'ರೂಲ್ ಮಾಡೋನೇ ನಾನು': ಹೊಸ ದಾಖಲೆ ಸೃಷ್ಟಿಸಿದ ಪವರ್ ಸ್ಟಾರ್ 'ಯುವರತ್ನ' ಟೀಸರ್..!

ಸ್ಯಾಂಡಲ್​ವುಡ್​ನಲ್ಲಿ ಸಖತ್ ಸೌಂಡ್ ಮಾಡಿದ್ದ ಯುವರತ್ನ ಇದೀಗ ಮತ್ತೊಮ್ಮೆ ಎಲ್ಲರ ಗಮನ ಸೆಳೆದಿದೆ. ದಸರಾ ಹಬ್ಬದಂದು ಬಿಡುಗಡೆಯಾಗಿದ್ದ ಈ ವಿಡಿಯೋ ತುಣುಕಿನಲ್ಲಿನ ಪವರ್​ ಸ್ಟಾರ್ ಪುನೀತ್ ರಾಜ್​ ಕುಮಾರ್ ಅವರ ಪವರ್​ಫುಲ್ ಎಂಟ್ರಿ ಸಿನಿಪ್ರಿಯರಿಗೆ ಹೊಸ ಅನುಭವ ನೀಡಿತ್ತು.

ಚಿತ್ರದಲ್ಲ ರಗ್ಬಿ ಆಟಗಾರನಾಗಿ ಕಾಣಿಸಿಕೊಂಡಿದ್ದ ಅಪ್ಪು ಎಂಟ್ರಿಯಲ್ಲೇ ಮೋಡಿ ಮಾಡಿದ್ದರು. ಇನ್ನು ಸಂತೋಷ್ ಆನಂದ್​ರಾಮ್ ಅವರ ನಿರ್ದೇಶನ ಮತ್ತೊಮ್ಮೆ ಮನಮೋಹಕವಾಗಿ ಮೂಡಿಬಂದಿದೆ ಎಂಬ ಮಾತುಗಳು ಕೇಳಿ ಬಂದಿತ್ತು.

ಈ ದುನಿಯಾದಲ್ಲಿ ಮೂರು ಥರ ಗಂಡಸರು ಇರುತ್ತಾರೆ. ರೂಲ್​ನ ಫಾಲೋ ಮಾಡೋರು. ರೂಲ್​ನ ಬ್ರೇಕ್ ಮಾಡೋರು. ಮೂರನೇ ಅವರು ನನ್ ಥರ ರೂಲ್​ ಮಾಡೋರು ಎಂಬ ಡೈಲಾಗ್​ ಅಪ್ಪು ಅಭಿಮಾನಿಗಳಂತು ಹೊಸ ರೋಮಾಂಚನ ನೀಡಿತ್ತು. ಇದೀಗ ಖುದ್ದು ಅಪ್ಪುವೇ ರೂಲ್ ಮಾಡಿದ್ದಾರೆ. ಅಂದರೆ ಯುವರತ್ನ ಟೀಸರ್ ಸ್ಯಾಂಡಲ್​ವುಡ್​ನಲ್ಲಿ ವಿಭಿನ್ನ ದಾಖಲೆಯೊಂದನ್ನು ಬರೆದಿದೆ.

ಈ ಸಿನಿಮಾದ ಟೀಸರ್‌ ಇದುವರೆಗೂ 31 ಲಕ್ಷಕ್ಕೂ ಅಧಿಕ ಬಾರಿ ವೀಕ್ಷಣೆಗೊಳಪಟ್ಟಿದೆ. ಅಲ್ಲದೆ ಯುವರತ್ನನಿಗೆ 1.34 ಲಕ್ಷ ಜನರು ಲೈಕ್ ಒತ್ತಿದ್ದಾರೆ. ಇದರೊಂದಿಗೆ ಜನರ ಪ್ರತಿಕ್ರಿಯೆ ಹೊಸ ದಾಖಲೆಯನ್ನು ಬರೆದಿದೆ. ಯುವರತ್ನ ಟೀಸರ್​ಗೆ 64 ಸಾವಿರಕ್ಕೂ ಅಧಿಕ ಕಾಮೆಂಟ್ಸ್‌ಗಳು ಸಿಕ್ಕಿವೆ. ಕನ್ನಡ ಚಿತ್ರವೊಂದರ ಟೀಸರ್‌ಗೆ ಇಷ್ಟೊಂದು ಪ್ರಮಾಣದಲ್ಲಿ ಕಾಮೆಂಟ್ಸ್‌ ಬಂದಿರುವುದು ಇದೇ ಮೊದಲು. ಆ ಮೂಲಕ ಮೊದಲ ಎಂಟ್ರಿಯಲ್ಲೇ ಅಪ್ಪು ಪವರ್ ತೋರಿಸಿದ್ದಾರೆ. ಇಂತಹದೊಂದು ವಿಶೇಷ ದಾಖಲೆ ನಿರ್ಮಿಸಿದ ಖುಷಿಯನ್ನು ಖುದ್ದು ಹೊಂಬಾಳೆ ಫಿಲಂಸ್ ಅಭಿಮಾನಿಗಳೊಂದಿಗೆ ಹಂಚಿಕೊಂಡಿದ್ದಾರೆ.

ಶಿಕ್ಷಣ ವ್ಯವಸ್ಥೆಯ ಕುರಿತ ಕಥೆ ಯುವರತ್ನದಲ್ಲಿರಲಿದ್ದು, ಪವರ್​ ಸ್ಟಾರ್ ಪುನೀತ್ ಜೊತೆ ಖ್ಯಾತನಟ ಪ್ರಕಾಶ್ ರಾಜ್, ರಾಧಿಕಾ ಶರತ್ ಕುಮಾರ್ ಬಣ್ಣಹಚ್ಚಿದ್ದಾರೆ. ಇನ್ನು ದೂದ್​ಪೇಡ ದಿಗಂತ್ , 'ಇಂತೀ ನಿನ್ನ ಪ್ರೀತಿಯ' ಚಿತ್ರ ಖ್ಯಾತಿಯ ನಟಿ ಸೋನು ಗೌಡ ಪ್ರಮುಖ ಪಾತ್ರದಲ್ಲಿ ಎಂಟ್ರಿ ಕೊಡಲಿದ್ದಾರೆ.

ಹಾಗೆಯೇ ಚಿತ್ರದಲ್ಲಿ ಕಾಲಿವುಡ್​ ನಟಿ ಸಯೇಶಾ ನಾಯಕಿಯಾಗಿ ಅಭಿನಯಿಸುತ್ತಿದ್ದಾರೆ. ಇದರೊಂದಿಗೆ ಸೋನು ಗೌಡರ ಎಂಟ್ರಿಯು ಚಿತ್ರವು ತ್ರಿಕೋನ ಪ್ರೇಮಕಥೆಯನ್ನು ಹೇಳಲಿದೆಯೇ ಎಂಬ ಕುತೂಹಲಕಾರಿ ಪ್ರಶ್ನೆಯನ್ನು ಸಿನಿಪ್ರಿಯರಲ್ಲಿ ಹುಟ್ಟುಹಾಕಿದೆ.

'ರಾಜಕುಮಾರ' ಚಿತ್ರದ ಬಳಿಕ ಸಂತೋಷ್ ಆನಂದ್​ರಾಮ್ ನಿರ್ದೇಶಿಸುತ್ತಿರುವ ಈ ಚಿತ್ರದಲ್ಲಿ ಪುನೀತ್ ಕಾಲೇಜು ಕುಮಾರನಾಗಿ ಬಣ್ಣ ಹಚ್ಚುತ್ತಿದ್ದು, 'ರಾಜರತ್ನ'ನಿಗೆ ಟಕ್ಕರ್ ಕೊಡುವ ಪಾತ್ರದಲ್ಲಿ ಡಾಲಿ ಧನಂಜಯ್ ಕಾಣಿಸಲಿದ್ದಾರೆ ಎನ್ನಲಾಗಿದೆ. ಇನ್ನು ಮತ್ತೊಂದು ಪ್ರಮುಖ ಪಾತ್ರದಲ್ಲಿ 'ತ್ರಿ ಈಡಿಯಟ್ಸ್' ಚಿತ್ರದ ಪ್ರೊಫೆಸರ್ ಬಾಲಿವುಡ್ ನಟ ಬೊಮನ್ ಹಿರಾನಿ ಸಹ ಬಣ್ಣಹಚ್ಚುತ್ತಿದ್ದಾರೆ. ಭರ್ಜರಿ ಹಿಟ್ ಆಗಿದ್ದ ಟೀಸರ್ ಇದೀಗ ವಿಭಿನ್ನ ರೀತಿಯಲ್ಲಿ ಯೂಟ್ಯೂಬ್​​ನಲ್ಲಿ ದಾಖಲೆ ಬರೆಯುವ ಮೂಲಕ ಯುವರತ್ನ ಚಿತ್ರದ ಮೂರನೇ ಅವರು ನನ್ ಥರ ರೂಲ್​ ಮಾಡೋರು ಎಂಬ ಡೈಲಾಗ್​ ಅನ್ನು ಮತ್ತೆ ನೆನಪಿಸಿದೆ.


ಇದನ್ನೂ ಓದಿ: ರಾಕಿಂಗ್ ದಂಪತಿಗೆ ಗಂಡು ಮಗು: ಜೂನಿಯರ್ ಯಶ್​ಗೆ ಹೆಸರು ಕೂಡ ಫಿಕ್ಸ್​?

ಬಿಗ್ ಬಿ ನೀಡಿದ ಬಿಗ್ ದೀಪಾವಳಿ ಪಾರ್ಟಿಯಲ್ಲಿ ಕಾಣಿಸಿಕೊಂಡ ದಕ್ಷಿಣ ಭಾರತದ ಸ್ಟಾರ್ ನಟ..!