ಪಾಪ್​ಕಾರ್ನ್ ಮಂಕಿ ಟೈಗರ್ ಎಫೆಕ್ಟ್: ಮತ್ತೊಂದು ಸಿನಿಮಾ ಗಿಟ್ಟಿಸಿಕೊಂಡ ಧನಂಜಯ್

ಡಾಲಿ ಧನಂಜಯ್​ ಅಭಿನಯದ ‘ಪಾಪ್​ಕಾರ್ನ್​ ಮಂಕಿ ಟೈಗರ್​’ ಗಾಂಧೀ ನಗರದಲ್ಲಿ ಭಾರೀ ಸದ್ದು ಮಾಡುತ್ತಿದೆ. ದುನಿಯಾ ಸೂರಿ ನಿರ್ದೇಶನದ ಈ ಚಿತ್ರಕ್ಕೆ ಎಲ್ಲೆಡೆ ಮೆಚ್ಚುಗೆ ವ್ಯಕ್ತವಾಗುತ್ತಿದೆ. ಈ ಸಿನಿಮಾ ಹಿಟ್​ ಆದ ಬೆನ್ನಲ್ಲೇ ಧನಂಜಯ್​ಗೆ ಸಾಲು ಸಾಲು ಚಿತ್ರಗಳು ಬರುತ್ತಿವೆ. ಈಗ ಅವರು ಹೊಸ ಸಿನಿಮಾಗೆ ಸಹಿ ಹಾಕಿದ್ದಾರೆ!

ಅಷ್ಟಕ್ಕೂ ಧನಂಜಯ್​ ಹೊಸ ಸಿನಿಮಾಗೆ ಆ್ಯಕ್ಷನ್​ ಕಟ್​ ಹೇಳುತ್ತಿರುವವರು ಯಾರು ಗೊತ್ತಾ? ಸತ್ಯಪ್ರಕಾಶ್​. ಹೌದು, ಸ್ಯಾಂಡಲ್​ವುಡ್​ನಲ್ಲಿ ‘ರಾಮಾ ರಾಮಾ ರೇ’, ‘ಒಂದಲ್ಲ ಎರಡಲ್ಲ’ ಅಂಥ ಕ್ಲಾಸಿಕ್​ ಚಿತ್ರಗಳನ್ನು ನೀಡಿದ ಸತ್ಯಪ್ರಕಾಶ್​ ಈಗ ಡಾಲಿ ಮುಂದಿನ ಚಿತ್ರಕ್ಕೆ ನಿರ್ದೇಶನ ಮಾಡುತ್ತಿದ್ದಾರೆ.

ಅಂದಹಾಗೆ, ಧನಂಜಯ್​ ಮೊದಲು ಕಾಣಿಸಿಕೊಂಡಿದ್ದ ‘ಜಯನಗರ 4^th ಬ್ಲಾಕ್​’ ಕಿರುಚಿತ್ರವನ್ನು ನಿರ್ದೇಶನ ಮಾಡಿದ್ದು ಇದೇ ಸತ್ಯಪ್ರಕಾಶ್​. ಈಗ ಸಿನಿಮಾಗಾಗಿ ಇಬ್ಬರೂ ಒಟ್ಟಿಗೆ ಕೆಲಸ ಮಾಡುತ್ತಿದ್ದಾರೆ. ಈ ಚಿತ್ರದಲ್ಲಿ ಧನಂಜಯ್​ ಪಾತ್ರಕ್ಕೆ ಎರಡು ಶೇಡ್​ಗಳು ಇರಲಿವೆಯಂತೆ. ಸದ್ಯ, ಸಿನಿಮಾ ಕೆಲಸಗಳು ಪ್ರಾಥಮಿಕ ಹಂತದಲ್ಲಿದ್ದು, ಧನಂಜಯ್​ ಅಭಿನಯದ ‘ಬಡವ ರ‍್ಯಾಸ್ಕಲ್​’ ಸಿನಿಮಾ ಕೆಲಸಗಳು ಪೂರ್ಣಗೊಂಡ ನಂತರ ಈ ಚಿತ್ರ ಸೆಟ್ಟೇರಲಿದೆ.

ಸದ್ಯ, ಸತ್ಯಪ್ರಕಾಶ್​ ಕಮರ್ಷಿಯಲ್​ ಸಿನಿಮಾಗಳತ್ತ ಮುಖ ಮಾಡುತ್ತಿದ್ದಾರೆ. ಪುನೀತ್ ರಾಜ್​ಕುಮಾರ್​ ಅಭಿನಯದ ಮುಂದಿನ ಚಿತ್ರಕ್ಕೆ ಸತ್ಯಪ್ರಕಾಶ್​ ಆ್ಯಕ್ಷನ್​ ಕಟ್​ ಹೇಳುತ್ತಿದ್ದಾರೆ.

ಇದನ್ನೂ ಓದಿ: ಸೂರಿ ಸಿನಿಮಾ ತುಂಬಾನೇ ರಾ ಆಗಿದೆ; ಪಾಪ್​ಕಾರ್ನ್​ ಮಂಕಿ ಟೈಗರ್ ಟೀಸರ್​ ನೋಡಿ ಮೆಚ್ಚಿದ ಪುನೀತ್​

ಸದ್ಯ, ಧನಂಜಯ್​ ಪಾಪ್​ಕಾರ್ನ್​ ಮಂಕಿ ಟೈಗರ್​ ಗೆಲುವಿನ ಅಲೆಯಲ್ಲಿ ತೇಲುತ್ತಿದ್ದಾರೆ. ದುನಿಯಾ ಸೂರಿ  ನಿರ್ದೇಶನದ ಈ ಚಿತ್ರವನ್ನು ಸುಧೀರ್ ಕೆ.ಎಂ ನಿರ್ಮಿಸಿದ್ದಾರೆ. ಶೇಖರ್ ಎಸ್ ಛಾಯಾಗ್ರಹಣ, ಚರಣ್ ರಾಜ್ ಸಂಗೀತ ಸಂಯೋಜನೆ ಹಾಗೂ ದೀಪು ಎಸ್. ಕುಮಾರ್​ ಸಂಕಲನ ಚಿತ್ರಕ್ಕಿದೆ. ಡಾಲಿ ಧನಂಜಯ, ನಿವೇದಿತಾ, ಕಾಕ್ರೋಚ್, ನವೀನ್, ಅಮೃತಾ ಅಯ್ಯಂಗಾರ್, ಸಪ್ತಮಿ, ಮೋನಿಶಾ ನಾಡಿಗೇರ್ ಹಾಗೂ ಗೌತಮ್ ಚಿತ್ರದಲ್ಲಿ ಪ್ರಮುಖಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ.