Kodavas Huttari Festival: 'ಪೊಲಿ ಪೊಲಿ ದೇವಾ ಪೊಲಿಯೇ ಬಾ' ಮುಗಿಲು ಮುಟ್ಟಿದ ಧಾನ್ಯಲಕ್ಷ್ಮಿ ಘೋಷಣೆ

ಈ ರೀತಿ ತಂದ ಕದಿರಿನಿಂದ ಸ್ವಲ್ಪ ಹೊಸ ಅಕ್ಕಿಯನ್ನು ಬಿಡಿಸಿ ಪಾಯಸಕ್ಕೆ ಹಾಕಿ ಸೇವಿಸುವ ಮೂಲಕ ಹೊಸ ಅಕ್ಕಿಯ ಭೋಜನ ಆರಂಭವಾಗುತ್ತದೆ. ಕುಟುಂಬದವರೆಲ್ಲಾ ಒಟ್ಟಾಗಿ ಈ ಹಬ್ಬವನ್ನು ಸಂಭ್ರಮಿಸುವುದು ವಿಶೇಷವಾಗಿದೆ.

ಧಾನ್ಯ ಲಕ್ಷ್ಮೀಯನ್ನು ಮನೆ ತುಂಬಿಸಿಕೊಳ್ಳುತ್ತಿರುವುದು.

ಧಾನ್ಯ ಲಕ್ಷ್ಮೀಯನ್ನು ಮನೆ ತುಂಬಿಸಿಕೊಳ್ಳುತ್ತಿರುವುದು.

  • Share this:
ಕೊಡಗು: ಕೊಡಗು ಜಿಲ್ಲೆಯಲ್ಲಿ (Kodagu District) ವಿವಿಧ ರೀತಿಯ ಸಂಪ್ರದಾಯಗಳನ್ನು ಆಚರಣೆ ಮಾಡಲಾಗುತ್ತದೆ. ಇಲ್ಲಿನ ಪ್ರತಿಯೊಂದು ಆಚರಣೆ ವಿಭಿನ್ನ ಹಾಗೂ ವಿಶಿಷ್ಟತೆಯಿಂದ ಕೂಡಿರುತ್ತದೆ. ಇಲ್ಲಿನ ಸಂಪ್ರದಾಯ, ಉಡುಗೆ, ತೊಡುಗೆ (Food Culture And Dress Culture) ಹಾಗೂ ಆಹಾರ ಪ್ರತಿಯೊಂದು ಸಹ ವಿಭಿನ್ನವಾಗಿರುತ್ತದೆ. ಅದೇ ರೀತಿ ಇಲ್ಲಿನ ಹುತ್ತರಿ ಹಬ್ಬ ತುಂಬಾ ತುಂಬಾ ಶ್ರೇಷ್ಠವಾಗಿ ಇಲ್ಲಿ ಆಚರಣೆ ಮಾಡಲಾಗುತ್ತದೆ. ವರ್ಷವಿಡೀ ಕಷ್ಟಪಟ್ಟು ದುಡಿದು ಇಂದು ಧಾನ್ಯಲಕ್ಷ್ಮಿಯನ್ನು ಮನೆ ತುಂಬಿಕೊಳ್ಳುವ ಸಂಭ್ರಮ. ವಿಶೇಷ ಆಚರಣೆ ಹೊಂದಿರುವ ಪ್ರಕೃತಿ ಮಾತೆಯನ್ನು ಪೂಜಿಸುವ ಕೊಡಗಿನಲ್ಲಿ ಶನಿವಾರ ಧಾನ್ಯ ಲಕ್ಷ್ಮಿಯನ್ನು ಮನೆ ತುಂಬಿಸಿಕೊಳ್ಳುವ ಸಂಭ್ರಮ ಸಡಗರ ಮನೆ ಮಾಡಿತ್ತು. ಕೊಡಗಿನಲ್ಲಿ ಸುಗ್ಗಿ ಹಬ್ಬ ಹುತ್ತರಿಯ (Huttari Festival) ಕಳೆ ಮನೆ ಮಾಡಿತ್ತು. ವರ್ಷದಲ್ಲಿ ಹಬ್ಬಗಳೆಷ್ಟೇ ಬರಲಿ ಕೊಡಗಿಗೆ ಸಂಭ್ರಮ ತುಂಬುವುದು ಮಾತ್ರ ಹುತ್ತರಿ ಹಬ್ಬ. ಪುತ್ತರಿ ಎಂದರೆ ಕೊಡವ ಭಾಷೆಯಲ್ಲಿ ಪುದಿಯ ಅರಿ. ಅಂದರೆ ಹೊಸ ಅಕ್ಕಿ ಎಂದರ್ಥ. ಹುತ್ತರಿಯಂದು ಹೊಸ ಅಕ್ಕಿ ತಂದು ಅದರಲ್ಲಿ ಪಾಯಸ ಮಾಡಿ ಸವಿಯುವ ಸಂಪ್ರದಾಯವಿದೆ. ಹುತ್ತರಿ ಅಂಗವಾಗಿ ಮಡಿಕೇರಿಯ ಧಾರ್ಮಿಕ ದತ್ತಿ ಇಲಾಖೆ ದೇವಾಲಯ ಓಂಕಾರೇಶ್ವರ ದೇವಾಲಯದಲ್ಲಿ ವಿಶೇಷವಾಗಿ ಪುತ್ತರಿ ಆಚರಿಸಲಾಯಿತು.

ಧಾನ್ಯ ಲಕ್ಷ್ಮಿಯನ್ನು ಮನೆ ತುಂಬಿಸಿಕೊಂಡರು

ದೇವಾಲಯಕ್ಕೆ ಆಗಮಿಸಿದ ನೂರಾರು ಭಕ್ತರು ದೇವರಿಗೆ ಪೂಜೆ ಸಲ್ಲಿಸಿದರು. ನಂತರ ದುಡಿಕೊಟ್ಟ ಪಾಟ್ ನೊಂದಿಗೆ ಮೆರವಣಿಗೆ ತೆರಳಿದ ಭಕ್ತರು, ದೇವಾಲಯದ ಆವರಣದ ಗದ್ದೆ ತಲುಪಿದರು. ಅಲ್ಲಿ ಭೂ ತಾಯಿಗೆ ಪೂಜೆ ಸಲ್ಲಿಸಿದರು. ಸಾಮಾನ್ಯವಾಗಿ ರೋಹಿಣಿ ನಕ್ಷತ್ರವಿರುವ ಹುಣ್ಣಿಮೆಯ ರಾತ್ರಿ ಹುತ್ತರಿ ಹಬ್ಬವನ್ನು ಆಚರಿಸಲಾಗುತ್ತದೆ. ಇಂದು ರಾತ್ರಿ ಕೂಡ ಭತ್ತದ ಗದ್ದೆಗೆ ತೆರಳಿ ಪೂಜೆ ಸಲ್ಲಿಸಿದ ಭಕ್ತರು ‘ಪೊಲಿ ಪೊಲಿ‌ ದೇವಾ, ಪೊಲಿಯೇ ಬಾ’ ಎಂಬ ಘೋಷಣೆಯೊಂದಿಗೆ ಧಾನ್ಯ ಲಕ್ಷ್ಮಿಯನ್ನು ಕರೆಯುತ್ತಾ ಕದಿರು ಕೊಯ್ದರು. ಅಲ್ಲದೆ ಕೋವಿಯಿಂದ ಎರಡು ಸುತ್ತು ಗುಂಡು ಹಾರಿಸಿ ಭೂ ತಾಯಿಗೆ ಗೌರವ ಸಲ್ಲಿಸಿದರು. ಬಳಿಕ ಕೊಡವ ಸಮಾಜಕ್ಕೆ ಕದಿರು ತಂದು ಧಾನ್ಯಲಕ್ಷ್ಮಿಯನ್ನು ಪೂಜಿಸಿದರು. ಹಲವು ವಿಧದ ಪತ್ರೆಗಳೊಂದಿಗೆ ನೆರೆಕಟ್ಟಿ ಅದನ್ನು ಒಂದೆಡೆ ಇರಿಸಿ ಪೂಜೆ ಸಲ್ಲಿಸಲಾಯಿತು. ನಂತರ ಎಲ್ಲರಿಗೂ ಕದಿರು ವಿತರಿಸಿದರು. ಭಕ್ತಿ ಭಾವದಿಂದ ಕದಿರು ಕೊಂಡೊಯ್ದು ಧಾನ್ಯ ಲಕ್ಷ್ಮಿಯನ್ನು ಮನೆ ತುಂಬಿಸಿಕೊಂಡರು.

ಮನೆಗಳಲ್ಲಿ ತೋರಣವಾಗಿ ಕಟ್ಟುತ್ತಾರೆ

ಹೀಗೆ ಗದ್ದೆಯಲ್ಲಿ ಬೆಳೆದಿದ್ದ ಭತ್ತದ ಪೈರನ್ನು ಕೊಯ್ದು ಕದಿರು ತೆಗೆಯಲಾಯಿತು. ಆ ರೀತಿ ತಂದ ಕದಿರನ್ನು ಎಲ್ಲಾ ಮನೆಗಳಲ್ಲಿ ತೋರಣವಾಗಿ ಕಟ್ಟಲಾಗುತ್ತದೆ. ಹುತ್ತರಿ ಹಬ್ಬದಂದು ಮೊದಲು ಮಳೆ ಹಾಗೂ ಬೆಳೆ ದೇವರೆಂದೇ ಪ್ರಸಿದ್ಧಿಯಾಗಿರುವ ಪಾಡಿ ಇಗ್ಗುತ್ತಪ್ಪ ದೇವಾಲಯದ ಗದ್ದೆಯಲ್ಲಿ ಕದಿರು ತೆಗೆಯಲಾಗುತ್ತದೆ. ಆ ಬಳಿಕ ಜಿಲ್ಲೆಯಾದ್ಯಂತ ರೈತರು ತಮ್ಮ ತಮ್ಮ ಗದ್ದೆಗಳಲ್ಲಿ ಬೆಳೆದ ಕದಿರನ್ನು ಮನೆಗೆ ತರುತ್ತಾರೆ. ಗದ್ದೆ ಇಲ್ಲದವರು ಸಮೀಪದ ದೇವಾಲಯಗಳಿಂದ ಇಲ್ಲವೇ ನೆರೆಯವರ ಬಳಿಯಿಂದ ಕದಿರು ತಂದು ಮನೆ ತುಂಬಿಸಿಕೊಳ್ಳುವುದೂ ಇದೆ.

ಇದನ್ನು ಓದಿ: Rain Effect: ಮಳೆ ಹಾನಿ ಬಗ್ಗೆ ಇಂದು ಸಭೆ, ಚರ್ಚೆ ಬಳಿಕ ಪರಿಹಾರ ಘೋಷಣೆ; ಸಿಎಂ ಬಸವರಾಜ ಬೊಮ್ಮಾಯಿ

ಈ ರೀತಿ ತಂದ ಕದಿರಿನಿಂದ ಸ್ವಲ್ಪ ಹೊಸ ಅಕ್ಕಿಯನ್ನು ಬಿಡಿಸಿ ಪಾಯಸಕ್ಕೆ ಹಾಕಿ ಸೇವಿಸುವ ಮೂಲಕ ಹೊಸ ಅಕ್ಕಿಯ ಭೋಜನ ಆರಂಭವಾಗುತ್ತದೆ. ಕುಟುಂಬದವರೆಲ್ಲಾ ಒಟ್ಟಾಗಿ ಈ ಹಬ್ಬವನ್ನು ಸಂಭ್ರಮಿಸುವುದು ವಿಶೇಷವಾಗಿದೆ. ಹುತ್ತರಿ ಅಂಗವಾಗಿ ಈ ದಿನ ತಂಬಿಟ್ಟು, ಅಡಿಕೆಪುಟ್ಟು, ಪಾಯಸ ಹಾಗೂ ಇತರ ಸಿಹಿ ಖಾದ್ಯಗಳನ್ನು ಮಾಡಿ ಸವಿಯುವುದು ಸಂಭ್ರಮ ಹಾಗೂ ಅಷ್ಟೆ ಭಕ್ತಿ ಭಾವದಿಂದ ಹುತ್ತರಿ ಆಚರಿಸಿದರು.
Published by:HR Ramesh
First published: