Yash - Radhika Pandit: ಮಗಳ ಮುಡಿ ಕೊಟ್ಟು ದೇವರ ಹರಕೆ ತೀರಿಸಿದ ಯಶ್​-ರಾಧಿಕಾ ದಂಪತಿ

ರಾಕಿಂಗ್ ಸ್ಟಾರ್ ಯಶ್​ 'ಕೆಜಿಎಫ್​ ಚಾಪ್ಟರ್​ 2' ಸಿನಿಮಾ ಶೂಟಿಂಗ್​ನಲ್ಲಿ ಬ್ಯುಸಿಯಾಗಿದ್ದಾರೆ. ಸಿನಿಮಾ ಕೆಲಸಗಳು ಪೂರ್ಣಗೊಳ್ಳುವ ಹಂತಕ್ಕೆ ಬಂದು ನಿಂತಿದೆ. ಈ ಮಧ್ಯೆ ಯಶ್ ತಮ್ಮ​ ಕುಟುಂಬದವರಿಗೂ ಹೆಚ್ಚಿನ ಸಮಯ ಕೊಡುತ್ತಿದ್ದಾರೆ. ಎರಡನೇ ಮಗು ಜನಿಸಿದಾಗ ಯಶ್​ ಶೂಟಿಂಗ್​ನಿಂದ ಬ್ರೇಕ್​ ಪಡೆದುಕೊಂಡು ಸಂಪೂರ್ಣವಾಗಿ ಕುಟುಂಬದ ಜೊತೆ ಸಮಯ ಕಳೆದಿದ್ದರು. ಈಗ ಸಿನಿಮಾ ಕೆಲಸಗಳ ಮಧ್ಯೆಯೂ ಯಶ್ ಕುಟುಂಬ ಸಮೇತ ಮೈಸೂರಿನ ನಂಜುಂಡೇಶ್ವರ ದೇವಾಲಯಕ್ಕೆ ಭೇಟಿ‌ ನೀಡಿದ್ದಾರೆ.

ಯಶ್​ ದೇವರ ಮೇಲೆ ಸಾಕಷ್ಟು ಭಕ್ತಿ ಹೊಂದಿದ್ದಾರೆ. ಹೀಗಾಗಿ, ಅವರು ಆಗಾಗ ದೇವಾಲಯಗಳಿಗೆ ಭೇಟಿ ನೀಡುತ್ತಿರುತ್ತಾರೆ. ಯಶ್ ತಮ್ಮ ಮಗಳ ಮುಡಿ ಕೊಡಿಸುವ ಹರಕೆ ಹೊತ್ತಿದ್ದರು. ಆ ಹರಕೆ ತೀರಿಸಲೆಂದು ಯಶ್ ಮತ್ತು ರಾಧಿಕಾ ಪಂಡಿತ್ ಇಂದು ಮಗಳು ಆಯ್ರಾ ಜೊತೆ ಆಗಮಿಸಿದ್ದರು. ಮಗಳ ಮುಡಿ ಒಪ್ಪಿಸುವ ಮೂಲಕ ಹರಕೆ ತೀರಿಸಿದರು.

ದೇವಾಲಯದ ಗರ್ಭಗುಡಿಯ ಮುಂಭಾಗದಲ್ಲಿ  ಕುಳಿತು‌ ಯಶ್- ರಾಧಿಕಾ ಪಂಡಿತ್​ ನಂಜುಂಡೇಶ್ವರನಿಗೆ ನಮಿಸಿದರು. ಮುಂಜಾನೆಯೇ ದೇವಾಲಯದಲ್ಲಿ ಯಶ್ ಮತ್ತು ರಾಧಿಕಾ ನೋಡಿ ಅಭಿಮಾನಿಗಳು ಸಂತಸಪಟ್ಟರು. ಅಷ್ಟೇ ಅಲ್ಲ ರಾಕಿ ಭಾಯ್​ಗೆ ಜೈಕಾರ ಕೂಡ ಹಾಕಿದರು.

ಈಗಾಗಲೇ 'ಕೆಜಿಎಫ್​ ಚಾಪ್ಟರ್​ 2' ಸಿನಿಮಾ ತಂಡ ಈಗಾಗಲೇ ಕುಂಬಳಕಾಯಿ ಒಡೆಯುವ ಸಂಭ್ರಮದಲ್ಲಿದ್ದು, ಪೋಸ್ಟ್ ಪ್ರೊಡಕ್ಷನ್ ಕೆಲಸಗಳಿಗೆ ಚಾಲನೆ ನೀಡಿದೆ. ಮೂಲಗಳ ಪ್ರಕಾರ ದಸರಾ ಹಬ್ಬಕ್ಕೆ ಅಂದರೆ ಅಕ್ಟೋಬರ್ 23ಕ್ಕೆ 'ಕೆಜಿಎಫ್ 2' ತೆರೆಗೆ ಬರಲಿದೆಯಂತೆ.