ಬಿಗ್ ಬಜೆಟ್...ಬಿಗ್ ಮೂವಿ: ಮತ್ತೊಂದು ಪ್ಯಾನ್ ಇಂಡಿಯಾ ಸಿನಿಮಾದಲ್ಲಿ ಶಿವಣ್ಣ..?

ಚಂದನವನ ಚಿರಯುವಕ ಹ್ಯಾಟ್ರಿಕ್ ಹೀರೋ ಶಿವರಾಜ್‌ ಕುಮಾರ್ ಬಿಗ್ ಬಜೆಟ್ ಚಿತ್ರವೊಂದರಲ್ಲಿ ಕಾಣಿಸಿಕೊಳ್ಳಲಿದ್ದಾರಾ? ಅದು ಕೂಡ ಕಾಲಿವುಡ್​ನ ಸ್ಟಾರ್ ನಟನ ಜೊತೆ? ಇಂತಹದೊಂದು ಕುತೂಹಲಕಾರಿ ಪ್ರಶ್ನೆ ಕಳೆದ ಕೆಲ ದಿನಗಳಿಂದ ತುಸು ಜೋರಾಗಿಯೇ ಕೇಳಿ ಬರುತ್ತಿದೆ. ಈ ಎಲ್ಲಾ ಪ್ರಶ್ನೆಗಳಿಗೆ ಸದ್ಯ ಸಿಗುತ್ತಿರುವ ಉತ್ತರ 'ಹೌದು'.

ಹೌದು, ಭಜರಂಗಿ-2 ಚಿತ್ರದ ಮೂಲಕ ಪ್ಯಾನ್ ಇಂಡಿಯಾ ಬಾಕ್ಸಾಫೀಸ್ ಮೇಲೆ ಕಣ್ಣಿಟ್ಟಿರುವ ಶಿವಣ್ಣ, ಮತ್ತೊಂದು ಬಹುಭಾಷಾ ಚಿತ್ರದಲ್ಲಿ ನಟಿಸಲಿದ್ದಾರಂತೆ. ಅದು ಸಹ ಕಾಲಿವುಡ್ ಸ್ಟಾರ್ ನಟ ಚಿಯಾನ್ ವಿಕ್ರಮ್ ಜೊತೆ ಎಂಬುದು ವಿಶೇಷ. ಚಿಯಾನ್ ವಿಕ್ರಮ್ ತಮ್ಮ 60ನೇ ಚಿತ್ರಕ್ಕಾಗಿ ಭರ್ಜರಿ ತಯಾರಿಯಲ್ಲಿದ್ದಾರೆ. ಈ ಚಿತ್ರದಲ್ಲಿ ಅವರ ಪುತ್ರ ಧ್ರುವ ವಿಕ್ರಮ್ ಕೂಡ ಕಾಣಿಸಿಕೊಳ್ಳುತ್ತಿದ್ದಾರೆ. ಬಿಗ್ ಬಜೆಟ್​ನಲ್ಲಿ ತಯಾರಾಗಲಿರುವ ಈ ಚಿತ್ರತಂಡದಿಂದ ಇದೀಗ ಕರುನಾಡ ಕಿಂಗ್ ಶಿವಣ್ಣನಿಗೆ ಬಿಗ್ ಆಫರ್ ಬಂದಿದೆ.

ತಮಿಳಿನಲ್ಲಿ 'ಜಿಗರ್‌ಥಂಡ', 'ಪಿಜ್ಜಾ', 'ಇರೈವಿ', 'ಪೆಟ್ಟಾ'ದಂತಹ ಸೂಪರ್ ಡೂಪರ್ ಹಿಟ್​ ಸಿನಿಮಾಗಳನ್ನು ನಿರ್ದೇಶಿಸಿರುವ ಕಾರ್ತಿಕ್ ಸುಬ್ಬರಾಜ್ ವಿಕ್ರಮ್ ಅವರ ಬಹುನಿರೀಕ್ಷೆಯ ಚಿತ್ರಕ್ಕೆ ಆ್ಯಕ್ಷನ್ ಕಟ್ ಹೇಳಲಿದ್ದಾರೆ. ಈಗಾಗಲೇ ಸ್ಕ್ರಿಪ್ಟ್ ಕೆಲಸಗಳನ್ನು ಮುಗಿಸಿರುವ ಚಿತ್ರತಂಡ ಫಸ್ಟ್ ಲುಕ್ ಪೋಸ್ಟರ್​ವೊಂದನ್ನು ಸಹ ಬಿಡುಗಡೆ ಮಾಡಿದೆ.

ಗ್ಯಾಂಗ್​ಸ್ಟರ್ ಚಿತ್ರಕಥೆ ಹೊಂದಿರುವ ಈ ಸಿನಿಮಾದಲ್ಲಿ ಪವರ್​ಫುಲ್ ಪಾತ್ರವೊಂದಿದೆ. ಈ ಪಾತ್ರದಲ್ಲಿ ನಟಿಸಲು ಶಿವಣ್ಣ ಅವರನ್ನು ಕೇಳಿಕೊಳ್ಳಲಾಗಿದೆ. ಈ ಸಂಬಂಧ ನಿರ್ದೇಶಕ ಕಾರ್ತಿಕ್ ಸುಬ್ಬರಾಜ್‌, ಬೆಂಗಳೂರಿಗೆ ಬಂದು ಶಿವಣ್ಣನಿಗೆ ಕಥೆ ಕೂಡ ಹೇಳಿ ಹೋಗಿದ್ದಾರಂತೆ. ಆದರೆ ಈಗಾಗಲೇ ಸ್ಯಾಂಡಲ್​ವುಡ್ ಕಿಂಗ್ ಈಗಾಗಲೇ ಹಲವು ಸಿನಿಮಾಗಳನ್ನು ಒಪ್ಪಿಕೊಂಡಿದ್ದಾರೆ. ಹೀಗಾಗಿ ಕಾಲಿವುಡ್ ಚಿತ್ರಕ್ಕಾಗಿ ಸಮಯ ಹೊಂದಿಸುವುದು ಕೂಡ ಅಷ್ಟು ಸುಲಭವಲ್ಲ.

ಹೀಗಾಗಿ ಶಿವಣ್ಣ ಸ್ವಲ್ಪ ಸಮಯ ಕೇಳಿದ್ದಾರೆ ಎನ್ನಲಾಗಿದೆ. ಅತ್ತ ಆ ಪಾತ್ರವನ್ನು ಶಿವಣ್ಣ ಅವರಿಂದಲೇ ಮಾಡಿಸಬೇಕೆಂಬ ಹಂಬದಲ್ಲಿದೆ ಚಿತ್ರತಂಡ. ಇನ್ನು ವಿಕ್ರಮ್ ಚಿತ್ರಗಳು ಮಲಯಾಳಂ ಹಾಗೂ ತೆಲುಗಿನಲ್ಲಿ ಡಬ್ ಆಗುತ್ತವೆ. ಇತ್ತ ಹ್ಯಾಟ್ರಿಕ್ ಹೀರೋ ಎಂಟ್ರಿಯೊಂದಿಗೆ ಕರ್ನಾಟಕದಲ್ಲೂ ಚಿತ್ರದ ತೂಕ ಹೆಚ್ಚಳಿದೆ. ಸದ್ಯ ಭಜರಂಗಿ-2 ಹಾಗೂ ಶಿವಪ್ಪ ಚಿತ್ರದಲ್ಲಿ ಬಿಝಿಯಾಗಿರುವ ಶಿವಣ್ಣ ಕಾರ್ತಿಕ್ ಸುಬ್ಬರಾಜ್ ಅವರ ಪ್ಯಾನ್ ಇಂಡಿಯಾ ಸಿನಿಮಾಗಾಗಿ ಸಮಯ ಹೊಂದಿಸಲಿದ್ದಾರಾ ಕಾದು ನೋಡಬೇಕಿದೆ.