ಚಕ್ರವರ್ತಿ ನಂತರ ಕಳಪೆ ಆಯ್ಕೆ ವಿಷಯದಲ್ಲಿ ತಕರಾರು ತೆಗೆದ ಪ್ರಶಾಂತ್ ಸಂಬರಗಿ..!

ಬಿಗ್ ಬಾಸ್ ಸೀಸನ್​ 8ರ ಫಿನಾಲೆಗೆ ಇನ್ನು ಎರಡು ವಾರಗಳು ಉಳಿದಿವೆ. ಹೀಗಾಗಿಯೇ ಮನೆಯಲ್ಲಿರುವ ಸ್ಪರ್ಧಿಗಳ ನಡುವೆ  ಪೈಪೋಟಿ ಜೋರಾಗಿದೆ. ಮನೆಯಲ್ಲಿ ಒಂದು ರೀತಿಯ ಒತ್ತಡದ ವಾತಾವರಣ ನಿರ್ಮಾಣವಾಗಿದೆ. ಮನೆಯಲ್ಲಿ ಬಿಗ್ ಬಾಸ್​ ಕೊಡುತ್ತಿದ್ದ ಟಾಸ್ಕ್​ಗಳಿಂದ ದೂರ ಉಳಿಯುತ್ತಿದ್ದವರು ಈಗ ಟಾಸ್ಕ್​ ಆಡಲೇಬೇಕೆಂದು ಪಟ್ಟು ಹಿಡಿದು ಕೂರುತ್ತಿದ್ದಾರೆ. ಇನ್ನು ಕೆಲವರು  ಏನಾದರೂ ಟಾಸ್ಕ್​ ಆಡುವುದರಿಂದ ನಾವು ದೂರ ಸರಿಯುವುದಿಲ್ಲ ಎನ್ನುತ್ತಿದ್ದಾರೆ. ಒಟ್ಟಾರೆ ಮನೆಯಲ್ಲಿ ಸ್ಪರ್ಧಿಗಳ ಸಂಖ್ಯೆ ಕಡಿಮೆಯಾಗುತ್ತಿದ್ದಂತೆಯೇ  ಸ್ಪರ್ಧೆಯ ಜೊತೆಗೆ ವೈಯಕ್ತಿಕ ಆಟ ಬಿಗುವಾಗುತ್ತಿದೆ. ಹೀಗಿರುವಾಗಲೇ ಮನೆಯ ಹೊಸ ಕ್ಯಾಪ್ಟನ್ ಆಯ್ಕೆಯ ಸಮಯ ಬಂದೇ ಬಿಟ್ಟಿತು. ವಾರ ಪೂರ್ತಿ ಮನೆಯಲ್ಲಿ ಕೊಟ್ಟ ಸಾಲು ಸಾಲು ಟಾಸ್ಕ್​ಗಳಲ್ಲಿ ಗೆದ್ದು ಹೆಚ್ಚು ಅಂಕಗಳಿಸುವ ಮೂಲಕ ದಿವ್ಯಾ ಉರುಡುಗ ಅವರು ಸೀಸನ್  8ರ ಸೆಕೆಂಡ್​ ಇನ್ನಿಂಗ್ಸ್​ನಲ್ಲಿ ಎರಡನೇ ಸಲ ಕ್ಯಾಪ್ಟನ್​ ಆಗಿ ಆಯ್ಕೆಯಾಗಿದ್ದಾರೆ. 

ಬಿಗ್ ಬಾಸ್​ ಮನೆಯಲ್ಲಿ ಕ್ಯಾಪ್ಟನ್ ಆಯ್ಕೆಯಾಗುತ್ತಿದ್ದಂತೆಯೇ ಆ ವಾರದ ಉತ್ತಮ ಹಾಗೂ ಕಳಪೆ ಪ್ರದರ್ಶನ ನೀಡಿದ ಸ್ಪರ್ಧಿಗಳ ಆಯ್ಕೆ ಪ್ರಕ್ರಿಯೆ ನಡೆಯುತ್ತದೆ. ಹೌದು, ದಿವ್ಯಾ ಉರುಡುಗ ಕ್ಯಾಪ್ಟನ್ ಆಗಿ ಆಯ್ಕೆಯಾದ ಖುಷಿಯಲ್ಲಿದ್ದರೆ, ಮನೆಯಲ್ಲಿ ಪ್ರಶಾಂತ್ ಸಂಬರಗಿ ಈ ಸಲ ಕಳಪೆ ಪ್ರದರ್ಶನ ತೋರಿದ ಸ್ಪರ್ಧಿಯಾಗಿ ಆಯ್ಕೆಯಾಗಿದ್ದಾರೆ.

