Sandalwood Drug Case: ವಿಚಾರಣೆಗೆ ಹಾಜರಾದ ಅಕುಲ್​ ಬಾಲಾಜಿ-ಸಂತೋಷ್​: ತನಿಖೆಗೆ ಸಹಕರಿಸುವೆವು ಎಂದ ನಟರು

ಸ್ಯಾಂಡಲ್​ವುಡ್​ ಡ್ರಗ್​ ಮಾಫಿಯಾ ವಿಷಯದಲ್ಲಿ ಸಿಸಿಬಿ ಪೊಲೀಸರು, ಸೆಲೆಬ್ರಿಟಿಗಳು ಸೇರಿದಂತೆ ಸಾಕಷ್ಟು ಮಂದಿಗೆ ನೋಟಿಸ್​ ನೋಡಿ ವಿಚಾರಣೆ ನಡಸುತ್ತಿದ್ದಾರೆ. ಇದೇ ಪ್ರಕರಣದಲ್ಲಿ ನಿನ್ನೆಯಷ್ಟೆ ನಟ ಹಾಗೂ ನಿರೂಪಕ ಅಕುಲ್​ ಬಾಲಾಜಿ ಹಾಗೂ ನಟ ಸಂತೋಷ್​ ಅವರಿಗೆ ವಿಚಾರಣೆಗೆ ಹಾಜರಾಗುವಂತೆ ನೋಟಿಸ್​ ನೋಡಿತ್ತು. ನೋಟಿಸ್​ ಸಿಗುತ್ತಿದ್ದಂತೆಯೇ ಅಕುಲ್ ಬಾಲಾಜಿ ಹೈದರಾಬಾದಿನಿಂದ ಬೆಂಗಳೂರಿಗೆ ಬಂದಿದ್ದಾರೆ. ಇನ್ನೂ ಮೂಸೂರಿನಲ್ಲಿದ್ದ ನಟ ಸಂತೋಷ್​ ಸಹ ಬೆಳಿಗ್ಗೆ ಹೇಳಿದ ಸಮಯಕ್ಕೆ ಸರಿಯಾಗಿ ಸಿಸಿಬಿ ಕಚೇರಿಗೆ ಬಂದಿದ್ದರು. ಸಂತೋಷ್ ಮೊದಲು ವಿಚಾರಣೆಗೆ ಹಾಜರಾಗಿ ಪೊಲೀಸರಿಗೆ ಸಹಕರಿಸಿದ್ದಾರೆ. ಇನ್ನು ನಂತರ ಬಂದ ಅಕುಲ್ ಬಾಲಾಜಿ ಸಹ ಪೊಲೀಸರಿಗೆ ತನಿಖೆಯಲ್ಲಿ ಸಂಪೂರ್ಣವಾಗಿ ಸಹಕರಿಸುವುದಾಗಿ ತಿಳಿಸಿದ್ದಾರೆ. ಇನ್ನು ತಮ್ಮ ರೆಸಾರ್ಟ್​ಗಳ ಪತ್ರಗಳನ್ನು ತೆಗೆದುಕೊಂಡು ಬಂದಿದ್ದಾರೆ ಅಕುಲ್ ಬಾಲಾಜಿ. ಅಕುಲ್​ ಹಾಗೂ ಸಂತೋಷ್​ ಅವರಿಗೆ ಸೇರಿದ ವಿಲ್ಲಾ ಹಾಗೂ ರೆಸಾರ್ಟ್​ಗಳಲ್ಲಿ ಡ್ರಗ್ಸ್​ ಪಾರ್ಟಿ ನಡೆದಿದೆ ಎನ್ನಲಾಗುತ್ತಿದ್ದು, ಈ ವಿಚಾರವಾಗಿ ತನಿಖೆ ನಡೆಸುತ್ತಿದ್ದಾರೆ ಸಿಸಿಬಿ ಪೊಲೀಸರು.

ವಿಚಾರಣೆಗೆ ಹಾಜರಾದ ನಂತರ ನಟ ಸಂತೋಷ್​ ಮಾಧ್ಯಮಗಳೊಂದಿಗೆ ಮಾತನಾಡುತ್ತಾ, 5 ವರ್ಷಗಳಿಂದ ವೈಭವ್ ಜೈನ್ ಪರಿಚಯವಿದೆ. ನಾನು ಬೆಂಗಳೂರು ನಗರಕ್ಕೆ ಶಿಫ್ಟ್​ ಆದಾಗಿನಿಂದ ನನ್ನ ವಿಲ್ಲಾ ಖಾಲಿ ಇತ್ತು. ಅಲ್ಲಿ ಪಾರ್ಟಿ ಆಗಾಗ ಆಗುತ್ತಿತ್ತು. ಆದರೆ ಡ್ರಗ್ಸ್ ಪಾರ್ಟಿ ಆಗಿಲ್ಲ. ನಾನು ಲೇಟ್​ ನೈಟ್​ ಪಾರ್ಟಿಗಳಿಗೆ ಅವಕಾಶ ಕೊಟ್ಟಿರಲಿಲ್ಲ. ಕೆಲವು ಸಮಸ್ಯೆ ನಂತರ ನಾನು ವಿಲ್ಲಾ ಕ್ಲೋಸ್ ಮಾಡಿದೆ ಎಂದಿದ್ದಾರೆ.



