ಮಲೆ ಮಹದೇಶ್ವರನ ಸನ್ನಿಧಿಯಲ್ಲಿ 'ಸಲಗ': ನವೀನ್ ಸಜ್ಜು ಸಂಯೋಜನೆಯ ಎರಡು ಹಾಡುಗಳು ಶೀಘ್ರದಲ್ಲೇ ರಿಲೀಸ್

ಸ್ಯಾಂಡಲ್​ವುಡ್​ನಲ್ಲಿ ಸೆಟ್ಟೇರಿದಾಗಲೇ ಸಖತ್ ಸೌಂಡ್​ ಮಾಡಿದ್ದ 'ಸಲಗ' ಮತ್ತೊಮ್ಮೆ ಘೀಳಿಟ್ಟಿದೆ. ಈ ಬಾರಿ ಅದು ಮಲೆ ಮಹದೇಶ್ವರ ಬೆಟ್ಟದಲ್ಲಿ ಎಂಬುದು ವಿಶೇಷ. ಹೌದು,  ದುನಿಯಾ ವಿಜಯ್ ನಿರ್ದೇಶಕ ಕಮ್ ನಾಯಕ ನಟನಾಗಿ ಕಾಣಿಸಿಕೊಳ್ಳುತ್ತಿರುವ ಸಲಗ ಮಾರ್ಚ್​ 25 ರಂದು ರಾಜ್ಯಾದ್ಯಂತ ತೆರೆಕಾಣಲಿದೆ.

ಅದಕ್ಕೂ ಮುನ್ನ ಜಬರ್ದಸ್ತ್​ ಹಾಡುಗಳನ್ನು ಕೇಳುಗರ ಮುಂದಿಡಲು ಸಲಗ ತಂಡ ಭರ್ಜರಿ ಪ್ಲ್ಯಾನ್ ಮಾಡಿಕೊಂಡಿದೆ. ಈ ಹಿನ್ನೆಲೆಯಲ್ಲಿ ಚಿತ್ರತಂಡ ಮಹದೇಶ್ವರನ ದರ್ಶನ ಪಡೆದು ವಿಶೇಷ ಪೂಜೆ ನೆರವೇರಿಸಿದರು.

ಈಗಾಗಲೇ ಸೂರಿ ಅಣ್ಣಾ..ಸಾಂಗ್ ಮೂಲಕ ಅಭಿಮಾನಿಗಳಿಗೆ ಕಿಕ್ಕೇರಿಸಿರುವ ಸಲಗ ತಂಡ ಈ ಬಾರಿ ಐ ಲವ್ ಯೂ ಸಂಜನಾ ಎಂದೇಳಲಿದೆ. ಅಂದರೆ ಬಹದ್ದೂರ್ ಚೇತನ್ ಕುಮಾರ್ ಬರೆದಿರುವ ಸಲಗ ಚಿತ್ರದ ಎರಡನೇ ಸಾಂಗ್ ಶೀಘ್ರದಲ್ಲೇ ಬಿಡುಗಡೆಯಾಗಲಿದೆ.


ಈ ಗೀತೆಗೆ ಗಾಯಕ ನವೀನ್ ಸಜ್ಜು ರಾಗ ಸಂಯೋಜಿಸಿರುವುದು ಇಲ್ಲಿ ವಿಶೇಷ. ಹಾಗೆಯೇ ಮತ್ತೊಂದು ಗೀತೆಗೂ ನವೀನ್ ಮ್ಯೂಸಿಕ್ ನೀಡಿದ್ದು, ಈ ಹಾಡಿಗೆ ಅರಸು ಅಂತಾರೆ ಸಾಹಿತ್ಯ ಬರೆದಿದ್ದಾರೆ. ಇನ್ನು ಈಗಾಗಲೇ ಮೋಡಿ ಮಾಡಿರುವ  ಸೂರಿ ಅಣ್ಣಾ...ಸಾಂಗ್​ ಮ್ಯೂಸಿಕ್​ನಲ್ಲೂ ಚರಣ್ ರಾಜ್ ಜೊತೆ ನವೀನ್ ಸಜ್ಜು ಕೈಜೋಡಿಸಿದ್ದರು.

ಸಲಗ ಟೀಸರ್​ ಈಗಾಗಲೇ ಸಿನಿಪ್ರಿಯರನ್ನು ಸೆಳೆದಿದ್ದು, ಅದರಲ್ಲೂ ವರ್ಲ್ಡ್​ ಯಾವುದೇ ಕಲರಲ್ಲಿದ್ದರೂ...ಈ ಅಂಡರ್​ವರ್ಲ್ಡ್​ ಮಾತ್ರ ಕೆಂಪು ಕಲರಲ್ಲಿರುತ್ತೆ...ಎಂಬ ರಕ್ತಪಾತದ ಮುನ್ಸೂಚೆನೆಯ ಖಡಕ್ ಡೈಲಾಗ್​ಗೆ​ ವಿಜಿ ಫ್ಯಾನ್ಸ್​ ಫಿದಾ ಆಗಿದ್ದಾರೆ.

ಈ ಚಿತ್ರದಲ್ಲಿ ದುನಿಯಾ ವಿಜಿ ಆನೆ ನಡೆದಿದ್ದೇ ದಾರಿ ಎಂಬಂತಹ ಖತರ್ನಾಕ್ ರೌಡಿ ಪಾತ್ರದಲ್ಲಿ  ಅಭಿನಯಿಸಿದರೆ, ಬ್ಲ್ಯಾಕ್ ಕೋಬ್ರಾಗೆ ಟಕ್ಕರ್ ಕೊಡುವ ಅವತಾರದಲ್ಲಿ ಡಾಲಿ ಧನಂಜಯ್ ಕಾಣಿಸುತ್ತಿದ್ದಾರೆ. 'ಟಗರು', 'ಯಜಮಾನ' ಸಿನಿಮಾದಲ್ಲಿ ನೆಗೆಟಿವ್ ಪಾತ್ರಗಳ ಮೂಲಕ ಅಭಿಮಾನಿಗಳನ್ನು ರಂಜಿಸಿದ 'ಮಿಠಾಯಿ ಸೂರಿ' ಧನಂಜಯ್ ಈ ಬಾರಿ ಮಾತ್ರ ಖಾಕಿಧಾರಿಯಾಗಿ ಕಾಣಿಕೊಳ್ಳಲಿದ್ದಾರೆ.

ದುನಿಯಾ ವಿಜಯ್​ ಅವರ ಚೊಚ್ಚಲ ಆ್ಯಕ್ಷನ್ ಕಟ್​ಗೆ ಟಗರು ನಿರ್ಮಾಪಕ ಕೆ.ಪಿ ಶ್ರೀಕಾಂತ್ ಬಂಡವಾಳ ಹೂಡಿದ್ದಾರೆ. ಇನ್ನು ಟಗರು ಚಿತ್ರಕ್ಕಾಗಿ ದುಡಿದ ತಂಡವೇ ಇಲ್ಲೂ ಜೊತೆಗೂಡಿದ್ದು, ಈ ಮೂಲಕ ಮತ್ತೊಂದು ಭರ್ಜರಿ ಹಿಟ್​ ಹುಡಕಾಟದಲ್ಲಿ ಚಿತ್ರತಂಡ.

ಹಾಗೆಯೇ ಚಿತ್ರದಲ್ಲಿ ನಾಯಕಿಯಾಗಿ ಸಂಜನಾ ಆನಂದ್ ಬಣ್ಣ ಹಚ್ಚಿದ್ದಾರೆ. ಅಲ್ಲದೆ  ಕೊಕ್ರೋಚ್ ಸುಧಿ, ಅಚ್ಯುತ್ ಕುಮಾರ್ ಅವರಂತಹ ಪ್ರತಿಭಾವಂತ ನಟರ ದಂಡೇ ಚಿತ್ರದಲ್ಲಿದೆ.  ಟೀಸರ್ ಮೂಲಕವೇ ಭಾರೀ ನಿರೀಕ್ಷೆ ಹುಟ್ಟುಹಾಕಿರುವ ಸಲಗದ ಅಸಲಿ ಘರ್ಜನೆ ವೀಕ್ಷಿಸಲು ಈ ತಿಂಗಳಾಂತ್ಯದವರೆಗೂ ಕಾಯಬೇಕಿದೆ.