Salaga Movie Review: ರೌಡಿಸಂನ ಕ’ರಾ’ಳತೆ ಬಿಚ್ಚಿಟ್ಟ ಸಲಗ, ಹೆಜ್ಜೆ ಹೆಜ್ಜೆಗೂ ಹರಿದ ನೆತ್ತರ ಕೋಡಿ

Salaga Kannada Movie: ನಿರ್ದೇಶಕನಾಗಿ ಮೊದಲ ಯತ್ನದಲ್ಲಿ ದುನಿಯಾ ವಿಜಯ ಅವರ ಪರಿಶ್ರಮ ಎದ್ದು ಕಾಣುತ್ತೆ. ಸಿನಿಮಾದ ಪ್ರತಿ ವಿಭಾಗದಲ್ಲೂ ವಿಜಯ್​ ಕೆಲಸ ವರ್ಕೌಟ್​ ಆಗಿದೆ. ಜನರ ನಾಡಿ ಮಿಡಿತವನ್ನ ಅರ್ಥಮಾಡಿಕೊಂಡು ವಿಜಯ್​ ಸಿನಿಮಾ ಮಾಡಿದ್ದಾರೆ. ಸಿನಿಮಾದಲ್ಲಿ ಏನಿದ್ದರೆ ಜನ ನೋಡುತ್ತಾರೆ ಅನ್ನುವುದು ವಿಜಯ್​ಗೆ ಚೆನ್ನಾಗಿ ತಿಳಿದಿದೆ.

ಸಲಗ ಸಿನಿಮಾ ಪೋಸ್ಟರ್

ಸಲಗ ಸಿನಿಮಾ ಪೋಸ್ಟರ್

  • Share this:
    Salaga Kannada Movie: ಮೀಸೆ ಚಿಗುರದ ಚಿಲ್ಟಾರಿ, ಪಲ್ಟಾರಿ ಯುವಕರೆಲ್ಲ ರೌಡಿಸಂ ಮಾಡಿ ನಾನೇ ಡಾನ್​ ಆಗಬೇಕು ಅಂತ ಕಾಲರ್​ ಮೇಲೆ ಎತ್ತಿ ದೌಲತ್ತಿನಲ್ಲಿ ತಿರುಗಾಡುತ್ತಾ ಇರ್ತಾರೆ. ಅಂಥವರಿಗೆಲ್ಲ ’ಸಲಗ’ (Salaga) ಸಿನಿಮಾ ಒಂದು ಪಾಠ. ಹುಟ್ಟಿದಾಗಲೇ ಯಾರೂ ರೌಡಿಗಳಾಗಲ್ಲ. ಈ ಸಮಾಜ, ಕಾನೂನು ವ್ಯವಸ್ಥೆ ಒಬ್ಬ ವ್ಯಕ್ತಿಯನ್ನ ರೌಡಿಯಾಗುವಂತೆ (Rowdyism based) ಹೇಗೆ ಫೋರ್ಸ್​ ಮಾಡುತ್ತೆ ಅನ್ನುವುದೆ ‘ಸಲಗ’ ಸಿನಿಮಾದ ಒನ್​ ಲೈನ್ ಸ್ಟೋರಿ. ಹೌದು, ಸ್ಯಾಂಡಲ್​ವುಡ್​ನ (Sandalwood) ಮೋಸ್ಟ್​ ಎಕ್ಸ್​​ಪೆಕ್ಟೆಡ್​ ಸಿನಿಮಾ ‘ಸಲಗ’ ರಾಜ್ಯಾದ್ಯಂತ ತೆರೆಕಂಡು ಹೌಸ್​​ಫುಲ್ (Housefull) ಪ್ರದರ್ಶನ ಕಾಣುತ್ತಿದೆ. ದುನಿಯಾ ವಿಜಯ್​ ಮೊದಲ ಬಾರಿಗೆ ನಿರ್ದೇಶನ (Duniya Vijay direction) ಮಾಡಿರುವ ’ಸಲಗ’ ಸಿನಿಮಾ ಮೇಲೆ ಸಾಕಷ್ಟು ನಿರೀಕ್ಷೆ ಇತ್ತು. ಕಿಲ್ಲರ್​ ಕೊರೋನಾ ಬಳಿಕ ಸ್ಟಾರ್​ ನಟನೊಬ್ಬನ ಸಿನಿಮಾ ತೆರೆಗೆ ಬರುತ್ತಿರುವುದು ಅವರ ಅಭಿಮಾನಿಗಳಲ್ಲಿ (Movie Fans) ಭಾರೀ ನಿರೀಕ್ಷೆ ಹುಟ್ಟುಹಾಕಿತ್ತು. ನಿನ್ನೆ ಸಿನಿಮಾ ಅದ್ಧೂರಿಯಾಗಿ ಬಿಡುಗಡೆಯಾಗಿದೆ. ಸಿನಿಮಾ ನೋಡಿದ ಪ್ರೇಕ್ಷಕ ಮಹಾಪ್ರಭುಗಳು ಏನಂತಾರೆ? ಡಾಲಿ ಧನಂಜಯ್​ (Dhanajay), ದುನಿಯಾ ವಿಜಯ್​ ಕಾಂಬೋ ವರ್ಕೌಟ್​ ಆಗಿದ್ಯಾ? ವಿಜಯ ನಿರ್ದೇಶನಕ್ಕೆ ಎಷ್ಟು ಮಾರ್ಕ್ಸ್​​? ಇಲ್ಲಿದೆ ನೋಡಿ...