ವೈಭವ್​ ಜೈನ್​ಗೆ ಮದುವೆಯಾಗಿ ಇಬ್ಬರು ಮಕ್ಕಳಿದ್ದಾರೆ. ಅವರು ಹೀಗೆ ಡ್ರಗ್ಸ್​ ಪ್ರಕರಣದಲ್ಲಿ ಭಾಗಿಯಾಗಿರುವುದು ತಿಳಿದಿದ್ದರೆ, ಆಗಲೇ ಕಪಾಳಕ್ಕೆ ಹೊಡೆದು ಬುದ್ಧಿ ಹೇಳಿರುತ್ತಿದ್ದೆ ಎಂದು ಸಂತೋಷ್​, ವೈಭವ್​ ಜೊತೆ ತಮಗಿರುವ ಸಂಬಂಧದ ಕುರಿತು ಬಹಿರಂಗವಾಗಿ ಹೇಳಿಕೆ ನೀಡಿದ್ದಾರೆ.



ಸಂತೋಷ್​ ನಂತರ ವಿಚಾರಣೆಗೆ ಹಾಜರಾದ ನಟ ಹಾಗೂ ನಿರೂಪಕ ಅಕುಲ್​ ಬಾಲಾಜಿ ಮಾಧ್ಯಮಗಳೊಂದಿಗೆ ಮಾತನಾಡಿದರು. ಸಿಸಿಬಿ ಪೊಲೀಸರು ಹೇಳಿದ ಸಮಯಕ್ಕೆ ಬಂದಿದ್ದೀನಿ. ಹತ್ತು‌ ನಿಮಿಷ ತಡವಾಗಿದೆ.  ನನ್ನ ರೆಸಾರ್ಟ್​ ಅನ್ನು ಲೀಜ್​ಗೆ ಕೊಟ್ಟಿದ್ದೆ. ಅದರ ದಾಖಲೆಗಳು ಸಹ ತಂದಿದ್ದೇನೆ. ಎಲ್ಲ ಮಾಹಿತಿಯನ್ನು ತನಿಖಾಧಿಕಾರಿಗಳಿಗೆ ನೀಡುತ್ತೇನೆ. ವೈಭವ್ ಜೈನ್ ಹಾಗೂ ನಾನು ಹಾಯ್ ಬಾಯ್ ಸ್ನೇಹಿತರು. ರೆಸಾರ್ಟ್​ನಲ್ಲಿ ಲಾಕ್​ಡೌನ್ ವೇಳೆಯಲ್ಲಿ ಏನು ನಡೆಯಿತ್ತು ಹಾಗೂ ಯಾರೆಲ್ಲ ಇದ್ದರು ಎಂದು ಎಲ್ಲ ಹೇಳುತ್ತೇನೆ ಎಂದಿದ್ದಾರೆ.

ಇದನ್ನೂ ಓದಿ: ಇನ್ನೂ ಜೈಲಿನಲ್ಲೇ ಇರಬೇಕು ರಾಗಿಣಿ-ಸಂಜನಾ: ಜಾಮೀನು ಅರ್ಜಿ ವಿಚಾರಣೆ ಮುಂದೂಡಿದ ನ್ಯಾಯಾಲಯ



ಸಾದಹಳ್ಳಿ ಗೇಟ್ ಬಳಿ ಸಂತೋಷ್ ಅವರ ವಿಲ್ಲಾ ಇದ್ದು, ಇಲ್ಲಿ ನಡೆಯುತ್ತಿದ್ದ ಪಾರ್ಟಿಗಳಿಗೆ ಸಂತೋಷ್ ಸಹ ಬರುತ್ತಿದ್ದರಂತೆ. ಈ ಬಗ್ಗೆ ತನಿಖೆ ವೇಳೆ ವೈಭವ್​ ಬಾಯಿಬಿಟ್ಟಿದ್ದಾರಂತೆ ಎನ್ನಲಾಗುತ್ತಿದೆ. ಇದೇ ಕಾರಣದಿಂದ ಸಂತೋಷ್​ ಅವರ ವಿಚಾರಣೆ ನಡೆಸಲಾಗಿದೆಯಂತೆ. ಸಂತೋಷ್ ಹಾಗೂ ಅಕುಲ್ ಬಾಲಾಜಿ ತಂದಿದ್ದ ದಾಖಲೆಗಳ ಪರಿಶೀಲನೆ ನಡೆಸಿದ್ದಾರೆ ಪೊಲೀಸರು.