Shakuntala Devi Trailer: ಶಕುಂತಲಾ ದೇವಿ ಟ್ರೇಲರ್ ಬಿಡುಗಡೆ; ಕನ್ನಡ ಸಾಧಕಿಯ ಪಾತ್ರವನ್ನು ಮಾಡಿದ ವಿದ್ಯಾ ಬಾಲನ್​ಗೆ ಯ್ಯೂಟೂಬ್​ನಲ್ಲಿ ಉಘೇ ಉಘೇ

ಮಾನವ ಕಂಪ್ಯೂಟರ್​ ಎಂದೇ ಖ್ಯಾತಿ ಪಡೆದಿರುವ ಕನ್ನಡತಿ ಶಕುಂತಲಾ ದೇವಿ ಅವರ ಕುರಿತಾಗಿ ಬಾಲಿವುಡ್​ನಲ್ಲಿ ಸಿನಿಮಾ ಮೂಡಿಬರುತ್ತಿದೆ. ನಟಿ ವಿದ್ಯಾ ಬಾಲನ್​ ಅವರು ಶಕುಂತಲಾ ದೇವಿ ಪಾತ್ರವನ್ನು ಮಾಡಿದ್ದಾರೆ. ಇದೀಗ ಈ ಸಿನಿಮಾದ ಟ್ರೇಲರ್​ ಯ್ಯೂಟೂಬ್​ನಲ್ಲಿ ಬಿಡುಗಡೆಗೊಂಡಿದ್ದು, ಪ್ರೇಕ್ಷಕರಿಂದ ಭಾರೀ ಮೆಚ್ಚುಗೆ ಗಳಿಸಿದೆ.

ಅನು ಮೆನನ್​ ನಿರ್ದೇಶನದಲ್ಲಿ ‘ಶಕುಂತಲಾ ದೇವಿ’ ಸಿನಿಮಾ ಮೂಡಿ ಬರುತ್ತಿದೆ. ಗಣಿತದಲ್ಲಿ ಮಹತ್ತರ ಸಾಧನೆ  ಮಾಡಿದ ಶಕುಂತಲಾ ಅವರ ಜೀವನ ಚರಿತ್ರೆಯನ್ನು ಇಟ್ಟುಕೊಂಡು ಅನು ಮೆನನ್ ಸಿನಿಮಾ ಮಾಡಿದ್ದಾರೆ. ಈ ಸಿನಿಮಾವನ್ನು ಒಟಿಟಿಯಲ್ಲಿ ಬಿಡುಗಡೆ ಮಾಡಲು ಚಿತ್ರತಂಡ ಮುಂದಾಗಿದ್ದು, ಜು.31 ರಂದು ಅಮೆಜಾನ್​ ಪ್ರೈಮ್​ನಲ್ಲಿ ರಿಲೀಸ್​ ಮಾಡುತ್ತಿದೆ.

ಅಮೆಜಾನ್​ ಪ್ರೈಮ್​​ ಯ್ಯೂಟೂಬ್​ ಖಾತೆಯಲ್ಲಿ ಶಕುಂತಲಾ ದೇವಿ ಟ್ರೇಲರ್​ ಬಿಡುಗಡೆಗೊಂಡಿದ್ದು,  4 ಲಕ್ಷಕ್ಕೂ ಅಧಿಕ ಜನರು ವೀಕ್ಷಿಸಿದ್ದಾರೆ. ಅನೇಕರು ವಿದ್ಯಾ ಬಾಲನ್​ ಅವರ ನಟನೆಯ ಫಿದಾ ಆಗಿದ್ದು, ಬಗೆ ಬಗೆಯ ಕಾಮೆಂಟ್​ ಬರೆಯುತ್ತಿದ್ದಾರೆ.

ಇನ್ನು ಶಕುಂತಲಾ ದೇವಿ ಸಿನಿಮಾದಲ್ಲಿ ಸಾನ್ಯ​ ಮಲ್ಹೋತ್ರ, ಪ್ರಕಾಶ್​ ಬೆಳವಾಡಿ ಕೂಡ ಈ ಸಿನಿಮಾದಲ್ಲಿ ಪ್ರಮುಖ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ.

ಶಕುಂತಲಾ ದೇವಿ:

ಶಕುಂತಲಾ ದೇವಿ ಮೂಲತಃ ಬೆಂಗಳೂರಿನವರು. 1929ರಲ್ಲಿ ಜನಿಸಿದರು. ಚಿಕ್ಕಂದಿನಿಂದಲೇ ಬುದ್ಧಿವಂತೆ. ಗಣಿತದಲ್ಲಿ ಹೆಚ್ಚು ಪರಿಣಿತೆ. ಇವರ ಪ್ರತಿಭಾನ್ವಿತೆಯನ್ನು ಗಮನಿಸಿ 1982ರಲ್ಲಿ ಗಿನ್ನಿಸ್​ ಬುಕ್​​ ಆಫ್​ ರೆಕಾಡ್​ಗೆ ಇವರ ಹೆಸರು ಸೇರ್ಪಡೆಯಾಗಿದೆ. ಅಷ್ಟು ಮಾತ್ರವಲ್ಲದೆ, ಸಾಕಷ್ಟು ಪುಸ್ತಕಗಳನ್ನು ಅವರು ಬರೆದಿದ್ದಾರೆ.



ಶಕುಂತಲಾ ಅವರು ರಾಜಕೀಯದಲ್ಲೂ ಗುರುತಿಸಿಕೊಂಡಿದ್ದರು. ಲೋಕಸಭಾ ಚುನಾವಣೆಯಲ್ಲಿ ಸ್ಪರ್ಧಿಸಿದ್ದರು. ಇಂತಹ ಕನ್ನಡದ ಸಾಧಕಿಯ ಜೀವನದ ಕುರಿತಾಗಿ ಬಾಲಿವುಡ್​ನಲ್ಲಿ ಸಿನಿಮಾವೊಂದು ನಿರ್ಮಾಣವಾಗಿ ಬಿಡುಗಡೆಯಾಗುತ್ತಿರುವ ಕನ್ನಡಿಗೆ ಹೆಮ್ಮೆಯ ಸಂಗತಿಯಾಗಿದೆ.