Nenapina Hudugiye Song: ಯೋಗರಾಜ್​ ಭಟ್ರು 3 ಗಂಟೆ ಕುಳಿತು ಬರೆದ ಹೀರೋ ಚಿತ್ರದ ನೆನಪಿನ ಹುಡುಗಿಯೇ... ಹಾಡಿಗೆ ದನಿಯಾದ ವಿಜಯ ಪ್ರಕಾಶ್​..!

ರಿಷಭ್​ ಶೆಟ್ಟಿ ಅಭಿನಯದ ಬಹುನಿರೀಕ್ಷಿತ ಸಿನಿಮಾ ಹೀರೋ.... ಸದ್ಯಕ್ಕೆ ಸಿನಿಪ್ರಿಯಲ್ಲಿ ಟ್ರೇಲರ್​ ಮೂಲಕವೇ ಬೆಟ್ಟದಷ್ಟು ನಿರೀಕ್ಷೆ ಹಾಗೂ ಕುತೂಹಲ ಹುಟ್ಟುಹಾಕಿರುವ ಈ ಸಿನಿಮಾ ಮಾರ್ಚ್​ 5ಕ್ಕೆ ರಿಲೀಸ್ ಆಗಲಿದೆ. ರಿಷಭ್​ ಶೆಟ್ಟಿ ಫಿಲ್ಮ್ಸ್​ ನಿರ್ಮಾಣದ ಈ ಸಿನಿಮಾವನ್ನು ಭರತ್ ರಾಜ್​ ಎಂ ನಿರ್ದೇಶಿಸಿದ್ದಾರೆ. ಭರತ್​ ರಾಜ್​ ಈ ಸಿನಿಮಾದ ಮೂಲಕ ನಿರ್ದೇಶಕರಾಗಿ ಪರಿಚಯವಾಗುತ್ತಿದ್ದಾರೆ. ಇದರಲ್ಲಿ ರಿಷಭ್​ ಶೆಟ್ಟಿ ಹಾಗೂ ಗಾನವಿ ಲಕ್ಷ್ಮಣ್​ ನಟಿಸಿದ್ದಾರೆ. ಸಂಕ್ರಾಂತಿ ಹಬ್ಬದಂದು ಈ ಸಿನಿಮಾದ ಟ್ರೇಲರ್​ ರಿಲೀಸ್ ಮಾಡಲಾಗಿತ್ತು. ಸಿನಿಮಾದಲ್ಲಿ ವಿಲನ್​ ಆಗಿ ಪ್ರಮೋದ್​ ಶೆಟ್ಟಿ ಕಾಣಿಸಿಕೊಂಡಿದ್ದು, ಪ್ರಮೋದ್​ ಅವರನ್ನು ಚಕ್ರಾಧಿಪತಿ ರಾವಣನಿಗೆ ಹೋಲಿಕೆ ಮಾಡಲಾಗಿದೆ. ಲಂಕಾಸುರನಂತಿರುವ ಪ್ರಮೋದ್​ ಶೆಟ್ಟಿಯ ಅಡಿಯಾಳುಗಳಿಗೆ ಕ್ರೌರ್ಯವೇ ಕರ್ಮ, ನಿಷ್ಠೆಯಿಂದ ಕ್ರೌರ್ಯವನ್ನೇ ಕರ್ಮವನ್ನಾಗಿ ಮಾಡುವ ಅವರಿಗೆ ಬಿಸಿ ನೆತ್ತರು ಮೈ ಸೋಕಿದರೆ ಅವರಿಗೆ ಹಸಿರು. ಇಂತಹ ರಕ್ತಸಿಕ್ತ ಸಸ್ಪೆನ್ಸ್ ಕಥೆಯಲ್ಲಿ ಸೇಡು, ಮೋಸ, ಪ್ರೀತಿ, ದ್ವೇಷ ಎಲ್ಲವೂ ಇದೆ.

ಸ್ವರ್ಣದೋಕುಳಿಲಿರುವ ಲಂಕೆಯಲ್ಲಿನ ರಕ್ತಸಿಕ್ತ ಕಥೆಯೇ ಈ ಹೀರೋ. ಈ ಸಿನಿಮಾದಲ್ಲಿ ಒಟ್ಟು ನಾಲ್ಕು ಹಾಡುಗಳಿವೆ. ಅವುಗಳಲ್ಲಿ ಒಂದನ್ನು ಈಗ ಚಿತ್ರತಂಡ ರಿಲೀಸ್ ಮಾಡಿದೆ. ನಿನ್ನೆಯೇ ಈ ಹಾಡಿನ ಪುಟ್ಟ ತುಣುಕನ್ನು ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಳ್ಳಲಾಗಿತ್ತು.

