Online Rummy: ಚಟವಾದ ಆನ್​ಲೈನ್​ ರಮ್ಮಿ, ಹೆಂಡ್ತಿ ಚಿನ್ನ ಮಾರಿ ಪಾಪರ್ ಆದ! ಈಗ 18 ಲಕ್ಷ ಕಳೆದುಕೊಂಡು ವ್ಯಕ್ತಿ ಆತ್ಮಹತ್ಯೆ

ಪಾಲಕ್ಕಾಡ್​: ಆನ್​ಲೈನ್​ ಗೇಮ್​ಗಳು (Online Game) ಇತ್ತೀಚಿನ ದಿನಗಳಲ್ಲಿ ಚಟವಾಗಿ ಪರಿಣಮಿಸುತ್ತಿವೆ. ಫ್ಯಾಂಟಿಸಿ ಗೇಮ್, ಆನ್​ಲೈನ್​ ರಮ್ಮಿ(Online Rummy) ಅಂತಹ ಆಟಗಳಲ್ಲಿ ದುಡ್ಡು ಗೆಲ್ಲಬಹುದು ಎಂಬ ಆಸೆಯಿಂದ ಅದೆಷ್ಟೋ ಮಧ್ಯಮ ವರ್ಗದ ಯುವಕರು ಹಣವನ್ನುಕಳೆದುಕೊಳ್ಳುತ್ತಿದ್ದಾರೆ. ಅದನ್ನು ಕೆಲವರು ಚಟವಾಗಿದ್ದು ಸಾಲವನ್ನು ಮಾಡಿ ಆಡುವ ಮಟ್ಟಕ್ಕೆ ಬೆಳಸಿಕೊಳ್ಳುತ್ತಿದ್ದಾರೆ. ಕೇರಳದ ಯುವಕನೊಬ್ಬ ಆನ್​ಲೈನ್ ರಮ್ಮಿಯನ್ನು ಚಟವಾಗಿಸಿಕೊಂಡು,  18 ಲಕ್ಷಕ್ಕೂ ಹೆಚ್ಚು ಹಣವನ್ನು ಕಳೆದುಕೊಂಡಿದ್ದ, ಇದೀಗ ಸಾಲಕ್ಕೆ ಹೆದರಿ ಕೊನೆಗೆ ಆತ್ಮಹತ್ಯೆ (Suicide) ಮಾಡಿಕೊಂಡಿದ್ದಾನೆ. ಈತನಿಗೆ ಇಬ್ಬರು ಮಕ್ಕಳಿದ್ದು, ಆ ಜವಾಬ್ದಾರಿಯ ಹೊರೆಯನ್ನು ಹೆಂಡತಿ ಹೊರುವಂತೆ ಮಾಡಿದ್ದಾನೆ.

ಕೇರಳಾದ ಕೊಲ್ಲಂಗೋಡ್​ ನಿವಾಸಿ ಗಿರೀಶ್​ ಎಂಬಾತ ಸಾಲ ಮಾಡಿ ಆನ್​ಲೈನ್​ ರಮ್ಮಿ ಆಡಿದ್ದು ಲಕ್ಷಾಂತರ ರೂಪಾಯಿ ಕಳೆದುಕೊಂಡಿದ್ದಾನೆ. ಇದೀಗ ಸಾಲಕ್ಕೆ ಹೆದರಿ ಆತ್ಮಹತ್ಯೆ ಮಾಡಿಕೊಂಡಿದ್ದಾನೆ. ಆನ್​ಲೈನ್​ ರಮ್ಮಿಯಿಂದ ಗಿರೀಶ್​ ಸುಮಾರ 18ರಿಂದ 20 ಲಕ್ಷ ರೂಪಾಯಿಗಳನ್ನು ಕಳೆದುಕೊಂಡಿದ್ದಾರೆ. ಜೊತೆಗೆ ತಮ್ಮ 25 ಪವನ್​​ ಚಿನ್ನವನ್ನು ಮಾರಿ ಬಂದ ಹಣವನ್ನು ರಮ್ಮಿಆಡುವುದಕ್ಕೆ ಬಳಸಿಕೊಂಡಿದರು ಎಂದು ಗಿರೀಶ್ ಪತ್ನಿ  ವೈಶಾಖ ಹೇಳಿದ್ದಾರೆ.

