ಉಡುಪಿಯಲ್ಲಿ ‘ಮಾರ್ವಾಡಿ ಹಠಾವೋ’ ಎಂಬ ಶಾಂತಿ ಕದಡುವ ಅಭಿಯಾನ

ಉಡುಪಿ: ಮೌನವಾಗಿದ್ದ ಕರಾವಳಿ ಜಿಲ್ಲೆಯಲ್ಲಿ ಕಿಡಿಗೇಡಿಗಳು ಬೆಂಕಿಯ ಕಡ್ಡಿ ಗೀರಿದ್ದಾರೆ. ಉಡುಪಿಯಲ್ಲಿ ಇದ್ದಕ್ಕಿದ್ದಂತೆ ‘ಮಾರ್ವಾಡಿ ಹಠಾವೋ’ ಆಂದೋಲನ ಸಾಮಾಜಿಕ ಜಾಲತಾಣಗಳಲ್ಲಿ ಶುರುವಾಗಿದೆ. ಅಭಿಯಾನಕ್ಕೆ ಧರ್ಮ ಮತ್ತು ರಾಜಕೀಯ ಕೂಡ ಎಂಟ್ರಿ ಕೊಟ್ಟಿದೆ. ಎತ್ತಿನಗಾಡಿಗೆ ಹೋಗದ ಒಂದು ಜಾಗಕ್ಕೆ ಒಬ್ಬ ಮಾರ್ವಾಡಿ ತಲುಪುತ್ತಾನೆ ಎಂಬ ಮಾತಿದೆ. ವ್ಯಾವಹಾರಿಕ ಕ್ಷೇತ್ರದಲ್ಲಿ ಮಾರ್ವಾಡಿಗಳು ದೇಶದ ಉದ್ದಗಲವನ್ನು ತಲುಪಿ ಗೂಟ ಊರಿಬಿಟ್ಟಿದ್ದಾರೆ. ಉಡುಪಿಯಲ್ಲಿ 30 ವರ್ಷಗಳಿಂದ ವ್ಯಾಪಾರ ವಹಿವಾಟು ಮಾಡುವ ರಾಜಸ್ಥಾನ ಮೂಲದವರು ಕಳೆದೆರಡು ದಿನಗಳಿಂದ ವಿಚಲಿತರಾಗಿದ್ದಾರೆ‌. ಇದಕ್ಕೆ ಕಾರಣ ಆ ಒಂದು ವಿಡಿಯೋ. 

ಉಡುಪಿ ನಗರದ ಪರ್ಕಳದ ನಿವಾಸಿ ದೀಪಕ್ ಭಂಡಾರಿ ಸ್ಟಿಂಗ್ ಆಪರೇಷನ್ ಮಾಡಿದ ವಿಡಿಯೋ ಅದು. ಉಡುಪಿಯ ಮರುಸಾಗರ್ ಎಂಬ ಎಲೆಕ್ಟ್ರಾನಿಕ್ ಅಂಗಡಿಯಿಂದ ಇವರು ವಯರ್​ಗಳನ್ನು ಖರೀದಿ ಮಾಡಿದ್ದರು. ಮನೆಗೆ ಹೋಗಿ ಅಳತೆ ಮಾಡುವಾಗ ಲೆಕ್ಕಕ್ಕಿಂತ ವಯರ್ ಕಮ್ಮಿಯಿತ್ತು. ಅಂಗಡಿಗೆ ವಾಪಸಾಗಿ ತಗಾದೆ ಎತ್ತಿದ ಈ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದೆ.  ಈ ಒಂದು ಘಟನೆ ಮಾರ್ವಾಡಿ ಹಠಾವೋ ಎಂಬ ಸೋಶಿಯಲ್ ಮೀಡಿಯಾ ಅಭಿಯಾನವಾಗಿ ಪರಿವರ್ತನೆಯಾಗಿದೆ.

ಇದನ್ನೂ ಓದಿ: ಯುಎಪಿಎ ಅಡಿ ಭಯೋತ್ಪಾದಕರ ಪಟ್ಟಿಗೆ ರಿಯಾಜ್ ಭಟ್ಟಳ, ಹಿಜ್ಬುಲ್ ಮುಖ್ಯಸ್ಥ ಸೇರಿ 18 ಮಂದಿ

ಸೋಷಿಯಲ್ ಮೀಡಿಯಾದಲ್ಲಿ ಈ ವಿಡಿಯೋಗೆ ಬಂದಿರುವ ಕಮೆಂಟ್​ಗಳಲ್ಲಿ ಹಿಂದೂ ಮುಸಲ್ಮಾನ ಆರೋಪ ಪ್ರತ್ಯಾರೋಪಕ್ಕೆ ಕಾರಣವಾಗಿದೆ. ಎರಡು ಧರ್ಮದ ನಡುವಿನ ವ್ಯಾಪಾರದ ವಾರ್​ಗೂ ಕಾರಣವಾಗಿದೆ. ಉತ್ತರ ಭಾರತದ ವಲಸಿಗರಿಂದ ಸ್ಥಳೀಯರಿಗೆ ವ್ಯಾಪಾರ ಕುದುರುತ್ತಿಲ್ಲ ಎಂಬ ಬಿಸಿಬಿಸಿ ಚರ್ಚೆ ನಡೆದಿದೆ.



ಮೂರು ದಶಕಗಳಲ್ಲಿ ಒಂದಿನಿತೂ ಮೋಸ ನಡೆಸದೆ ನಾವು ವ್ಯಾಪಾರ ಮಾಡುತ್ತಿದ್ದೇವೆ. ಅಭಿಯಾನದ ಹಿಂದೆ ವೈಯಕ್ತಿಕ ಹಿತಾಸಕ್ತಿ ಇದೆ ಎಂಬುದು ವ್ಯಾಪಾರಿಗಳ ವಾದ. ಇಷ್ಟಾಗುತ್ತಲೇ ಘಟನೆಗೆ ಬಿಜೆಪಿ ಪ್ರವೇಶ ಮಾಡಿದೆ. ರಾಜಸ್ಥಾನಿಗರಿಂದ ಸಾರ್ವಜನಿಕರಿಗೆ ಕೈಗೆಟಕುವ ಬೆಲೆಯಲ್ಲಿ ವಸ್ತುಗಳು ಸಿಗುತ್ತಿವೆ. ಕೆಲ ಕಿಡಿಗೇಡಿಗಳು ಸಮಾಜದಲ್ಲಿ ಶಾಂತಿ ಕದಡುವ ಪ್ರಯತ್ನ ಮಾಡುತ್ತಿದ್ದಾರೆ ಎಂಬುದು ಬಿಜೆಪಿಯ ವಾದ.

ಇದನ್ನೂ ಓದಿ: ಬಾಗಲಕೋಟೆಯಲ್ಲಿ ಕೀಟನಾಶಕ ಸಿಂಪಡಣೆಗೂ ಬಂತು ಡ್ರೋನ್​​!ಕೋಮು ಸಾಮರಸ್ಯದಿಂದ ಇರುವ ಉಡುಪಿ ಜಿಲ್ಲೆಯಲ್ಲಿ ಕೆಲ ದುಷ್ಟ ಶಕ್ತಿಗಳು ಹುಳಿ ಹಿಂಡುವ ಪ್ರಯತ್ನ ಮಾಡುತ್ತಿವೆ. ಸ್ಥಳೀಯ ಕೆಲ ವ್ಯಾಪಾರಿಗಳು ಮಾರ್ವಾಡಿ ಹಠಾವೋ ಅಭಿಯಾನದ ಹಿಂದೆ ನಿಂತಿರುವುದು ಮೇಲ್ನೋಟಕ್ಕೆ ಕಂಡುಬರುತ್ತಿದೆ. ಸೆನ್ ಪೊಲೀಸರು ಕಿಡಿಗೇಡಿಗಳ ಬೆನ್ನು ಬಿದ್ದಿದ್ದು ಅಭಿಯಾನದ ಹಿಂದಿರುವವರ ಮೇಲೆ ನಿಗಾ ಇಟ್ಟಿದ್ದಾರೆ.

ವರದಿ: ಪರೀಕ್ಷಿತ್ ಶೇಟ್