Act 1978 Trailer: ಕುತೂಹಲ ಹೆಚ್ಚಿಸಿದೆ ಮಂಸೋರೆ ನಿರ್ದೇಶನದ ಈ ಚಿತ್ರದ ಟ್ರೇಲರ್​ ..!

ಕೊರೋನಾ ಕಾರಣದಿಂದಾಗಿ ಮುಚ್ಚಿದ್ದ ಚಿತ್ರಮಂದಿರ ಹಾಗೂ ಮಲ್ಟಿಪ್ಲೆಕ್ಸ್​ಗಳು ತೆರೆದಿವೆ. ಆದರೂ ಜನರು ಚಿತ್ರಮಂದಿರಗಳಿಗೆ ಬರುತ್ತಿಲ್ಲ. ಇನ್ನು ಹಳೇ ಸಿನಿಮಾಗಳನ್ನೇ ರಿರಿಲೀಸ್​ ಮಾಡುತ್ತಿರುವುದು ಇದಕ್ಕೆ ಒಂದು ಕಾರಣ ಇರಬಹುದು ಎನ್ನಲಾಗುತ್ತಿದೆ. ಹೀಗಿರುವಾಗಲೇ ಕೆಲವು ಕನ್ನಡ ಸಿನಿಮಾ ತಂಡಗಳು ತಮ್ಮ ಹೊಸ ಚಿತ್ರಗಳನ್ನು ರಿಸ್ಕ್​ ತೆಗೆದುಕೊಂಡು ರಿಲೀಸ್​ ಮಾಡಲು ಮುಂದಾಗಿದ್ದಾರೆ. ಅವುಗಳಲ್ಲಿ ಒಂದು  ಮಂಸೋರೆ ಅವರ ಈ ಆ್ಯಕ್ಟ್​ 1978 ಸಿನಿಮಾ. ಒಟ್ಟಾರೆ ಹಳೆಯ ಸಿನಿಮಾಗಳು ರೀ-ರಿಲೀಸ್‌ ಆಗುತ್ತಿರುವ ಕಾರಣ ನಿರೀಕ್ಷಿಸಿದಷ್ಟು ಜನರಿಂದ ರೆಸ್ಪಾನ್ಸ್‌ ಸಿಗದಿದ್ದರೂ, ಹೊಸ ಸಿನಿಮಾಗಳು ತೆರೆಗೆ ಅಪ್ಪಳಿಸಿದಾಗ ನಿರೀಕ್ಷೆಯನ್ನು ಸಿನಿಪ್ರಿಯರು ಹುಸಿ ಮಾಡುವುದಿಲ್ಲ ಎಂಬ ನಂಬಿಕೆ ಚಿತ್ರತಂಡದ್ದು.ಈ ಚಿತ್ರದ ಪೋಸ್ಟರ್ ರಿಲೀಸ್​ ಆದಾಗಲೇ ಪ್ರೇಕ್ಷಕರಲ್ಲಿ ಕುತೂಹಲ ಹೆಚ್ಚಿತ್ತು. ಈಗ ಈ ಸಿನಿಮಾದ ಟ್ರೇಲರ್​ ರಿಲೀಸ್​ ಆಗಿದ್ದು, ಪ್ರೇಕ್ಷಕರಿಮದ ಉತ್ತಮ ಪ್ರತಿಕ್ರಿಯೆ ಪಡೆದುಕೊಳ್ಳುತ್ತಿದೆ.

ಈಗಾಗಲೇ ರಿಲೀಸ್​ ಆಗಿರುವ ಚಿತ್ರದ ಪೋಸ್ಟರ್‌ ಮತ್ತು ಟೈಟಲ್‌ ಚಿತ್ರದ ಕಥಾವಸ್ತುವಿನ ಬಗ್ಗೆ ಪ್ರೇಕ್ಷಕರಲ್ಲಿ ಕುತೂಹಲ ಮೂಡಿಸಿದೆ. ಅವುಗಳ ಜೊತೆಗೆ ಈಗ ಆ್ಯಕ್ಟ್​ 1978 ಸಿನಿಮಾದ ಟ್ರೇಲರ್​ ಸಹ ಸೇರಿಕೊಂಡಿದೆ.



ಆ್ಯಕ್ಟ್​ 1978 ಸಿನಿಮಾ ಟ್ರೇಲರ್​ ಅನ್ನು ಪುನೀತ್​ ರಾಜ್​ಕುಮಾರ್ ಅವರು ರಿಲೀಸ್​ ಮಾಡಿದ್ದಾರೆ. ಇದರಲ್ಲಿ ಇಬ್ಬರು ಸಾಮಾನ್ಯರು ಸರ್ಕಾರದಿಂದ ತಮಗೆ ಸಿಗಬೇಕಾಗಿರುವ ಸವಲತ್ತುಗಳಿಗಾಗಿ ಸರ್ಕಾರಿ ಕಚೇರಿಗಳಿಗೆ ಚಪ್ಪಲಿ ಸೆವೆಸುತ್ತಾರೆ. ಸ್ಪಂದಿಸದ ವ್ಯವಸ್ಥೆ ಹಾಗೂ ಸರ್ಕಾರಿ ಅಧಿಕಾರಿಗಳ ವಿರುದ್ಧ ತಿರುಗಿ ಬೀಳುತ್ತಾರೆ. ಗರ್ಭಿಣಿಯಾಗಿ ಕಾಣಿಸಿಕೊಂಡಿರುವ ಯಜ್ಞ ಶೆಟ್ಟಿ ಹೊಟ್ಟೆಗೆ ಬಾಂಬ್​ ಕಟ್ಟಿಕೊಂಡು ಸರ್ಕಾರಿ ಕಚೇರಿಯನ್ನೇ ಹೈಜಾಕ್​ ಮಾಡುತ್ತಾರೆ. ಅದೇ ಈ ಸಿನಿಮಾದ ಕತೆ.



ಮಂಸೋರೆ ನಿರ್ದೇಶನದ, ದೇವರಾಜ್‌ ಆರ್‌ ನಿರ್ಮಾಣದ ಆ್ಯಕ್ಟ್‌ 1978 ಚಿತ್ರದಲ್ಲಿ ಯಙ್ಞ ಶೆಟ್ಟಿ, ಬಿ ಸುರೇಶ್‌, ಪ್ರಮೋದ್‌ ಶೆಟ್ಟಿ, ಅಚ್ಯುತ್‌ ಕುಮಾರ್‌, ಶ್ರುತಿ, ದತ್ತಣ್ಣ, ಸಂಚಾರಿ ವಿಜಯ್‌, ಶೋಭರಾಜ್‌, ಅವಿನಾಶ್‌ ಪ್ರಮುಖ ಪಾತ್ರಗಳಲ್ಲಿ ನಟಿಸಿದ್ದಾರೆ.



ಇನ್ನು ಈ ಚಿತ್ರದ ಪೋಸ್ಟರ್​ ರಿಲೀಸ್​ ಆದಾಗ ಪ್ರೇಕ್ಷಕರು, ಆ್ಯಕ್ಟ್‌ 1978 ಅಂದರೇನು? ಕಾಯ್ದೆಯನ್ನೇ ಸಿನಿಮಾ ಟೈಟಲ್‌ ಮಾಡಲು ಕಾರಣವೇನು? ಎಂಬ ಪ್ರಶ್ನೆಗಳೂ ಚಿತ್ರರಸಿಕರನ್ನು ಕಾಡಲಾರಂಭಿಸಿದ್ದವು. ಆದರೆ ಆ ಎಲ್ಲ ಪ್ರಶ್ನೆಗಳಿಗೂ ಈ ಟ್ರೇಲರ್​ನಲ್ಲಿ ಉತ್ತರ ಸಿಗದಿದ್ದರೂ, ಅವರ ನಿರೀಕ್ಷೆಯನ್ನು ದುಪ್ಪಟ್ಟು ಮಾಡಿದೆ. ಇನ್ನೇನು ಇದೇ ತಿಂಗಳು ಈ ಸಿನಿಮಾವನ್ನು ಪ್ರೇಕ್ಷಕರು ಚಿತ್ರ ಮಂದಿರಗಳಲ್ಲೇ ನೋಡಬಹುದಾಗಿದೆ.