View this post on Instagram

A post shared by Rishab Shetty Films (@rishabshettyfilms)

ಅಜನೀಶ್​ ಲೋಕನಾಥ್​ ಸಂಗೀತ ನೀಡಿರುವ ನೆನಪಿನ ಹುಡುಗಿಯೇ ಹಾಡಿಗೆ ಯೋಗರಾಜ ಭಟ್​ ಅವರು ಸಾಹಿತ್ಯ ನೀಡಿದ್ದಾರೆ. ಭಟ್ರು ಸತತ ಮೂರು ಗಂಟೆಗಳ ಕಾಲ ಕುಳಿತು ಈ ಹಾಡನ್ನು ಬರೆದಿದ್ದಾರಂತೆ. ಹೀಗೆಂದು ಕೆಲವೇ ಗಂಟೆಗಳ ಹಿಂದೆಯಷ್ಟೆ ಇನ್​ಸ್ಟಾಗ್ರಾಂನಲ್ಲಿ ಲೈವ್​ ಬಂದಿದ್ದ ರಿಷಭ್​ ಶೆಟ್ಟಿ ಮಾಹಿತಿ ನೀಡಿದ್ದಾರೆ. ಗಾಯಕ ವಿಜಯ ಪ್ರಕಾಶ್​ ಅವರು ದನಿಯಾಗಿರುವ ಈ ಲಿರಿಕಲ್​ ವಿಡಿಯೋ ಸದ್ಯ ಸಂಗೀತ ಪ್ರಿಯರಿಗೆ ಇಷ್ಟವಾಗುತ್ತಿದೆ.



ಸಿನಿಮಾದಲ್ಲಿರುವ ನಾಲ್ಕು ಹಾಡುಗಳಲ್ಲಿ ಎರಡನ್ನು ಯೋಗರಾಜ್​ ಭಟ್ಟರು ಬರೆದಿದ್ದಾರೆ.  ಮತ್ತೊಂದನ್ನು ಜಯಂತ್​ ಕಾಯ್ಕಿಣಿ ಬರೆದಿದ್ದಾರಂತೆ. 3 ಗಂಟೆಗಳಲ್ಲಿ ನನೆನಪಿನ ಹುಡುಗಿ... ಹಾಡನ್ನು ಬರೆದ ಯೋಗರಾಜ್​ ಭಟ್​ ಅವರು, ನಂತರ ಮತ್ತೊಂದು ಹಾಡನ್ನು ಒಂದೇ ಗಂಟೆಯಲ್ಲಿ ಬರೆದಿದ್ದಾರಂತೆ. ಅದು ಮತ್ತಷ್ಟು ಇಂಟೆನ್ಸ್​ ಆಗಿ ಮೂಡಿ ಬಂದಿದೆಯಂತೆ. ಸಿನಿಮಾ ರಿಲೀಸ್​ಗೆ 4ನಾಲ್ಕು ದಿನಗಳಿರುವಾಗ ಒಂದು ಹಾಡನ್ನು ರಿಲೀಸ್​ ಮಾಡಲಿದ್ದಾರಂತೆ ರಿಷಭ್​ ಶೆಟ್ಟಿ.

View this post on Instagram

A post shared by Rishab Shetty Films (@rishabshettyfilms)

ಸದ್ಯ ರಿಷಭ್​ ಶೆಟ್ಟಿ ಹಾಗೂ ಅವರ ಹೀರೋ ಚಿತ್ರತಂಡ ಕೊಚ್ಚಿಯಲ್ಲಿದ್ದಾರೆ. ಹಾಡು ರಿಲೀಸ್ ಆದ ನಂತರ ಬೆಂಗಳೂರಿಗೆ ಬರುತ್ತಿದ್ದೇವೆ ಎಂದಿದ್ದಾರೆ ರಿಷಭ್​. ಹೀರೋ ಸಿನಿಮಾದ ಪ್ರಚಾರ ಕಾರ್ಯ ಸಹ ಆರಂಭವಾಗಿದೆ. ಬೇರೆ ಬೇರೆ ರಾಜ್ಯಗಳಲ್ಲಿ ಹೀರೋ ರಿಲೀಸ್​ಗೆ ಪ್ಲಾನ್​ ಮಾಡಲಾಗುತ್ತಿದೆ.