    ರೌಡಿಸಂನ ಕ‘ರಾ’ಳತೆ ಬಿಚ್ಚಿಟ್ಟ ಸಿನಿಮಾ

    ‘ಸಲಗ’ ಸಿನಿಮಾದ ಟೀಸರ್​​, ಪೋಸ್ಟರ್​​ಗಳನ್ನ ನೋಡಿದಾಗಲೇ ಇದೊಂದು ಪಕ್ಕಾ ರೌಡಿಸಂ ಸಿನಿಮಾ ಅನ್ನೋದು ಗೊತ್ತಿತ್ತು. ಆದರೆ ಸಿನಿಮಾದಲ್ಲಿ ರೌಡಿಸಂ ಆಳ-ಅಗಲ ಎಷ್ಟಿದೆ ಅನ್ನುವುದನ್ನ ಸಖತ್​ ‘ರಾ’ ಆಗಿ ತೋರಿಸಲಾಗಿದೆ. ’ಸಲಗನನ್ನ ನಾನು ಹೊಡಿತೀನಿ, ನಾನು ಸಾಯಿಸ್ತಿನಿ, ಸಲಗ ನನ್ನ ಬೇಟೆ’ ಎಂಬ ಡೈಲಾಗ್​​ಗಳಿಂದಲೇ ಆರಂಭವಾಗುವ ಸಿನಿಮಾ ಭೂಗತ ಲೋಕದ ಕರಾಳ ವ್ಯವಸ್ಥೆಯನ್ನ ಎಳೆ ಎಳೆಯಾಗಿ ಬಿಚ್ಚಿಡುತ್ತೆ. ರಕ್ತದೋಕುಳಿ ನಡುವೆ ಒಂದು ಫ್ಲಾಶ್​​​ಬ್ಯಾಕ್​, ಆ ಫ್ಲಾಶ್​ಬ್ಯಾಕ್​ನಲ್ಲಿ ಸಮಾಜಕ್ಕೆ ಒಂದು ಮೆಸೇಜ್​. ಜೊತೆಗೆ ಒಳ್ಳೆಯ ಎಂಟರ್​ಟೈನ್ಮೆಂಟ್​. ಒಂದು ಸಿನಿಮಾಗೆ ಬೇಕಿರುವ ಎಲ್ಲ ಅಂಶಗಳು ಸಲಗ ಸಿನಿಮಾದಲ್ಲಿದೆ. ಆದರೆ ರಕ್ತಪಾತದ ಅಬ್ಬರ ಕೊಂಚ ಹೆಚ್ಚಾಗಿಯೇ ಇದೆ.

