Rocking Star Yash: ಬೆಳ್ಳಂಬೆಳಗ್ಗೆ ಅಭಿಮಾನಿಗಳನ್ನು ಭೇಟಿ ಮಾಡಿದ ಯಶ್! ಶೀಘ್ರ ಸಿನಿಮಾ ಅನೌನ್ಸ್ ಮಾಡ್ತೀನಿ ಎಂದ ರಾಕಿ ಭಾಯ್

ರಾಕಿಂಗ್ ಸ್ಟಾರ್ ಯಶ್ (Rocking Star Yash) ಅವರು ಅಪಾರ ಅಭಿಮಾನಿಗಳ (Fans) ಪ್ರೀತಿ ಗಳಿಸಿದ್ದಾರೆ. ಕೆಜಿಎಫ್ ಹಾಗೂ ಕೆಜಿಎಫ್ 2 (KGF 2) ಸಿನಿಮಾಗಳ ಮೂಲಕ ಯಶ್ ಖ್ಯಾತಿ ಮತ್ತಷ್ಟು ಹೆಚ್ಚಾಗಿದೆ. ಸ್ಯಾಂಡಲ್​ವುಡ್ ಮಾತ್ರವಲ್ಲ ವಿದೇಶದಲ್ಲಿಯೂ ಅಭಿಮಾನಿಗಳನ್ನು ಗಳಿಸಿದ ಯಶ್ ಕೆಜಿಎಫ್ ಸಿನಿಮಾಗಳ ಮೂಲಕ ಪ್ಯಾನ್ ಇಂಡಿಯಾ ಸ್ಟಾರ್ ಆಗಿ ಹೊರಹೊಮ್ಮಿದರು. ಇದೀಗ ನಟ ಬೆಳ್ಳಂಬೆಳಗ್ಗೆ ಅಭಿಮಾನಿಗಳನ್ನು ಭೇಟಿ ಮಾಡಿದ್ದಾರೆ. ಗಾಲ್ಫ್ ಗ್ರೌಂಡ್ ಬಳಿಯ ಪ್ರೆಸ್ಟೀಜ್ ಅಪಾರ್ಟ್ ಮೆಂಟ್​ನ ಮುಂದೆ ಅಭಿಮಾನಿಗಳನ್ನು ಭೇಟಿ ಮಾಡಿದ್ದಾರೆ ಯಶ್.

ರಾಕಿಂಗ್ ಸ್ಟಾರ್ ಯಶ್ ಅವರನ್ನು ನೋಡಲು ಸಾವಿರಾರು ಅಭಿಮಾನಿಗಳು ಬಂದಿದ್ದರು. ಹುಟ್ಟುಹಬ್ಬದ ದಿನ ಸ್ಟಾರ್ ನಟರು ಅಭಿಮಾನಿಗಳನ್ನು ಭೇಟಿ ಮಾಡುವುದು ವಾಡಿಕೆ. ಆದರೆ ಈ ಸಲ ಯಶ್ ಅವರು ಫ್ಯಾಮಿಲಿ ಜೊತೆ ದುಬೈ ವೆಕೇಷನ್​ಗೆ ಹೋದ ಕಾರಣ ಅವರು ಅಭಿಮಾನಿಗಳನ್ನು ಭೇಟಿ ಮಾಡಲು ಸಾಧ್ಯವಾಗಿರಲಿಲ್ಲ.

ಈ ಹಿನ್ನೆಲೆಯಲ್ಲಿ ಫೆಬ್ರವರಿ 2ರಂದು ಯಶ್ ಅವರು ಅಭಿಮಾನಿಗಳನ್ನು ಭೇಟಿ ಮಾಡಿದ್ದಾರೆ. ಕರ್ನಾಟಕದ ಮೂಲೆ ಮೂಲೆಯಿಂದ ಬಂದಿದ್ದ ಅಭಿಮಾನಿಗಳು ಯಶ್ ಅವರನ್ನು ಭೇಟಿಯಾಗಿದ್ದಾರೆ.

