ವಿವಾದದಲ್ಲಿ ರಕ್ಷಿತ್​ ಶೆಟ್ಟಿ ಸಿನಿಮಾ; ಟೈಟಲ್​ ಬದಲಾಯಿಸುತ್ತಾರಾ ಸಿಂಪಲ್ ಸ್ಟಾರ್​?

ಸಿನಿಮಾ ಇಂಡಸ್ಟ್ರಿಯಲ್ಲಿ ಟೈಟಲ್​ ವಿವಾದಗಳೇನು ಹೊಸದಲ್ಲ. ಯಾರಾದರೂ ಸಿನಿಮಾ ಘೋಷಣೆ ಮಾಡಿದ ನಂತರದಲ್ಲಿ ಅದು ನಮ್ಮ ಟೈಟಲ್​ ಎಂದು ಕೆಲವರು ಮುಂದೆ ಬಂದಿರುವ ಸಾಕಷ್ಟು ಉದಾಹರಣೆಗಳಿವೆ. ಕನ್ನಡ ಸಿನಿಮಾ ಇಂಡಸ್ಟ್ರಿಯಲ್ಲಿ ಈ ರೀತಿಯ ಸಾಕಷ್ಟು ಘಟನೆಗಳು ನಡೆದಿವೆ. ಈಗ ರಕ್ಷಿತ್ ಶೆಟ್ಟಿ ನಟನೆಯ ಸಿನಿಮಾದ ಟೈಟಲ್​ ಕೂಡ ವಿವಾದಕ್ಕೀಡಾಗಿದೆ. ಅವರು ನಟಿಸಬೇಕಿರುವ ರಿಚ್ಚಿ ಸಿನಿಮಾ ಟೈಟಲ್​ ನಮ್ಮದು ಎಂದು ನಿರ್ದೇಶಕರೊಬ್ಬರು ಆರೋಪ ಮಾಡಿದ್ದಾರೆ.

ಉಳಿದವರು ಕಂಡಂತೆ ಸಿನಿಮಾದಲ್ಲಿ ರಕ್ಷಿತ್​ ಶೆಟ್ಟಿ ರಿಚ್ಚಿ ಹೆಸರಿನ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದರು. ಈಗ ಅದೇ ಪಾತ್ರದ ಹೆಸರಲ್ಲಿ ಸಿನಿಮಾ ಬರುತ್ತಿದೆ. ಈಗ ಈ ಸಿನಿಮಾ ಶೀರ್ಷಿಕೆ ನಮ್ಮದು ಎಂದು ಹೇಮಂತ್​ ಹೆಸರಿನ ನಿರ್ದೇಕರೊಬ್ಬರು ಕನ್ನಡ ಚಲನಚಿತ್ರ ವಾಣಿಜ್ಯ ಮಂಡಳಿಗೆ ದೂರು ನೀಡಿದ್ದಾರೆ.

ನಾನು​ ಎರಡು ವರ್ಷಗಳ ಹಿಂದೆಯೇ ರಿಚ್ಚಿ ಸಿನಿಮಾ ಕೈಗೆತ್ತಿಕೊಂಡಿದ್ದೆ. ಈಗಾಗಲೇ ಶೇ.70 ಶೂಟಿಂಗ್ ಕೂಡ ಪೂರ್ಣಗೊಂಡಿದೆ. ಹೀಗಿರುವಾಗ ರಕ್ಷಿತ್​ ಸಿನಿಮಾಗೂ ಅದೇ ರೀತಿಯ ಹೆಸರಿಟ್ಟರೆ ಹೇಗೆ ಎನ್ನುವ ಪ್ರಶ್ನೆ ಹೇಮಂತ್​ ಅವರದ್ದು. ಅಲ್ಲದೆ, ಈ ಬಗ್ಗೆ ದೂರು ನೀಡಿದರೂ ಯಾವುದೇ ಪ್ರಯೋಜನ ಆಗಿಲ್ಲ ಎನ್ನುತ್ತಾರೆ ಹೇಮಂತ್.

ಸದ್ಯ ರಕ್ಷಿತ್​ ಶೆಟ್ಟಿ ಚಾರ್ಲಿ-777 ಸಿನಿಮಾದಲ್ಲಿ ನಟಿಸುತ್ತಿದ್ದಾರೆ. ಈ ಚಿತ್ರ ಶ್ವಾನ ಹಾಗೂ ಮನುಷ್ಯನ ಬಾಂಧವ್ಯದ ಬಗ್ಗೆ ಹೇಳಲಾಗುತ್ತಿದೆ. ಹೀಗಾಗಿ, ಈ ಸಿನಿಮಾ ಮೇಲೆ ಸಾಕಷ್ಟು ನಿರೀಕ್ಷೆ ಇಟ್ಟುಕೊಳ್ಳಲಾಗಿದೆ. ಈ ಚಿತ್ರದ ನಂತರದಲ್ಲಿ ಅವರು ರಿಚ್ಚಿ ಸಿನಿಮಾ ಕೈಗೆತ್ತಿಕೊಳ್ಳಲಿದ್ದಾರೆ ಎನ್ನಲಾಗಿದೆ. ರಿಚ್ಚಿ ಸಿನಿಮಾದಲ್ಲಿ ಉಳಿದವರು ಕಂಡಂತೆ ಸಹಾಯ ನಿರ್ದೇಶಕ ರಾಹುಲ್​ ಈ ಚಿತ್ರಕ್ಕೆ ಆಕ್ಷನ್​ ಕಟ್​ ಹೇಳುತ್ತಿದ್ದಾರೆ.