ಶೂಟಿಂಗ್​ ಇಲ್ಲದೆ ಹೊಸ ಬ್ಯುಸಿನೆಸ್​ ಶುರು ಮಾಡಿದ ‘ಮಾಣಿಕ್ಯ‘ ನಟಿ!

ಮಹಾಮಾರಿ ಕೊರೋನಾ ಅಟ್ಟಹಾಸ ದಿನೇ ದಿನೇ ಮುಂದುವರಿಯುತ್ತಲೇ ಇದೆ. ಇತ್ತ ಎಲ್ಲಾ ಚಿತ್ರರಂಗಗಳು ಸ್ತಬ್ಧವಾಗಿದೆ. ಬಾಕಿ ಇರುವ ಸಿನಿಮಾಗಳಿಗ ಶೂಟಿಂಗ್​ಗೆ ಅವಕಾಶ ನೀಡಿದರೂ ಹೆಚ್ಚಿನ ಚಿತ್ರತಂಡಗಳು ಸಿನಿಮಾ ಶೂಟಿಂಗ್​ ಮಾಡಲು ಹಿಂದೇಟು ಹಾಕುತ್ತಿವೆ. ಹೀಗಾಗಿ ಚಿತ್ರತಾರೆಯರು ಅತ್ತ ಶೂಟಿಂಗ್​ ಇಲ್ಲದೆ ಮನೆಯಲ್ಲಿ ಕುಳಿತು ಫ್ಯಾಮಿಲಿ ಜೊತೆಗೆ ಸಮಯ ಕಳೆಯುತ್ತಿದ್ದಾರೆ. ಹೀಗಿರುವಾಗ ಕನ್ನಡ ‘ಮಾಣಿಕ್ಯ’, ‘ರಣಂ’, ‘ವಿಸ್ಮಯ’ ಸಿನಿಮಾದಲ್ಲಿ ನಟಿಸಿದ ನಟಿ ವರಲಕ್ಷ್ಮೀ ಶರತ್​ ಕುಮಾರ್​ ಹೊಸ ಬ್ಯುಸಿನೆಸ್​ ಶುರುಮಾಡಿದ್ದಾರೆ.

ಕೊರೋನಾ ಸಮಯದಲ್ಲಿ ಸುಮ್ಮನೆ ಕೂರದ ನಟಿ ವರಲಕ್ಷ್ಮೀ ಬೇಕಿಂಗ್​ ಕಂಪೆನಿ ಶುರು ಮಾಡಿದ್ದಾರೆ. ಮೊದಲಿನಿಂದಲು ಅಡುಗೆಯಲ್ಲಿ ಅಪಾರ ಆಸಕ್ತಿ ಹೊಂದಿರುವ ನಟಿ ವರಲಕ್ಷ್ಮೀ ‘ಲೈಫ್​ ಆಫ್​​ ಪೈ’ ಎಂಬ ಚೀಸ್​ ಕೇಕ್​​​ಗಳನ್ನು ತಯಾರಿಸಿ ಮಾರಾಟ ಮಾಡುತ್ತಿದ್ದಾರೆ. ಆ ಮೂಲಕ ಲಾಕ್​ಡೌನ್​ ಸಮಯವನ್ನು ಸದುಪಯೋಗ ಪಡಿಸಿಕೊಳ್ಳುತ್ತಿದ್ದಾರೆ.

ಕೊರೋನಾ ಸಮಯದಲ್ಲಿ ಅನೇಕ ಬ್ಯುಸಿನೆಸ್​ಗಳು ನೆಲಕಚ್ಚಿ ಹೋಗಿವೆ. ಹೀಗಿರುವಾಗ ನಟಿ ವರಲಕ್ಷ್ಮೀ  ಪ್ರಾರಂಭಿಸಿದ ಬ್ಯುಸಿನೆಸ್​ ಲಾಭ ಕಾಣಬಹುದೇ ಎಂಬ ಪ್ರಶ್ನೆ ಮೂಡುವುದು ಸಹಜ. ಆದರೆ ಹಂತ ಹಂತವಾಗಿ ಲಾಭ ಕಾಣುತ್ತಿದ್ದಾರಂತೆ ನಟಿ. ಅನೇಕರು ಚೀಸ್ ​ಕೇಕ್​ ಅನ್ನು ಆರ್ಡರ್​ ಮಾಡುತ್ತಿದ್ದಾರಂತೆ. ಅಷ್ಟೇ ಅಲ್ಲದೆ ದಿನೇ ದಿನೇ ಲೈಫ್​ ಆಫ್​ ಪೈ ಚೀಸ್​ ಕೇಕ್​ ಜನಪ್ರಿಯತೆ ಪಡೆಯುತ್ತಿದೆಯಂತೆ.



ಸ್ಟಾರ್​ ನಟ-ನಟಿಯರು ಕೊರೋನಾ ಲಾಕ್​ಡೌನ್​ ಸಮಯದಲ್ಲಿ ಮನೆಯಲ್ಲಿ ಸುಮ್ಮನೆ ಕೂರಲಾಗದೆ ಏನಾದರೊಂದು ಕೆಲಸ ಮಾಡುತ್ತಿದ್ದಾರೆ. ಇನ್ನು ಕೆಲವು ನಟರು ಸಂಕಷ್ಟದಲ್ಲಿರುವ ಜನರಿಗೆ ಸಹಾಯ ಮಾಡುತ್ತಿದ್ದರೆ, ಮತ್ತಿತರು ಆನ್​ಲೈನ್​ ಕಾರ್ಯಕ್ರಮಗಳನ್ನು ಮಾಡುತ್ತಾ ಅದರ ಮೂಲಕ ಹಣ ಸಂಗ್ರಹಿಸುತ್ತ ಕೊರೋನಾ ದೇಣಿಗೆ ಸಂಗ್ರಹಿಸುತ್ತಿದ್ದಾರೆ. ಬಂದ ಹಣವನ್ನು ಸಂಕಷ್ಟದಲ್ಲಿರುವವರಿಗೆ ನೀಡುತ್ತಿದ್ದಾರೆ. ಅದರಂತೆ ನಟಿ ವರಲಕ್ಷ್ಮೀ ಚೀಸ್​ ಕೇಕ್​ಗಳನ್ನು ಸಿದ್ಧಪಡಿಸಿ ಮಾರಾಟ ಮಾಡುತ್ತಿದ್ದಾರೆ.