ಚೆಕ್​ಬೌನ್ಸ್​ ಪ್ರಕರಣ; ತಾರಾ ದಂಪತಿ ಶರತ್​ ಕುಮಾರ್​-ರಾಧಿಕಾಗೆ ಒಂದು ವರ್ಷ ಜೈಲು ಶಿಕ್ಷೆ ವಿಧಿಸಿದ ನ್ಯಾಯಾಲಯ

ಚೆಕ್​ಬೌನ್ಸ್​ ಪ್ರಕರಣದಲ್ಲಿ ದಕ್ಷಿಣ ಭಾರತದ ಖ್ಯಾತ ನಟ ಶರತ್​ ಕುಮಾರ್​ ಮತ್ತು ಅವರ ಹೆಂಡತಿ ನಟಿ ರಾಧಿಕಾ ಶರತ್​ಕುಮಾರ್​ ಅವರಿಗೆ ಇಂದು ವರ್ಷ ಜೈಲು ಶಿಕ್ಷೆ ವಿಧಿಸಿ ಚೆನ್ನೈನ ವಿಶೇಷ ನ್ಯಾಯಾಲಯ ಆದೇಶ ಹೊರಡಿಸಿದೆ. ಈ ತಾರಾದಂಪತಿಗಳ ವಿರುದ್ದ ಬಾಕಿ ಇದ್ದ ಎರಡು ಚೆಕ್​ಬೌನ್ಸ್​ ಪ್ರಕರಣಗಳಲ್ಲಿನ ಕ್ರಿಮಿನಲ್​ ಮೊಕದ್ದಮೆಯನ್ನು ರದ್ದುಗೊಳಿಸಲು 2019ರಲ್ಲಿ ಮದ್ರಾಸ್​​ ಹೈ ಕೋರ್ಟ್​ ನಿರಾಕರಿಸಿತ್ತು. ಈ ಪ್ರಕರಣಗಳ ವಿಚಾರಣೆ ನಡೆಸಿದ ನ್ಯಾಯಾಲಯ ತಾರಾ ದಂಪತಿಗೆ ಒಂದು ವರ್ಷ ಸಜೆ ವಿಧಿಸಿ ಆದೇಶ ನೀಡಿದೆ.

ಶರತ್​ ಕುಮಾರ್​ ಮತ್ತು ರಾಧಿಕಾ ಪಾಲುದಾರಿಕೆಯ ಮ್ಯಾಜಿಕ್​ ಫ್ರೇಂ ಸಂಸ್ಥೆಯು 2014ರಲ್ಲಿ ವಿಕ್ರಂ ಪ್ರಭು ಮತ್ತು ಕೀರ್ತಿ ಸುರೇಶ್​ ನಟನೆಯಲ್ಲಿ ವಾಟ್​ ಎ ಮ್ಯಾಜಿಕ್​ ಎಂಬ ಚಿತ್ರ ನಿರ್ಮಾಣಕ್ಕೆ ಮುಂದಾಗಿದ್ದರು. ರೆಡಿಯನ್ಸ್​ ಎಂಬ ಮೀಡಿಯಾ ಫೈನಾನ್ಸ್​ ಕಂಪನಿಯಿಂದ  ರಾಧಿಕಾ, ಶರತ್​ ಕುಮಾರ್​ ಹಾಗೂ ನಿರ್ಮಾಪಕ ಲಿಸ್ಟಿನ್​ ಸ್ಟೇಪನ್ನ ಮಾಜ್ಯಿಕ್​ ಪ್ರೇಮ್ಸ್​ ಎಂಬ ಕಂಪನಿಗಾಗಿ​ 1. 5 ಕೋಟಿ ಹಣವನ್ನು ಸಾಲ ಪಡೆದಿದ್ದರು.

ಈ ಹಣವನ್ನು 2015ರಲ್ಲಿ ಮರಳಿಸುವುದಾಗಿ ಈ ದಂಪತಿ ಭರವಸೆ ನೀಡಿದ್ದರು. ಅಲ್ಲದೇ ಚಿತ್ರ ಬಿಡುಗಡೆಯಾಗುತ್ತಿದ್ದಂತೆ ಹಣ ಹಿಂದಿರುಗಿಸುವುದಾಗಿ ಹೇಳಿದ್ದ ಈ ದಂಪತಿ ಮಾತು ತಪ್ಪಿದ್ದರು. ಈ ಹಣವನ್ನು ಬಳಸಿಕೊಂಡು ಈ ತಾರಾ ದಂಪತಿ ಮತ್ತೊಂದು ಚಿತ್ರ ನಿರ್ಮಾಣ ಮಾಡಿದ್ದರು. ಬಳಿಕ ಈ ಹಣವನ್ನು ಎರಡು ಚೆಕ್​ ಮೂಲಕ ಹಿಂತಿರುಗಿಸಿದ್ದರು.

ಇದಾದ ಬಳಿಕ ಶರತ್​ ಕುಮಾರ್​ ತಮ್ಮ ಕಂಪನಿಗಾಗಿ 50 ಲಕ್ಷ ನಗದನ್ನು ಮತ್ತೆ  ಪಡೆದಿದ್ದರು. 10 ಲಕ್ಷದಂತೆ ಐದು ಚೆಕ್​ ಮೂಲಕ ಈ ಹಣವನ್ನು ಹಿಂತಿರುಗಿಸಿದ್ದರು. ಆದರೆ, ಈ ಚೆಕ್​ಗಳು ಬೌನ್ಸ್​ ಆಗಿತ್ತು. ಇದಾದ ಬಳಿಕ ರೇಡಿಯನ್ಸ್​ ಸಂಸ್ಥೆ ಮ್ಯಾಜಿಕ್​ ಫ್ರೇಮ್ಸ್​ ಸಂಸ್ಥೆ ಚೆಕ್​ ಬೌನ್ಸ್​ ಆರೋಪದ ಅಡಿ ನ್ಯಾಯಾಲಯದಲ್ಲಿ ಮೊಕದ್ಧಮೆ ಹೂಡಿತು. ಈ ವೇಳೆ ಬಡ್ಡಿ ಹೆಚ್ಚಿರುವ ಹಿನ್ನಲೆ ಹಣವನ್ನು ತಕ್ಷಣಕ್ಕೆ ಮರು ಪಾವತಿಸಲು ಸಾಧ್ಯವಿಲ್ಲ ಎಂದು ಮ್ಯಾಜಿಕ್​ ಫ್ರೇಮ್ಸ್​ ಸಂಸ್ಥೆ ವಾದಿಸಿತು. ಸಾಲ ಮರುಪಾವತಿಗೆ ಚೆಕ್​ ನೀಡಿದ ಬಳಿಕವೂ ಅದು ಬೌನ್ಸ್​ ಆಗಿತ್ತು. ಈ ಆರೋಪದ ಹಿನ್ನಲೆ ಈ ದಂಪತಿ ಹಾಗೂ ನಿರ್ಮಾಪಕ ಲಿಸ್ಟಿನ್​ ಸ್ಟೇಪನ್ನ ಅವರಿಗೆ ಜೈಲು ಶಿಕ್ಷೆ ವಿಧಿಸಿ ತೀರ್ಪು ನೀಡಲಾಗಿದೆ.