    ಇದನ್ನೂ ಓದಿ: ಸಂತೋಷ್‌ನಿಂದ ತ್ರಿವೇಣಿ ಚಿತ್ರಮಂದಿರಕ್ಕೆ ಹೋದ Salaga: 300 ಚಿತ್ರಮಂದಿರಗಳಲ್ಲಿ 1,200 ಶೋಗಳು..!

    ‘ಸಲಗ’ನ ಸುತ್ತ ಸುತ್ತುವ ಕಥೆ

    ಜೈಲಿನಲ್ಲೇ ಕೂತು ಬೆಂಗಳೂರನ್ನೇ ಆಳುವ ಸಲಗ. ಒಳಗೆ ಇದ್ದೆ, ತನ್ನ ವಿರುದ್ಧ ತೊಡೆ ತಟ್ಟಿದವರ ಕಥೆ ಮುಗಿಸಿ ಮೆರೆದಾಡುವ ಸಲಗ. ಇತ್ತ ಆತ ರಿಲೀಸ್​ ಆದರೆ ಕೊಚ್ಚಿ ಹಾಕಬೇಕೆಂಬ ಹಸಿದ ತೋಳಗಳಂತೆ ಕಾಯುವ ರೌಡಿಗಳು. ಸಲಗ ರಿಲೀಸ್​ ಬಳಿಕ ಸಾಯಿಸಲು ಸ್ಕೆಚ್​​ ಹಾಕಿದ್ದವರ ಕಥೆಯೇ ಮುಗಿಸುವ ಹೀರೋ ​.ಇದರ ಮಧ್ಯೆ ರೌಡಿ ಪಡೆಗಳಿಗೆ ನಿಂತಲ್ಲೇ ಪ್ಯಾಂಟ್​ ಒದ್ದೆ ಮಾಡಿಸುವ ಖಡಕ್​ ಪೊಲೀಸ್​ ಅಧಿಕಾರಿ. ಮದುವೆಯಾದರೆ ಸಲಗನನ್ನೇ ಆಗಬೇಕು ಅನ್ನುವ ಹುಡುಗಿ. ಕಡೆಗೆ ಸಲಗ ರೌಡಿಸಂಗೆ ಬರಲು ಕಾರಣವೇನು ಅನ್ನುವ ಫ್ಲಾಶ್​ಬ್ಯಾಕ್​. ಇದಿಷ್ಟು ಸಲಗ ಸಿನಿಮಾದ ಪ್ರಮುಖ ಅಂಶಗಳು. ಸಲಗ ರೌಡಿಯಾಗಿದ್ದೇಕೆ ಎಂದು ತಿಳಿದುಕೊಳ್ಳುವುದರ ಜೊತೆಗೆ ಸಮಾಜದ ಕ್ರೂರ ಮುಖವನ್ನ ಅನಾವರಣ ಮಾಡಲಾಗಿದೆ. ಈ ಸಮಾಜ, ಕಾನೂನು ವ್ಯವಸ್ಥೆ ಒಬ್ಬ ವ್ಯಕ್ತಿಯನ್ನ ಹೇಗೆ ರೌಡಿ ಮಾಡಲಾಗುತ್ತೆ ಅಂತ ತೋರಿಸಲಾಗಿದೆ.

