V Doraswami Raju Passes Away: ಖ್ಯಾತ ನಿರ್ಮಾಪಕ ವಿ ದೊರಸ್ವಾಮಿ ರಾಜು ನಿಧನ: ಶೋಕದಲ್ಲಿ ಟಾಲಿವುಡ್​.!

ಟಾಲಿವುಡ್​ನ ವಿಡಂಸಿ (ವಿಜಯ ಮಾರುತಿ ಕ್ರಿಯೇಟೀವ್ಸ್​) ಬ್ಯಾನರ್​ ಹೆಸರಿನಲ್ಲಿ ತೆಲುಗಿನಲ್ಲಿ ಯಶಸ್ವಿಯಾಗಿ ಹಿಟ್​ ಸಿನಿಮಾಗಳನ್ನು ನಿರ್ಮಿಸಿದ್ದ ಖ್ಯಾತ ನಿರ್ಮಾಪಕ ವಿ ದೊರಸ್ವಾಮಿ ರಾಜು ಇನ್ನಿಲ್ಲ. ಇಂದು ಬೆಳಿಗ್ಗೆ ಹೃದಯಾಘಾತದಿಂದ ದೊರಸ್ವಾಮಿ ರಾಜು ಸಾವನ್ನಪ್ಪಿದ್ದಾರೆ. ನಿರ್ಮಾಪಕರಾಗಿ ಮಾತ್ರವಲ್ಲದೇ ವಿತರಕರಾಗಿಯೂ ವಿಎಂಸಿ ಡಿಸ್ಟ್ರಿಬ್ಯೂಟರ್ಸ್​ ಸಂಸ್ಥೆಯ ಮೂಲಕ ಸಾಕಷ್ಟು ಸಿನಿಮಾಗಳ ವಿತರಣೆ ಮಾಡಿದ್ದಾರೆ. 1978ರಲ್ಲಿ ವಿಎಂಸಿ ಸಂಸ್ಥೆಯನ್ನು ಆರಂಭಿಸಿದ ದೊರಸ್ವಾಮಿ ಅವರು, ತಮ್ಮ ಸಂಸ್ಥೆಗೆ ಮೇರುನಟ ಎಂಟಿಆರ್​ ಅವರ ಕೈಯಲ್ಲಿ ಉದ್ಘಾಟನೆ ಮಾಡಿಸಿದ್ದರು. ಗುರುಶಿಷ್ಯುಲು, ಜಾನಕಿ ರಾಮುಡು, ಪ್ರೇಮಾಭಿಷೇಕಂನಂತಹ 750 ಸಿನಿಮಾಗಳ ವಿತರಕರಾಗಿದ್ದರು.  ಟಾಲಿವುಡ್​ನಲ್ಲಿ ರಾಯಲಸೀಮೆಯ ರಾಜು ಎಂಬ ಖ್ಯಾತಿ ಗಳಿಸಿದ್ದರು. ಕಳೆದ ಕೆಲ ಸಮಯದಿಂದ ಅನಾರೋಗ್ಯದಿಂದ ಬಳಲುತ್ತಿದ್ದ ನಿರ್ಮಾಪಕ ದೊರಸ್ವಾಮಿ ರಾಜು ಅವರು ಬಂಜಾರಾ ಹಿಲ್ಸ್​ನಲ್ಲಿರುವ ಕೇರ್ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದು, ಇಂದು ಬೆಳಿಗ್ಗೆ ಕೊನೆಯುಸಿರೆಳೆದಿದ್ದಾರೆ.

ಸಿನಿ ರಂಗದಲ್ಲಿ ವಿತರಕರಾಗಿ ಕಾಲಿಟ್ಟ ದೊರಸ್ವಾಮಿ ರಾಜು ಅವರ ಪಯಣ ನಂತರ ವಿಯಂಸಿ ಪ್ರೊಡಕ್ಷನ್ಸ್​ ಬ್ಯಾನರ್​ ಅಡಿ ನಿರ್ಮಾಪಕರಾಗಿ ಬಡ್ತಿ ಹೊಂದಿದರು. ಮೊದಲ ಬಾರಿಗೆ ಕೃಷ್ಣಂರಾಜು, ನಾಗಾರ್ಜುನ ನಾಯಕರಾಗಿ ನಟಿಸಿರುವ ಕಿರಾಯಿದಾದ ಸಿನಿಮಾವನ್ನು ವಿಯಂಸಿ ಬ್ಯಾನರ್​ ಅಡಿ ನಿರ್ಮಿಸಿದರು. ಎ. ಕೋದಂರಾಮಿರೆಡ್ಡಿ ಅವರ ನಿರ್ದೇಶನದಲ್ಲಿ ಮೂಡಿಬಂದ ಈ ಸಿನಿಮಾ ಹಿಟ್ ಆಗಿತ್ತು.



ನಂತರ ಅಕ್ಕಿನೇನಿ ನಾಗೇಶ್ವರ ರಾವ್​ ಹಾಗೂ ಮೀನಾ ಪ್ರಮುಖ ಪಾತ್ರದಲ್ಲಿ ನಟಿಸಿರುವ ಸೀತಾರಾಮಯ್ಯಗಾರಿ ಮನವರಾಲು ಎಂಬ ಚಿತ್ರವನ್ನೂ ನಿರ್ಮಿಸಿ ಮತ್ತಷ್ಟು ಖ್ಯಾತಿ ಗಳಿಸಿದರು. ಆಮೇಲೆ ಕೋದಂಡರಾಮಿರೆಡ್ಡಿ ನಿರ್ದೇಶನದಲ್ಲಿ ಮೀನಾ ನಾಯಕಿಯಾಗಿ ನಟಿಸಿರುವ ಪ್ರೆಸಿಡೆಂಟ್​ ಗಾರಿ ಪೆಳ್ಳಾಂ ಚಿತ್ರದ ಮೂಲಕ ಯಶಸ್ಸುಗಳಿಸಿದರು.

ಇದನ್ನೂ ಓದಿ: ಸೈಫ್​ ಅಲಿ ಖಾನ್​ ಅಭಿನಯದ ತಾಂಡವ್​ ವೆಬ್​ ಸರಣಿ ವಿರುದ್ಧ ಎಫ್​ಐಆರ್ ದಾಖಲು..!

ಮಾಧವಯ್ಯಗಾರಿ ಮನವಡು, ಅನ್ನಮಯ್ಯ, ಸಿಂಹಾದ್ರಿಯಂತಹ ಹಿಟ್​ ಸಿನಿಮಾಗಳನ್ನು ನಿರ್ಮಿಸಿ ಸ್ಟಾರ್ ನಿರ್ಮಾಪಕ ಎನಿಸಿಕೊಂಡರು. ದೊರಸ್ವಾಮಿ ರಾಜು ಅವರು ಹೆಚ್ಚಾಗಿ ಅಕ್ಕಿನೇನಿ ನಾಗೇಶ್ವರ ರಾವು ಹಾಗೂ ನಾಗಾರ್ಜುನ ಅವರ ಜೊತೆಯೇ ಸಿನಿಮಾಗಳನ್ನು ಮಾಡಿದ್ದು ವಿಶೇಷ.