Onion Price: ತುಮಕೂರಿನ ಈರುಳ್ಳಿ ಬೆಳಗಾರರ ಕಣ್ಣಲ್ಲಿ ನೀರು ತರಿಸಿದ ಜಿಟಿಮಳೆ!

ತುಮಕೂರು : ಈ ಬಾರಿ ರಾಜ್ಯದಲ್ಲಿ ಹಲವೆಡೆ ಧಾರಾಕಾರವಾಗಿ ಮಳೆ ಸುರಿಯುತ್ತಿದೆ. ಕೆಲವು ಜಿಲ್ಲೆಗಳಲ್ಲಿ ಪ್ರವಾಹ ಪರಿಸ್ಥಿತಿ ನಿರ್ಮಾಣವಾಗಿದೆ . ಈ ನಡುವೆ ಕಳೆದ ಎರಡೂರು ದಿನಗಳಿಂದ ವರುಣನ ಆರ್ಭಟ ಜೋರಾಗಿದೆ . ಇನ್ನೂ ಶಿರಾ ತಾಲ್ಲೂಕಿನಲ್ಲಿ ಉತ್ತಮ ಮಳೆಯಾದ ಹಿನ್ನೆಲೆ ಒಳ್ಳೆಯ ಇಳುವರಿಯ ನಿರಿಕ್ಷೆಯಲ್ಲಿದ್ದ ರೈತರಿಗೆ ಈ ಬಾರಿ ಈರುಳ್ಳಿ ಕಣ್ಣೀರು ತರಿಸಿದೆ. ಬರಪೀಡಿತ ತಾಲ್ಲೂಕುಗಳಲ್ಲಿ ತುಮಕೂರು ಜಿಲ್ಲೆಯ ಶಿರಾ ತಾಲ್ಲೂಕಿನ ರೈತರು ಕೃಷಿ ನಂಬಿ ಜೀವನ ಮಾಡುವವರ ಸಂಖ್ಯೆ ತುಂಬಾ ವಿರಳ. ಸಿಗುವ ಅಲ್ಪ ಸ್ವಲ್ಪ ಅಂತರ್ಜಲ ನೀರು ಬಳಸಿಕೊಂಡು ಸಮೃದ್ಧ ಬೆಳೆ ತೆಗೆದ ರೈತರ ಸಂಖ್ಯೆ ಅಗಾಧವಾಗಿದೆ . ಕಡ್ಲೆಕಾಯಿ , ಕಲ್ಲಂಗಡಿ ಬೆಳೆದ ರೈತರು ಕೈ ತುಂಬಾ ಹಣವನ್ನು ಗಳಿಸಿದ್ದಾರೆ . ಅದೇ ರೀತಿ ಶಿರಾ ತಾಲ್ಲೂಕಿನ ಹುಲಿಕುಂಟೆ ಹೋಬಳಿಯ ಕರೆಕಲ್ಲು ಹಟ್ಟಿ , ಕ್ಯಾಸಮುದ್ರ , ಮುಸುದಲೋಟಿ , ಎಂಜಲಗೆರೆಯ ರೈತರು ಈರುಳ್ಳಿ ಬೆಳೆದಿದ್ದರು .

ನಾಲ್ಕು ತಿಂಗಳ ನಿರಂತರ ಪರಿಶ್ರಮದಿಂದ ಈರುಳ್ಳಿ ಬೆಳೆ ಕೈಗೆ ಬಂದಿತ್ತು. ಇನ್ನೂ ಹದಿನೈದು ದಿನ ಕಳೆದಿದ್ದರೆ ರೈತರು ಜೇಬು ತುಂಬ ಹಣ ಎಣಿಸುತ್ತಿದ್ದರು. ಆದರೆ, ಜಟಿಮಳೆ ಪರಿಣಾಮ ಎಲ್ಲಾ ಈರುಳ್ಳಿ ಬೆಳೆ ನೀರಿನಲ್ಲಿ ಕೊಳೆತು ಹೋಗಿದೆ. 5 ಹಳ್ಳಿಯ ಸುಮಾರು 30 ಕ್ಕೂ ಹೆಚ್ಚು ರೈತರು ಸುಮಾರು 80 ರಿಂದ 100 ಎಕರೆ ಪ್ರದೇಶದಲ್ಲಿ ಬೆಳೆದಿದ್ದ ಈರುಳ್ಳಿ ಬೆಳೆದಿದ್ದರು , ಅಂದಾಜು ಎಕರೆಗೆ 30 ರಿಂದ 40 ಸಾವಿರ ಖರ್ಚು ಮಾಡಿ ಈರುಳ್ಳಿ ಬೆಳೆ ಬೆಳೆಯಲಾಗಿತ್ತು.

ಇದನ್ನೂ ಓದಿ : ರೈತರ ಪ್ರತಿಭಟನೆ ಜೊತೆಗೆ ನಾಳೆ ಬೆಂಗಳೂರಿನಲ್ಲಿ ಆಶಾ ಕಾರ್ಯಕರ್ತೆಯರಿಂದಲೂ ಮುಷ್ಕರ

ಸರಿಸುಮಾರು 80 ಲಕ್ಷ ಆದಾಯದವನ್ನು ಈರುಳ್ಳಿ ಬೆಳೆಯಿಂದ ನಿರೀಕ್ಷೆ ಮಾಡಲಾಗಿತ್ತು . ಆದ್ರೀಗ ನಿರಂತರ ಮಳೆಯಿಂದ ಎಲ್ಲಾ ಬೆಳೆ ಕೊಳೆತು ಹೋಗಿದೆ . ಶಿರಾದಲ್ಲಿ ಉಪಚುನಾವಣೆಯ ಕಾವು ಜೋರಾಗಿದೆ . ಮಂತ್ರಿಗಳು , ಸಚಿವರು ಕ್ಷೇತ್ರಕ್ಕೆ ಭೇಟಿ ನೀಡಿ ಪ್ರಚಾರ ನಡೆಸುತ್ತಿದ್ದಾರೆ . ಆದ್ರೆ ಈರುಳ್ಳಿ ಬೆಳೆದ ಈ ರೈತರಿಗೆ ಯಾವ ಅಧಿಕಾರಿಯೂ , ರಾಜಕೀಯ ಮುಖಂಡರು ಸಹಾಯ ಹಸ್ತ ಚಾಚಿಲ್ಲ.

ನಾಮಕಾವಸ್ಥೆಗೆ ತೋಟಗಾರಿಕೆ ಇಲಾಖೆ ಅಧಿಕಾರಿಗಳು ಸ್ಥಳಕ್ಕೆ ಭೇಟಿ ನೀಡಿ ಸರ್ಕಾರಕ್ಕೆ ವರದಿ ಸಲ್ಲಿಸುವ ಮಾತನಾಡಿದ್ದಾರೆ . ಆದರೆ ರೈತರಿಗೆ ಈವರೆಗೂ ಯಾವುದೇ ಖಚಿತ ಭರವಸೆ ಸಿಕ್ಕಿಲ್ಲ , ಸಂಕಷ್ಟದಲ್ಲಿರುವ ರೈತರಿಗೆ ಸರ್ಕಾರ ಸ್ಪಂದಿಸಬೇಕಾಗಿದೆ.