ವಿಷಪೂರಿತ ನಾಗರ ಹಾವಿನ ಜೊತೆ ಸರಸ; ವೃದ್ಧ ಸಾವು!

ಗದಗ (ಫೆಬ್ರವರಿ 08); ವಿಷಪೂರಿತ ನಾಗರ ಹಾವಿನೊಂದಿಗೆ ಸರಸವಾಡಿ ವೃದ್ಧ ಸಾವನ್ನಪ್ಪಿರುವ ಘಟನೆ ಗದಗ ಜಿಲ್ಲೆಯ ರೋಣ ಪಟ್ಟಣದಲ್ಲಿ ನಡೆದಿದೆ. ಮೃತ ದುರ್ದೈವಿಯನ್ನು ಮಕ್ತುಮ್ ಸಾಬ ರಾಜೆಖಾನ್ (75) ಎಂದು ಗುರುತಿಸಲಾಗಿದೆ. ಈತ ಹಲವಾರು ವರ್ಷಗಳಿಂದ ಹಾವು ಹಿಡಿಯುವುದರಲ್ಲಿ ನಿಪುಣನಾಗಿದ್ದ. ಹಲವಾರು ಹಾವುಗಳನ್ನು ರಕ್ಷಣೆ ಮಾಡಿ ಕಾಡಿಗೆ ಅಥವಾ ನಗರದ ಹೊರವಲಯದಲ್ಲಿ ಬಿಟ್ಟು ಬರುತ್ತಿದ್ದ. ಆದರೆ, ಇಂದು ಆತನ ಎಂದಿನ ಕೆಲಸವೇ ಆತನ ಜೀವಕ್ಕೆ ಕುತ್ತಾಗಿದ್ದು ಮಾತ್ರ ವಿಪರ್ಯಾಸ.

ರೋಣ ಪಟ್ಟಣದ ತಹಶೀಲ್ದಾರ್ ಕಾರ್ಯಾಲಯದ ಆವರಣದಲ್ಲಿ ಇಂದು ಹಾವು ಕಾಣಿಸಿಕೊಂಡಿತ್ತು. ಹೀಗಾಗಿ ಕೂಡಲೇ ಮಕ್ತುಮ್ ಸಾಬ ರಾಜೆಖಾನ್ ಗೆ ಕರೆ ಮಾಡಲಾಗಿತ್ತು. ಸ್ಥಳಕ್ಕೆ ಬಂದಿದ್ದ ರಾಜೆಖಾನ್​ ಹಾವನ್ನು ಹಿಡಿದಿದ್ದರು. ಕೂಡಲೇ ಅದನ್ನು ಅಲ್ಲಿಂದ ಬೇರೆಡೆ ಸಾಗಿಸಿದ್ದರೆ ಸಮಸ್ಯೆ ಇರುತ್ತಿರಲಿಲ್ಲ.

ಇದನ್ನೂ ಓದಿ: ಕೊನೆಗೂ ಬಳ್ಳಾರಿಯನ್ನು ವಿಭಜಿಸಿ ಹೊಸ ವಿಜಯನಗರ ಜಿಲ್ಲೆಯನ್ನು ಘೋಷಿಸಿದ ಸರ್ಕಾರ; ಹೊಸಪೇಟೆ ಕಾರ್ಯಸ್ಥಾನ!

ಆದರೆ, ಹಾವನ್ನು ಹಿಡಿದಿದ್ದ ರಾಜೆಖಾನ್ ಅದರ ಜೊತೆಗೆ ಆಟವಾಡುವ ಮೂಲಕ ಸಾರ್ವಜನಿಕರಿಗೆ ಪುಕ್ಕಟೆ ಮನರಂಜನೆ ನೀಡಲು ಮುಂದಾಗಿದ್ದರು. ಆದರೆ, ಈ ವೇಳೆ ನಾಗರ ಹಾವು ಅಚಾನಕ್ಕಾಗಿ ಅವರನ್ನು ಕಚ್ಚಿದೆ.

ಕೂಡಲೇ ಅವರನ್ನು ಹತ್ತಿರದ ಸರ್ಕಾರಿ ಆಸ್ಪತ್ರೆಗೆ ದಾಖಲಿಸಿ ಚಿಕಿತ್ಸೆ ನೀಡಲಾಗಿದೆ. ಆದರೆ, ಚಿಕಿತ್ಸೆ ಫಲಕಾರಿಯಾಗದೆ ವೃದ್ಧ ರಾಜೆಖಾನ್​ ಕೆಲವೇ ನಿಮಿಷಗಳಲ್ಲಿ ಮೃತಪಟ್ಟಿದ್ದಾರೆ. ಹೀಗಾಗಿ ಕುಟುಂಬದಲ್ಲಿ ಶೋಕಸಾಗರ ಮನೆಮಾಡಿದೆ. ರೋಣ ಪೊಲೀಸ್​ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ. ಏನೇ ಆದರೂ ವೃದ್ಧನ ಪ್ರವೃತ್ತಿಯೇ ಅವರ ಜೀವಕ್ಕೆ ಕುತ್ತಾದದ್ದು ಮಾತ್ರ ವಿಪರ್ಯಾಸ.