View this post on Instagram

A post shared by Colors Kannada Official (@colorskannadaofficial)

ಹೌದು, ಮನೆಯಲ್ಲಿ ಶುಭಾ ಪೂಂಜಾ ಹಾಗೂ ಪ್ರಶಾಂತ್ ಸಂಬರಗಿ ಅವರಿಗೆ ತಲಾ ಮೂರು ಮತಗಳು ಬಿದ್ದಿದ್ದವು. ಆಗ ಕ್ಯಾಪ್ಟನ್​ ದಿವ್ಯಾ ಉರುಡುಗ ಕ್ಯಾಪ್ಟನ್​ ಆಗಿ ಶುಭಾ ಟಾಸ್ಕ್​ಗಳಲ್ಲಿ ಭಾಗಿ ಗೆಲ್ಲಲು ಪ್ರಯತ್ನಿಸಿದರು. ಆದರೆ ಪ್ರಶಾಂತ್​ ಅವರು ಸಿಕ್ಕ ಅವಕಾಶವನ್ನು ಪ್ರಯತ್ನಿಸದೆ ಕೈಬಿಟ್ಟ ಕಾರಣಕ್ಕೆ ಅವರೇ ಕಳಪೆ ಎಂದು ನಿರ್ಧರಿಸಿದ್ದಾರೆ.

ಇದನ್ನೂ ಓದಿ: ಮತ್ತೆ ಕ್ಯಾಪ್ಟನ್​ ಆದ ದಿವ್ಯಾ ಉರುಡುಗ: ಫಿನಾಲೆಗೆ ಸಿಕ್ತು ಎಂಟ್ರಿ..!

ಕ್ಯಾಪ್ಟನ್​ ಈ ಮನೆಯಲ್ಲಿ ಸರ್ವಾಧಿಕಾರಿಯಲ್ಲ. ಇಬ್ಬರಿಗೆ ಮೂರು ಮೂರು ಮತಗಳು ಬಿದ್ದಾಗ, ಹೇಗೆ ಕ್ಯಾಪ್ಟನ್ ಒಬ್ಬರನ್ನು ಕಳಪೆ ಎಂದು ನಿರ್ಧರಿಸುತ್ತಾರೆ. ಅಲ್ಲದೆ ವೈಷ್ಣವಿ ತನಗೆ ಕಳಪೆ ಎನ್ನಲು ಕೊಟ್ಟ ಕಾರಣ ನನಗೆ ಸರಿ ಎನಿಸಲಿಲ್ಲ ಎಂದಿದ್ದಾರೆ. ಇನ್ನು ಟಾಸ್ಕ್​ ಆಡುವಾಗ ನನ್ನ ಮೇಲೆ ಕೈ ಎತ್ತಿ ನಂತರ ತನ್ನ ಬಳಿ ಬಂದು ಕ್ಷಮೆ ಕೇಳಿದವರೇ ಈಗ ಕಳಪೆ ಕೊಡುತ್ತಿದ್ದಾರೆ ಎಂದು ವೈಷ್ಣವಿ ಮೇಲೆ ಕೂಗಾಡುತ್ತಾರೆ.

ಈ ವಾರದ ಅತ್ಯುತ್ತಮಕ್ಕೆ ನಾನು ಮತ ಹಾಕುವುದಿಲ್ಲ. ಯಾರ ಹೆಸರನ್ನೂ ತೆಗೆದುಕೊಳ್ಳುವುದಿಲ್ಲ. ಯಾವ ಶಿಕ್ಷೆ ಕೊಟ್ಟರೂ ತೆಗೆದುಕೊಳ್ಳುತ್ತೇನೆ ಎನ್ನುತ್ತಾರೆ. ನಂತರ ಮನೆಯವರು ಮನವೊಲಿಸಿ ಅತ್ಯುತ್ತಮಕ್ಕೆ ಹೆಸರು ಹೇಳುವಂತೆ ಮಾಡುತ್ತಾರೆ.  ಈ ಸಲ ಪ್ರಶಾಂತ್ ಅವರು ತಾನು ಕಳಪೆ ಪಟ್ಟ ಸ್ವೀಕರಿಸುವುದಿಲ್ಲ. ಜೈಲಿಗೆ ಹೋಗುವುದೂ ಇಲ್ಲ. ಏನು ಬೇಕಾದರೂ ಆಗಲಿ ಎಂದು ಹೊರಗೆ ಹೋಗುತ್ತಾರೆ. ಕಡೆಗೆ ಚಕ್ರವರ್ತಿ ಅವರು ಬಂದು ಪ್ರಶಾಂತ್ ಅವರ ಮನವೊಲಿಸಿ ಜೈಲಿಗೆ ಕಳುಹಿಸುತ್ತಾರೆ.

ಪ್ರಶಾಂತ್​ ಸಂಬರಗಿಗೆ ಕಳಪೆ ಪಟ್ಟ ಕೊಡಲು ಇಲ್ಲಿದೆ ಕಾರಣ

ಪ್ರಶಾಂತ್​ ಅವರು ಈ ವಾರ ಬಿಗ್ ಬಾಸ್​ ಕೊಟ್ಟಿದ್ದ ಟಾಸ್ಕ್​ನಲ್ಲಿ ತಾನೇ ಆಡಬೇಕೆಂದು ಪಟ್ಟು ಹಿಡಿದು ಹೋಗಿದ್ದರು. ಆದರೆ ಟಾಸ್ಕ್​ ಆರಂಭವಾಗುತ್ತಿದ್ದಂತೆಯೇ ಅದರಲ್ಲಿ ಭಾಗಿಯಾಗಿ ಪ್ರಯತ್ನಿಸುವುದನ್ನು ಬಿಟ್ಟು, ಹಾಗೆಯೇ ಹಿಂತಿರುಗುತ್ತಾರೆ. ಇದರಿಂದಾಗಿ ಬೇರೆಯವರು ಭಾಗಿಯಾಗಿ ಅಂಕ ಗಳಿಸಬಹುದಾಗಿದ್ದ ಅವಕಾಶವನ್ನು ಕಸಿದುಕೊಂಡಿದ್ದರು.

ಪ್ರಶಾಂತ್ ಸಂಬರಗಿ ಅವರ ಈ ವರ್ತನೆಯಿಂದಾಗಿ ಮನೆಯಲ್ಲಿ ಕೆಲವರಿಗೆ ಬೇಸರವಾಗಿತ್ತು. ಟಾಸ್ಕ್​ ನಡೆದ ದಿನವೇ ಪ್ರಶಾಂತ್​ ಸಂಬರಗಿ ಅವರಿಗೆ ಅರವಿಂದ್ ನೀವು ಬೇರೆ ಸ್ಪರ್ಧಿಗಳ ಅವಕಾಶ ಕಿತ್ತುಕೊಂಡಿದ್ದಿರಿ ಎಂದು ಟೀಕಿಸಿದ್ದರು. ಇನ್ನು ಈ ವಿಷಯ ವೈಷ್ಣವಿ ಅವರಿಗೂ ಬೇಸರ ತಂದಿತ್ತು.

View this post on Instagram

A post shared by Colors Kannada Official (@colorskannadaofficial)

ಕಳೆದ ವಾರ ಕಳಪೆಯಾಗಿ ಆಯ್ಕೆಯಾಗಿದ್ದ ಚಕ್ರವರ್ತಿ ಚಂದ್ರಚೂಡ ಅವರು ಜೈಲಿನಲ್ಲೇ ಕುಳಿತು ಪ್ರತಿಭಟಿಸಿದ್ದರು. ಕಳಪೆ ಎಂದು ತನ್ನನ್ನು ಆಯ್ಕೆ ಮಾಡಿದ್ದವರು ಕೊಟ್ಟಿದ್ದ ಕಾರಣಗಳು ನನಗೆ ಸೂಕ್ತವೆನಿಸಲಿಲ್ಲ ಅಂತ ಚಕ್ರವರ್ತಿ ತರಕಾರಿ ಕತ್ತರಿಸದೆ ಪ್ರತಿಭಟಿಸಿದ್ದರು. ಜೊತೆಗೆ ಇದೇ ವಿಷಯವಾಗಿ ಶಮಂತ್​ ಅವರ ಜೊತೆ ಜಗಳ ಸಹ ಮಾಡಿದ್ದರು. ಇನ್ನು ಪ್ರಿಯಾಂಕಾ, ಶುಭಾ ಪೂಂಜಾ ಹಾಗೂ ಶಮಂತ್ ಹೆಸರಿನಲ್ಲಿ ಪೋಸ್ಟರ್​ ಸಹ ರಿಲೀಸ್ ಮಾಡಿದ್ದರು.

ಇದನ್ನೂ ಓದಿ: Priya Varrier: ನೆಟ್ಟಿಗರನ್ನು ತರಾಟೆಗೆ ತೆಗೆದುಕೊಂಡ ಪ್ರಿಯಾ ಪ್ರಕಾಶ್​ ವಾರಿಯರ್​ ಸಿಟ್ಟಾಗಿದ್ದೇಕೆ ಗೊತ್ತಾ..?

ಚಕ್ರವರ್ತಿ ಅವರು ತರಕಾರಿ ಕತ್ತರಿಸದೆ ಮಾಡಿದ್ದ ಪ್ರತಿಭಟನೆಯಿಂದಾಗಿ ಮನೆಯಲ್ಲಿ ತರಕಾರಿ ಕತ್ತರಿಸದಂತೆಯೇ ಹಾಕಿ ಅಡುಗೆ ಮಾಡಲಾಗಿತ್ತು. ಈ ವಿಷಯ ಕಡೆಗೆ ಕಿಚ್ಚನ ಅಂಗಳಕ್ಕೆ ಬಂದ ನಂತರ ಪರಿಹಾರವಾಯಿತು. ಈಗ ಪ್ರಶಾಂತ್ ಸಂಬರಗಿ ಜೈಲಿಗೆ ಹೋಗಿದ್ದಾರೆ, ಆದರೆ ತರಕಾರಿ ಕತ್ತರಿಸುವುದಿಲ್ಲ ಅಂತ ಮತ್ತೊಂದು ಬಾಂಬ್ ಸಿಡಿಸಿದ್ದಾರೆ.  ಅವರ ಈ ನಿರ್ಧಾರದಿಂದ ಯಾವ ಬೆಳವಣಿಗೆಯಾಗಲಿದೆ ಅನ್ನೋದು ನಾಳಿನ ಸಂಚಿಕೆಯಲ್ಲಿ ತಿಳಿಯಲಿದೆ.