ZyCov-D Vaccine - ಅನುಮೋದನೆ ಕೊಟ್ಟರೆ ಎರಡು ತಿಂಗಳೊಳಗೆ ಲಸಿಕೆ ಸರಬರಾಜು: ಝೈಡಸ್ ಕ್ಯಾಡಿಲಾ

ಭಾರತದಲ್ಲಿ ದೇಶೀಯವಾಗಿ ಅಭಿವೃದ್ಧಿಯಾದ ಎರಡನೇ ಲಸಿಕೆ ಹಾಗೂ ಪ್ಲಾಸ್ಮಿಡ್ ಡಿಎನ್ಎ ಆಧಾರಿತ ವಿಶ್ವದ ಮೊದಲ ಲಸಿಕೆ ಎನಿಸಿದ ZyCoV-Dಗೆ ಅನುಮೋದನೆ ದೊರತರೆ ಎರಡು ತಿಂಗಳಲ್ಲಿ ಉತ್ಪಾದನೆ ಆರಂಭಿಸುವುದಾಗಿ ಝೈಡಸ್ ಕ್ಯಾಡಿಲಾ ಸಂಸ್ಥೆ ಹೇಳಿದೆ.

ಸಾಂದರ್ಭಿಕ ಚಿತ್ರ

ಸಾಂದರ್ಭಿಕ ಚಿತ್ರ

  • News18
  • Last Updated :
  • Share this:
ನವದೆಹಲಿ(ಜುಲೈ 01): ಗುಜರಾತ್​ನ ಅಹ್ಮದಾಬಾದ್ ಮೂಲದ ಫಾರ್ಮಾ ಕಂಪನಿ ಝೈಡಸ್ ಕ್ಯಾಡಿಲಾ ಅಭಿವೃದ್ಧಿಪಡಿಸಿರುವ ಝೈಕೋವಿ-ಡಿ (ZyCoV-D) ಲಸಿಕೆಯ ತುರ್ತು ಬಳಕೆಗೆ ಅನುಮತಿ ಕೋರಿದೆ. ವಿಶ್ವದ ಮೊದಲ ಪ್ಲಾಸ್ಮಿಡ್ ಡಿಎನ್​ಎ ಆಧಾರಿತ ವ್ಯಾಕ್ಸಿನ್ ಎಂದು ಹೆಸರು ಮಾಡಿರುವ ಝೈಡಸ್​ನ ಈ ಲಸಿಕೆ ಇನ್ನೂ ಎರಡು ಹಂತಗಳ ಟ್ರಯಲ್​ಗೆ ಒಳಪಡಬೇಕಿದೆ. ಆದರೆ, ಮೊದಲ ಹಂತದ ಟ್ರಯಲ್​ನಲ್ಲಿ ಉತ್ತಮ ಪ್ರತಿಕ್ರಿಯೆ ದೊರೆತಿರುವುದಾಗಿ ಹೇಳಿರುವ ಝೈಡಸ್ ಕ್ಯಾಡಿಲಾ, ಒಂದು ವೇಳೆ ತುರ್ತು ಬಳಕೆಗೆ ಅನುಮತಿ ಕೊಟ್ಟರೆ 45ರಿಂದ 60 ದಿನದೊಳಗೆ ಲಸಿಕೆ ಪೂರೈಕೆ ಆರಂಭಿಸುವುದಾಗಿ ಸ್ಪಷ್ಟಪಡಿಸಿದೆ. ವರ್ಷಕ್ಕೆ 10-12 ಕೋಟಿ ಲಸಿಕೆ ಉತ್ಪಾದನೆ ಮಾಡುವ ಯೋಜನೆ ಈ ಕಂಪನಿಯದ್ದು.

ಝೈಡಸ್ ಕ್ಯಾಡಿಲಾ ಕಂಪನಿ ನೀಡಿರುವ ಮಾಹಿತಿ ಪ್ರಕಾರ, ಈ ಲಸಿಕೆಯು ಆರ್​ಟಿ-ಪಿಸಿಆರ್ ಪರೀಕ್ಷೆಯಲ್ಲಿ ಪಾಸಿಟಿವ್ ಬಂದು ರೋಗ ಲಕ್ಷಗಳಿರುವ ಪ್ರಕರಣಗಳಲ್ಲಿ ಶೇ. 66.6ರಷ್ಟು ಪರಿಣಾಮಕಾರಿಯಂತೆ. ಅದೇ ರೋಗಲಕ್ಷಣಗಳಿಲ್ಲದ ಪಾಸಿಟಿವ್ ಕೇಸ್​ಗಳಲ್ಲಿ ಇದು ಶೇ. 100ರಷ್ಟು ಪರಿಣಾಮಕಾರಿಯಾಗಿ ಕೆಲಸ ಮಾಡುತ್ತದೆ ಎನ್ನಲಾಗಿದೆ.

