‘ಕೆಜಿಎಫ್ 2’ನಲ್ಲಿ ಸಂಜಯ್ ದತ್ ನಟಿಸ್ತಾರಾ?; ಹೌದು ಅಂತಾರೆ ಯಶ್!

‘ರಾಕಿಂಗ್ ಸ್ಟಾರ್​’ ಯಶ್​ ನಟನೆಯ ‘ಕೆಜಿಎಫ್​’ ಚಾಪ್ಟರ್​ 1 ಚಿತ್ರ ಹಲವು ದಾಖಲೆಗಳನ್ನು ಬರೆದಿದೆ. ಬಾಕ್ಸ್​ ಆಫೀಸ್​ನಲ್ಲಿ ಬರೋಬ್ಬರಿ 200 ಕೋಟಿ ರೂ. ಗಳಿಕೆ ಮಾಡಿದ ಹೆಮ್ಮೆ ‘ಕೆಜಿಎಫ್​’ ಚಿತ್ರದ್ದು. ಸದ್ಯ ಎಲ್ಲರ ದೃಷ್ಟಿ ‘ಕೆಜಿಎಫ್​ 2’ ಮೇಲೆ ನೆಟ್ಟಿದೆ. ಈಗಾಗಲೇ ಚಿತ್ರದ ಶೂಟಿಂಗ್​ಗೆ ಸಿದ್ಧತೆ ಕೂಡ ನಡೆಯುತ್ತಿದೆ. ಈ ನಡುವೆ ಯಶ್​ ಒಂದಷ್ಟು ವಿಚಾರಗಳನ್ನು ಖಚಿತಪಡಿಸಿದ್ದಾರೆ. ಇದು ಯಶ್​ ಅಭಿಮಾನಿಗಳ ಖುಷಿ ಹೆಚ್ಚಿಸಿದೆ.

‘ಕೆಜಿಎಫ್​ 2’​ನಲ್ಲಿ ಬಾಲಿವುಡ್​ ಹೀರೋ ಸಂಜಯ್​ ದತ್​ ನಟಿಸಲಿದ್ದಾರೆ ಎನ್ನುವ ಮಾತುಗಳಿದ್ದವು. ಆದರೆ, ಆ ಬಗ್ಗೆ ಚಿತ್ರದ ಯಾರೊಬ್ಬರೂ ಸ್ಪಷ್ಟನೆ ನೀಡಿರಲಿಲ್ಲ. ಈಗ ಈ ವಿಚಾರವನ್ನು ಯಶ್​ ಖಚಿತಪಡಿಸಿದ್ದಾರೆ. ಸಂಜಯ್​ ದತ್​ ಚಾಪ್ಟರ್​ 2ನಲ್ಲಿ ಅಭಿನಯಿಸುವುದು ಬಹುತೇಕ ಖಚಿತವಂತೆ.

‘ಕೆಜಿಎಫ್​ 1’ ಚಿತ್ರದಲ್ಲೂ ಸಂಜಯ್​ ನಟಿಸಬೇಕಿತ್ತು ಎನ್ನುವ ಯಶ್​, “ನಾವು ಸಂಜಯ್​ ದತ್​ಗೆ ‘ಕೆಜಿಎಫ್​’ನಲ್ಲಿ ನಟಿಸುವಂತೆ ಕೋರಿಕೊಂಡಿದ್ದೆವು. ಆದರೆ, ಡೇಟ್​ ಹೊಂದಾಣಿಕೆಯಾಗದ ಕಾರಣ ಅವರು ನಟಿಸಲು ಸಾಧ್ಯವಾಗಿಲ್ಲ. ಈಗ ಚಾಪ್ಟರ್​ 2ನಲ್ಲಿ ಪ್ರಮುಖ ವಿಲನ್​ ಪಾತ್ರ ನಿರ್ವಹಿಸಲು ಅಪ್ರೋಚ್​ ಮಾಡಿದ್ದೇವೆ. ಅವರು ಈ ಆಫರ್​ ಒಪ್ಪಿಕೊಳ್ಳುತ್ತಾರೆ ಎನ್ನುವ ನಂಬಿಕೆ ಇದೆ,” ಎನ್ನುತ್ತಾರೆ.

ಇದನ್ನೂ ಓದಿ: TRAILER: 'ಆನೆ ನಡೆದಿದ್ದೇ ದಾರಿ ತಾಕತ್ತಿದ್ದರೆ ಕಟ್ಟಾಕು': 'ಯಜಮಾನ'ನ ಮಾಸ್​ ಎಂಟ್ರಿ

ಸಂಜಯ್​ ದತ್​ ಬಾಲಿವುಡ್​ ಚಿತ್ರಗಳಲ್ಲಿ ಮಾತ್ರ ಬಣ್ಣ ಹಚ್ಚಿದ್ದಾರೆ. ಅವರು ಈವರೆಗೆ ದಕ್ಷಿಣ ಭಾರತದ ಚಿತ್ರರಂಗಕ್ಕೆ ಕಾಲಿಟ್ಟಿಲ್ಲ. ಒಂದೊಮ್ಮೆ ಅವರು, ‘ಕೆಜಿಎಫ್ 2’ನಲ್ಲಿ ಬಣ್ಣ ಹಚ್ಚಿದ್ದೇ ಆದಲ್ಲಿ ಕನ್ನಡದ ಚಿತ್ರರಂಗದ ಮೂಲಕ ಅವರು ದಕ್ಷಿಣ ಭಾರತಕ್ಕೆ ಬಂದಂತಾಗುತ್ತದೆ.

‘ಕೆಜಿಎಫ್’ ಸ್ಥಳೀಯ ಸಿನಿಮಾ ಎನ್ನುವ ಕಾರಣಕ್ಕೆ ಸಂಜಯ್​ ದತ್​ ನಟಿಸಲು ಸಾಧ್ಯವಿಲ್ಲ ಎಂದಿದ್ದರಂತೆ. ಆದರೆ, ಈಗ ಅವರು ಈ ಚಿತ್ರವನ್ನು ವೀಕ್ಷಿಸಿದ್ದಾರೆ. ಕೆಜಿಎಫ್​ ತಂದ ಪ್ರಯತ್ನ ಮೆಚ್ಚಿಕೊಂಡಿರುವ ಅವರು, ಚಾಪ್ಟರ್​ 2ನಲ್ಲಿ ನಟಿಸಲು ಒಪ್ಪಿಕೊಂಡಿದ್ದಾರೆ ಎಂಬುದು ಮೂಲಗಳ ಮಾಹಿತಿ. ಕ್ರಿಸ್​ಮಸ್​ ಹಬ್ಬದ ನಿಮಿತ್ತ ಈ ಚಿತ್ರ ಡಿ.21ರಂದು ತೆರೆಗೆ ಬಂದಿತ್ತು. ಐದು ಭಾಷೆಗಳಲ್ಲಿ ಈ ಚಿತ್ರಕ್ಕೆ ಮೆಚ್ಚುಗೆ ವ್ಯಕ್ತವಾಗಿದೆ.

ಇದನ್ನೂ ಓದಿ: ತೆರೆಮೇಲೆ ಮತ್ತೆ ರಂಜಿಸಲಿದೆ 'ಚುಟುಚುಟು' ಜೋಡಿ; 'ಅವತಾರ ಪುರುಷನಿ'ಗೆ ಕೊನೆಗೂ ಸಿಕ್ಕಳು ಬೆಡಗಿ