ಸ್ಟಾರ್​ ನಟರ ಕನ್ನಡ ಸಿನಿಮಾಗಳ ಒಟಿಟಿ ರಿಲೀಸ್​ ಬಗ್ಗೆ ಮಾಹಿತಿ ನೀಡಿದ ಕಾರ್ತಿಕ್​ ಗೌಡ..!

ಕೊರೋನಾ ಯಾವ ರೀತಿ ಜನರ ಜೀವ ಹಾಗೂ ಜೀವನದೊಂದಿಗೆ ಆಟವಾಡುತ್ತಿದೆ ಎಂದು ತಿಳಿದೇ ಇದೆ. ಕೊರೋನಾ ಸೋಂಕು ಹರಡುವ ಭೀತಿಯಿಂದ ಆರಂಭವಾದ ಲಾಕ್​ಡೌನ್​ನಿಂದಾಗಿ ಸಾವಿರಾರು ಮಂದಿ ಕೆಲಸ ಕೆಳದುಕೊಳ್ಳುವುದರೊಂದಿಗೆ ದೇಶದ ಆರ್ಥಿಕತೆಯ ಮೇಲೂ ದುಷ್ಪರಿಣಾಮ ಬೀರಿದೆ. ಸಣ್ಣ ಸಣ್ಣ ಉದ್ಯಮ ನಡೆಸುತ್ತಿದ್ದವರು ತಮ್ಮ ಕಚೇರಿಯ ಬಾಗಿಲು ಮುಚ್ಚಿ ಮನೆಯಲ್ಲಿ ಕೂರುವಂತಾಗಿದೆ. ಕೊರೋನಾ ಕಾಟ ಸಿನಿರಂಗದ ಮೇಲೂ ಕಡಿಮೆಯಾಗಿಲ್ಲ. ಸುಮಾರು 7 ತಿಂಗಳ ಕಾಲ ಬಾಗಿಲು ಮುಚ್ಚಿದ್ದ ಚಿತ್ರಮಂದಿರಗಳು ಹಾಗೂ ಮಲ್ಟಿಪ್ಲೆಕ್ಸ್​ಗಳು ಈಗ ಬಾಗಿಲು ತೆರೆದಿವೆ. ಆದರೆ ನಿರೀಕ್ಷೆಗೆ ತಕ್ಕಂತೆ ಸಿನಿಪ್ರಿಯರು ಮಾತ್ರ ಸಿನಿಮಾ ನೋಡಲು ಬರುತ್ತಿಲ್ಲ. ಇದರ ಜೊತೆಗೆ ಥಿಯೇಟರ್​ನಲ್ಲಿ ಶೇ 50 ಮಂದಿಗೆ ಮಾತ್ರ ಚಿತ್ರ ವೀಕ್ಷಿಸಲು ಅವಕಾಶ ಕಲ್ಪಿಸಿ ಸರ್ಕಾರ ಹೊರಡಿಸುವ ಆದೇಶ ಬೇರೆ. ಇವೆಲ್ಲದರಿಂದ ಚಿತ್ರ ಪ್ರದರ್ಶಕರು ಒಂದು ಕಡೆ ನಷ್ಟದಲ್ಲಿದ್ದರೆ, ಮತ್ತೊಂದು ಕಡೆ ಸಿನಿಮಾ ನಿರ್ಮಾಪಕರು ಬಿಗ್ ಬಜೆಟ್​ ಹಾಗೂ ಸ್ಟಾರ್​ ನಟರ ಚಿತ್ರಗಳನ್ನು ರಿಲೀಸ್​ ಮಾಡಲು ಹಿಂದೆ ಮುಂದೆ ನೋಡುತ್ತಿದ್ದಾರೆ. 

ಜನರು ಸಿನಿಮಾ ನೋಡಲು ಚಿತ್ರಮಂದಿರಗಳಿಗೆ ಬರುತ್ತಿಲ್ಲ. ಇದರಿಂದಾಗಿ ಚಿತ್ರಮಂದಿರಗಳ ಮಾಲೀಕರು ನಷ್ಟ ಅನುಭವಿಸುತ್ತಿದ್ದಾರೆ. ಈ ಕಾರಣದಿಂದಾಗಿ ಸಿನಿಮಾ ಪ್ರದರ್ಶಕರು ಹೊಸ ಮಾದರಿ ಲಾಭ ಹಂಚಿಕೆಗೆ ಒತ್ತಾಯಿಸುತ್ತಿದ್ದಾರೆ. ಈ ಕುರಿತಾಗಿ ಚಿತ್ರ ಪ್ರದರ್ಶಕರು ಹಾಗೂ ಸಿನಿಮಾ ನಿರ್ಮಾಪಕರು ಈಗಾಗಲೇ ಮಾತುಕತೆ ನಡೆಸಿದ್ದಾರೆ.



