ಪ್ರಾಣಿ ದಯಾ ಸಂಘಕ್ಕೆ ತನ್ನ ಇಷ್ಟದ ಕಾರನ್ನ ಉಡುಗೊರೆಯಾಗಿ ನೀಡಿದ ಜಾನ್​ ಅಬ್ರಾಹಂ!

ಬಾಲಿವುಡ್​ ಖ್ಯಾತ ನಟ ಜಾನ್​ ಅಬ್ರಾಹಂ ಸಿನಿಮಾದ ಜೊತೆಗೆ ಕಾರು, ಬೈಕ್​ಗಳನ್ನು ಸಂಗ್ರಹಿಸುವ ಹವ್ಯಾಸವನ್ನು ಹೊಂದಿರುವ ವಿಚಾರ ಅನೇಕರಿಗೆ ಗೊತ್ತು. ಅವರ ಮನೆಯಲ್ಲಿ ದುಬಾರಿ ಕಾರು, ಬೈಕ್​ಗಳನ್ನು ಸಂಗ್ರಹವಿದೆ. ಆಗಾಗ ಜಾನ್​ ಅಬ್ರಾಹಂ ಬೈಕ್​ ಅಥವಾ ಕಾರನ್ನು ಓಡಿಸಿಕೊಂಡು ಮುಂಬೈ ರಸ್ತೆಯಲ್ಲಿ ಓಡಡಾಡುವ ಫೋಟೊ ಸಾಮಾಜಿಕ ಜಾಲತಾಣದಲ್ಲಿ ವೈರಲ್​ ಆಗುತ್ತಿರುತ್ತವೆ. ಆದರೀಗ ಅವರ ಕಾರು ಕಲ್ಷೆಕನ್​ನಲ್ಲಿದ್ದ ಒಂದು ಕಾರನ್ನು ಪ್ರಾಣಿ ದಯಾ ಸಂಘಕ್ಕೆ ಉಡುಗೊರೆಯಾಗಿ ನೀಡಿದ್ದಾರೆ. ಆ ಮೂಲಕ ಮಾನವೀಯತೆ ಮೆರೆದಿದ್ದಾರೆ.

ಮೊದಲೇ ಹೇಳಿದಂತೆ ಪೋರ್ಶೆ, ಆಡಿ, ಬೇಂಜ್​ ಲಕ್ಸುರಿ ಕಾರನ್ನು ಜಾನ್​ ಅಬ್ರಾಹಂ ಹೊಂದಿದ್ದಾರೆ. ಅದರಂತೆ ಅದರಲ್ಲಿ ಹಳೆಯ ವಾಹನಗಳು ಕೂಡ ಇವೆ. ಇದೀಗ ಅನಿಮಲ್​ ಮ್ಯಾಟರ್​​ ಟು ಮಿ ಹೆಸರಿನ ಪ್ರಾಣಿ ದಯಾ ಸಂಘಕ್ಕೆ ತನ್ನೊಂದಿಗಿದ್ದ ಹಳೆಯ ಮಾರುತಿ ಸುಜುಕಿ ಕಂಪನಿಯ ಜಿಪ್ಸಿ ಕಾರನ್ನು ಉಡುಗೊರೆಯಾಗಿ ನೀಡಿದ್ದಾರೆ. ಆ ಮೂಲಕ ಅಭಿಮಾನಿಗಳೆದುರಿಗೆ ಮತ್ತೊಮ್ಮೆ ಹೀರೋ ಎನಿಸಿಕೊಂಡಿದ್ದಾರೆ.

ಅನಿಮಲ್​ ಮ್ಯಾಟರ್​ ಟು ಮಿ ಸಂಸ್ಥೆ ಈ ಬಗ್ಗೆ ಇನ್​​​ಸ್ಟಾಗ್ರಾಂನಲ್ಲಿ ಅಬ್ರಾಹಂ ಮಾಡಿರುವ ಉಪಕಾರದ ಬಗ್ಗೆ ಬರೆದುಕೊಂಡಿದೆ. ‘ಕಳೆದ 5 ವರ್ಷಗಳಿಂದ ಜಾನ್​ ಅಬ್ರಾಹಂ ನಮ್ಮ ಕೋಲಾಡ್​ ಪ್ರಾಣಿಧಾಮದ ಜೊತೆಗೆ ಗಟ್ಟಿಯಾದ ಸಂಬಂಧವನ್ನು ಬೆಳೆಸಿದ್ದಾರೆ. ಅವರ ಸಂಪೂರ್ಣ ಬೆಂಬಲ ಹೀಗೆ ಮುಂದುವರಿಯಲಿ ಎಂದಿದೆ.

ಅವರು ನೀಡಿರುವ ಜಿಪ್ಸಿ ವಾಹನವನ್ನು ಪ್ರಾಣಿಗಳನ್ನು ಕಾಪಾಡಲು, ಚಿಕಿತ್ಸೆಗಾಗಿ ಮುಂಬೈನಿಂದ ಕೋಲಾಡ್​ ವರೆಗೆ ಚಲಿಸಲು  ಬಳಸುತ್ತೇವೆ. ಅಬ್ರಾಹಂ ನೀಡಿರುವ ಉಡುಗೊರೆಗಾಗಿ ಕೃತಜ್ಞರಾಗಿರುತ್ತೇವೆ ಎಂದು ಬರೆದುಕೊಂಡಿದ್ದಾರೆ.

ಅನಿಮಲ್​ ಮ್ಯಾಟರ್​ ಟು ಮಿ ಸಂಸ್ಥೆಯನ್ನು ಮುಂಬೈ ಮೂಲದ ಗಣೇಶ್​​ ನಾಯಕ್​ ಸ್ಥಾಪಿಸಿದ್ದಾರೆ. ಇದರ ಮೂಲಕ ಬೀದಿನಾಯಿ, ಪ್ರಾಣಿ, ಪಕ್ಷಿಗಳನ್ನು ಕಾಪಾಡುವುದು ಮತ್ತು ಅದಕ್ಕೆ ಸೂಕ್ತ ಚಿಕಿತ್ಸೆ ನೀಡುವ ಮೂಲಕ ಆರೈಕೆ ಮಾಡುವ ಕೆಲಸವನ್ನು ಮಾಡುತ್ತಾ ಬಂದಿದೆ.