ಒಂದೇ ಮನೆಯಲ್ಲಿದ್ದರೂ ಒಬ್ಬರ ಮುಖ ಒಬ್ಬರು ನೋಡಿಕೊಳ್ಳುವುದಿಲ್ಲವಂತೆ ಸೋನಮ್ ಕಪೂರ್-ಆನಂದ್ ಅಹೂಜ

ನಟಿ ಸೋನಮ್​ ಕಪೂರ್​ ಹಾಗೂ ಉದ್ಯಮಿ ಆನಂದ್ ಅಹೂಜ ಮದುವೆಯಾಗಿ ಎರಡು ವರ್ಷಗಳೇ ಕಳೆದಿವೆ. ಈಗ ಲಾಕ್​ಡೌನ್​ ಇರುವುದರಿಂದ ಇಬ್ಬರೂ ಮನೆಯಲ್ಲೇ ಇದ್ದಾರೆ. ವಿಚಿತ್ರ ಎಂದರೆ, ಒಂದೇ ಮನೆಯಲ್ಲಿದ್ದರೂ ಒಬ್ಬರ ಮುಖ ಒಬ್ಬರು ನೋಡಿಕೊಳ್ಳುವುದಿಲ್ಲವಂತೆ. ಹೀಗೆಂದು ಖುದ್ದು ಸೋನಮ್​ ಕಪೂರ್​ ಹೇಳಿದ್ದಾರೆ.

ನಾನು ಒಂದು ರೂಂನಲ್ಲಿ ಕುಳಿತು ಕೆಲಸ ಮಾಡುತ್ತೇನೆ. ಆನಂ​ದ್​ ಮತ್ತೊಂದು ರೂಂನಲ್ಲಿ ಕುಳಿತಿರುತ್ತಾರೆ. ಪ್ರತಿ ಎರಡು ಗಂಟೆಗೆ ಒಮ್ಮೆ ಬಂದು ಅವರು ನನ್ನನ್ನು ಮಾತನಾಡಿಸಿ ಹೋಗುತ್ತಾರೆ. ಹೀಗಾಗಿ, ನನಗೆ ನನ್ನದೇ ಸ್ಪೇಸ್​ ಸಿಗುತ್ತಿದೆ. ನಾವು ಮಧ್ಯಾಹ್ನ ಒಟ್ಟಿಗೆ ಊಟು ಮಾಡುತ್ತೇವೆ ಎಂದಿದ್ದಾರೆ ಸೋನಮ್​.

ನಾವು ಒಂದೇ ಮನೆಯಲ್ಲಿದ್ದರೂ ಹಗಲಿನಲ್ಲಿ ಹೆಚ್ಚು ಭೇಟಿ ಆಗುವುದಿಲ್ಲ. ಬೆಳಗ್ಗೆ ಒಟ್ಟಿಗೆ ತಿಂಡಿ ತಿನ್ನುತ್ತೇವೆ. ಮಧ್ಯಾಹ್ನ ಒಟ್ಟಿಗೆ ಊಟ ಮಾಡುತ್ತೇವೆ. ಇದನ್ನು ಬಿಟ್ಟರೆ ನಾವಿಬ್ಬರೂ ಭೇಟಿ ಆಗೋದು ತುಂಬಾನೇ ಕಡಿಮೆ. ಇಬ್ಬರೂ ಅವರವರದೇ ಕೆಲಸದಲ್ಲಿ ಮಗ್ನರಾಗಿರುತ್ತೇವೆ ಎನ್ನುತ್ತಾರೆ ಅವರು.

ಸುಶಾಂತ್​ ಸಿಂಗ್ ಆತ್ಮಹತ್ಯೆ ನಂತರದಲ್ಲಿ ಸೋನಂ ಅವರನ್ನು ಟ್ರೋಲ್​ ಮಾಡಲಾಗಿತ್ತು. ಅಲ್ಲದೆ, ಕಮೆಂಟ್​ ಸೆಕ್ಷನ್​ಅನ್ನು ಕೂಡ ಅವರು ತೆಗೆದು ಹಾಕಿದ್ದರು. ಈ ಬಗ್ಗೆಯೂ ಸೋನಮ್​ ಮೌನ ಮುರಿದಿದ್ದಾರೆ. ನಾನು ಕಮೆಂಟ್​ ಬಾಕ್ಸ್​ ತೆಗೆದು ಹಾಕಲು ಮುಖ್ಯ ಕಾರಣ ನನ್ನ ಪಾಲಕರು. ಅವರು ಈ ಕಮೆಂಟ್​ಗಳನ್ನು ನೋಡಿ ಡಿಸ್ಟರ್ಬ್​ ಆಗುತ್ತಾರೆ. ಹೀಗಾಗಿ ಕಮೆಂಟ್​ ಬಾಕ್ಸ್​ ಅಳಿಸಿ ಹಾಕಿದ್ದೇನೆ ಎನ್ನುತ್ತಾರೆ ಸೋನಮ್​.