ಮಲ್ಟಿಪ್ಲೆಕ್ಸ್​ಗಳಿಗೆ ನೀಡುವ ಲಾಭದ ಹಂಚಿಕೆಯಂತೆಯೇ ತಮಗೂ ನೀಡಬೇಕೆಂದು ಚಿತ್ರ ಪ್ರದರ್ಶಕರು ನಿರ್ಮಾಪಕರ ಮೇಲೆ ಒತ್ತರ ಹೇರುತ್ತಿದ್ದಾರೆ. ಆದರೆ ಚಿತ್ರಮಂದಿರಗಳ ಮಾಲೀಕರ ಒತ್ತಾಯವನ್ನು ನಿರ್ಮಾಪಕರು ಒಪ್ಪುತ್ತಿಲ್ಲವಂತೆ. ಇದರಿಂದಾಗಿ ಬಿಗ್ ಬಜೆಟ್​ ಸಿನಿಮಾಗಳು ಇನ್ನು ನೇರವಾಗಿ ಒಟಿಟಿ ಮೂಲಕ ರಿಲೀಸ್​ ಆದರೂ ಆಶ್ಚರ್ಯ ಪಡಬೇಕಿಲ್ಲ.

ಇದನ್ನೂ ಓದಿ: Puneeth Rajkumar: ಗೋಕರ್ಣದಲ್ಲಿ ಪುನೀತ್ ರಾಜ್​ಕುಮಾರ್​: ಕಡಲ ತೀರದಲ್ಲಿ ಸುತ್ತಾಡಿದ ಅಪ್ಪು..!

ಈ ಕುರಿತಂತೆ ಹೊಂಬಾಳೆ ಫಿಲಂಸ್​ನ ಕಾರ್ಯಕಾರಿ ನಿರ್ಮಾಪಕ ಕಾರ್ತಿಕ್ ಗೌಡ ಟ್ವೀಟ್ ಮಾಡಿದ್ದಾರೆ. ಎಲ್ಲ ಸರಿ ಹೋದರೆ, ಮುಂದಿನ ವಾರ ಹೊಸ ಸಿನಿಮಾಗಳ ಒಟಿಟಿ ರಿಲೀಸ್​ ಬಗ್ಗೆ ಪ್ರಕಟಿಸಲಿದ್ದೇವೆ ಎಂದಿದ್ದಾರೆ.

With the new theatre demands, its quite difficult. If all goes well, in the next week, we might have an announcement of a big film coming directly in OTT and many others to follow. https://t.co/pk4JTkcoae

— Karthik Gowda (@Karthik1423) January 7, 2021

ಚಿತ್ರ ಮಂದಿರಗಳ ಮಾಲೀಕರು ಹಾಗೂ ನಿರ್ಮಾಪಕರು ನಿನ್ನೆ ಸಭೆ ನಡೆಸಿದ್ದು, ಹೊಸ ಬೇಡಿಕೆ ವಿಚಾರವಾಗಿ ಚರ್ಚಿಸಿದ್ದಾರೆ. ಸಭೆಯಲ್ಲಿ ಕೆಜಿಎಫ್​, ಯುವರತ್ನ ನಿರ್ಮಾಪಕರಾದ ವಿಜಯ್​ ಕಿರಗಂದೂರ್​, ಹೊಂಬಾಳೆ ಫಿಲಂಸ್​ನ ಕಾರ್ಯಕಾರಿ ನಿರ್ಮಾಪಕ ಕಾರ್ತಿಕ್​ ಗೌಡ, ಸಲಗ ನಿರ್ಮಾಪಕ ಕೆ.ಪಿ. ಶ್ರೀಕಾಂತ್​, ಕೋಟಿಗೊಬ್ಬ 3 ಚಿತ್ರದ ಸೂರಪ್ಪ ಬಾಬು, ರಾಬರ್ಟ್​ ಚಿತ್ರದ ಉಮಾಪತಿ ಸೇರಿದಂತೆ ಹಲವಾರು ಮಂದಿ ಭಾಗಿಯಾಗಿದ್ದರು.

#Yuvarathnaa in theatres from 01-04-2021#YuvarathnaaReleaseDate@VKiragandur @SanthoshAnand15 @hombalefilms @MusicThaman @Karthik1423 @sayyeshaa @Dhananjayaka @diganthmanchale @KRG_Connects @divomovies @SMTollywood pic.twitter.com/B1UEBFAczz

— Puneeth Rajkumar (@PuneethRajkumar) January 1, 2021

ಸದ್ಯಕ್ಕೆ ಪುನೀತ್​ ಅಭಿನಯದ ಯುವರತ್ನ ಸಿನಿಮಾದ ರಿಲೀಸ್ ದಿನಾಂಕ ಪ್ರಕಟಿಸಲಾಗಿದೆ. ಉಳಿದಂತೆ ರಾಬರ್ಟ್​, ಕೋಟಿಗೊಬ್ಬ 3, ಸಲಗ, ಕೆಜಿಎಫ್​ ಚಾಪ್ಟರ್​ 2, ಭಜರಂಗಿ 2, ಪೊಗರು ಸೇರಿದಂತೆ ಹಲವಾರು ಬಿಗ್​ ಬಜೆಟ್​ ಚಿತ್ರಗಳು ತೆರೆ ಕಾಣಲು ತುದಿಗಾಲಿನಲ್ಲಿವೆ. ಇವುಗಳಲ್ಲಿ ಯಾವ ಚಿತ್ರಗಳು ಒಟಿಟಿ ಮೂಲಕ ರಿಲೀಸ್ ಆಗಲಿವೆ ಎಂದು ಸದ್ಯದಲ್ಲೇ ಬಹಿರಂಗವಾಗಲಿದೆ.