ಝೈಡಸ್ ಲಸಿಕೆಯು ಮೂರು ಡೋಸ್​ಗಳನ್ನ ಒಳಗೊಂಡಿದೆ. ಎರಡು ಡೋಸ್ ತೆಗೆದುಕೊಂಡ ಬಳಿಕ ಯಾವುದೇ ಕೋವಿಡ್ ಸೋಂಕಿತನಿಗೆ ತೀವ್ರ ರೀತಿಯಲ್ಲಿ ಸೋಂಕು ವ್ಯಾಪಿಸಿಲ್ಲ. ಯಾರಿಗೂ ಸಾವು ಸಂಭವಿಸಿಲ್ಲ. ಮೂರೂ ಡೋಸ್ ತೆಗೆದುಕೊಂಡ ವ್ಯಕ್ತಿಯಲ್ಲಿ ಸೋಂಕು ತೀವ್ರಮಟ್ಟದಲ್ಲಿ ಇರುವುದು ಬೆಳಕಿಗೆ ಬಂದಿಲ್ಲ ಝೈಡಸ್ ಕ್ಯಾಡಿಲಾ ಹೆಲ್ತ್​ಕೇರ್ ಸಂಸ್ಥೆಯ ಮ್ಯಾನೇಜಿಂಗ್ ಡೈರೆಕ್ಟರ್ ಡಾ. ಶರ್ವಿಲ್ ಪಟೇಲ್ ಹೇಳುತ್ತಾರೆ.

ಕೋವಿಡ್-19 ರೋಗದ ಎರಡನೇ ಅಲೆ ಉತ್ತುಂಗದಲ್ಲಿದ್ದಾಗ ದೇಶಾದ್ಯಂತ 50 ಕ್ಕೂ ಹೆಚ್ಚು ಕ್ಲಿನಿಕಲ್ ತಾಣಗಳಲ್ಲಿ ಈ ಲಸಿಕೆಯ ಅಧ್ಯಯನ ಕೈಗೊಳ್ಳಲಾಗಿದೆ. ಇದು ಹೊಸ ರೂಪಾಂತರಿ ಕೋವಿಡ್ ವೈರಸ್​ಗಳ ಎದುರೂ ಪರಿಣಾಮಕಾರಿಯಾಗಿದೆ.

ಇದನ್ನೂ ಓದಿ: ಕೋವಿಶೀಲ್ಡ್ ಲಸಿಕೆ ಪಡೆದವರ ಯುರೋಪ್ ಪ್ರಯಾಣಕ್ಕೆ ಒಪ್ಪಿಗೆ: ಸ್ವಿಜರ್​​​ಲ್ಯಾಂಡ್​​ ಸೇರಿ 9 ದೇಶಗಳಲ್ಲಿ ಗ್ರೀನ್​​ಸಿಗ್ನಲ್​​

ಪ್ಲಾಸ್ಮಿಡ್ ಡಿಎನ್​ಎ ತಂತ್ರಜ್ಞಾನದ ವಿಶೇಷತೆ?

ಕೋವಿಡ್ ವೈರಸ್ ರೀತಿಯ ಕೋಡಿಂಗ್ ಸೀಕ್ವೆನ್ಸ್​ಗಳಿರುವ ಆಂಟಿಜೆನ್​​ಗಳನ್ನ ಒಳಗೊಂಡಿರುವ ಶುದ್ಧೀಕರಿಸಿದ ಪ್ಲಾಸ್ಮಿಡ್ ಡಿಎನ್​ಎ ಅನ್ನು ಇಂಜೆಕ್ಷನ್ ಮೂಲಕ ದೇಹದ ಜೀವಕೋಶಕ್ಕೆ ನೀಡಲಾಗುತ್ತದೆ. ಒಂದೊಮ್ಮೆ ಅಲ್ಲಿಗೆ ಸೇರಿದರೆ ಆಂಟಿಜೆನ್ ಸಾಕಷ್ಟು ಪ್ರಮಾಣದಲ್ಲಿ ಹೊರಬಂದು ದೇಹದಲ್ಲಿ ನಿರ್ದಿಷ್ಟ ರೀತಿಯಲ್ಲಿ ಪ್ರತಿರೋಧಕ ಸೃಷ್ಟಿಯಾಗುವಂತೆ ಪ್ರೇರೇಪಿಸುತ್ತದೆ. ಇಂಥ ಡಿಎನ್​ಎ ವ್ಯಾಕ್ಸಿನ್​ಗಳು ವೈರಸ್, ಪ್ಯಾರಸೈಟ್ ಹಾಗೂ ಕ್ಯಾನ್ಸರ್ ಕೋಶಗಳ ಮೇಲೆ ಬಹಳ ಪರಿಣಾಮಕಾರಿಯಾಗಿ ಕೆಲಸ ಮಾಡುವುದು ದೃಢಪಟ್ಟ ಸಂಗತಿ.

