Viral Video: ನೆರೆಯಲ್ಲಿ ಕೊಚ್ಚಿ ಹೋದ ಪಿಕಪ್​; ದಕ್ಷಿಣ ಕನ್ನಡದಲ್ಲಿ ವರುಣನ ರುದ್ರ ನರ್ತನ

ಕಳೆದ ಕೆಲವು ದಿನಗಳಿಂದ ರಾಜ್ಯದಾದ್ಯಂತ ಎಡೆಬಿಡದೆ ಮಳೆ ಸರಿಯುತ್ತಿದೆ. ದಕ್ಷಿಣ ಕನ್ನಡದಲ್ಲೂ ವರುಣನ ಆರ್ಭಟ ಹೆಚ್ಚಾಗಿದ್ದು ಜನಜೀವನ ಅಸ್ತವ್ಯಸ್ತವಾಗಿದೆ. ನೇತ್ರಾವತಿ, ಕುಮಾರಧಾರ ನದಿಗಳು ಉಕ್ಕಿ ಹರಿಯುತ್ತಿದ್ದು, ವರುಣನ ರೌದ್ರ ನರ್ತನಕ್ಕೆ ಪಿಕಪ್​ ವಾಹನವೊಂದು ನೀರಿನಲ್ಲಿ ಕೊಚ್ಚಿ ಹೋಗುತ್ತಿರುವ ವೀಡಿಯೋ ಸಾಮಾಜಿಕ ಜಾಲತಾಣದಲ್ಲಿ ಭಾರೀ ವೈರಲ್​ ಆಗಿದೆ.

ಉಪ್ಪಿನಂಗಡಿಯ ಕಾಂಚನದಲ್ಲಿ ಈ ಘಟನೆ ನಡೆದಿದೆ. ನೇತ್ರಾವತಿ ನದಿ ಹರಿವು ಜೋರಾಗಿದೆ. ಸುತ್ತಮುತ್ತಲಿನ ಪ್ರದೇಶದಲ್ಲಿ ನೆರೆಯ ಭೀತಿ ಉಂಟಾಗಿದೆ. ಹೊಳೆ ಉಕ್ಕಿ ಸೇತುವೆ ಮೇಲೆ ನೀರು ಹರಿಯುತ್ತಿದ್ದರು ಅದನ್ನು ಲೆಕ್ಕಿಸದೇ ಚಾಲಕ ಪಿಕಪ್​ ವಾಹನವನ್ನು ಚಲಾಯಿಸಿದ್ದಾನೆ. ನೀರಿನ ರಭಸಕ್ಕೆ ಪಿಕಪ್​​ ಮಗುಚಿ ಕೊಚ್ಚಿ ಹೋಗಿದೆ. ಅದರೊಳಗಿದ್ದ ಚಾಲಕ ಅದೃಷ್ಟವಶಾತ್​ ಪಾರಾಗಿದ್ದಾನೆ ಎಂದು ತಿಳಿದುಬಂದಿದೆ.

ಉಪ್ಪಿನಂಗಡಿ ಪೊಲೀಸ್​ ಠಾಣೆ ಜನರಲ್ಲಿ ಎಚ್ಚರಿಕೆಯಿಂದ ಇರುವಂತೆ ಪ್ರಕಟನೆ ಹೊರಡಿಸಿದೆ. ಉಪ್ಪಿನಂಗಡಿ ಪೊಲೀಸ್​​ ಠಾಣಾ ವ್ಯಾಪ್ತಿಯಲ್ಲಿ ತೀರಾ ಮಳೆಯಾಗುತ್ತಿದ್ದು ಅಲ್ಲಲ್ಲಿ ಪ್ರಾಕೃತಿಕ ವಿಕೋಪ ಕಂಡು ಬರುತ್ತಿದೆ. ನದಿ, ಹಳ್ಳ, ತೋಡು ಮುಂತಾದ ಪ್ರದೇಶಗಳ ಬಳಿಯಿರುವ ಜನರು ಮುಂಜಾಗೃತೆ ವಹಿಸಿಕೊಳ್ಳುವಂತೆ ಗ್ರಾಮ ಪಂಚಾಯತ್​​ ವತಿಯಿಂದ ಈಗಾಗಲೇ ಧ್ವನಿವರ್ಧಕ ಮುಖಾಂತರ ಸೂಚನೆ ನೀಡಲಾಗಿದೆ ಎಂದು ಪಿಎಸ್​ಐ ಶ್ರೀ ಈರಯ್ಯ ಪ್ರಟಕಣೆಯಲ್ಲಿ ತಿಳಿಸಿದ್ದಾರೆ.

ಮಳೆವಿಪರೀತ ಸುರಿಯುತ್ತಿದ್ದು, ನೆರೆ ನೀರಿನಮಟ್ಟ ವ್ಯಾಪಕವಾಗಿ ಏರುತ್ತಿದ್ದು, ಮಹಿಳೆಯರು ಸುರಕ್ಷಿತ ಪ್ರದೇಶಕ್ಕೆ ತೆರಳುವಂತೆ ಮನವಿ ಮಾಡಿಕೊಳ್ಳಲಾಗಿದೆ. ನೆರೆ ನೀರನ್ನು ವೀಕ್ಷಿಸಲು ಮಕ್ಕಳು, ಜನರು ಮುಗಿಬೀಳುತ್ತಿರುವುದು, ಮೊಬೈಲ್​ ಚಿತ್ರೀಕರಣ, ಸೆಲ್ಫೀ ತೆಗೆಯುತ್ತಿರುವುದು ಕಂಡು ಬರುತ್ತಿದ್ದು, ಸಾರ್ವಜನಿಕರು ಮುನ್ನೆಚ್ಚರಿಕೆ ತೆಗೆದುಕೊಳ್ಳಬೇಕಾಗಿ ವಿನಂತಿ ಮಾಡಿದ್ದಾರೆ.