Mutant Corona: ರೂಪಾಂತರಿ ಕೊರೋನಾ ಭೀತಿ; ಮತ್ತೆ 6 ವಾರಗಳ ಲಾಕ್​ಡೌನ್​ ಘೋಷಿಸಿದ ಬ್ರಿಟನ್ ಸರ್ಕಾರ!

ಲಂಡನ್: ಕಳೆದ ವರ್ಷ ಚೀನಾದಲ್ಲಿ ಪತ್ತೆಯಾದ ಕೊರೋನಾ ವೈರಸ್​ ಇದೀಗ ಇಡೀ ವಿಶ್ವವನ್ನು ಬಿಟ್ಟೂ ಬಿಡದೆ ಕಾಡುತ್ತಿದೆ. ಜಗತ್ತಿನಾದ್ಯಂತ ಮಿಂಚಿನ ವೇಗದಲ್ಲಿ ಹರಡಿದ್ದ ಈ ವೈರಸ್​ ಲಕ್ಷಾಂತರ ಜನರ ಪ್ರಾಣಕ್ಕೆ ಕುತ್ತಾಗಿದೆ. ಭಾರತದಲ್ಲೂ ಸಹ 1.5 ಲಕ್ಷಕ್ಕೂ ಅಧಿಕ ಜನ ಈ ಸೋಂಕಿನಿಂದಾಗಿ ಮೃತಪಟ್ಟಿದ್ದಾರೆ. ಈ ಸೋಂಕಿಗೆ ಲಸಿಕೆಯನ್ನು ಸಂಶೋಧಿಸುವ ಕೆಲಸವೂ ನಡೆಯುತ್ತಿದೆಯಾದರೂ ಈ ವರೆಗೆ ಲಸಿಕೆಗಳು ಕ್ಲಿನಿಕಲ್​ ಟ್ರಯಲ್​ ಹಂತವನ್ನು ದಾಟಿಲ್ಲ. ಇನ್ನೂ ಭಾರತದಲ್ಲಿ ಲಸಿಕೆ ಡ್ರೈ ರನ್​ ನಡೆಯುತ್ತಿರುವುದು ಆಶಾದಾಯಕ ಬೆಳವಣಿಗೆ. ಈ ನಡುವೆ ಇಂಗ್ಲೆಂಡ್​ನಲ್ಲಿ ಪತ್ತೆಯಾಗಿರುವ​ ಹೊಸ ರೂಪಾಂತರ ಪ್ರಭೇದದ ಕೊರೋನಾ ವೈರಸ್​ ಇಡೀ ಜಗತ್ತಿಗೆ ಮತ್ತಷ್ಟು ಮಾರಕವಾಗುವ ಸಾಧ್ಯತೆಗಳನ್ನು ಮುಂದಿಟ್ಟಿದೆ. Covid-19 ಗಿಂತಲೂ ವೇಗವಾಗಿ ಹರಡುತ್ತಿರುವ ಈ ವೈರಸ್​ ಇಂಗ್ಲೆಂಡ್​ ದೇಶಕ್ಕೆ ಸವಾಲಾಗಿ ಪರಿಣಮಿಸಿದೆ. ಪರಿಣಾಮ ಅಲ್ಲಿನ ಸರ್ಕಾರ ಇಡೀ ದೇಶದಲ್ಲಿ ಮತ್ತೊಂದು ಸುತ್ತಿನ ಲಾಕ್​ಡೌನ್​ ಘೋಷಿಸಲು ಮುಂದಾಗಿದೆ.​

ರೂಪಾಂತರಿ ಕೊರೋನಾ ವೈರಸ್ ಪ್ರಕರಣಗಳು ಉಲ್ಬಣವಾಗುತ್ತಿದೆ. ಹೀಗೆ ಮುಂದುವರೆದರೆ ಪ್ರಕರಣಗಳು ದಿನೇ ದಿನೇ ಹೆಚ್ಚುತ್ತವೆ. ಪರಿಣಾಮ ಆಸ್ಪತ್ರೆಗಳಲ್ಲಿ ರೋಗಿಗಳ ಚಿಕಿತ್ಸೆಗೆ ಸ್ಥಳಾವಕಾಶವೂ ಇರುವುದಿಲ್ಲ ಎಂಬ ತಜ್ಞರ ಎಚ್ಚರಿಕೆಯ ನಂತರ ತುರ್ತು ಕ್ರಮಕ್ಕೆ ಮುಂದಾಗಿರುವ ಬ್ರಿಟನ್ ಸರ್ಕಾರ ಲಂಡನ್​ನಲ್ಲಿ ಇಂದಿನಿಂದ ಆರು ವಾರಗಳ ಲಾಕ್​ಡೌನ್​ ಘೋಷಿಸಿ ಆದೇಶಿಸಿದೆ.

ಸೋಮವಾರ ಈ ಕುರಿತ ಆದೇಶವನ್ನು ಪ್ರಕಟಿಸಿರುವ ಬ್ರಿಟನ್ ಪ್ರಧಾನಿ ಬೋರಿಸ್​ ಜಾನ್ಸನ್​, "ಬ್ರಿಟನ್​ನಲ್ಲಿ ಉಲ್ಭಣಿಸುತ್ತಿರುವ ರೂಪಾಂತರಿ ಕೊರೋನಾ ವೈರಸ್​ ವೇಗವಾಗಿ ಹರಡುವುದನ್ನು ತಡೆಯುವ ಸಲುವಾಗಿ ಬ್ರಿಟನ್​ನಲ್ಲಿ 6 ವಾರಗಳ ಕಾಲ ಮತ್ತೊಂದು ಸುತ್ತಿನ ಲಾಕ್​ಡೌನ್​ ಅನ್ನು ಹೇರಲಾಗುತ್ತಿದೆ. ಶಾಲಾ ಕಾಲೇಜು ಹಾಗೂ ಎಲ್ಲಾ ರಂಗಗಳು ಮುಂದಿನ ಆರು ವಾರಗಳ ಕಾಲ ಸಂಪೂರ್ಣವಾಗಿ ಮುಚ್ಚಲಿವೆ.

ಇದನ್ನೂ ಓದಿ : ಇಂಗ್ಲೆಂಡ್​ನಿಂದ ಬಂದವರಿಗೆ ಹೋಮ್​ ಕ್ವಾರಂಟೈನ್​, ಆರ್​ಟಿಪಿಸಿಆರ್​ ಟೆಸ್ಟ್​ ಕಡ್ಡಾಯ; ಸಚಿವ ಕೆ ಸುಧಾಕರ್​

ಆಕ್ಸ್‌ಫರ್ಡ್ ವಿಶ್ವವಿದ್ಯಾಲಯ ಅಸ್ಟ್ರಾಜೆನೆಕಾ ಸೇರಿದಂತೆ ಎರಡು ಲಸಿಕೆಗಳನ್ನು ಪರಿಚಯಿಸುವುದರೊಂದಿಗೆ ಬ್ರಿಟನ್ ಕೊರೋನಾ ಲಸಿಕೆ ಸಂಶೋಧನೆಯಲ್ಲಿ ಮುನ್ನಡೆ ಸಾಧಿಸುತ್ತಿದೆ. ಆದರೂ ಮುಂಜಾಗ್ರತಾ ಕ್ರಮವಾಗಿ ಲಾಕ್​ಡೌನ್ ಅಗತ್ಯವಾಗಿದೆ. ಫೆಬ್ರವರಿ ಮಧ್ಯಂತರದ ವೇಳೆಗೆ ಎಲ್ಲರೂ ಮುಕ್ತವಾಗಿ ಓಡಾಡಬಹುದು ತಮ್ಮ ಆದ್ಯತೆಯ ಕೆಲಸಗಳಿಗೆ ಮರಳಬಹುದು. ಪ್ರಸ್ತುತ ಜನರ ಜೀವವನ್ನು ಉಳಿಸುವ ರಕ್ಷಿಸುವ ಸಲುವಾಗಿ ನಾವು ಇನ್ನೂ ಆರು ವಾರಗಳ ಕಾಲ ಮನೆಯಲ್ಲೇ ಇರಬೇಕಾಗುತ್ತದೆ" ಎಂದು ದೂರದರ್ಶನದಲ್ಲಿ ಮಾಡಿದ ಭಾಷಣದ ಮೂಲಕ ತಿಳಿಸಿದ್ದಾರೆ.

ಬ್ರಿಟನ್​ನಲ್ಲಿ ರೂಪಾಂತರಿ ಕೊರೋನಾ ವೈರಸ್​ ಅನ್ನು ಹಿಮ್ಮೆಟ್ಟಿಸುವ ಸಲುವಾಗಿ ವಿಜ್ಞಾನಿಗಳು ಹಾಗೂ ತಂತ್ರಜ್ಞರು ತೀವ್ರವಾಗಿ ಲಸಿಕೆ ಸಂಶೋಧನೆ ಕೆಲಸದಲ್ಲಿ ತೊಡಗಿದ್ದಾರೆ. ಇನ್ನೂ ಕೆಲವರು ಲಾಕ್​ಡೌನ್ ಅವಧಿಯನ್ನು ಮತ್ತಷ್ಟು ವಿಸ್ತರಿಸಬೇಕು ಅಲ್ಲದೆ, ಶೀಘ್ರದಲ್ಲಿ ಈ ವೈರಸ್​ ಅನ್ನು ಹಿಮ್ಮೆಟ್ಟಿಸುವ ಲಸಿಕೆ ಸಂಶೋಧನೆಯಾಗದಿದ್ದರೆ, ಲಂಡನ್​​ಗೆ ತೀವ್ರ ಅಪಾಯ ತಪ್ಪಿದ್ದಲ್ಲ ಎಂದು ಎಚ್ಚರಿಕೆ ನೀಡಿದ್ದಾರೆ. ಈ ನಡುವೆ ನೆರೆಯ ಸ್ಕಾಟ್ಲೆಂಟ್​ ದೇಶ ಸಹ ಮುಂಜಾಗ್ರತಾ ಕ್ರಮವಾಗಿ ಲಾಕ್​ಡೌನ್ ಘೋಷಿಸಿದೆ.