ಈ ವಾರ ಯಾವ ಸಿನಿಮಾ ನೋಡಬಹುದು? ಆ ಗೊಂದಲಕ್ಕೆ ಇಲ್ಲಿದೆ ಪರಿಹಾರ

ಬೆಂಗಳೂರು (ಡಿ.06): ಈ ವಾರಾಂತ್ಯದಲ್ಲಿ ಯಾವುದಾದರೂ ಸಿನಿಮಾ ನೋಡಬೇಕು ಎಂದು ಪ್ಲ್ಯಾನ್​ ಮಾಡಿದ್ದೀರಾ? ಯಾವ ಸಿನಿಮಾ ನೋಡಬೇಕು ಎನ್ನುವ ಗೊಂದಲದಲ್ಲಿದ್ದೀರಾ? ಹಾಗಾದರೆ ಈ ಸುದ್ದಿ ಓದಿ. ಈ ವಾರ ಯಾವ ಯಾವ ಚಿತ್ರಗಳು ತೆರೆಗೆ ಬರುತ್ತಿವೆ. ಅದರ ಹಿನ್ನೆಲೆ ಏನು ಎಂಬುದರ ಮಾಹಿತಿ ಇಲ್ಲಿದೆ.

ಗಣೇಶ್​​ಗೆ ಲಕ್ಕಿ ಡಿಸೆಂಬರ್​:
‘ಗೋಲ್ಡನ್​ ಸ್ಟಾರ್​’ ಗಣೇಶ್​ ವೃತ್ತಿ ಬದುಕಿಗೆ ತಿರುವು ನೀಡಿದ ಚಿತ್ರ ‘ಮುಂಗಾರುಮಳೆ’. ಈ ಸಿನಿಮಾ ತೆರೆಕಂಡಿದ್ದು ಡಿಸೆಂಬರ್​ನಲ್ಲಿ. ಹಾಗಾಗಿ ಡಿಸೆಂಬರ್​ ಗಣೇಶ್​ ಪಾಲಿಗೆ ಲಕ್ಕಿ. ಈಗ ಅವರ ಅಭಿನಯದ ‘ಆರೆಂಜ್​’ ಚಿತ್ರ ಕೂಡ ಇದೇ ತಿಂಗಳಲ್ಲೇ ತೆರೆಕಾಣುತ್ತಿದೆ. ಈ ಡಿಸೆಂಬರ್ ಗಣೇಶ್​ ಪಾಲಿಗೆ ಲಕ್ಕಿಯೇ ಎಂಬುದನ್ನು ಪ್ರೇಕ್ಷಕರೇ ಹೇಳಬೇಕು.

ಪ್ರಶಾಂತ್​ ರಾಜ್​ ಕಥೆ, ಚಿತ್ರಕಥೆ ಬರೆದು 'ಆರೆಂಜ್​' ನಿರ್ದೇಶಿಸಿದ್ದಾರೆ. ‘ರಾಜ್​ಕುಮಾರ್​’ ಚಿತ್ರದ ಮೂಲಕ ಕನ್ನಡಕ್ಕೆ ಬಂದಿದ್ದ ಪ್ರಿಯಾ ಆನಂದ್​ ಈ ಚಿತ್ರದ ಮೂಲಕ ಮತ್ತೆ ಚಂದನವನದ ಕದ ತಟ್ಟಿದ್ದಾರೆ. ಸಂತೋಷ್​ ರೈ ಪತಾಜೆ ಛಾಯಾಗ್ರಹಣ, ಎಸ್.ಎಸ್​.ತಮನ್​ ಸಂಗೀತ ನಿರ್ದೇಶನ ಮಾಡಿದ್ದಾರೆ. ಸಾಧುಕೋಕಿಲ, ರಂಗಾಯಣ ರಘು ಮೊದಲಾದವರು ಚಿತ್ರದಲ್ಲಿ ಬಣ್ಣ ಹಚ್ಚಿದ್ದಾರೆ.

ಪರಭಾಷೆಗೆ ಕಾಲಿಟ್ಟ ‘ಡಾಲಿ’ ಧನಂಜಯ್​:
‘ಟಗರು’ ಚಿತ್ರ ತೆರೆಕಂಡ ನಂತರದಲ್ಲಿ ‘ಡಾಲಿ’ ಧನಂಜಯ್​ ವೃತ್ತಿ ಬದುಕಿಗೆ ಮೈಲೇಜ್​ ಸಿಕ್ಕಿತ್ತು. ಈಗ ಅವರು ‘ಭೈರವ ಗೀತ’ ಚಿತ್ರದ ಮೂಲಕ ಮತ್ತೆ ಪ್ರೇಕ್ಷಕರ ಎದುರು ಬರುತ್ತಿದ್ದಾರೆ. ಈ ಚಿತ್ರದಲ್ಲಿ ಜಾತಿಜಾತಿಗಳ ನಡುವೆ ನಡೆವ ಘರ್ಷಣೆ ಮೊದಲಾದ ವಿಚಾರಗಳ ಬಗ್ಗೆ ಹೇಳಲಾಗುತ್ತಿದೆ ಎಂಬುದಕ್ಕೆ ಟ್ರೇಲರ್​ನಲ್ಲಿ ಸಾಕ್ಷ್ಯ ಸಿಕ್ಕಿದೆ.

