Karnam Malleswari Biopic: ಕರಣಂ ಮಲ್ಲೇಶ್ವರಿ ಪಾತ್ರದಲ್ಲಿ ನಟಿಸಲಿದ್ದಾರಂತೆ ಈ ಬಾಲಿವುಡ್​ ನಟಿ..!

ಬಾಲಿವುಡ್​ನಲ್ಲಿ ಈಗಾಗಲೇ ಸಾಧನೆ ಮಾಡಿದ ಕ್ರೀಡಾಪಟುಗಳ ಜೀವನಾಧಾರಿತ ಸಿನಿಮಾಗಳು ತೆರೆಕಂಡಿವೆ. ಇನ್ನು ಕೆಲವರ ಸಿನಿಮಾಗಳು ಆರಂಭಿಕ ಹಂತದಲ್ಲಿವೆ. ಹೀಗಿರುವಾಗಲೇ ಟಾಲಿವುಡ್​ನಲ್ಲಿ ಕರಣಂ ಮಲ್ಲೇಶ್ವರಿ ಅವರ ಬಯೋಪಿಕ್​ ಸಿದ್ಧಗೊಳ್ಳುತ್ತಿದೆ. 

ಕ್ರೀಡಾಪಟುಗಳಾದ ಸಚಿನ್​, ಎಂ.ಎಸ್. ಧೋನಿ ಅವರ ಜೀವನಾಧಾರಿತ ಸಿನಿಮಾಗಳು ಈಗಾಗಲೇ ಬಿ-ಟೌನ್​ನಲ್ಲಿ ತೆರೆಕಂಡಿವೆ. ಕಪಿಲ್ ದೇವ್​ ಅವರ ಬಯೋಪಿಕ್​ '83' ತೆರೆ ಕಾಣುವ ಹಂತದಲ್ಲಿದೆ. ಇನ್ನು ವಿರಾಟ್​ ಕೊಹ್ಲಿ ಅವರ ಜೀವನಾಧಾರಿತ ಸಿನಿಮಾ ಬರಲಿದೆಯಂತೆ. ಮಹಿಳಾ ಕ್ರಿಕೆಟ್ ಆಟಗಾರ್ತಿ ಮಿಥಾಲಿ ಅವರ ಬಯೋಪಿಕ್​ ಸಹ ಸಿದ್ಧವಾಗುತ್ತಿದ್ದು 'ಶಹಬ್ಬಾಸ್ ಮಿಥು' ಎಂಬ ಟೈಟಲ್ ನೀಡಲಾಗಿದೆ. ಇದರಲ್ಲಿ ತಾಪ್ಸಿ ಪನ್ನು ನಟಿಸುತ್ತಿದ್ದಾರೆ.



ಈಗ ಟಾಲಿವುಡ್​ನಲ್ಲಿ ಕರಣಂ ಮಲ್ಲೇಶ್ವರಿ ಅವರ ಬಯೋಪಿಕ್​ ನಿರ್ಮಾಣವಾಗುತ್ತಿದ್ದು, ಇದು ಸಹ ಪ್ಯಾನ್​ ಇಂಡಿಯಾ ಮಟ್ಟದಲ್ಲಿ ಸಿದ್ಧಗೊಳ್ಳಲಿದೆ ಎಂದು ನಿರ್ಮಾಪಕರಾದ ಎವಿವಿ ಸತ್ಯನಾರಾಯಣ ಹಾಗೂ ಕೋನಾ ವೆಂಕಟೇಶ್​ ಅಧಿಕೃತವಾಗಿ ಪ್ರಕಟಿಸಿದ್ದಾರೆ. ಜೂನ್​ 1ರಂದು ಕರಣಂ ಮಲ್ಲೇಶ್ವರಿ ಅವರ ಹುಟ್ಟುಹಬ್ಬದಂದು ಸಿನಿಮಾದ ಪೋಸ್ಟರ್ ಬಿಡುಗಡೆ ಮಾಡಿರುವ ಚಿತ್ರತಂಡ ಈಗ ನಾಯಕಿಯ ಹುಡುಕಾಟದಲ್ಲಿದೆಯಂತೆ.

ಇದನ್ನೂ ಓದಿ: ಯೂಟ್ಯೂಬ್​ನಲ್ಲಿ ರಿಲೀಸ್ ಆಯ್ತು ವಿದ್ಯಾ ಬಾಲನ್​ ನಿರ್ಮಿಸಿ ನಟಿಸಿರುವ ಕಿರುಚಿತ್ರ..!

ಇದು ಪ್ಯಾನ್​ ಇಂಡಿಯಾ ಸಿನಿಮಾ ಆಗಿರುವ ಕಾರಣಕ್ಕೆ ನಾಯಕಿ ಪಾತ್ರದಲ್ಲಿ  ಪ್ರಿಯಾಂಕಾ ಚೋಪ್ರಾ ನಟಿಸಲಿದ್ದಾರೆ ಎಂದು ಹೇಳಲಾಗುತ್ತಿದೆ. ಈ ಹಿಂದೆ ಮೇರಿ ಕೋಮ್​ ಅವರ ಪಾತ್ರಕ್ಕೆ ಜೀವ ತುಂಬಿದ್ದ ಪ್ರಿಯಾಂಕಾ ಕರಣಂ ಮಲ್ಲೇಶ್ವರಿ ಬಯೊಪಿಕ್​ಗೆ ಸರಿಯಾದ ಆಯ್ಕೆ ಎಂದೂ ಹೇಳಲಾಗುತ್ತಿದೆಯಂತೆ.



ಈಗಾಗಲೇ ಈ ಪಾತ್ರಕ್ಕಾಗಿ ಚಿತ್ರತಂಡ ಕಂಗನಾ ಅವರನ್ನು ಸಂಪರ್ಕಿಸಿದ್ದು, ಅವರು ಒಲ್ಲೆ ಎಂದಿದ್ದಾರಂತೆ. 'ಪಂಗಾ' ಸಿನಿಮಾಗಾಗಿ ಬೆವರಿಳಿಸಿದ್ದ ಕಂಗನಾ ಈಗ ಮತ್ತೆ ವರ್ಕೌಟ್​ ಮಾಡಲಾಗುವುದಿಲ್ಲ ಎಂದು ನಿರಾಕರಿಸಿದ್ದಾರಂತೆ.

ಈಗಾಗಲೇ ಸಿನಿಮಾದ ನಿರ್ಮಾಪಕರು ಪ್ರಿಯಾಂಕಾ ಚೋಪ್ರಾ ಅವರನ್ನು ಭೇಟಿ ಮಾಡಿ ಕತೆ ಹೇಳಿದ್ದಾರಂತೆ. ಆದರೆ ಇನ್ನೂ ಪಿಗ್ಗಿ ಕಡೆಯಿಂದ ಉತ್ತರ ಸಿಕ್ಕಲ್ಲವಂತೆ. ಇನ್ನು ಸಂಜನಾ ರೆಡ್ಡಿ ನಿರ್ದೇಶನ ಮಾಡಲಿರುವ ಈ ಚಿತ್ರದ ಸ್ಕ್ರಿಪ್ಟ್​ ಕೆಲಸ ಮುಗಿದಿದೆಯಂತೆ.