ಆನ್​ಲೈನ್​ನಲ್ಲಿ ಹನಿಮೂನ್ ಮಾಡಿದ್ರೆ ಮಕ್ಕಳಾಗುತ್ತಾ? ಪ್ರಥಮ್ ಪ್ರಶ್ನೆ..!

ಒಳ್ಳೆ ಹುಡುಗ ಪ್ರಥಮ್ ಮನಸ್ಸಿಗೆ ಬಂದದ್ದನ್ನು ನೇರವಾಗಿ ಹೇಳುವ 'ದೇವ್ರಂಥ ಮನುಷ್ಯ'. ಅದರಲ್ಲೂ ಬಿಗ್ ಬಾಸ್ ವಿನ್ನರ್​ನ ಮಾತಿನಲ್ಲಿ ಹಾಸ್ಯದೊಂದಿಗೆ ಒಂದು ಸಂದೇಶವಿರುತ್ತದೆ. ಸದ್ಯ ಕೊರೋನಾ ಲಾಕ್​ಡೌನ್ ಹಿನ್ನೆಲೆಯಲ್ಲಿ ಮನೆಯಲ್ಲಿಯೇ ಕಾಲ ಕಳೆಯುತ್ತಿದ್ದಾರೆ 'ನಟಭಯಂಕರ'. ಅಂದರೆ ಮನೆಯಲ್ಲಿಯೇ ಕೂತು ಕಾಲ ಕಳೆದಿಲ್ಲ. ಬದಲಾಗಿ ಲಾಕ್​ಡೌನ್​ನಿಂದ ಸಂಕಷ್ಟಕ್ಕೀಡಾದವರಿಗೆ ಆಹಾರ ಸಾಮಾಗ್ರಿಗಳನ್ನು ವಿತರಿಸಿ ನೆರವಿನ ಹಸ್ತ ಕೂಡ ಚಾಚಿದ್ದಾರೆ.

ಈ ಸಂದರ್ಭದಲ್ಲಿ ಪ್ರಥಮ್ ಹೇಳಿದ ಒಂದು ಮಾತು ಸಿಕ್ಕಾಪಟ್ಟೆ ವೈರಲ್ ಆಗಿತ್ತು. ದಿನಸಿ ಪದಾರ್ಥಗಳನ್ನು ವಿತರಿಸುವ ವೇಳೆ ವಾಟರ್ ಬೇಕಾದ್ರೆ ಕೊಡ್ತೀನಿ ಆದರೆ ಕ್ವಾಟರ್ ಮಾತ್ರ ಕೊಡಲ್ಲ ಎಂದಿದ್ದರು. ಆದರೆ ಆ ಬಳಿಕ ಸರ್ಕಾರವೇ ಕ್ವಾಟರ್ ಕೊಡಲು ಲಾಕ್​ಡೌನ್ ಸಡಿಲಿಕೆ ಮಾಡಿದ್ದು ಬೇರೆ ವಿಷಯ. ಇದೀಗ ಮತ್ತೊಮ್ಮೆ ತನ್ನ ಹಾಸ್ಯಭರಿತ ಮಾತಿನೊಂದಿಗೆ ಸರ್ಕಾರ ನಡೆಗೆ ಬಗ್ಗೆ ಚಾಟಿ ಬೀಸಿದ್ದಾರೆ ಒಳ್ಳೆ ಹುಡುಗ.



ಹೌದು, ಕೊರೋನಾ ಲಾಕ್​ಡೌನ್​ನಿಂದ ಈಗ ಎಲವೂ ಆನ್‌ ಲೈನ್​ನಲ್ಲಿಯೇ ನಡೆಯುತ್ತಿದೆ. ಶಾಲೆಗಳು ಆನ್​ಲೈನ್ ಟೀಚಿಂಗ್ ಶುರುಮಾಡಿವೆ. ಶಿಕ್ಷಕರು ಮಾಡುವ ಪಾಠ, ಅಸೈನ್‌ಮೆಂಟ್, ಹೋಂವರ್ಕ್ ಮತ್ತು ಪರೀಕ್ಷೆಗಳೂ ಈಗ ಆನ್‌ ಲೈನ್​ನಲ್ಲಿಯೇ ಮಕ್ಕಳು ಕೇಳಿಸಿಕೊಳ್ಳುತ್ತಿದ್ದಾರೆ. ಈ ಬಗ್ಗೆ ಪ್ರಥಮ್ ಪ್ರತಿಕ್ರಿಯಿಸಿದ್ದಾರೆ.

'ಮುಖದ ಮುಂದೆ ಪಾಠ ಮಾಡಿದ್ರೆ ತಲೆಗೆ ಹತ್ತೋದು ಕಷ್ಟ. ಇನ್ನು ಆನ್​ಲೈನ್ ಕ್ಲಾಸ್ ಕೇಳಿ ಪರೀಕ್ಷೆ ಬರೆದರೆ ದೇವ್ರಿಗೇ ಪ್ರೀತಿ. ಹಳ್ಳಿಯಲ್ಲಿ ನೆಟ್​ವರ್ಕ್ ಸಮಸ್ಯೆ ಇರುತ್ತೆ. ಆನ್​ಲೈನ್​ನಲ್ಲಿ ಹನಿಮೂನ್ ಮಾಡಿದ್ರೆ ಮಕ್ಕಳಾಗುತ್ತಾ?' ಎಂದು ಸರ್ಕಾರದ ನಡೆಯನ್ನು ವ್ಯಂಗ್ಯದೊಂದಿಗೆ ಪ್ರಶ್ನಿಸಿದ್ದಾರೆ ಪ್ರಥಮ್. ಸದ್ಯ ಒಳ್ಳೆ ಹುಡುಗ ಹೇಳಿಕೆ ಸಿಕ್ಕಾಪಟ್ಟೆ ವೈರಲ್ ಆಗುತ್ತಿದೆ. ಹಾಗೆಯೇ 'ದೇವ್ರಂಥ ಮನುಷ್ಯ' ಹೇಳಿದ ಮಾತಿನಲ್ಲೂ ಪಾಯಿಂಟ್ ಇದೆ ಎನ್ನುತ್ತಿದ್ದಾರೆ ಅಭಿಮಾನಿಗಳು.