ಈ ಚಿತ್ರ ಕೇವಲ ಕನ್ನಡ ಮಾತ್ರವಲ್ಲದೆ, ತಮಿಳು, ತೆಲುಗು ಭಾಷೆಗಳಲ್ಲೂ ತೆರೆಕಾಣುತ್ತಿದೆ. ಸಿದ್ಧಾರ್ಥ್​ ತಟೋಲು ಚಿತ್ರಕ್ಕೆ ಆ್ಯಕ್ಷನ್​-ಕಟ್​ ಹೇಳಿದ್ದಾರೆ. ಇವರು ರಾಮ್​ ಗೋಪಾಲ್​ ವರ್ಮಾ ಅವರ ಶಿಷ್ಯ. ಈ ಚಿತ್ರದಲ್ಲಿ ಐರಾ ಮೋರ್​ ನಾಯಕಿಯಾಗಿ ನಟಿಸಿದ್ದಾರೆ.

ಇದನ್ನೂ ಓದಿ: ಗಣರಾಜ್ಯೋತ್ಸವಕ್ಕೆ ‘ನಟಸಾರ್ವಭೌಮ’ vs ‘ಸೀತಾರಾಮ ಕಲ್ಯಾಣ’?; ಚಂದನವನದಲ್ಲಿ ಬಿಗ್​ ಫೈಟ್​

ಹೊಸಬರ ‘ಚರಂತಿ’:
ಮಹೇಶ್​ ರಾವಲ್​ ನಿರ್ದೇಶನವಿರುವ ‘ಚರಂತಿ’ ಚಿತ್ರ ಹೊಸಬರ ಪ್ರಯತ್ನ. ಈ ಚಿತ್ರಕ್ಕೆ ಅವಿನಾಶ್​​ ಬಿ. ಸಂಗೀತ ನಿರ್ದೇಶನ, ಶಿವಾಜಿ ಛಾಯಾಗ್ರಹಣ, ವೆಂಕಿ ಸಂಕಲನ ಇದೆ. ಮಹೇಶ್​ ರಾವಲ್​, ಸಚಿನ್​ ಪುರೋಹಿತ್​ ಮೊದಲಾದವರು ಚಿತ್ರದಲ್ಲಿ ಅಭಿನಯಿಸಿದ್ದಾರೆ.

ಈ ವಾರ ‘ಮಟಾಶ್​’:
ಎಸ್​.ಡಿ. ಅರವಿಂದ್​ ನಿರ್ದೇಶನದ ‘ಮಟಾಶ್​’ ಚಿತ್ರಕ್ಕೆ ರಾನಿ ಅಬ್ರಾಹಿಂ ಛಾಯಾಗ್ರಹಣವಿದೆ. ಎಸ್​.ಡಿ. ಅರವಿಂದ್​​ ಸಂಗೀತ ನಿರ್ದೇಶನ ಈ ಚಿತ್ರಕ್ಕಿದೆ. ಸಮರ್ಥ್​ ನರಸಿಂಹ ರಾಜು, ಐಶ್ವರ್ಯ ಶಿಂಡೊಗಿ ಮೊದಲಾದವರು ಈ ಚಿತ್ರದಲ್ಲಿ ಅಭಿನಯಿಸಿದ್ದಾರೆ.  

‘ಮುಂದಿನ ಬದಲಾವಣೆ’:
ಪ್ರವೀಣ್‍ಭೂಷಣ್ ನಿರ್ದೇಶನ ಮಾಡುತ್ತಿರುವ ‘ಮುಂದಿನ ಬದಲಾವಣೆ’ ಚಿತ್ರ ಹಾಸ್ಯ ಪ್ರಧಾನವಾಗಿರಲಿದೆಯಂತೆ. ಪ್ರವೀಣ್​ ಭೂಷಣ್​, ಸಂಗೀತ, ಸತೀಶ್​ ಮೊದಲಾದವರು ತಾರಾ ಬಳಗದಲ್ಲಿದ್ದಾರೆ.

ಹಿಂದಿಯಲ್ಲಿ ‘ಕೇದಾರ್​ನಾಥ್​’:
2013ರಲ್ಲಿ ಉತ್ತರಾಖಂಡದಲ್ಲಿ ಮೇಘಸ್ಫೋಟ ಸಂಭವಿಸಿತ್ತು. ಈ ವೇಳೆ ಅನೇಕರು ಪ್ರಾಣಕಳೆದುಕೊಂಡಿದ್ದರು. ಇದೇ ಘಟನೆ ಇಟ್ಟುಕೊಂಡು ನಿರ್ದೇಶಕ ಅಭಿಷೇಕ್​ ಕಪೂರ್​ ‘ಕೇದಾರ್​ನಾಥ್​’ ಚಿತ್ರ ಮಾಡಿದ್ದಾರೆ. ಸುಶಾಂತ್​ ಸಿಂಗ್​ ರಜಪೂತ್​ ಹಾಗೂ ಸಾರಾ ಅಲಿಖಾನ್​ ಮುಖ್ಯಭೂಮಿಕೆಯಲ್ಲಿದ್ದಾರೆ. ಸಾರಾಗಿದು ಚೊಚ್ಚಲ ಚಿತ್ರ. ಹಾಗಾಗಿ ಸಿನಿಮಾ ಮೇಲೆ ಅವರು ಸಾಕಷ್ಟು ನಿರೀಕ್ಷೆ ಇಟ್ಟುಕೊಂಡಿದ್ದಾರೆ. ಈಗಾಗಲೇ ಟ್ರೈಲರ್​ ಮೂಲಕ ಸಿನಿಮಾ ನಿರೀಕ್ಷೆ ಹುಟ್ಟುಹಾಕಿದೆ.

ಇದನ್ನೂ ಓದಿ: ಈ ರಾಕಿ ಗ್ಯಾಂಗ್​ಸ್ಟರ್​ ಅಲ್ಲ ಮಾನ್​​ಸ್ಟರ್​; ‘ಕೆಜಿಎಫ್’ ಎರಡನೇ ಟ್ರೈಲರ್​ ಬಿಡುಗಡೆ