Explainer: ಫೇಸ್‌ಬುಕ್ ಡೇಟಾ ಸೋರಿಕೆ ಬಗ್ಗೆ ನೀವು ತಿಳಿದುಕೊಳ್ಳಬೇಕಾದ ಎಲ್ಲ ಮಾಹಿತಿ ಇಲ್ಲಿದೆ

2019 ರ ಫೇಸ್‌ಬುಕ್‌ನ ಹ್ಯಾಕ್‌ನ ಡೇಟಾವನ್ನು ಇತ್ತೀಚಿನ ದಿನಗಳಲ್ಲಿ ಸಾರ್ವಜನಿಕವಾಗಿ ಪ್ರಕಟಿಸಲಾಗಿದ್ದು, ಅರ್ಧ ಶತಕೋಟಿಗೂ ಹೆಚ್ಚು ಜನರ ಫೋನ್ ಸಂಖ್ಯೆಗಳು ಮತ್ತು ವೈಯಕ್ತಿಕ ಮಾಹಿತಿಯನ್ನು ಬಹಿರಂಗಪಡಿಸಲಾಗಿದೆ. ಫೇಸ್‌ಬುಕ್ ಪ್ಲ್ಯಾಟ್‌ಫಾರ್ಮ್‌ಗಳ ದುರ್ಬಲತೆಯಿಂದ ಡೇಟಾ ಬಂದಿದ್ದು, ಅದನ್ನು ಈಗಾಗಲೇ ಸರಿಪಡಿಸಲಾಗಿದೆ ಎಂದು ಭದ್ರತಾ ತಜ್ಞರು ಹೇಳುತ್ತಾರೆ. ಆದರೆ, ವಂಚಕರು ಅಥವಾ ಸ್ಕ್ಯಾಮರ್‌ಗಳು ಮಾಹಿತಿಯನ್ನು ಸ್ಪ್ಯಾಮ್ ಇಮೇಲ್ ಮತ್ತು ರೋಬೋಕಾಲಿಂಗ್‌ನಂತಹ ದುರುದ್ದೇಶಪೂರಿತ ಉದ್ದೇಶಗಳಿಗಾಗಿ ಬಳಸಬಹುದು ಎಂದು ಹೇಳುತ್ತಾರೆ. ಡೇಟಾ ಸೋರಿಕೆ ಕುರಿತು ಹೆಚ್ಚಿನ ವಿವರಗಳನ್ನು ಯುರೋಪಿನ ನಿಯಂತ್ರಕರು ಫೇಸ್‌ಬುಕ್‌ಗೆ ಕೇಳಿದ್ದಾರೆ. ಡೇಟಾ ಸೋರಿಕೆ ತನ್ನ ವೇದಿಕೆಯಲ್ಲಿ ಅಂತಹವರ ಬಗ್ಗೆ ಪೊಲೀಸ್ ಕ್ರಮಗಳ ಅಗತ್ಯವನ್ನು ಪ್ರತಿಬಿಂಬಿಸುತ್ತದೆ ಎಂದು ಫೇಸ್‌ಬುಕ್‌ ಮಂಗಳವಾರ ಬ್ಲಾಗ್ ಪೋಸ್ಟ್‌ನಲ್ಲಿ ತಿಳಿಸಿದೆ.

ನೀವು ತಿಳಿದುಕೊಳ್ಳಬೇಕಾದದ್ದು ಇಲ್ಲಿದೆ..

ಈ ಹ್ಯಾಕ್‌ನಲ್ಲಿ ಬಳಕೆದಾರರ ಖಾಸಗಿ ಮಾಹಿತಿ ಸೋರಿಕೆಯಾಗಿರುವ ಬಗ್ಗೆ ನೋಟಿಫಿಕೇಷನ್‌ ಕಳಿಸಲಾಗುತ್ತದೆಯೇ ಎಂಬ ಬಗ್ಗೆ ಫೇಸ್‌ಬುಕ್ ಪ್ರತಿಕ್ರಿಯಿಸಿಲ್ಲ. ಆದರೆ ಕೆಲವು ಸೈಬರ್‌ ಸೆಕ್ಯುರಿಟಿ ತಜ್ಞರು ಸೈಟ್‌ಗಳನ್ನು ರಚಿಸಿದ್ದು, ಜನರು ತಮ್ಮ ಮಾಹಿತಿಯು ಡೇಟಾ ಸೋರಿಕೆಯಲ್ಲಿ ಇದೆಯೇ ಎಂದು ನೋಡಲು ಅನುಮತಿಸುತ್ತದೆ.

ಅಂತಹ ಒಂದು ಸೈಟ್ haveibeenpwned.com ಆಗಿದೆ, ಅಲ್ಲಿ ನೀವು ನಿಮ್ಮ ಫೋನ್ ಸಂಖ್ಯೆ ಅಥವಾ ಇಮೇಲ್ ವಿಳಾಸವನ್ನು ನಮೂದಿಸಬಹುದು ಮತ್ತು ಫಲಿತಾಂಶವನ್ನು ನೋಡಬಹುದು. ವಿಭಿನ್ನ ಡೇಟಾ ಉಲ್ಲಂಘನೆಗಳಲ್ಲಿ ಅವರ ಖಾಸಗಿ ಮಾಹಿತಿಯನ್ನು ಇತರರು ಪಡೆದುಕೊಂಡಿದ್ದಾರೆಯೇ ಎಂದು ಪರಿಶೀಲಿಸಲು ಅನುವು ಮಾಡಿಕೊಡುವ ವೆಬ್‌ಸೈಟ್ ಅನ್ನು ಆಸ್ಟ್ರೇಲಿಯಾದ ವೆಬ್-ಸೆಕ್ಯುರಿಟಿ ಕನ್ಸಲ್ಟೆಂಟ್ ಟ್ರಾಯ್ ಹಂಟ್ ರಚಿಸಿದ್ದಾರೆ.

ಜನರ ಮಾಹಿತಿಯನ್ನು ಫೇಸ್‌ಬುಕ್‌ ಪ್ಲಾಟ್‌ಫಾರ್ಮ್‌ನಿಂದ ಸೋರಿಕೆ ಮಾಡಲಾಗಿದೆಯೇ ಎಂದು ಗುರುತಿಸಲು ಸಹಾಯ ಮಾಡುವ ಮೂರನೇ ವ್ಯಕ್ತಿಯ ಸೈಟ್‌ಗಳ ವಿಶ್ವಾಸಾರ್ಹತೆಯ ಕುರಿತು ಫೇಸ್‌ಬುಕ್ ತಕ್ಷಣ ಪ್ರತಿಕ್ರಿಯಿಸಲಿಲ್ಲ.

ಯಾವ ಡೇಟಾ ಸೋರಿಕೆಯಾಗಿದೆ..?

ಫೋನ್ ನಂಬರ್‌, ಇಮೇಲ್ ವಿಳಾಸ, ಜನ್ಮದಿನ, ಹೋಂ ಟೌನ್‌, ರಿಲೇಷನ್‌ಶಿಪ್‌ ಸ್ಟೇಟಸ್‌ ಇತ್ಯಾದಿ ಮಾಹಿತಿ ಪ್ರಪಂಚದಾದ್ಯಂತದ ಹಲವಾರು ದೇಶಗಳ ಬಳಕೆದಾರರಿಂದ ಸೋರಿಕೆಯಾಗಿದೆ.

ನನ್ನ ಅಕೌಂಟ್‌ ಅನ್ನು ರಕ್ಷಿಸಲು ನಾನು ಏನು ಮಾಡಬೇಕು..?

ಫೇಸ್‌ಬುಕ್‌ಗೆ ಲಾಗ್ ಇನ್ ಮಾಡಲು ಎರಡು ಅಂಶಗಳ ದೃಢೀಕರಣವನ್ನು ಸಕ್ರಿಯಗೊಳಿಸುವುದು ಉತ್ತಮ ಅಭ್ಯಾಸ. ಸಕ್ರಿಯಗೊಳಿಸಿದ್ದರೆ, ಪರಿಚಯವಿಲ್ಲದ ಬ್ರೌಸರ್ ಅಥವಾ ಮೊಬೈಲ್ ಸಾಧನದಿಂದ ಯಾರಾದರೂ ಫೇಸ್‌ಬುಕ್ ಪ್ರವೇಶಿಸಲು ಪ್ರಯತ್ನಿಸಿದಾಗ ಪ್ರತಿ ಬಾರಿ ವಿಶೇಷ ಲಾಗಿನ್ ಕೋಡ್ ನಮೂದಿಸಲು ಅಥವಾ ನಿಮ್ಮ ಲಾಗಿನ್ ಪ್ರಯತ್ನವನ್ನು ಖಚಿತಪಡಿಸಲು ನಿಮ್ಮನ್ನು ಕೇಳಲಾಗುತ್ತದೆ.

ಫೇಸ್‌ಬುಕ್ ತನ್ನ ವೆಬ್‌ಸೈಟ್‌ನಲ್ಲಿ ಎರಡು ಅಂಶಗಳ ದೃಢೀಕರಣವನ್ನು ಹೇಗೆ ಬಳಸುವುದು ಎಂಬುದರ ಕುರಿತು ಸೂಚನೆಗಳನ್ನು ನೀಡುತ್ತದೆ. ಬಳಕೆದಾರರು ಸಾರ್ವಜನಿಕವಾಗಿ ಹಂಚಿಕೊಳ್ಳಲು ಬಯಸುವ ಸಂಗತಿಗಳನ್ನು ಹೊಂದಿಸುವುದನ್ನು ಖಚಿತಪಡಿಸಿಕೊಳ್ಳಲು ಬಳಕೆದಾರರು ತಮ್ಮ ಸೆಟ್ಟಿಂಗ್‌ಗಳನ್ನು ನಿಯಮಿತವಾಗಿ ಪರಿಶೀಲಿಸಬೇಕು ಎಂದು ಕಂಪನಿ ಹೇಳಿದೆ.

ಫೇಸ್‌ಬುಕ್‌ನಿಂದ ಡೇಟಾ ಹೇಗೆ ಸೋರಿಕೆಯಾಯಿತು..?

ಕಂಪನಿಯ ಸಂಪರ್ಕ ಆಮದು ಕಾರ್ಯದಲ್ಲಿನ ದೌರ್ಬಲ್ಯದ ಪರಿಣಾಮವೇ ಈ ದುರ್ಬಲತೆ ಎಂದು ಫೇಸ್‌ಬುಕ್ ಹೇಳಿದೆ. ಅಲ್ಲದೆ, ಈ ಸಮಸ್ಯೆಯನ್ನು 2019 ರ ಆಗಸ್ಟ್‌ನಲ್ಲಿ ಗುರುತಿಸಿ ಸರಿಪಡಿಸಲಾಗಿದೆ ಎಂದು ಹೇಳಿದೆ.

ಈ ಸಮಸ್ಯೆ ಪರಿಹರಿಸಲು ಫೇಸ್‌ಬುಕ್ ಮತ್ತು ಇನ್‌ಸ್ಟಾಗ್ರಾಮ್‌ನಾದ್ಯಂತ ಜನರು ತಮ್ಮ ಫೋನ್ ಸಂಖ್ಯೆಗಳ ಮೂಲಕ ಬಳಕೆದಾರರನ್ನು ಹುಡುಕಲು ಸಾಧ್ಯವಾಗದಂತೆ ಫೇಸ್‌ಬುಕ್ ನಿರ್ಬಂಧಿಸಿದೆ. ನಿರ್ದಿಷ್ಟ ಬಳಕೆದಾರರೊಂದಿಗೆ ಯಾವ ಫೋನ್ ಸಂಖ್ಯೆಗಳನ್ನು ಸಂಯೋಜಿಸಲಾಗಿದೆ ಎಂಬುದನ್ನು ಸಂಪರ್ಕಿಸಲು ಸಾಫ್ಟ್‌ವೇರ್ ಅನ್ನು 2019 ರಲ್ಲಿ ಕಂಪನಿಯು ಕಂಡುಕೊಂಡಿದೆ. ಈ ತಂತ್ರವು ಬಳಕೆದಾರರ ಪ್ರೊಫೈಲ್‌ಗಳ ಗುಂಪನ್ನು ಪ್ರಶ್ನಿಸಲು ಮತ್ತು ಅವರ ಸಾರ್ವಜನಿಕ ಪ್ರೊಫೈಲ್‌ಗಳಿಂದ ಕೆಲವು ಮಾಹಿತಿಯನ್ನು ಪಡೆಯಲು ಸಹ ಶಕ್ತಗೊಳಿಸುತ್ತದೆ.

ಫೇಸ್‌ಬುಕ್ ಮಾಡಿದ ಬದಲಾವಣೆಗಳಿಗೆ ಮೊದಲು ಡೇಟಾವನ್ನು ಪ್ಲಾಟ್‌ಫಾರ್ಮ್‌ನಿಂದ ಎತ್ತಿಕೊಳ್ಳಲಾಯಿತು ಮತ್ತು ನಂತರ ಅದನ್ನು ಹ್ಯಾಕರ್‌ಗಳು ಮಾರಾಟ ಮಾಡಿದರು.

ಡೇಟಾ ಏನಾಯಿತು..?

ಡೇಟಾ ಸಿಕ್ಕ ಕೂಡಲೇ ಹ್ಯಾಕರ್‌ಗಳು ಆನ್‌ಲೈನ್‌ನಲ್ಲಿ ಬಿಡ್‌ದಾರರಿಗೆ ಮಾರಾಟ ಮಾಡಲು ಪ್ರಾರಂಭಿಸಿದರು. ಇಸ್ರೇಲಿ ಸೈಬರ್‌ ಸೆಕ್ಯುರಿಟಿ ಸಂಸ್ಥೆ ಹಡ್ಸನ್ ರಾಕ್‌ನ ಮುಖ್ಯ ತಂತ್ರಜ್ಞಾನ ಅಧಿಕಾರಿ ಅಲೋನ್ ಗೋಲ್, ಇದನ್ನು ಆರಂಭದಲ್ಲಿ ಹತ್ತು ಸಾವಿರ ಡಾಲರ್‌ಗಳಿಗೆ ಮಾರಾಟ ಮಾಡಲಾಗುತ್ತಿತ್ತು ಮತ್ತು ಇತ್ತೀಚೆಗೆ raidforums.com ನಂತಹ ಸೈಟ್‌ಗಳಲ್ಲಿ ಉಚಿತವಾಗಿ ಲಭ್ಯವಾಗುವವರೆಗೆ ಬೆಲೆ ಇಳಿಯುತ್ತಲೇ ಇತ್ತು.

ಸಾಕಷ್ಟು ಸಮಯ ಆ ಡೇಟಾ ಸರ್ಕ್ಯುಲೇಟ್‌ ಆದ ನಂತರ ಹ್ಯಾಕರ್‌ಗಳು ಡೇಟಾವನ್ನು ಉಚಿತವಾಗಿ ಬಿಡುಗಡೆ ಮಾಡುತ್ತಾರೆ ಎಂದು ಬಾಲ್ಟಿಮೋರ್ ಮೂಲದ ಸೈಬರ್‌ ಸೆಕ್ಯುರಿಟಿ ಕಂಪನಿಯ ಝ್ಯಾಕ್‌ ಅಲೆನ್ ಹೇಳಿದ್ದಾರೆ.

ಡೇಟಾದೊಂದಿಗೆ ಹ್ಯಾಕರ್‌ಗಳು ಏನು ಮಾಡಬಹುದು..?

ಸುಮಾರು 533 ಮಿಲಿಯನ್ ಅಕೌಂಟ್‌ಗಳ ಮಾಹಿತಿ ಸೋರಿಕೆಯಾಗಿದೆ. ಹೋಲ್ಡ್ ಸೆಕ್ಯುರಿಟಿ ಎಲ್ಎಲ್‌ಸಿಯ ಆದರೆ ಅದರಲ್ಲಿ ಹೆಚ್ಚಿನವು ಸೆಮಿ ಪಬ್ಲಿಕ್ ಮಾಹಿತಿಯಾಗಿದ್ದು, ಅದನ್ನು ಹೇಗಾದರೂ ಫೇಸ್‌ಬುಕ್ ಅಕೌಂಟ್‌ಗಳಲ್ಲಿ ಪ್ರದರ್ಶಿಸಲಾಗುತ್ತದೆ. ಹ್ಯಾಕ್ ಮಾಡಿದ ಡೇಟಾವು ಪಾಸ್‌ವರ್ಡ್‌ಗಳು, ಕ್ರೆಡಿಟ್-ಕಾರ್ಡ್ ಮಾಹಿತಿ ಅಥವಾ ಸಾಮಾಜಿಕ-ಭದ್ರತೆ ಸಂಖ್ಯೆಗಳಂತಹ ಹೆಚ್ಚು ಸೂಕ್ಷ್ಮ ಮಾಹಿತಿಯನ್ನು ಒಳಗೊಂಡಿರುವುದಿಲ್ಲ.

ಆದರೆ, ಇದನ್ನು ರೋಬೋಕಾಲ್‌ಗಳು ಮತ್ತು ಸ್ಪ್ಯಾಮ್ ಇಮೇಲ್‌ಗಳಂತಹ “ಸಾಮಾಜಿಕ ದುರುಪಯೋಗ” ಕ್ಕೆ ಮಾಹಿತಿಯನ್ನು ಬಳಸಬಹುದು ಎಂದು ತಜ್ಞರು ಹೇಳಿದರು. ಉಲ್ಲಂಘನೆಯಾಗಿರುವ ಡೇಟಾವನ್ನು ದುರುದ್ದೇಶಪೂರಿತ ಪಠ್ಯ ಸಂದೇಶಗಳನ್ನು ಕಳುಹಿಸಲು ಸ್ಕ್ಯಾಮರ್‌ಗಳು ಬಳಸಿಕೊಳ್ಳಬಹುದು. ಮತ್ತು ಸಿಮ್ ಸ್ವ್ಯಾಪಿಂಗ್‌ ತಂತ್ರವನ್ನು ಬಳಸಿಕೊಂಡು ಕೆಲವು ಫೋನ್ ಸಂಖ್ಯೆಗಳನ್ನು ಸ್ವಾಧೀನಪಡಿಸಿಕೊಳ್ಳಲು ಪ್ರಯತ್ನಿಸಬಹುದು. ಅಲ್ಲಿ ಅವರು ಹ್ಯಾಕ್‌ನಲ್ಲಿ ಕಳವು ಮಾಡಿದ ವೈಯಕ್ತಿಕ ಮಾಹಿತಿಯನ್ನು ಮತ್ತೊಂದು ಸಾಧನದ ಫೋನ್‌ ಸ್ವ್ಯಾಪ್‌ ಮಾಡಲು ನಿಮ್ಮ ನಂಬರ್‌ ಬಳಸಬಹುದು ಎಂದೂ ಅಲೆನ್‌ ಹೇಳಿದ್ದಾರೆ.

ಈ ಹ್ಯಾಕ್ ಏಕೆ ಮುಖ್ಯವಾಗಿದೆ..?

ಫೇಸ್‌ಬುಕ್ ತನ್ನ 2.8 ಬಿಲಿಯನ್ ಬಳಕೆದಾರರ ಬಗ್ಗೆ ವಿಶ್ವದಾದ್ಯಂತ ಅಪಾರ ಪ್ರಮಾಣದ ಮಾಹಿತಿಯನ್ನು ಹೊಂದಿದೆ, ಮತ್ತು ಹ್ಯಾಕರ್‌ಗಳು ಆ ಡೇಟಾವನ್ನು ಇತರ ಉದ್ದೇಶಗಳಿಗಾಗಿ ಬಳಕೆ ಮಾಡಲು ಪ್ರಯತ್ನಿಸುತ್ತಾರೆ ಎಂಬ ಎಚ್ಚರಿಕೆಯ ಕರೆಗಂಟೆ ಇದು.

"ಈ ರೀತಿಯ ಡೇಟಾ ಸೆಟ್‌ಗಳನ್ನು ಮರುಬಳಕೆ ಮಾಡುವುದನ್ನು ಅಥವಾ ಹೊಸದನ್ನು ಕಾಣದಂತೆ ನಾವು ಯಾವಾಗಲೂ ತಡೆಯಲು ಸಾಧ್ಯವಿಲ್ಲವಾದರೂ, ಈ ಕೆಲಸದ ಮೇಲೆ ನಾವು ಕೇಂದ್ರೀಕೃತ ತಂಡವನ್ನು ಹೊಂದಿದ್ದೇವೆ" ಎಂದು ಫೇಸ್‌ಬುಕ್ ತನ್ನ ಏಪ್ರಿಲ್ 6 ರ ಬ್ಲಾಗ್ ಪೋಸ್ಟ್‌ನಲ್ಲಿ ತಿಳಿಸಿದೆ.

ಟ್ರಂಪ್‌ರ 2016 ರ ಅಧ್ಯಕ್ಷೀಯ ಅಭಿಯಾನಕ್ಕೆ ಸಂಬಂಧ ಹೊಂದಿರುವ ದತ್ತಾಂಶ ಸಂಸ್ಥೆಯಾದ ಕೇಂಬ್ರಿಡ್ಜ್ ಅನಾಲಿಟಿಕಾ, ಹತ್ತಾರು ಮಿಲಿಯನ್‌ ಫೇಸ್‌ಬುಕ್ ಬಳಕೆದಾರರ ಡೇಟಾವನ್ನು ಪಡೆದುಕೊಂಡಿತ್ತು. ಈ ವಿಚಾರವಾಗಿ ಫೇಸ್‌ಬುಕ್ ತನ್ನ ಡೇಟಾವನ್ನು ಹೇಗೆ ಪ್ರವೇಶಿಸಲಾಗಿದೆ ಮತ್ತು ಬಳಕೆ ಮಾಡಿಕೊಳ್ಳಲಾಗಿದೆ ಎಂಬ ವಿಚಾರದಲ್ಲಿ ಈ ಹಿಂದೆ ವಿವಾದವನ್ನು ಎದುರಿಸಿತ್ತು.

ಕೇಂಬ್ರಿಡ್ಜ್ ಅನಾಲಿಟಿಕಾದೊಂದಿಗೆ ಸಂಬಂಧ ಮತ್ತು ಬಳಕೆದಾರರ ಡೇಟಾವನ್ನು ಭದ್ರಪಡಿಸುವಲ್ಲಿನ ಇತರ ಸಮಸ್ಯೆಗಳ ಪರಿಣಾಮವಾಗಿ ಕಂಪನಿಯು 2019 ರಲ್ಲಿ ಫೆಡರಲ್ ಟ್ರೇಡ್ ಕಮಿಷನ್ ವಿಧಿಸಿದ್ದ 5 ಬಿಲಿಯನ್ ಡಾಲರ್‌ ದಂಡವನ್ನು ಪಾವತಿಸಿತು. ಇದು ಡೇಟಾ-ಗೌಪ್ಯತೆ ವಿಷಯಗಳ ಕುರಿತು ಇತರ ನ್ಯಾಯವ್ಯಾಪ್ತಿಯಲ್ಲಿ ನಿಯಂತ್ರಕ ಪರಿಶೀಲನೆಯನ್ನು ಎದುರಿಸಿದೆ.

ಯುರೋಪಿಯನ್ ಯೂನಿಯನ್ ಕೇಂದ್ರ ಕಚೇರಿ ಡಬ್ಲಿನ್‌ನಲ್ಲಿರುವ ಕಾರಣ ಫೇಸ್‌ಬುಕ್‌ನ ಮೇಲ್ವಿಚಾರಣೆ ನಡೆಸುತ್ತಿರುವ ಐರ್ಲೆಂಡ್‌ನ ಡೇಟಾ ಪ್ರೊಟೆಕ್ಷನ್ ಕಮಿಷನ್, ಏಪ್ರಿಲ್ 6 ರಂದು ಹೇಳಿಕೆ ನೀಡಿದ್ದು, ಇತ್ತೀಚಿನ ಡೇಟಾ ಸೋರಿಕೆಗೆ ಸಂಬಂಧಿಸಿದಂತೆ ಫೇಸ್‌ಬುಕ್ ಅನ್ನು ಸಂಪರ್ಕಿಸಿದೆ ಎಂದು ಏಪ್ರಿಲ್ 6 ರಂದು ಹೇಳಿಕೆ ನೀಡಿದೆ. 533 ಮಿಲಿಯನ್ ಅಕೌಂಟ್‌ಗಳ ಮಾಹಿತಿ ಹ್ಯಾಕ್‌ ಆಗಿರುವ ಪೈಕಿ ಯುರೋಪಿಯನ್ ಒಕ್ಕೂಟಕ್ಕೆ ಸೇರಿದ ಹಲವರ ಮಾಹಿತಿ ಸೋರಿಕೆಯಾಗಿರುವ ಹಿನ್ನೆಲೆ ಅವರನ್ನು ಸಂಪರ್ಕಿಸಿದೆ.

ಮೂರನೇ ವ್ಯಕ್ತಿಗಳು ಪ್ರವೇಶವನ್ನು ಪಡೆಯಲು ಪ್ರಯತ್ನಿಸಿದರೆ ಫೋನ್ ಸಂಖ್ಯೆ ಅಥವಾ ಇಮೇಲ್ ವಿಳಾಸವನ್ನು ಬಳಸಿಕೊಂಡು ದೃಢೀಕರಣದ ಅಗತ್ಯವಿರುವ ಯಾವುದೇ ಸೇವೆಗಳ ಬಗ್ಗೆ ಜನರು ಜಾಗರೂಕರಾಗಿರಬೇಕು ಎಂದು ಐರ್ಲೆಂಡ್‌ನ ಡೇಟಾ ಪ್ರೊಟೆಕ್ಷನ್ ಕಮಿಷನ್ ಶಿಫಾರಸು ಮಾಡಿದೆ.