ಹಲವು ಬಾರಿ ಬೆದರಿಕೆ

ಸಾಲ ಮಾಡಿಕೊಂಡಿದ್ದ ಗಿರೀಶ್​ ಹೆಂಡತಿಯೊಡನೆ ರಮ್ಮಿ ಆಡುವ ವಿಚಾರಕ್ಕೆ ಹಲವು ಜಗಳ ಮಾಡುತ್ತಿದ್ದ. ಜಗಳವಾದಾಗಲೆಲ್ಲಾ ಆತ್ಮಹತ್ಯೆ ಮಾಡಿಕೊಳ್ಳುವುದಾಗಿ ಗಿರೀಶ್ ಬೆದರಿಸುತ್ತಿದ್ದನಂತೆ. ಆದರೆ ಅದನ್ನು ಗಂಭೀರವಾಗಿ ಪರಿಗಣಿಸಿಲ್ಲ, ಹೀಗೆ ಮಾಡುತ್ತೇನೆ ಎಂದುಕೊಂಡಿರಲಿಲ್ಲ ಎಂದು ವೈಶಾಖ ಹೇಳಿದ್ದಾರೆ. ಇನ್ನೂ ರಮ್ಮಿ ಆಟವಾಡಲು ಹಣಕ್ಕಾಗಿ ತನಗೆ ಥಳಿಸುತ್ತಿದ್ದರು ಎಂದೂ ಆಕೆ ಹೇಳಿಕೊಂಡಿದ್ದಾಳೆ.

ಇದನ್ನೂ ಓದಿ: Crime: ಬ್ಯಾಗ್​ನಲ್ಲಿ ಪ್ರಗ್ನೆನ್ಸಿ ಕಿಟ್ ಸಿಕ್ಕಿದ್ದಕ್ಕೆ ಮಗಳ ಮೇಲೆ ಅಕ್ರಮ ಸಂಬಂಧದ ಶಂಕೆ; ಯುವತಿಯನ್ನ ಕೊಂದು, ದೇಹಕ್ಕೆ ಆ್ಯಸಿಡ್ ಹಾಕಿದ ತಂದೆ-ತಾಯಿ!

ಕೋವಿಡ್ ಸಂದರ್ಭದಲ್ಲಿ ಆರಂಭ

ಕೋವಿಡ್ 19 ಲಾಕ್​ಡೌನ್​ ಸಮಯದಲ್ಲಿ ಏಕಾಂಗಿಯಾದ್ದಾಗ ಗಿರೀಶ್​ ಆನ್​ಲೈನ್​ನಲ್ಲಿ​ ರಮ್ಮಿ ಆಡಲು ಆರಂಭಿಸಿದ್ದ. ಮೊದಮೊದಲು ಸುಮ್ಮನೇ ಟೈಂಪಾಸ್ ಮಾಡಲು ಆಡುತ್ತಿರುವೆ ಎಂದು ಹೇಳುತ್ತಿದ್ದ. ಆದರೆ ದಿನ ಕಳೆದಂತೆ ಅದನ್ನು ಚಟವಾಗಿ ಬೆಳಸಿಕೊಂಡ. ತನ್ನ ಸಂಪೂರ್ಣ ಸಂಬಳವನ್ನು ರಮ್ಮಿ ಆಡುವುದಕ್ಕೆ ಬಳಸಿಕೊಳ್ಳುತ್ತಿದ್ದ. ಸಂಬಳದ ಹಣ ಸೋತ ಮೇಲೆ ನನ್ನ ಚಿನ್ನವನ್ನು ಕದ್ದು ಮಾರಾಟ ಮಾಡಿದ್ದಾನೆ ಎಂದು ತಿಳಿಸಿದ್ದಾರೆ.

ಕುಡಿತದ ಚಟ

ರಮ್ಮಿ ಆಟದಲ್ಲಿ ಹಣ ಕಳೆದುಕೊಳ್ಳುತ್ತಾ ಹೋದಂತೆ ಗಿರೀಶ್​ ಮದ್ಯ ಸೇವನೆಯಲ್ಲಿ ತೊಡಗಿಸಿಕೊಂಡಿದ್ದಾನೆ. ಇದರಿಂದ ಸಾಲದ ಪ್ರಮಾಣ ಹೆಚ್ಚಾಗಿದೆ. ಈ ಚಟವನ್ನು ಬಿಡಿ ಎಂದು ಹಲವು ಬಾರಿ ಪತ್ನಿ ಮನವಿ ಮಾಡಿಕೊಂಡರೂ, ಆಕೆಯ ಮಾತನ್ನು ಕೇಳದೆ ಥಳಿಸುತ್ತಿದ್ದನಂತೆ. ಮೈತುಂಬ ಸಾಲ ಮಾಡಿಕೊಂಡಿದ್ದ ಆತನ ಕೊನೆಗೆ ಸಾಲಗಾರರ ಕಿರುಕುಳ ಸಹಿಸಲಾರದೇ ಆತ್ಮಹತ್ಯೆ ದಾರಿ ಹಿಡಿದಿದ್ದಾನೆ ಎಂದು ತಿಳಿದುಬಂದಿದೆ.

ಮನೆಬಿಟ್ಟು ಹೋಗಿದ್ದ ಪತ್ನಿ

ಆನ್‌ಲೈನ್ ರಮ್ಮಿ ಆಟಕ್ಕೆ ಸಂಬಂಧಿಸಿದಂತೆ ಗಿರೀಶ್‌ನೊಂದಿಗೆ ಪತ್ನಿ ವಿಶಾಖ ನಿರಂತರವಾಗಿ ಜಗಳ ನಡೆಯುತ್ತಿತ್ತು. ಜಗಳವಾಡಿದರೂ ಗಿರೀಶ್ ಆಟ ನಿಲ್ಲಿಸದ ಕಾರಣ ಆಕೆ ತ್ರಿಶೂರಿನ ಮಡಕ್ಕತಾರಾದಲ್ಲಿರುವ ತನ್ನ ತವರು ಮನೆಗೆ ಹೋಗಿದ್ದಾರೆ. ಎರಡು ದಿನಗಳಿಂದ ಗಿರೀಶ್ ಕಾಣದ ಹಿನ್ನೆಲೆಯಲ್ಲಿ ಆತನ ತಂದೆಯ ಅಣ್ಣನ ಮಗ ಮೋಹನ್ ಮನೆಗೆ ಬಂದಾಗ ಬಾಗಿಲು ಒಳಗಿನಿಂದ ಲಾಕ್ ಆಗಿದೆ. ಬಾಗಿಲು ಒದ್ದು ತೆರೆದು ನೋಡಿದಾಗ ಗಿರೀಶ್ ರೂಮ್​ವೊಂದರಲ್ಲಿ ನೇಣು ಬಿಗಿದುಕೊಂಡು ಆತ್ಮಹತ್ಯೆ ಮಾಡಿಕೊಂಡಿರುವುದು ತಿಳಿದುಬಂದಿದೆ.

ಗಿರೀಶ್ ತ್ರಿಶೂರ್‌ನ ಚುರುತುರ್ಥಿಯಲ್ಲಿರುವ ಖಾಸಗಿ ಕಾಲೇಜಿನಲ್ಲಿ ಲ್ಯಾಬ್ ಇನ್​ಸ್ಟ್ರಕ್ಟರ್​ ಆಗಿ ಕೆಲಸ ಮಾಡುತ್ತಿದ್ದರು. ಇದೀಗ ಆನ್​ಲೈನ್​ ಚಟಕ್ಕೆ ಬಲಿಯಾಗಿದ್ದಾರೆ. ಈತನ ಸಾವಿನಿಂದ ಇಬ್ಬರು ಮಕ್ಕಳ ಜವಾಬ್ದಾರಿ ಹೆಣ್ಣುಮಗಳ ಮೇಲೆ ಬಿದ್ದಿದೆ. ಜಿಲ್ಲಾಸ್ಪತ್ರೆಯಲ್ಲಿ ಮರಣೋತ್ತರ ಪರೀಕ್ಷೆ ನಡೆಸಿದ ಬಳಿಕ ಎಳವಂಚೇರಿ ಅನಿಲ ಚಿತಾಗಾರದಲ್ಲಿ ಶವ ಸಂಸ್ಕಾರ ನಡೆಸಲಾಗಿದೆ.