ಹೀರೋ ಹಿಂದಿ ಡಬ್ಬಿಂಗ್​ ಹಕ್ಕು ಮಾರಾಟ

ಹಿಂದಿ ಡಬ್ಬಿಂಗ್​ ರೈಟ್ಸ್​ ಸೇಲಾಗಿದೆಯಂತೆ. ಪ್ಯಾನ್​ ಇಂಡಿಯಾ ಸಿನಿಮಾ ಮಾಡುವು ಅಷ್ಟು ಸುಲಭವಲ್ಲ. ಅದಕ್ಕೆ ದೊಡ್ಡ ಮಟ್ಟದ ಪ್ಲಾನ್​ ಬೇಕು. ಇಲ್ಲೇ ಕನ್ನಡ ಸಿನಿಮಾವನ್ನು ಹಿಟ್ ಮಾಡಿ, ಅದು ದೇಶ ಅಲ್ಲ ವಿದೇಶದವರೆಗೂ ತಲುಪಲಿದೆ ಎಂದಿದ್ದಾರೆ ರಿಷಭ್​ ಶೆಟ್ಟಿ.

300ಕ್ಕೂ ಹೆಚ್ಚು ಚಿತ್ರಮಂದಿರಗಳಲ್ಲಿ ತೆರೆ ಕಾಣಲಿದೆ ಹೀರೋ ಸಿನಿಮಾ 

ಜಯಣ್ಣ ಹಾಗೂ ಭುವನ್​ ಅವರು ಹೀರೋ ಸಿನಿಮಾದ ವಿತರಕರಾಗಿದ್ದಾರೆ. 75-100 ಸಿಂಗಲ್​ ಸ್ಕ್ರೀನ್​ ಹಾಗೂ ಎಲ್ಲ ಮಲ್ಟಿಪ್ಲೆಕ್ಸ್​ಗಳಲ್ಲಿ ಹೀರೋ ಸಿನಿಮಾ ರಿಲೀಸ್​ಗೆ ತಯಾರಿ ನಡೆದಿದೆ. ಒಟ್ಟಾರೆ 300ಕ್ಕೂ ಹೆಚ್ಚು ಚಿತ್ರಮಂದಿರಗಳಲ್ಲಿ ಈ ಸಿನಿಮಾ ಬಿಡುಗಡೆಯಾಗಲಿದೆ. ಇನ್ನು ಕನ್ನಡ ಸಿನಿಮಾವನ್ನೇ ದೇಶದ ಬೇರೆ ರಾಜ್ಯಗಳಲ್ಲೂ ರಿಲೀಸ್​ ಮಾಡಲು ಸಿದ್ಧತೆ ನಡೆಯುತ್ತಿದೆಯಂತೆ.

ಇದನ್ನೂ ಓದಿ: ವಿವಾದದಲ್ಲಿ ಪೊಗರು ಸಿನಿಮಾ: ವಿವಿಧ ಸಂಘಟನೆಗಳಿಂದ ಹೋರಾಟದ ಎಚ್ಚರಿಕೆ

ರಿಷಭ್​ ಶೆಟ್ಟಿ ಅವರ ಕೈಯಲ್ಲಿರುವ ಪ್ರಾಜೆಕ್ಟ್​ಗಳ ವಿಷಯಕ್ಕೆ ಬಂದರೆ, ಹೀರೋ ಹೊರತಾಗಿ ಹರಿಕಥೆ ಅಲ್ಲ ಗಿರಿಕಥೆ, ನಾತುರಾಮ್, ಮಹನಿಯರೇ ಮಹಿಳೆಯರೇ, ಕೌ ಬಾಯ್ ಕೃಷ್ಣ, ಗರುಡ ಗಮನ ವೃಷಭ ವಾಹನ, ಬೆಲ್‌ ಬಾಟಂ 2 ಚಿತ್ರಗಳಲ್ಲಿ ರಿಷಬ್ ಶೆಟ್ಟಿ ನಟಿಸುತ್ತಿದ್ದಾರೆ. ಇದರ ಜೊತೆ ರುದ್ರಪ್ರಯಾಗ ಎಂಬ ಚಿತ್ರವನ್ನು ನಿರ್ದೇಶಿಸುತ್ತಿದ್ದಾರೆ ಈ ಕೌ ಬಾಯ್​ ಕೃಷ್ಣ.