ಬಹಳ ಸುಲಭ ನಿರ್ವಹಣೆಯ ಲಸಿಕೆ:

ಝೈಡಸ್ ಲಸಿಕೆಯ ಒಂದು ಪ್ರಮುಖ ವಿಶೇಷತೆ ಎಂದರೆ ಒಂದೊಮ್ಮೆ ಕೋವಿಡ್ ವೈರಸ್ ಡೆಲ್ಟಾ ಪ್ಲಸ್​ಗಿಂತಲೂ ಬೇರೆ ರೀತಿಯಲ್ಲಿ ರೂಪಾಂತರಗೊಂಡರೂ ಪರಿಣಾಮಕಾರಿ ಎನಿಸುತ್ತದೆ. ಒಂದು ವೇಳೆ ಇದು ಪರಿಣಾಮಕಾರಿ ಎನಿಸದೇ ಇದ್ದರೆ ಲಸಿಕೆಯಲ್ಲಿ ತುಸು ಮಾರ್ಪಾಡು ಮಾಡುವ ಅವಕಾಶವೂ ಇದೆ. ಇದರಿಂದ ಹೊಸದಾಗಿ ಲಸಿಕೆ ಅಭಿವೃದ್ದಿಪಡಿಸುವ ಪ್ರಮೇಯ ತಪ್ಪುತ್ತದೆ.

ಇದನ್ನೂ ಓದಿ: Xi Jinping - ಚೀನಾವನ್ನು ಬೆದರಿಸಲು ಬಂದವರು ರಕ್ತಪಾತ ನೋಡಬೇಕಾಗುತ್ತದೆ: ಕ್ಸಿ ಜಿನ್​ಪಿಂಗ್

ಅಲ್ಲದೇ, ಝೈಡಸ್ ಲಸಿಕೆಯನ್ನ ಬಯೋ ಸೇಫ್ಟಿ ಲೆವೆಲ್ 1ರ ಲ್ಯಾಬ್​ನಲ್ಲೇ ಉತ್ಪಾದನೆ ಮಾಡಬಹುದು. ಕೋವ್ಯಾಕ್ಸಿನ್ ಅನ್ನು ಬಯೋ ಸೇಫ್ಟಿ ಲೆವೆಲ್ 3 ಲ್ಯಾಬ್​ನಲ್ಲಿ ಮಾತ್ರ ಉತ್ಪಾದಿಸಲು ಸಾಧ್ಯ. ಹಾಗೆಯೇ, ಝೈಡಸ್ ಲಸಿಕೆಯನ್ನು ಕೇವಲ 2-8 ಡಿಗ್ರಿ ಸೆಲ್ಸಿಯಸ್ ಉಷ್ಣಾಂಶದಲ್ಲಿ ಸಂಗ್ರಹಿಸಲು ಸಾಧ್ಯ. ಇದರಿಂದ ಇದರ ಸರಬರಾಜು ಪ್ರಕ್ರಿಯೆ ಸುಲಭವಾಗುತ್ತದೆ.

ಅಂದಹಾಗೆ, ಝೈಡಸ್ ಕ್ಯಾಡಿಲಾ ಸಂಸ್ಥೆಯ ಈ ಲಸಿಕೆ ಕೋವ್ಯಾಕ್ಸಿನ್ ಬಳಿಕ ಭಾರತದಲ್ಲಿ ದೇಶೀಯವಾಗಿ ಅಭಿವೃದ್ಧಿಯಾಗಿರುವ ಎರಡನೇ ಲಸಿಕೆಯಾಗಿದೆ. ಹೈದರಾಬಾದ್ ಮೂಲದ ಭಾರತ್ ಬಯೋಟೆಕ್ ಸಂಸ್ಥೆ ಅಭಿವೃದ್ಧಿಪಡಿಸಿರುವ ಕೋವಾಕ್ಸಿನ್ ಲಸಿಕೆಯ ತುರ್ತು ಬಳಕೆಗೆ ಕೇಂದ್ರ ಸರ್ಕಾರ ಈಗಾಗಲೇ ಅನುಮತಿ ನೀಡಿದ್ದಾಗಿದೆ. ಸೀರಂ ಸಂಸ್ಥೆ ಉತ್ಪಾದಿಸಿರುವ ಕೋವಿಶೀಲ್ಡ್ ಅನ್ನು ಅಭಿವೃದ್ಧಿಪಡಿಸಿರುವುದು ವಿದೇಶದಲ್ಲಿ.
Published by:Vijayasarthy SN
First published: