• Home
  • »
  • News
  • »
  • explained
  • »
  • ನರೇಂದ್ರ ಮೋದಿ ಕ್ರೀಡಾಂಗಣ: ವಿಶ್ವದ ಅತೀ ದೊಡ್ಡ ಸ್ಟೇಡಿಯಂನ ವಿಶೇಷತೆಗಳೇನು?

ನರೇಂದ್ರ ಮೋದಿ ಕ್ರೀಡಾಂಗಣ: ವಿಶ್ವದ ಅತೀ ದೊಡ್ಡ ಸ್ಟೇಡಿಯಂನ ವಿಶೇಷತೆಗಳೇನು?

ಪಿಎಂ ಮೋದಿ

ಪಿಎಂ ಮೋದಿ

ಈ ಕ್ರೀಡಾಂಗಣದ ದೊಡ್ಡ ವೈಶಿಷ್ಟ್ಯವೆಂದರೆ ಅದರ ಸ್ತಂಭಗಳನ್ನು ಬಳಸದಿರುವುದು. ಇದರಿಂದ ಕ್ರೀಡಾಂಗಣದ ಯಾವುದೇ ಭಾಗದಲ್ಲಿ ಕುಳಿತು ಪ್ರೇಕ್ಷಕರು ಪಂದ್ಯವನ್ನು ಆನಂದಿಸಬಹುದು.

  • Share this:

    ಫೆಬ್ರವರಿ 24 ರಂದು ವಿಶ್ವದ ಅತಿದೊಡ್ಡ ಕ್ರಿಕೆಟ್ ಕ್ರೀಡಾಂಗಣ ಅಹಮದಾಬಾದ್‌ನ ಮೊಟೇರಾ ಸ್ಡೇಡಿಯಂ ಅನ್ನು ರಾಷ್ಟ್ರಪತಿ ರಾಮನಾಥ್ ಕೋವಿಂದ್ ಅವರು ಔಪಚಾರಿಕವಾಗಿ ಉದ್ಘಾಟಿಸಿದರು. ಇದರ ಬೆನ್ನಲ್ಲೇ ನೂತನ ಸ್ಟೇಡಿಯಂಗೆ ನರೇಂದ್ರ ಮೋದಿ ಕ್ರೀಡಾಂಗಣ ಎಂದು ಮರುನಾಮಕರಣ ಮಾಡಲಾಗಿದೆ ಘೋಷಿಸಲಾಗಿದೆ. ಈ ಹಿಂದೆ ಈ ಕ್ರೀಡಾಂಗಣವನ್ನು ಸರ್ದಾರ್ ಪಟೇಲ್ ಕ್ರಿಕೆಟ್ ಕ್ರೀಡಾಂಗಣ ಎಂದು ಕರೆಯಲಾಗುತ್ತಿತ್ತು. ಭಾರತ ಮತ್ತು ಇಂಗ್ಲೆಂಡ್ ನಡುವಿನ ನಾಲ್ಕು ಟೆಸ್ಟ್ ಸರಣಿಯ ಮೂರನೇ ಪಂದ್ಯ ಬುಧವಾರದಿಂದ ಇದೇ ಕ್ರೀಡಾಂಗಣದಲ್ಲಿ ಆರಂಭವಾಗಿದ್ದು, ಇದು ಭಾರತದಲ್ಲಿ ನಡೆಯುತ್ತಿರುವ ಎರಡನೇ ಪಿಂಕ್ ಬಾಲ್ ಟೆಸ್ಟ್ ಆಗಿದೆ.


    ವಿಶ್ವದ ಅತಿದೊಡ್ಡ ಮತ್ತು ಅತ್ಯಾಧುನಿಕ ಕ್ರಿಕೆಟ್ ಕ್ರೀಡಾಂಗಣ ಎಂದು ಗುರುತಿಸಿಕೊಂಡಿರುವ ಈ ಸ್ಟೇಡಿಯಂನಲ್ಲಿ ಲೋಕಾರ್ಪಣೆ ಕಾರ್ಯಕ್ರಮದಲ್ಲಿ ಗೃಹ ಸಚಿವ ಅಮಿತ್ ಶಾ ಮತ್ತು ಕ್ರೀಡಾ ಸಚಿವ ಕಿರೆನ್ ರಿಜಿಜು ಸೇರಿದಂತೆ ಹಲವಾರು ವಿಶೇಷ ಅತಿಥಿಗಳ ಭಾಗವಹಿಸಿದ್ದರು. 63 ಎಕರೆ ಪ್ರದೇಶದಲ್ಲಿ ವ್ಯಾಪಿಸಿರುವ ಈ ಕ್ರೀಡಾಂಗಣದಲ್ಲಿ ಒಂದು ಲಕ್ಷ 32 ಸಾವಿರ ಪ್ರೇಕ್ಷಕರು ಕುಳಿತುಕೊಳ್ಳಬಹುದು. ಈ ಮೂಲಕ ಅತೀ ದೊಡ್ಡ ಕ್ರಿಕೆಟ್ ಮೈದಾನ ಎಂಬ ಆಸ್ಟ್ರೇಲಿಯಾದ ಮೆಲ್ಬೋರ್ನ್ ಕ್ರಿಕೆಟ್ ಸ್ಡೇಡಿಯಂ (90 ಸಾವಿರ ಪ್ರೇಕ್ಷಕರು) ನ ದಾಖಲೆಯನ್ನು ನರೇಂದ್ರ ಮೋದಿ ಕ್ರೀಡಾಂಗಣ ಮುರಿದಿದೆ.


    ಈ ಮೈದಾನವನ್ನು ನವೀಕರಣಕ್ಕಾಗಿ 2015 ರಲ್ಲಿ ಮುಚ್ಚಲಾಗಿತ್ತು. ಅಲ್ಲದೆ ಈ ಕ್ರಿಕೆಟ್ ಮೈದಾನವು ಅನೇಕ ಅದ್ಭುತ ಕ್ಷಣಗಳಿಗೆ ಸಾಕ್ಷಿಯಾಗಿದೆ. ಅದರಲ್ಲಿ 1987 ರಲ್ಲಿ ಸುನೀಲ್ ಗವಾಸ್ಕರ್ 10000 ಟೆಸ್ಟ್ ರನ್ ಗಳಿಸಿದ್ದು, 1994 ರಲ್ಲಿ ಸರ್ ರಿಚರ್ಡ್ ಹೆಡ್ಲಿ ಅವರ ದಾಖಲೆಯನ್ನು ಮುರಿದು ಕಪಿಲ್ ದೇವ್ (432 ಟೆಸ್ಟ್ ವಿಕೆಟ್) ಅತಿ ಹೆಚ್ಚು ಟೆಸ್ಟ್ ವಿಕೆಟ್ ಪಡೆದಿರುವುದು ಇದೇ ಮೈದಾನದಲ್ಲಿ ಎಂಬುದು ವಿಶೇಷ. ಇನ್ನು ಮೆಲ್ಬೋರ್ನ್​ ಕ್ರಿಕೆಟ್ ಮೈದಾನವನ್ನು ವಿನ್ಯಾಸಗೊಳಿಸಿದ ಆಸ್ಟ್ರೇಲಿಯಾದ ಡಿಸೈನಿಂಗ್​ ಸಂಸ್ಥೆ ಪಾಪ್ಯುಲಸ್ ಸೇರಿದಂತೆ ಅನೇಕ ತಜ್ಞರು ಇದರ ನಿರ್ಮಾಣದಲ್ಲಿ ಭಾಗಿಯಾಗಿದ್ದರು.


    ಕಳೆದ ಕೆಲವು ದಿನಗಳಿಂದ ಇಲ್ಲಿ ಅಭ್ಯಾಸ ಮಾಡುತ್ತಿರುವ ಭಾರತ ಮತ್ತು ಇಂಗ್ಲೆಂಡ್‌ನ ಆಟಗಾರರು ಕೂಡ ಈ ಮೈದಾನದ ಸೌಕರ್ಯಗಳನ್ನು ಹಾಡಿ ಹೊಗಳಿದ್ದಾರೆ. ನಾಲ್ಕು ಡ್ರೆಸ್ಸಿಂಗ್ ಕೊಠಡಿಗಳನ್ನು ಹೊಂದಿರುವ ಏಕೈಕ ಕ್ರಿಕೆಟ್ ಕ್ರೀಡಾಂಗಣ ಇದಾಗಿದೆ. ಇದಲ್ಲದೆ ಕ್ರಿಕೆಟ್ ಅಕಾಡೆಮಿಗಳು, ಒಳಾಂಗಣ ಅಭ್ಯಾಸ ಪಿಚ್‌ಗಳು ಮತ್ತು ಎರಡು ಪ್ರತ್ಯೇಕ ಅಭ್ಯಾಸ ಮೈದಾನಗಳಿವೆ.


    ಡ್ರೆಸ್ಸಿಂಗ್ ಕೊಠಡಿಯಿಂದ ಮೈದಾನಕ್ಕೆ ತಲುಪಲು ಆಟಗಾರರು 80 ಮೆಟ್ಟಿಲುಗಳನ್ನು ಇಳಿಯಬೇಕು ಎಂದರೆ ಈ ಮೈದಾನವು ಎಷ್ಟು ದೊಡ್ಡದು ಎಂದು ಅಂದಾಜಿಸಬಹುದು. ಇದಲ್ಲದೆ ಪಿಚ್ ಬಳಿ ತಲುಪಲು ಕೂಡ ಸಾಕಷ್ಟು ಸಮಯ ತೆಗೆದುಕೊಳ್ಳುತ್ತಾರೆ. 800 ಕೋಟಿ ವೆಚ್ಚದಲ್ಲಿ ನಿರ್ಮಿಸಲಾದ ಈ ಕ್ರೀಡಾಂಗಣದಲ್ಲಿ ಎರಡು ಅಭ್ಯಾಸ ಮೈದಾನಗಳಿವೆ. ಇದಲ್ಲದೆ ಕೆಂಪು ಮತ್ತು ಕಪ್ಪು ಮಣ್ಣಿನಿಂದ ಮಾಡಿದ 11 ವಿಭಿನ್ನ ಪಿಚ್‌ಗಳಿವೆ.


