Kangana: ಆ ಸ್ಟಾರ್​ ನಟನ ಪತ್ನಿ ವಿಚ್ಛೇದನ ಕೊಟ್ಟಿದ್ದೇ ಡ್ರಗ್ಸ್​ನಿಂದ: ಸ್ಫೋಟಕ ಮಾಹಿತಿ ಕೊಟ್ಟ ಕಂಗನಾ..!

ಸುಶಾಂತ್​ ಸಿಂಗ್​ ಅವರ ಸಾವಿನ ಪ್ರಕರಣ ದಿನಕ್ಕೊಂದು ತಿರುವು ಪಡೆಯುತ್ತಿದ್ದು, ಸಿಬಿಐ ಇದರ ತನಿಖೆ ನಡೆಸುತ್ತಿದೆ. ಇದೇ ವೇಳೆ ಸುಶಾಂತ್​ ಸಾವಿಗೂ ಡ್ರಗ್ಸ್​ ಮಾಫಿಯಾಗೂ ಲಿಂಕ್​ ಇರಬಹುದು ಎಂದು ಹೇಳಲಾಗುತ್ತಿದೆ. ಹೀಗಿರುವಾಗಲೇ ನಟಿ ಕಂಗನಾ ಬಾಲಿವುಡ್​ನಲ್ಲಿರುವ ಡ್ರಗ್​ ಮಾಫಿಯಾ ಕುರಿತಂತೆ ಸಾಕಷ್ಟು ಮಾಹಿತಿ ಹಂಚಿಕೊಂಡಿದ್ದಾರೆ. 

ಬಾಲಿವುಡ್​ ಕ್ವೀನ್​ ಕಂಗನಾ ಸುದ್ದಿ ವಾಹಿನಿಯೊಂದಕ್ಕೆ ನೀಡಿರುವ ಸಂದರ್ಶನದಲ್ಲಿ ಬಾಲಿವುಡ್​ನಲ್ಲಿ ಡ್ರಗ್ಸ್​ ಹೇಗೆಲ್ಲ ಬಳಕೆಯಾಗುತ್ತದೆ ಹಾಗೂ ಇದರಲ್ಲಿ ದೊಡ್ಡ ದೊಡ್ಡ ಸೆಲೆಬ್ರಿಟಿಗಳು ಇದ್ದಾರೆ ಎನ್ನುವ ಕುರಿತು ಮಾಹಿತಿ ಹಂಚಿಕೊಂಡಿದ್ದಾರೆ. ಕಂಗನಾ ರನೋತ್​ ಬಣ್ಣದ ಲೋಕಕ್ಕೆ ಕಾಲಿಟ್ಟಾಗ ಹೇಗೆ ಅವರಿಗೂ ಬಲವಂತವಾಗಿ ಡ್ರಗ್ಸ್​ ನೀಡಲಾಗುತ್ತಿತ್ತು, ಅದರಿಂದ ಅವರು ಹೇಗೆ ಹೊರ ಬಂದರು. ಅವರಿಗೆ ಸಹಾಯ ಮಾಡಿದವರು ಯಾರೆಂದು ವಿವರವಾಗಿ ಈ ಸಂದರ್ಶನದಲ್ಲಿ ಹೇಳಿಕೊಂಡಿದ್ದಾರೆ.



ನಂತರ, ಬಾಲಿವುಡ್​ನ ಸ್ಟಾರ್​ ನಟರೊಬ್ಬರು ಯಾವ ಮಟ್ಟಕ್ಕೆ ಮಾದಕ ವ್ಯಸನಿಯಾಗಿದ್ದರು. ಅದರಿಂದ ಅವರ ಪತ್ನಿ ಹೇಗೆ ದೂರಾದರೂ ಎಂದು ಕಂಗನಾ ಹೇಳಿದ್ದಾರೆ. ಯಾವ ನಟನ ಹೆಸರನ್ನೂ ನೇರವಾಗಿ ತೆಗೆದುಕೊಳ್ಳದೆ ಕಂಗನಾ ಕೇವಲ ನಡೆದ ಘಟನೆಗಳನ್ನು ಮಾತ್ರ ವಿವರಿಸಿದ್ದಾರೆ.

ಇದನ್ನೂ ಓದಿ: Jaggesh: ಸ್ಯಾಂಡಲ್​ವುಡ್ ಡ್ರಗ್​ ಮಾಫಿಯಾ: ಕೆಲವರು ಮಾಡಿದ ತಪ್ಪಿಗೆ ಇಡೀ ಚಿತ್ರರಂಗವನ್ನು ದೂರಬೇಡಿ ಎಂದ ಜಗ್ಗೇಶ್​

ತಾನು ಸಿನಿಮಾವೊಂದರ ಶೂಟಿಂಗ್​ಗಾಗಿ ವಿದೇಶಕ್ಕೆ ಹೋಗಿದ್ದೆ. ಅಲ್ಲಿ ತನ್ನೊಂದಿಗೆ ನಟಿಸುತ್ತಿದ್ದ ನಾಯಕ ನಟ ಡ್ರಗ್ಸ್​ ತೆಗೆದುಕೊಳ್ಳುತ್ತಿದ್ದ, ಜೊತೆಗೆ ಅಲ್ಲಿ ಅವರಿಗಿದ್ದ ವಿದೇಶಿ ಸ್ನೇಹಿತರು ಹೇಗೆಲ್ಲ ಅವುಗಳನ್ನು ನೀಡುತ್ತಿದ್ದರು ಎಂದು ವಿವರಿಸಿದ್ದಾರೆ. ಈ ಸಿನಿಮಾದ ಚಿತ್ರೀಕರಣಕ್ಕೆ ಆ ನಟನ ಪತ್ನಿ ಸಹ ಬಂದಿದ್ದರು. ಅಲ್ಲಿ ನಟನಿಗಿದ್ದ ಡ್ರಗ್ಸ್​ ಅಭ್ಯಾಸ ಹಾಗೂ ಅವರಿಗೆ ಬೇರೆ ಹೆಣ್ಣುಮಕ್ಕಳೊಂದಿಗೆ ಇದ್ದ ಸಂಬಂಧಗಳನ್ನೆಲ್ಲ ನೋಡಿ, ನೊಂದು ವಿಚ್ಛೇಧನ ಪಡೆದರು ಎಂದು ಆರೋಪಿಸಿದ್ದಾರೆ ನಟಿ.

ಆ ವಿಚ್ಛೇದಿತ ನಟನೊಂದಿಗೆ ಕೆಲ ಸಮಯ ತಾನು ಡೇಟಿಂಗ್​ ಮಾಡಿದ್ದಾಗಿಯೂ, ನಂತರ ಆ ನಟ ನನ್ನ ಮೇಲೆ ಸುಳ್ಳು ಆರೋಪಗಳನ್ನು ಮಾಡಿ, ಜೈಲಿಗೆ ಕಳುಹಿಸುವ ಹುನ್ನಾರ ಮಾಡಿದ್ದ ಎಂದು ಹೇಳಿಕೊಂಡಿದ್ದಾರೆ. ಬಾಲಿವುಡ್​ನಲ್ಲಿ ನಡೆಯುವ ದೊಡ್ಡವರ ಪಾರ್ಟಿಗಳಲ್ಲಿ ಡ್ರಗ್ಸ್​ ಬಳಕೆ ಕಾಮನ್​ ಎಂದಿದ್ದಾರೆ ಕಂಗನಾ.

ಇದನ್ನೂ ಓದಿ: ಐದು ತಿಂಗಳ ನಂತರ ಓಣಂ ಹಬ್ಬಕ್ಕಾಗಿ ಅಮ್ಮನ ಮನೆಗೆ ಬಂದ ಮಲೈಕಾ ಅರೋರಾ..!

ಇನ್ನು ಡ್ರಗ್ಸ್​ ವಿಷಯವಾಗಿ ಹೀಗೆ ಬಹಿರಂಗವಾಗಿ ಮಾತನಾಡುತ್ತಿರುವ ತನಗೆ ಭದ್ರತೆ ಬೇಕೆಂದು ಕಂಗನಾ ಮನವಿ ಮಾಡಿದ್ದಾರೆ. ಆದರೆ ತನಗೆ ಮುಂಬೈ ಪೊಲೀಸರನ್ನು ಕಂಡರೆ ಭಯವಿರುವ ಕಾರಣದಿಂದ ಕೇಂದ್ರ ಅಥವಾ ಹಿಮಾಚಲ ಪ್ರದೇಶದ ವತಿಯಿಂದ ರಕ್ಷಣೆ ನೀಡುವಂತೆ ಕೋರಿದ್ದಾರೆ ಈ ನಟಿ.