ಕಳ್ಳರಲ್ಲೂ ಕರುಣೆ ಹುಟ್ಟಿಸಿದ ಕೊರೋನಾ.. ಕದ್ದ ವ್ಯಾಕ್ಸಿನ್​ ಬಾಕ್ಸನ್ನು ಹಿಂತಿರುಗಿಸಿ ಕ್ಷಮೆ ಕೇಳಿದ ಕಳ್ಳರು!

ಹರಿಯಾಣ (ಏ.22) : ಕೊರೋನಾ ಭಾರತೀಯರನ್ನು ದಿನೇ ದಿನೇ ಕಿತ್ತು ತಿನ್ನುತ್ತಿದೆ. ವೈರಸ್​ನಿಂದ ಬದುಕುಳಿಯಲು ಲಕ್ಷಾಂತರ ಜನ ನಿತ್ಯ ಹೋರಾಟ ನಡೆಸುತ್ತಿದ್ದಾರೆ. ಇಂಥ ಸಂಕಷ್ಟದ ಸಮಯದಲ್ಲಿ ಮಾನವೀಯತೆಗಿಂತ ಮೇಲು ಬೇರೇನೂ ಇಲ್ಲ ಎಂಬುವುದು ಹರಿಯಾಣದಲ್ಲಿ ನಡೆದ ಘಟನೆಯಿಂದ ಸಾಬೀತಾಗಿದೆ. ಕದ್ದ ಬಾಕ್ಸ್​ನಲ್ಲಿ ಕೊರೋನಾ ವ್ಯಾಕ್ಸಿನ್​ ಇದ್ದಿದ್ದನ್ನು ಕಂಡ ಕಳ್ಳರು ಬಾಕ್ಸನ್ನು ಪೊಲೀಸ್​ ಠಾಣೆಯ ಬಳಿ ಬಿಟ್ಟು ಹೋಗಿದ್ದಾರೆ. ಜೊತೆಗೆ ಪತ್ರವನ್ನೂ ಬರೆದಿರುವ ಕಳ್ಳರು ನಮ್ಮನ್ನು ಕ್ಷಮಿಸಿ. ಬಾಕ್ಸ್​​ನಲ್ಲಿ ವ್ಯಾಕ್ಸಿನ್​ ಇದೆ ಎಂದು ತಿಳಿಯದೇ ಕದ್ದಿದ್ದಕ್ಕೆ ಕ್ಷಮೆ ಇರಲಿ ಎಂದು ಬರೆದಿದ್ದಾರೆ. ತಮ್ಮ ಮಾನವೀಯತೆ ಮೂಲಕ ಕಳ್ಳರು ಪೊಲೀಸರ ಮನಗೆದ್ದಿದ್ದಾರೆ.

ಇಂಥ ಅಪರೂಪದ ಘಟನೆ ನಡೆದಿರೋದು ಜಿಂದ್​ ಜಿಲ್ಲೆಯ ಆಸ್ಪತ್ರೆಯಲ್ಲಿ. ಬುಧವಾರ ರಾತ್ರಿ ಆಸ್ಪತ್ರೆಗೆ ನುಗ್ಗಿದ್ದ ಕಳ್ಳರು ಸ್ಟೋರ್​ ರೂಂನಲ್ಲಿ ಕೈಗೆ ಸಿಕ್ಕ ವಸ್ತುಗಳನ್ನು ಕದ್ದು ಪರಾರಿಯಾಗಿದ್ದರು. ಆಸ್ಪತ್ರೆಯ ಹೆಡ್​​ ನರ್ಸ್​ ಬಂದು ನೋಡುವಷ್ಟರಲ್ಲಿ ಔಷಧಿ ದಾಸ್ತಾನು ಕೊಠಡಿಯ ಬೀಗ ಮುರಿದಿತ್ತು. ಒಳಗೆ ಪರಿಶೀಲಿಸಿದಾಗ ವ್ಯಾಕ್ಸಿನ್​ ಇದ್ದ ಬಾಕ್ಸ್​ ಕಣ್ಮರೆಯಾಗಿತ್ತು. ವ್ಯಾಕ್ಸಿನ್​ ಕಳವಿನಿಂದ ಜಿಲ್ಲೆಯಲ್ಲಿ ವಿತರಿಸಲು ಲಸಿಕೆ ಇಲ್ಲದಂತೆ ಆಗಿತ್ತು. ಈ ಬಗ್ಗೆ ಪೊಲೀಸರಿಗೆ ದೂರು ಕೂಡ ನೀಡಲಾಗಿತ್ತು. ವಾಕ್ಸಿನ್​​ ಕಳವಾಗಿದೆ ಎಂದು ದೊಡ್ಡ ಸುದ್ದಿಯಾಗಿತ್ತು.

2 ದಿನಗಳ ನಂತರ ಆಸ್ಪತ್ರೆಯಲ್ಲಿ ಕಳುವಾಗಿದ್ದ ಲಸಿಕೆಗಳಿದ್ದ ಬಾಕ್ಸ್​​ ಸ್ಥಳೀಯ ಪೊಲೀಸ್​ ಠಾಣೆಯ ಬಳಿ ಪತ್ತೆಯಾಗಿತ್ತು. ಬಾಕ್ಸ್​ನಲ್ಲಿ 182 ವೈಯಲ್ಸ್​ ಕೋವಿಶೀಲ್ಡ್​ ಹಾಗೂ 440 ಡೋಸೇಜ್​ ಕೊವ್ಯಾಕ್ಸಿನ್​ ಲಸಿಕೆ ಹಾಗೆಯೇ ಇದ್ದವು. ಬಾಕ್ಸ್​ ಜೊತೆ ಕಳ್ಳರು ಬರೆದಿದ್ದ ಪತ್ರವೂ ಸಿಕ್ಕಿತ್ತು. ಗೊತ್ತಿಲ್ಲದೇ ನಾವು ವ್ಯಾಕ್ಸಿನ್​ ಇದ್ದ ಬಾಕ್ಸನ್ನು ಕದ್ದಿದ್ದೇವೆ. ಹೀಗಾಗಿ ಬಾಕ್ಸನ್ನು ಹಿಂತಿರುಗಿಸುತ್ತಿದ್ದೇವೆ. ಕ್ಷಮೆ ಇರಲಿ ಎಂದು ಹಿಂದಿಯಲ್ಲಿ ಬರೆಯಲಾಗಿತ್ತು.

ಕಳ್ಳರ ನಿಯತ್ತಿಗೆ ಪೊಲೀಸರ ಮನವೂ ಕರಗಿದೆ. ಕೊರೋನಾ ಕಷ್ಟವನ್ನು ಅರಿತು ಜವಾಬ್ದಾರಿಯುತವಾಗಿ ನಡೆದುಕೊಂಡ ಕಳ್ಳರ ಬಗ್ಗೆ ಸ್ಥಳೀಯರಲ್ಲೂ ಮರುಕ ಉಂಟಾಗಿದೆ. ಇನ್ನು ಪೊಲೀಸ್​ ಠಾಣೆಯ ಟೀ ಅಂಗಡಿ ಬಳಿ ವ್ಯಾಕ್ಸಿನ್​ ಬಾಕ್ಸ್​ ಇಟ್ಟು ಹೋದ ಕಳ್ಳರಿಗಾಗಿ ಹುಡುಕಾಟ ನಡೆಸಲಾಗಿದೆ. ಸ್ಥಳದಲ್ಲಿದ್ದ ಸಿಸಿಟಿವಿ ಪರಿಶೀಲಿಸಿದಾಗ ಇಬ್ಬರು ಕಳ್ಳರು ಬಾಕ್ಸನ್ನು ತಂದಿಟ್ಟಿರುವುದು ಗೊತ್ತಾಗಿದೆ.