    ಈ ಮೈದಾನವನ್ನು ಹಚ್ಚ ಹಸಿರಿನಿಂದ ಕಂಗೊಳಿಸುವಂತೆ ಮಾಡಲು ಬರ್ಮುಡಾ ಹುಲ್ಲನ್ನು ಆಸ್ಟ್ರೇಲಿಯಾದಿಂದ ಆಮದು ಮಾಡಲಾಗಿದೆ. ಕ್ರೀಡಾಂಗಣದ ಕ್ಲಬ್ ಹೌಸ್ 55 ಕೊಠಡಿಗಳನ್ನು ಹೊಂದಿದೆ. 3 ಡಿ ಮಿನಿ ಥಿಯೇಟರ್ ಸಹ ಇದರಲ್ಲಿದೆ. ಒಲಿಂಪಿಕ್ ಗಾತ್ರದ ಈಜುಕೊಳ, ಸೌರ ಸ್ನಾನದ ವ್ಯವಸ್ಥೆಯನ್ನೂ ಇಲ್ಲಿ ಮಾಡಲಾಗಿದೆ. ಇದಲ್ಲದೆ ಒಳಾಂಗಣ ಕ್ರೀಡೆಗಳಿಗಾಗಿ ಸ್ಕ್ವ್ಯಾಷ್ ಕೋರ್ಟ್‌ಗಳನ್ನು ಸಹ ಮಾಡಲಾಗಿದೆ. ಆಟಗಾರರಿಗಾಗಿ ವಿಶೇಷ ಡ್ರೆಸ್ಸಿಂಗ್ ಕೊಠಡಿ ಹಾಗೂ ಜಿಮ್​ಗಳನ್ನು ಸಿದ್ಧಪಡಿಸಲಾಗಿದೆ. ಹಾಗೆಯೇ ಕ್ರೀಡಾಂಗಣದಲ್ಲಿ 76 ಎಸಿ ಕಾರ್ಪೊರೇಟ್ ಪೆಟ್ಟಿಗೆಗಳಿವೆ.


    ಈ ಕ್ರೀಡಾಂಗಣದ ದೊಡ್ಡ ವೈಶಿಷ್ಟ್ಯವೆಂದರೆ ಅದರ ಸ್ತಂಭಗಳನ್ನು ಬಳಸದಿರುವುದು. ಇದರಿಂದ ಕ್ರೀಡಾಂಗಣದ ಯಾವುದೇ ಭಾಗದಲ್ಲಿ ಕುಳಿತು ಪ್ರೇಕ್ಷಕರು ಪಂದ್ಯವನ್ನು ಆನಂದಿಸಬಹುದು. ಹಳೆಯ ಕ್ರೀಡಾಂಗಣದ ಫ್ಲಡ್ ಲೈಟ್ ಟವರ್‌ನ ಸ್ಥಳದಲ್ಲಿ ಹೊಸದಾಗಿ ನಿರ್ಮಿಸಲಾದ ಕ್ರೀಡಾಂಗಣದಲ್ಲಿ ಎಲ್‌ಇಡಿ ದೀಪಗಳನ್ನು ಅಳವಡಿಸಲಾಗಿದ್ದು, ನೆರಳಿನ ಸಮಸ್ಯೆ ತಲೆದೂರುವುದಿಲ್ಲ. ಹಾಗೆಯೇ ಒಳಚರಂಡಿ ವ್ಯವಸ್ಥೆಯು ವಿಶ್ವ ದರ್ಜೆಯದ್ದಾಗಿದೆ. ಈ ಕಾರಣಕ್ಕಾಗಿ, ಮಳೆಯ ನಂತರ ಅರ್ಧ ಘಂಟೆಯೊಳಗೆ ಕ್ರೀಡಾಂಗಣವನ್ನು ಪಂದ್ಯಕ್ಕೆ ಸಿದ್ಧಪಡಿಸಬಹುದು. ಕ್ರೀಡಾಂಗಣದ ಬಳಿ 3 ಸಾವಿರ ಕಾರುಗಳು ಮತ್ತು 10 ಸಾವಿರ ದ್ವಿಚಕ್ರ ವಾಹನಗಳನ್ನು ಪಾರ್ಕಿಂಗ್ ಮಾಡಬಹುದು. ಒಟ್ಟಿನಲ್ಲಿ ವಿಶ್ವದ ಅತೀ ದೊಡ್ಡ ಕ್ರೀಡಾಂಗಣವು ಇದೀಗ ಅಂತಾರಾಷ್ಟ್ರೀಯ ಪಂದ್ಯವೊಂದಕ್ಕೆ ಸಾಕ್ಷಿಯಾಗಿ ಇಡೀ ವಿಶ್ವದ ಗಮನ ಸೆಳೆಯುತ್ತಿದೆ.

    Published by:zahir
    First published: