ಜೀಪ್, ಬೋಟ್ ಏರಿ ಪ್ರವಾಹ ದಾಟಿದ ಸಚಿವ ವಿ.ಸೋಮಣ್ಣ; ಮಳೆಯಿಂದಾಗಿ ಅರ್ಚಕರ ಕುಟುಂಬ ರಕ್ಷಣಾ ಕಾರ್ಯಾಚರಣೆ ವಿಳಂಬ

ಕೊಡಗು: ಕೊಡಗು ಜಿಲ್ಲೆಯಲ್ಲಿ ರಣಭೀಕರ ಮಳೆ ಸುರಿಯುತ್ತಿರುವುದರಿಂದ ತಲಕಾವೇರಿ ಬ್ರಹ್ಮಗಿರಿ ಬೆಟ್ಟ ಕುಸಿದಿದೆ. ಕುಸಿದ ಮಣ್ಣಿನ ಅಡಿಯಲ್ಲಿ ಕಣ್ಮರೆಯಾಗಿರುವ ಅರ್ಚಕರ ಕುಟುಂಬದ ರಕ್ಷಣಾ ಕಾರ್ಯಾಚರಣೆಗೆ ಮಳೆ ತೀವ್ರ ಅಡಚಣೆ ಉಂಟು ಮಾಡಿದೆ. ರಕ್ಷಣಾ ಕಾರ್ಯಾಚರಣೆ ಸ್ಥಳಕ್ಕೆ ಉಸ್ತುವಾರಿ ಸಚಿವ ವಿ ಸೋಮಣ್ಣ ಹರಸಾಹಸ ಪಟ್ಟು ಭೇಟಿ ನೀಡಿದ್ದರು.

ಮಡಿಕೇರಿಯಿಂದ ಬಾಗಮಂಡಲಕ್ಕೆ ಹೊರಟ ಸಚಿವ ಸೋಮಣ್ಣಗೆ ಕೊಟ್ಟೂರು ಬಳಿಯೇ ಕಾವೇರಿ ಪ್ರವಾಹ ಬ್ರೇಕ್ ಹಾಕಿತು. ಕೊಟ್ಟೂರಿನ ಸೇತುವೆ ಮೇಲೆ ಸುಮಾರು ಮೂರು ಅಡಿ ಎತ್ತರಕ್ಕೆ ಹರಿಯುತ್ತಿರುವ ಕಾವೇರಿ ಪ್ರವಾಹದ ನೀರಿನಲ್ಲಿ ಜೀಪ್ ಏರಿದ ಸಚಿವ ವಿ ಸೋಮಣ್ಣ ಬಾಗಮಂಡಲ ಕಡೆಗೆ ಹೊರಟರು. ಇವರೊಂದಿಗೆ ಸಂಸದ ಪ್ರತಾಪ್ ಸಿಂಹ ವಿರಾಜಪೇಟೆ ಶಾಸಕ ಕೆ ಜಿ ಬೋಪಯ್ಯ ಅವರು ಸಹ ಪ್ರವಾಹದ ನೀರಿನಲ್ಲೇ ಜೀಪ್ ಮೂಲಕ ಬಾಗಮಂಡಲ ತಲುಪಿದರು. ಆದರೆ ಅಲ್ಲಿಯೂ ಬರೋಬ್ಬರಿ ಎಂಟು ಅಡಿ ಎತ್ತರಕ್ಕೆ ಹರಿಯುತ್ತಿರುವ ಪ್ರವಾಹದ ನೀರು ಮತ್ತೆ ಸೋಮಣ್ಣ ಮತ್ತು ತಂಡವನ್ನು ಹಿಡಿದು ನಿಲ್ಲಿಸಿತು. ಆದರೆ ಅದ್ಯಾವುದನ್ನು ಲೆಕ್ಕಿಸದ ಸಚಿವ ಸೋಮಣ್ಣ ಲೈಫ್ ಜಾಕೆಟ್ ಧರಿಸಿ ಪ್ರವಾಹದಲ್ಲೇ ಬೋಟ್ ಮೂಲಕ ಬಾಗಮಂಡಲ ತಲುಪಿದರು.

ಅಲ್ಲಿ ಮಾತನಾಡಿದ ಸಚಿವ ವಿ ಸೋಮಣ್ಣ, ಭೂ ಕುಸಿತ ಆಗಿರುವ ಸ್ಥಳಕ್ಕೆ ತಲುಪುವುದು ಸಾಹಸದ ಕೆಲಸವಾಗಿದೆ. ರಕ್ಷಣಾ ಕಾರ್ಯಾಚರಣೆ ನಡೆಸಬೇಕಾದರೆ ಜೆಸಿಬಿ ಅತ್ಯಗತ್ಯ. ಆದರೆ ಎಲ್ಲೆಡೆ ಪ್ರವಾಹ ಉಕ್ಕಿ ಹರಿಯುತ್ತಿರುವುದರಿಂದ ಜೆಸಿಬಿ ಬರಲು ಸಾಧ್ಯವಿಲ್ಲ. ಈಗಾಗಲೇ ಜಿಲ್ಲೆಯಲ್ಲಿ ಎನ್​ಡಿಆರ್​ಎಫ್ ತಂಡ ಎರಡು ಎಸ್​ಡಿಆರ್​ಎಫ್ ತಂಡಗಳಿವೆ. ಆದರೆ ಜೆಸಿಬಿ ಅಗತ್ಯವಾಗಿದೆ. ಜೊತೆಗೆ ಭಾರೀ ಗಾಳಿ ಮಳೆ ಮುಂದುವರೆದಿರುವುದರಿಂದ ರಕ್ಷಣಾ ಕಾರ್ಯಚರಣೆ ಸದ್ಯಕ್ಕೆ ಕಷ್ಟ ಎಂದರು.

ಇದನ್ನು ಓದಿ: ಬಸವಸಾಗರ ಜಲಾಶಯದಿಂದ 1.80 ಲಕ್ಷ ಕ್ಯೂಸೆಕ್ ನೀರು ಬಿಡುಗಡೆ; ಜಲ ರೌದ್ರ ನರ್ತನದ ಚಿತ್ರಗಳು

ಇನ್ನು ಸಂಸದ ಪ್ರತಾಪ್ ಸಿಂಹ ಮಾತನಾಡಿ, 2018ರಲ್ಲಿ ಆದಂತಹ ಭೂ ಕುಸಿತ ಮತ್ತು ಪ್ರವಾಹದ ರೀತಿಯಲ್ಲೇ ಈ ಬಾರಿಯೂ ಆಗುತ್ತಿದೆ. ಇನ್ನು ಎಲ್ಲೆಲ್ಲಿ ಭೂ ಕುಸಿತ ಆಗುತ್ತೆ ಅಂತ ಹೇಳಲು ಆಗದ ಸ್ಥಿತಿ ಇದೆ ಎಂದು ಆತಂಕ ವ್ಯಕ್ತಪಡಿಸಿದರು.