ಕೊರೋನಾ ಎಫೆಕ್ಟ್​: ರಾಜ್ಯಾದ್ಯಂತ ಚಿತ್ರಮಂದಿರಗಳು ಸ್ವಯಂ ಬಂದ್​​

ರಾಜ್ಯದಲ್ಲಿ ಸೋಂಕಿನ ಸಂಖ್ಯೆ ಏರಿಕೆಯಾಗುತ್ತಿರುವ ಹಿನ್ನಲೆ ರಾಜ್ಯಾದ್ಯಂತ ಚಿತ್ರಮಂದಿರಗಳನ್ನು ಸ್ವಯಂ ಪ್ರೇರಿತವಾಗಿ ಮುಚ್ಚಲು ಥಿಯೇಟರ್​ ಮಾಲೀಕರು ನಿರ್ಧರಿಸಿದ್ದಾರೆ. ಸೋಂಕು ಹೆಚ್ಚಳ ಜೊತೆಗೆ ಜನರು ಕೂಡ ಸಿನಿಮಾ ಮಂದಿರಗಳತ್ತ ಮುಖ ಮಾಡುತ್ತಿಲ್ಲ. ಜೊತೆಗೆ ಯಾವುದೇ ಹೊಸ ಸಿನಿಮಾಗಳು ಬಿಡುಗಡೆಯಾಗುತ್ತಿಲ್ಲ. ಇದರಿಂದ ಚಿತ್ರ ಮಂದಿರ ನಿರ್ವಹಣೆ ಕಷ್ಟವಾಗುತ್ತಿದೆ. ಈ ಹಿನ್ನಲೆ ಈ ಕ್ರಮಕ್ಕೆ ಮುಂದಾಗಲಾಗಿದೆ ಎಂದು ವೀರೇಶ್​ ಚಿತ್ರಮಂದಿರದ ಮಾಲೀಕ ಕೆ ವಿ ಚಂದ್ರಶೇಖರ್​ ತಿಳಿಸಿದ್ದಾರೆ. ರಾಜ್ಯದಲ್ಲಿರುವ 650ಕ್ಕೂ ಹೆಚ್ಚೂ ಚಿತ್ರಮಂದಿಗಳನ್ನು ಇದೇ ಏಪ್ರಿಲ್​ 23ರಿಂದ ಬಂದ್​ ಮಾಡಲಾಗುವುದು. ಸೋಂಕು ಹೆಚ್ಚಾಗಿರುವ ಈ ಸಂದರ್ಭದಲ್ಲಿ ಸರ್ಕಾರವನ್ನು ಬೆಂಬಲ ಜೊತೆಗೆ ಅನಿವಾರ್ಯ ಕಾರಣದಿಂದ ಈ ನಿರ್ಧಾರ ಕೈಗೊಳ್ಳಲಾಗಿದೆ ಎಂದರು.

ಕಳೆದ ವರ್ಷ ಲಾಕ್​ಡೌನ್​ನಿಂದಾಗಿ ಚಿತ್ರ ಮಂದಿರಗಳು ನಷ್ಟ ಅನುಭವಿಸಿದ್ದವು. ಕಳೆದ ಫೆಬ್ರವರಿಯಿಂದ ಶೇ 50ರಷ್ಟು ಆಸನ ಭರ್ತಿಗೆ ಸರ್ಕಾರಗಳು ಅನುಮತಿ ನೀಡಿದ್ದವು. ಇದಾದ ಬಳಿಕ ಒಂದೆರಡು ಬಿಗ್​ ಬಜೆಟ್​ ಸಿನಿಮಾಗಳು ಬಿಡುಗಡೆಯಾಗಿದ್ದವು. ಇನ್ನೇನು ತುಸು ಚೇತರಿಕೆ ಕಾಣಲಿದೆ ಎಂಬ ಮಾಲೀಕರ ಲೆಕ್ಕಾಚಾರ ಮತ್ತೆ ಉಲ್ಟಾ ಆಗಿದೆ.


ಸೋಂಕು ಹೆಚ್ಚಳದ ಹಿನ್ನಲೆ ಕಳೆದ ಹದಿನೈದು ದಿನಗಳ ಹಿಂದೆ ಮತ್ತೆ ಸರ್ಕಾರ ಚಿತ್ರಮಂದಿಗಳಿಗೆ ಶೇ 50ರಷ್ಟು ಸೀಟ್​ ಭರ್ತಿಗೆ ಅವಕಾಶ ನೀಡಿತು. ಇದರಿಂದ ಮತ್ತೆ ಚಿತ್ರಮಂದಿರಗಳು ಮತ್ತೆ ಸಂಕಷ್ಟಕ್ಕೆ ಒಳಗಾದವು. ಸಿನಿಮಾ ಮಂದಿರಗಳಿಗೆ ಪೂರ್ಣ ಪ್ರಮಾಣದ ಭರ್ತಿ ಅವಕಾಶ ನೀದ ಹಿನ್ನಲೆ ಹಲವು ಚಿತ್ರಗಳು ಕೂಡ ಬಿಡುಗಡೆ ದಿನಾಂಕವನ್ನು ಕೂಡ ಮುಂದೂಡಿದೆ.

ಪ್ರೇಕ್ಷಕರು ಸಿನಿಮಾ ಮಂದಿರಗಳತ್ತ ಬಾರದ ಹಿನ್ನಲೆ ಚಿತ್ರ ಬಿಡುಗಡೆಯೇ ಇಲ್ಲದಿರುವ ಈ ಸಮಯದಲ್ಲಿ ನಿರ್ವಹಣೆ ಕೂಡ ಮಾಲೀಕರಿಗೆ ಕಷ್ಟವಾಗಿದೆ. ಅಲ್ಲದೇ ಈ ಸಮಯದಲ್ಲಿ ಚಿತ್ರ ಮಂದಿರ ನಿರ್ವಹಣಾಕಾರರ ಆರೋಗ್ಯ ಕಾಪಾಡುವುದು ಪ್ರಮುಖವಾಗಿದ್ದು, ಈ ನಿಟ್ಟಿನಲ್ಲಿ ಈ ಕ್ರಮಕ್ಕೆ ಮುಂದಾಗಲಿದೆ ಎಂದು ತಿಳಿಸಿದ್ದಾರೆ.