    ವಿಜಯ್​ ಮೊದಲ ಪ್ರಯತ್ರಕ್ಕೆ ಫುಲ್​ ಮಾರ್ಕ್ಸ್​​

    ನಿರ್ದೇಶಕನಾಗಿ ಮೊದಲ ಯತ್ನದಲ್ಲಿ ದುನಿಯಾ ವಿಜಯ ಅವರ ಪರಿಶ್ರಮ ಎದ್ದು ಕಾಣುತ್ತೆ. ಸಿನಿಮಾದ ಪ್ರತಿ ವಿಭಾಗದಲ್ಲೂ ವಿಜಯ್​ ಕೆಲಸ ವರ್ಕೌಟ್​ ಆಗಿದೆ. ಜನರ ನಾಡಿ ಮಿಡಿತವನ್ನ ಅರ್ಥಮಾಡಿಕೊಂಡು ವಿಜಯ್​ ಸಿನಿಮಾ ಮಾಡಿದ್ದಾರೆ. ಸಿನಿಮಾದಲ್ಲಿ ಏನಿದ್ದರೆ ಜನ ನೋಡುತ್ತಾರೆ ಅನ್ನುವುದು ವಿಜಯ್​ಗೆ ಚೆನ್ನಾಗಿ ತಿಳಿದಿದೆ. ವಿಜಯ್ ನಿರ್ದೇಶನ ಅವರ ಮೇಲೆ ಭರವಸೆ ಹುಟ್ಟಿಸುತ್ತದೆ. ಅವರ ನಟನೆಯೂ ಕೂಡ ಪಾತ್ರಕ್ಕೆ ತಕ್ಕಂತೆ ಗಾಂಭೀರ್ಯತೆಯಿಂದ ಕೂಡಿದೆ.

    ಇದನ್ನೂ ಓದಿ: Duniya Vijay: Salaga ಚಿತ್ರತಂಡಕ್ಕೆ ಜೊತೆಯಾದ ಪುನೀತ್​ ರಾಜ್​ಕುಮಾರ್

    ಕಲಾವಿದರ ಅದ್ಭುತ ನಟನೆಯೆ ಸಿನಿಮಾಗೆ ಪ್ಲಸ್​​

    ಖಡಕ್ ಪೊಲೀಸ್ ಅಧಿಕಾರಿ ಪಾತ್ರದಲ್ಲಿ 'ಡಾಲಿ' ಧನಂಜಯ್‌ ಮಿಂಚಿದ್ದಾರೆ. ಸಾವಿತ್ರಿ ಪಾತ್ರ ಮಾಡಿರುವ ಸುಧಿ ಪ್ರೇಕ್ಷಕರಿಗೆ ಸಖತ್ ಕಿಕ್​ ನೀಡುತ್ತಾರೆ. ಕೆಂಡ ಪಾತ್ರಧಾರಿ ಶ್ರೇಷ್ಠ ತೆರೆ ಮೇಲೆ ಇರುವಷ್ಟು ಸಮಯ ಅಬ್ಬರಿಸಿದ್ದಾರೆ. ಇನ್ನೂ ಯಶ್ ಶೆಟ್ಟಿ, ನೀನಾಸಂ ಅಶ್ವತ್ಥ್, ಚನ್ನಕೇಶವ, ಸಂಪತ್, ಜಹಾಂಗೀರ್, ಉಷಾ, ಕಾಂತರಾಜ್‌ ಎಲ್ಲರೂ ಕೂಡ ತಮ್ಮ ಪಾತ್ರಗಳಿಗೆ ಜೀವ ತುಂಬಿದ್ದಾರೆ. ಸಲಗ ಫ್ಲಾಶ್​​ಬ್ಯಾಕ್​ನಲ್ಲಿ ವಿಜಯ ಅವರ ಬಾಲ್ಯದ ಪಾತ್ರ ಮಾಡಿರುವ ಶ್ರೀಧರ್​ ​ಸಿಕ್ಕ ಪಾತ್ರವನ್ನ ಬಳಸಿಕೊಂಡಿದ್ದಾರೆ. ಸಿನಿಮಾದ ಸೆಕೆಂಡ್ ಹಾಫ್​ನಲ್ಲಿ ಶ್ರೀಧರ್​ ಮಿಂಚಿದ್ದಾರೆ. ರೌಡಿಸಂ ಕಥೆ ಹೊಂದಿರುವ ಸಿನಿಮಾ ಆಗಿರುವುದರಿಂದ ಹೀರೋಯಿನ್​ ಪಾತ್ರಕ್ಕೆ ಅಷ್ಟೊಂದು ಸ್ಕೋಪ್​ ಇಲ್ಲ. ಕೆಲ ಸೀನ್​ಗಳಿಗಷ್ಟೇ ನಟಿ ಸಂಜನಾ ಆನಂದ್ ಕಾಣಿಸಿಕೊಂಡಿದ್ದು, ಗಮನ ಸೆಳೆಯುತ್ತಾರೆ.

