Karnataka Bandh - ಕರ್ನಾಟಕ ಬಂದ್ ಸಹಜ ಸ್ಥಿತಿಯಲ್ಲಿ ಕೆಂಪೇಗೌಡ ಅಂತರಾಷ್ಟ್ರೀಯ ವಿಮಾನ ನಿಲ್ದಾಣ

ದೇವನಹಳ್ಳಿ: ಮಾರಾಠ ಅಭಿವೃದ್ಧಿ ನಿಗಮಕ್ಕೆ ಮುಂದಾಗಿರುವ ಸರ್ಕಾರದ ಕ್ರಮ ಖಂಡಿಸಿ ಕನ್ನಡ ಸಂಘಟನೆಗಳ ಒಕ್ಕೂಟ ಇಂದು ಕರೆ ನೀಡಿದ ಕರ್ನಾಟಕ ಬಂದ್​ನ ಬಿಸಿ ಕೆಂಪೇಗೌಡ  ಅಂತರಾಷ್ಟ್ರೀಯ ವಿಮಾನ ನಿಲ್ದಾಣದ ಮೇಲೆ ಯಾವುದೇ  ಪರಿಣಾಮ ಬೀರಿಲ್ಲ. ಎಂದಿನಂತೆ ವಿಮಾನ ನಿಲ್ದಾಣದ ಟ್ಯಾಕ್ಸಿ  ಸೇರಿದಂತೆ  ಬಿಎಂಟಿಸಿ, ಕೆಎಸ್ ಆರ್ ಟಿಸಿ ಬಸ್​ಗಳು  ಓಡಾಡುತ್ತಿವೆ.  ಏರ್​ಪೋರ್ಟ್ ಟ್ಯಾಕ್ಸಿ , ಓಲಾ,  ಊಬರ್ ಸಹ ಸಂಚರಿಸುತ್ತಿವೆ. 

ಬಂದ್​ನಿಂದ ಸಾರಿಗೆ  ವ್ಯವಸ್ಥೆ ಇರುತ್ತೋ ಇಲ್ಲವೋ ಅನ್ನೋ  ಭಯದಲ್ಲಿ  ಪ್ರಯಾಣಿಕರು ಬೆಳ್ಳಂಬೆಳಗ್ಗೆಯೇ ವಿಮಾನ ನಿಲ್ದಾಣಕ್ಕೆ  ಬರುತ್ತಿದ್ದಾರೆ. ಮಧ್ಯಾಹ್ನದ ಸಮಯಕ್ಕೆ ವಿಮಾನ ಇರುವವರೂ ಕೂಡ ಈಗಾಗಲೇ ವಿಮಾನ  ನಿಲ್ದಾಣಕ್ಕೆ  ಬಂದಿದ್ದು ಏರ್​ಪೋರ್ಟ್ ಟರ್ಮಿನಲ್​ನಲ್ಲಿ ತಮ್ಮ ವಿಮಾನಕ್ಕಾಗಿ  ಕಾಯುತ್ತಿದ್ದಾರೆ.

ವಿದೇಶಗಳಿಂದ ಮತ್ತು ಹೊರ ರಾಜ್ಯಗಳಿಂದ  ಬರುವ ಪ್ರಯಾಣಿಕರಿಗೂ ಸಹ ಯಾವುದೇ ತೊಂದರೆಯಾಗಿಲ್ಲ.  ಏರ್​ಪೋರ್ಟ್​ನಿಂದ  ಟ್ಯಾಕ್ಸಿ  ಸೇವೆ ಮತ್ತು ಕೆಎಸ್ ಆರ್ಟಿಸಿ  ಮತ್ತು  ಬಿಎಂಟಿಸಿ ಬಸ್ ಗಳು ಸೇವೆಗೆ  ಸಿದ್ದವಾಗಿದ್ದು  ಪ್ರಯಾಣಿಕರನ್ನ  ತಮ್ಮ  ಸ್ಥಳಗಳಿಗೆ  ತಲುಪಿಸುತ್ತಿವೆ.

ಇದನ್ನೂ ಓದಿ: Karnataka Bandh Updates – ಬೆಂಗಳೂರಿನಲ್ಲಿ ಕಾವೇರಿದ ಬಂದ್; ಪ್ರತಿಭಟನಾಕಾರರು ಪೊಲೀಸರ ವಶಕ್ಕೆ

ಬಂದ್ ಹಿನ್ನೆಲೆ  ವಿಮಾನ  ನಿಲ್ದಾಣದಲ್ಲಿ ಪೊಲೀಸ್  ಬಿಗಿ ಬಂದೋಬಸ್ತ್  ಮಾಡಲಾಗಿದೆ. ವಿಮಾನ ನಿಲ್ದಾಣದ ಪ್ರವೇಶದಲ್ಲಿ ವಾಹನಗಳ  ತಪಾಸಣೆಯನ್ನ ಪೊಲೀಸರು  ಮಾಡುತ್ತಿದ್ದಾರೆ. ಬೋರ್ಡಿಂಗ್  ಪಾಸ್ ಇದ್ದವರಿಗೆ  ಮಾತ್ರ ವಿಮಾನ ನಿಲ್ದಾಣದ ಒಳಗೆ  ಪ್ರವೇಶ ನೀಡಲಾಗುತ್ತಿದೆ. ರಾಷ್ಟ್ರೀಯ ಹೆದ್ದಾರಿ 7 ರಲ್ಲಿ ಎಂದಿನಂತೆ  ವಾಹನಗಳ ಸಂಚಾರ ಇದ್ದು, ಬಂದ್ ಹಿನ್ನೆಲೆ ರಜೆ ಇರುವುದರಿಂದ  ಯುವ ಜನತೆ ಜಾಲಿ ರೈಡ್ ಹೊರಟ್ಟಿದ್ದಾರೆ.

ವರದಿ: ನವೀನ್ ಕುಮಾರ್