ರಾಕಿಂಗ್ ಸ್ಟಾರ್ ಯಶ್

ಇದನ್ನೂ ಓದಿ: Raj B Shetty: ರಾಜ್ ಬಿ ಶೆಟ್ಟಿ ಬಿಗ್​ ಬಜೆಟ್ ಮೂವಿ! ಇದು ಲವ್ ಸ್ಟೋರಿ ಅಲ್ಲ

ಬಾಗಲಕೋಟೆ, ಧಾರವಾಡ, ಉತ್ತರ ಪ್ರದೇಶದಿಂದಲೂ ಯಶ್ ಅವರನ್ನು ನೋಡಲು ಅಭಿಮಾನಿಗಳು ಬಂದಿದ್ದರು. ಯಶ್ ಭೇಟಿಗೆ ಅಭಿಮಾನಿಗಳ ದಂಡೇ ಹರಿದು ಬಂದಿತ್ತು. ಕೆಲವು ಅಭಿಮಾನಿಗಳಿಗೆ ಯಶ್ ಅವರು ಆಹ್ವಾನ ಕೊಟ್ಡಿದ್ದರು. ಈ ಸುದ್ದಿ ತಿಳಿದು ಅಪಾರ ಸಂಖ್ಯೆಯಲ್ಲಿ ಅಭಿಮಾನಿಗಳು ಯಶ್ ಮನೆ ಬಳಿ ಸೇರಿದ್ದಾರೆ.

ಇಂದು ಬೆಳ್ಳಂಬೆಳಗ್ಗೆ ತಮ್ಮ ನಿವಾಸದ ಬಳಿ ನಟ ಅಭಿಮಾನಿಗಳನ್ನು ಭೇಟಿ  ಮಾಡಿದ್ದಾರೆ. ಕೆಲವು ಅಭಿಮಾನಿಗಳನ್ನು ಭೇಟಿ ಮಾಡಿ ಫೋಟೋಗೆ ಪೋಸ್ ಕೊಟ್ಟಿದ್ದಾರೆ. ಈ ಸಂದರ್ಭ ಸದ್ಯದಲ್ಲಿಯೇ ಯಶ್ 19 ಸಿನಿಮಾ ಅನೌನ್ಸ್ ಮಾಡುತ್ತೇನೆ ಎಂದು ನಟ ಹೇಳಿದ್ದಾರೆ.

ಯಶ್ 19 ನೇ ಸಿನಿಮಾಗೆ ಹೆಚ್ಚಿದ ಕುತೂಹಲ

ರಾಕಿ ಭಾಯ್ ಅವರ 19ನೇ ಸಿನಿಮಾ ಅನೌನ್ಸ್​ಮೆಂಟ್​ಗಾಗಿ ಕನ್ನಡ ಸಿನಿಪ್ರೇಕ್ಷಕರು ಮಾತ್ರವಲ್ಲದೆ ದೇಶಾದ್ಯಂತ ಅಭಿಮಾನಿಗಳು ಕಾಯುತ್ತಿದ್ದಾರೆ. ಅವರ ಬರ್ತ್​ಡೇ ದಿನ ಸಿನಿಮಾ ಅನೌನ್ಸ್ ಮಾಡುತ್ತಾರೆ ಎಂದು ಎಲ್ಲರೂ ನಿರೀಕ್ಷಿಸಿದ್ದರು. ಆದರೆ ಆ ನಿರೀಕ್ಷೆ ಹುಸಿಯಾಗಿದೆ.

ಕೆಜಿಎಫ್ 2 ಸಿನಿಮಾ ಯಾವಾಗ ಬರುತ್ತೆ?