    ‘ಸಲಗ’ ಸಿನಿಮಾದ ರಿಯಲ್​ ಹೀರೋ ಚರಣ್​ ರಾಜ್​

    ಸಿನಿಮಾದ ಮೊದಲ ದೃಶ್ಯದಿಂದ ಕೊನೆ ದೃಶ್ಯದವರೆಗೂ ಕಣ್ಣಿಗೆ ಕಾಣಿಸದಿದ್ದರೂ ಚರಣ್​ ರಾಜ್​ ಸಖತ್​ ಸೌಂಡ್​ ಮಾಡಿದ್ದಾರೆ. ತಮ್ಮ ವಿಭಿನ್ನ ಮ್ಯೂಸಿಕ್​​ನಿಂದಲೇ ಸಿನಿಮಾವನ್ನ ತೂಗಿಸಿಕೊಂಡು ಹೋಗಿದ್ದಾರೆ. ಸಿನಿಮಾದಲ್ಲಿ ಹಿನ್ನಲೆ ಸಂಗೀತವೇ ಹೈಲೆಟ್ಸ್​​. ಸೂರಿ ಅಣ್ಣ.. ಸಲಗ ಟೈಟಲ್​ ಟ್ರ್ಯಾಕ್​ ಹಾಡುಗಳು ಇಷ್ಟವಾಗುತ್ತೆ.

    ಡೈಲಾಗ್ಸ್​ಗಳೇ ಸಿನಿಮಾಗೆ ಪ್ಲಸ್​- ಮೈನಸ್​

    ಹೌದು, ರೌಡಿಸಂ ಕಥಾಹಂದರ ಹಿನ್ನಲೆ ಸಂಭಾಷಣೆಯಲ್ಲಿ ಸಾಕಷ್ಟು ಅವಾಚ್ಯ ಶಬ್ದಗಳನ್ನ ಬಳಸಲಾಗಿದೆ. ಇದು ಫ್ಯಾಮಿಲಿ ಪ್ರೇಕ್ಷರಿಗೆ ಇರಿಸು ಮುರಿಸು ಉಂಟು ಮಾಡುತ್ತದೆ. 'ಟಗರು' ಸಿನಿಮಾದಿಂದ ಖ್ಯಾತಿ ಪಡೆದಿದ್ದ ಮಾಸ್ತಿ, ಸಂಭಾಷಣೆ ವಿಚಾರದಲ್ಲಿ ಇಲ್ಲೂ ಸದ್ದು ಮಾಡಿದ್ದಾರೆ. ಸಂಭಾಷಣೆಯೇ 'ಸಲಗ' ಚಿತ್ರದ ಪ್ಲಸ್​ ಹಾಗೂ ಮೈನಸ್​ ಎನ್ನಬಹುದು. ಶಿವಸೇನ ಕ್ಯಾಮರಾ ಹಿಂದೆ ತಮ್ಮ ಕೈಚಳಕ ತೋರಿದ್ದಾರೆ.

    (ವರದಿ - ವಾಸುದೇವ್​.ಎಂ)
    Published by:Soumya KN
    First published: