ಬೆಂಗಳೂರಿನಲ್ಲಿ ಮನೆ ಮುಂಭಾಗ ಹಾದುಹೋಗಿದ್ದ ವಿದ್ಯುತ್ ತಂತಿ ತಾಗಿ ಬಾಲಕಿಗೆ ಗಂಭೀರ ಗಾಯ

ಬೆಂಗಳೂರು(ಜ. 27): ಬೆಸ್ಕಾಂ ವಿದ್ಯುತ್ ಕಂಪನಿ ಅಳವಡಿಸಿರುವ ವಿದ್ಯುತ್ ತಂತಿಗಳು ಸಾರ್ವಜನಿಕರ ನೆತ್ತಿಯ ಮೇಲೆ ಕತ್ತಿಯಂತೆ ತೂಗುತ್ತಲೇ ಇದೆ ಎಂಬ ಆರೋಪ ಬಹಳ ಹಳೆಯದು. ವಿದ್ಯುತ್ ತಂತಿ ತಾಗಿ ಅನೇಕ ದುರಂತ ಘಟನೆಗಳು ನಡೆದುಹೋಗಿವೆ. ಆ ಸಾಲಿಗೆ ಮತ್ತೊಂದು ಘಟನೆ ಸೇರಿಕೊಂಡಿದೆ. ಬೆಸ್ಕಾಂ ನಿರ್ಲಕ್ಷ್ಯಕ್ಕೆ ಬಾಲಕಿಯೊಬ್ಬಳು ಗಂಭೀರವಾಗಿ ಗಾಯಗೊಂಡ ಘಟನೆ ವೈಟ್​ಫೀಲ್ಡ್​ನಲ್ಲಿ ನಡೆದಿದೆ. ಇಲ್ಲಿಯ ಗಾಂಧಿಪುರದಲ್ಲಿ ಡಾಲಿ ಏಂಜೆಲ್ (12) ಎಂಬ ಬಾಲಕಿಯ ಕೈ, ಹೊಟ್ಟೆ ಸೇರಿ ಹಲವೆಡೆ ಸುಟ್ಟ ಗಾಯಗಳಾಗಿವೆ. ಮನೆ ಮುಂದೆ ಹಾದುಹೋಗಿದ್ದ 11 ಕೆವಿ ಲೈವ್ ವಿದ್ಯುತ್ ತಂತಿ ತಾಗಿ ಈ ದುರಂತ ಸಂಭವಿಸಿದೆ.

ಮನೆ ಮುಂದೆ ಹಾದುಹೋಗಿದ್ದ ವಿದ್ಯುತ್ ತಂತಿ ಮೇಲೆ ಮೊಬೈಲ್ ಚಾರ್ಜರ್ ಬಿದ್ದಿತ್ತು. ಅದನ್ನು ಮಾರ್ಫಿಂಗ್ ಸ್ಟಿಕ್ ಮೂಲಕ ತೆಗೆಯಲು ಬಾಲಕಿ ಯತ್ನಿಸಿದ್ದಾಳೆ. ಈ ವೇಳೆ ತಂತಿ ತಾಕಿ ಆಕೆಯ ಹೊಟ್ಟೆ, ಕೈ ಹಾಗೂ ಇತರ ಭಾಗಗಳಿಗೆ ತಾಗಿ ಸುಟ್ಟಿರುವುದು ತಿಳಿದುಬಂದಿದೆ. 11 ಕಿಲೋವ್ಯಾಟ್ ವಿದ್ಯುತ್ ಪ್ರವಹಿಸುವ ಈ ತಂತಿಗೆ ಬೆಸ್ಕಾಂನವರು ಪ್ಲಾಸ್ಟಿಕ್ ಕವರ್ ಅಳವಡಿಕೆ ಮಾಡಿರಲಿಲ್ಲ. ಜನವಸತಿ ಪ್ರದೇಶದಲ್ಲಿ ಬೆಸ್ಕಾಂ ತೋರಿದ ನಿರ್ಲಕ್ಷ್ಯದಿಂದ ಈ ಅವಘಡ ಸಂಭವಿಸಿದೆ ಎಂದು ಬಾಲಕಿಯ ಪೋಷಕರು ಸ್ಥಳೀಯ ಬೆಸ್ಕಾಂ ಎಇಇ ಮತ್ತು ಎಇ ವಿರುದ್ಧ ದೂರು ದಾಖಲಿಸಿದ್ಧಾರೆ.

ಇದನ್ನೂ ಓದಿ: ಮೋದಿ ಸರ್ಕಾರ ಯಾವತ್ತೂ ರೈತಪರ; ರೈತ ಪ್ರತಿಭಟನೆ ಹಿಂದೆ ವಿಪಕ್ಷಗಳ ಕುಮ್ಮಕ್ಕು: ಸಚಿವ ಜಗದೀಶ್ ಶೆಟ್ಟರ್

ವೈಟ್​ಫೀಲ್ಡ್ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ. ಗಾಯಗೊಂಡಿರುವ ಬಾಲಕಿಯನ್ನು ಆಸ್ಪತ್ರೆಗೆ ದಾಖಲಿಸಿ ಚಿಕಿತ್ಸೆ ನೀಡಲಾಗುತ್ತಿದೆ. ಈ ವೇಳೆ, ಬಾಲಕಿ ಗಾಯಗೊಂಡರೂ ಬೆಸ್ಕಾಂ ಸಿಬ್ಬಂದಿ ಈವರೆಗೂ ವಿಚಾರಿಸುವ ಸೌಜನ್ಯ ಕೂಡ ತೋರಿಲ್ಲ ಎಂಬ ಟೀಕೆಯೂ ಕೇಳಿಬರುತ್ತಿದೆ.

ವರದಿ: ಮುನಿರಾಜು ಹೊಸಕೋಟೆ