yuvaratna: 'ಯುವರತ್ನ'ನ ಅಬ್ಬರಕ್ಕೆ ಅಧೀರ ಫಿದಾ..!

ಸ್ಯಾಂಡಲ್​ವುಡ್​ನಲ್ಲಿ 'ಯುವರತ್ನ'ನ ದರ್ಬಾರ್ ಶುರುವಾಗಿದೆ. ಹಲವಾರು ದಿನಗಳ ಅಪ್ಪು ಅಭಿಮಾನಿಗಳ ಕಾತುರತೆಗೆ ಕೊನೆಗೂ ನಿನ್ನೆ ಫುಲ್​ಸ್ಟಾಪ್ ಬಿದ್ದಿದೆ.   ಡಿಫರೆಂಟ್ ಲುಕ್, ಖಡಕ್ ಮೈಕಟ್ಟಿನೊಂದಿಗೆ ಅಪ್ಪುವಿನ ಅಬ್ಬರ  ಪವರ್ ಫ್ಯಾನ್ಸ್​  ನಿರೀಕ್ಷೆಯನ್ನು ಮೆಟ್ಟಿ ನಿಂತಿದೆ.

ಚಿತ್ರದ ಟೀಸರ್​​ಗೆ ಈಗಾಗಲೇ ಹಲವು ಸ್ಟಾರ್ ನಟರು ಮೆಚ್ಚುಗೆ ಸೂಚಿಸಿದ್ದಾರೆ. ಅವರೊಂದಿಗೆ ಬಾಲಿವುಡ್ ನಟ ಸಂಜಯ್ ದತ್ ಕೂಡ ಚಿತ್ರಕ್ಕೆ ಬಹುಪರಾಕ್ ಅಂದಿರುವುದು ವಿಶೇಷ. ಕೆಜಿಎಫ್ 2 ಚಿತ್ರದ ಮೂಲಕ ಕನ್ನಡಕ್ಕೆ ಕಾಲಿಟ್ಟಿರುವ ಅಧೀರ  ದತ್​  ಟೀಸರ್​ಗೆ ಮನಸೋತಿದ್ದಾರೆ.

ಚಿತ್ರದ ಟೀಸರ್​ ಅನ್ನು ಟ್ವೀಟ್ ಮಾಡಿರುವ ಮುನ್ನಾ ಭಾಯ್ ಅಪ್ಪುವಿನ ಚಿತ್ರವನ್ನು ಹಾಡಿಹೊಗಳಿದ್ದಾರೆ. ಬ್ರಿಲಿಯಂಟ್ ಟೀಸರ್, ತಂಡಕ್ಕೆ ಆಲ್ ದಿ ಬೆಸ್ಟ್​ ಎಂದು ಸಂಜಯ್ ದತ್ ಮಾಡಿರುವ ಟ್ವೀಟ್ ಈಗ ವೈರಲ್ ಆಗಿದೆ. ಇತ್ತ ಕೆಜಿಎಫ್ 2 ಮೂಲಕ ಸ್ಯಾಂಡಲ್​ವುಡ್​ನಲ್ಲಿ ಖಾತೆ ಆರಂಭಿಸಲಿರುವ ನಟನ ಟ್ವೀಟ್ ಈಗ ಯುವರತ್ನನನ್ನು ಅಂತರಾಷ್ಟ್ರೀಯ ಮಟ್ಟದಲ್ಲಿ ಗುರುತಿಸುವಂತೆ ಮಾಡಿದೆ.

The #Yuvarathnaa teaser is looking brilliant! All the best @VKiragandur, @Karthik1423 & the entire team at @hombalefilms 👍https://t.co/5a94CHbufI

— Sanjay Dutt (@duttsanjay) October 7, 2019

ಹೊಂಬಾಳೆ ಬ್ಯಾನರ್​ನಲ್ಲಿ ನಿರ್ಮಾಣವಾಗುತ್ತಿರುವ ಈ ಚಿತ್ರದಲ್ಲಿ ಪವರ್ ಸ್ಟಾರ್ ರಗ್ಬಿ ಆಟಗಾರನಾಗಿ ಕಾಣಿಸಲಿದ್ದು,  ಸಂತೋಷ್ ಆನಂದ್​ರಾಮ್ ಅವರ ನಿರ್ದೇಶನದ ಟೀಸರ್​ ಝಲಕ್  ಮನಮೋಹಕವಾಗಿ ಮೂಡಿಬಂದಿದೆ. ಇನ್ನು ಟೀಸರ್​ ಆಟ-ಓಟ ಹಾಗೂ ಹೊಡೆದಾಟದ ನಡುವೆ ಚಿತ್ರೀಕರಿಸಲಾಗಿದ್ದು, ಹೊಸ ಹೇರ್​ ಸ್ಟೈಲ್​ನೊಂದಿಗೆ ಪವರ್ ಸ್ಟಾರ್ ಕಾಣಿಸಿಕೊಂಡಿದ್ದಾರೆ.

ಈ ದುನಿಯಾದಲ್ಲಿ ಮೂರು ಥರ ಗಂಡಸರು ಇರುತ್ತಾರೆ. ರೂಲ್​ನ ಫಾಲೋ ಮಾಡೋರು. ರೂಲ್​ನ ಬ್ರೇಕ್ ಮಾಡೋರು. ಮೂರನೇ ಅವರು ನನ್ ಥರ ರೂಲ್​ ಮಾಡೋರು ಎಂಬ ಡೈಲಾಗ್​ ಅಪ್ಪು ಅಭಿಮಾನಿಗಳಂತು ಹೊಸ ರೋಮಾಂಚನ ನೀಡಿದೆ.

ಚಿತ್ರದಲ್ಲಿ  ಖ್ಯಾತನಟ ಪ್ರಕಾಶ್ ರಾಜ್, ರಾಧಿಕಾ ಶರತ್ ಕುಮಾರ್ ಕೂಡ ಬಣ್ಣ ಹಚ್ಚಿದ್ದು, ಇವರೊಂದಿಗೆ  ದೂದ್​ಪೇಡ ದಿಗಂತ್ , 'ಇಂತೀ ನಿನ್ನ ಪ್ರೀತಿಯ' ಚಿತ್ರ ಖ್ಯಾತಿಯ ನಟಿ ಸೋನು ಗೌಡ ಪ್ರಮುಖ ಪಾತ್ರದಲ್ಲಿ ಎಂಟ್ರಿ ಕೊಡಲಿದ್ದಾರೆ.

ಇನ್ನು ಚಿತ್ರದಲ್ಲಿ ಕಾಲಿವುಡ್​ ನಟಿ ಸಯೇಶಾ ನಾಯಕಿಯಾಗಿ ಅಭಿನಯಿಸುತ್ತಿದ್ದಾರೆ. ಇದರೊಂದಿಗೆ ಸೋನು ಗೌಡರ ಎಂಟ್ರಿಯು ಚಿತ್ರವು ತ್ರಿಕೋನ ಪ್ರೇಮಕಥೆಯನ್ನು ಹೇಳಲಿದೆಯೇ ಎಂಬ ಕುತೂಹಲಕಾರಿ ಪ್ರಶ್ನೆಯನ್ನು ಸಿನಿಪ್ರಿಯರಲ್ಲಿ ಹುಟ್ಟುಹಾಕಿದೆ.

'ರಾಜಕುಮಾರ' ಚಿತ್ರದ ಬಳಿಕ ಸಂತೋಷ್ ಆನಂದ್​ರಾಮ್ ನಿರ್ದೇಶಿಸುತ್ತಿರುವ ಈ ಚಿತ್ರದಲ್ಲಿ ಪುನೀತ್ ಕಾಲೇಜು ಕುಮಾರನಾಗಿ ಬಣ್ಣ ಹಚ್ಚುತ್ತಿದ್ದು, 'ರಾಜರತ್ನ'ನಿಗೆ ಟಕ್ಕರ್ ಕೊಡುವ ಪಾತ್ರದಲ್ಲಿ ಡಾಲಿ ಧನಂಜಯ್ ಕಾಣಿಸಲಿದ್ದಾರೆ ಎನ್ನಲಾಗಿದೆ. ಇನ್ನು ಮತ್ತೊಂದು ಪ್ರಮುಖ ಪಾತ್ರದಲ್ಲಿ 'ತ್ರಿ ಈಡಿಯಟ್ಸ್' ಚಿತ್ರದ ಪ್ರೊಫೆಸರ್ ಬಾಲಿವುಡ್ ನಟ ಬೊಮನ್ ಹಿರಾನಿ ಸಹ ಬಣ್ಣಹಚ್ಚುತ್ತಿದ್ದಾರೆ.

ಟೈಟಲ್ ಮೂಲಕವೇ ಸ್ಯಾಂಡಲ್​ವುಡ್​ನಲ್ಲಿ ಸಂಚಲನ ಸೃಷ್ಟಿಸಿರುವ  'ಯುವರತ್ನ' ಚಿತ್ರದಲ್ಲಿ ಈಗ ಖ್ಯಾತನಾಮರ ದಂಡೇ ಸೇರಿದ್ದು, ಇದರಿಂದ ಚಿತ್ರದ ಮೇಲಿನ ನಿರೀಕ್ಷೆ ಕೂಡ ದಿನ ಕಳೆದಂತೆ ದುಪ್ಪಟ್ಟಾಗುತ್ತಾ ಸಾಗುತ್ತಿದೆ. ಇದರ ಬೆನ್ನಲ್ಲೇ ಚಿತ್ರದ ಟೀಸರ್​ ಅಭಿಮಾನಿಗಳನ್ನು ಹುಚ್ಚೆಬ್ಬಿಸಿದ್ದು, ಯುವರತ್ನ ನಿರೀಕ್ಷೆಯನ್ನು ಇಮ್ಮಡಿಗೊಳಿಸಿದೆ.