ಕೆಜಿಎಫ್ ಡೈರೆಕ್ಟರ್ ತೆಲುಗಿನಲ್ಲಿ ಬ್ಯುಸಿಯಾಗಿದ್ದಾರೆ. ಇತ್ತ ಹೊಂಬಾಳೆ ಫಿಲ್ಮ್ಸ್ ಕೂಡಾ ಕಾಂತಾರ 2 ಸಿನಿಮಾ ನಿರ್ಮಾಣದಲ್ಲಿ ಬ್ಯುಸಿಯಾಗಿದೆ. ಹಾಗಾಗಿ ಸದ್ಯ ಯಶ್ ಅಭಿನಯದ ಕೆಜಿಎಫ್ 3 ಸಿನಿಮಾ ಬಿಡುಗಡೆಯಾಗುತ್ತಿಲ್ಲ. ಬದಲಾಗಿ ಈ ಸಿನಿಮಾ 2026ರ ವೇಳೆಗೆ ರಿಲೀಸ್ ಆಗಲಿದೆ ಎಂದು ತಿಳಿದು ಬಂದಿದೆ.

ಕೆಜಿಎಫ್ ಪಾರ್ಟ್ 5 ಕೂಡ ಬರುತ್ತೆ

‘ಕೆಜಿಎಫ್ 3 ಸಿನಿಮಾದ ಪ್ರೀ ಪ್ರೊಡೆಕ್ಷನ್ ಕೆಲಸ ಆರಂಭವಾಗಿಲ್ಲ. ಆದ್ರೆ ಕೆಜಿಎಫ್​ ಪಾರ್ಟ್ 3 ಪಕ್ಕಾ ಎಂದು ವಿಜಯ್ ಕಿರಂಗದೂರ್​ ಹೇಳಿದ್ದಾರೆ. ಇನ್ನು ಕೆಜಿಎಫ್ ಪಾರ್ಟ್​ 3 ಬಳಿಕ ಕೆಜಿಎಫ್​ ಸೀರಿಸ್​ನಲ್ಲಿ ಐದು ಪಾರ್ಟ್​​ಗಳು ಬರಬಹುದು ಎಂದು ನಿರ್ಮಾಪಕರು ಹೇಳಿದ್ದಾರೆ. ಕೆಜಿಎಫ್​ ಸೀರಿಸ್ ಹೀಗೆ ಮುಂದಿವರಿಯುತ್ತಾ? ಹಾಗಾದ್ರೆ ಕೆಜಿಎಫ್ ಪಾರ್ಟ್ 5 ಬರೋದಕ್ಕೆ ಎಷ್ಟು ವರ್ಷಬೇಕು ಎಂದು ಅಭಿಮಾನಿಗಳು ಪ್ರಶ್ನೆ ಮಾಡ್ತಿದ್ದಾರೆ.

ಕೆಜಿಎಫ್ ಸೀರಿಸ್​ನಲ್ಲಿ ಬದಲಾಗ್ತಾರಂತೆ ಹೀರೋ

ಕೆಜಿಎಫ್ 1, ಕೆಜಿಎಫ್ 2 ನಲ್ಲಿ ರಾಕಿ ಭಾಯ್ ಆಗಿ ಮಿಂಚಿದ್ದ ಯಶ್ ಕೆಜಿಎಫ್ 3ನಲ್ಲೂ ಅವರೇ ಇರ್ತಾರೆ ಎನ್ನಲಾಗ್ತಿದೆ. ಆದ್ರೆ ಮುಂದಿನ ಕೆಜಿಎಫ್ ಸರಣಿಯಲ್ಲಿ ಯಶ್ ನಾಯಕರಾಗಿರೋದಿಲ್ಲ. ಯಶ್ ಬದಲು ನಾಯಕನ ಪಾತ್ರವನ್ನು ಬೇರೆಯವರು ನಿರ್ವಹಿಸಲಿದ್ದಾರೆ ಎಂದು ನಿರ್ಮಾಪಕ ವಿಜಯ್ ಕಿರಂದೂರು ಹೇಳಿದ್ದಾರೆ.