ಕೊರೊನಾ ಆರ್ಭಟ: ಚೀನಾದಲ್ಲಿರುವ ವಿದ್ಯಾರ್ಥಿಗಳನ್ನು ಪಾಕಿಸ್ತಾನಕ್ಕೆ ಕರೆಸಿಕೊಳ್ಳಲು ನಿರಾಕರಿಸಿದ ಇಮ್ರಾನ್​ ಖಾನ್​​

ನವದೆಹಲಿ (ಫೆ.04): ಜಗತ್ತಿನೆಲ್ಲೆಡೆ ಭೀತಿ ಮೂಡಿಸಿರುವ ಕೊರೊನಾ ವೈರಸ್​ಗೆ ಚೀನಾದಲ್ಲಿ ಈಗಾಗಲೇ 425 ಜನ ಸಾವನ್ನಪ್ಪಿದ್ದಾರೆ. ಚೀನಾದಲ್ಲಿ ವ್ಯಾಪಕವಾಗಿ ಹರಡುತ್ತಿರುವ ಈ ಡೆಡ್ಲಿ ವೈರಸ್​ಗೆ ಹೆದರಿ ಈಗಾಗಲೇ ಇಲ್ಲಿ ನೆಲೆಸಿರುವ ವಿದೇಶಿ ವಿದ್ಯಾರ್ಥಿಗಳು ತಮ್ಮ ತವರಿಗೆ ಹಿಂತಿರುಗುತ್ತಿದ್ದಾರೆ. ಭಾರತ ಕೂಡ ಇಲ್ಲಿ ನೆಲೆಸಿರುವ ಭಾರತೀಯರಿಗೆ ಸಹಾಯಹಸ್ತ ಚಾಚಿದ್ದು, ದೇಶಕ್ಕೆ ವಾಪಸ್ಸು ಕರೆಸಿಕೊಂಡಿದೆ. ಇನ್ನ ನೆರೆಯ ಪಾಕಿಸ್ತಾನ ವಿದ್ಯಾರ್ಥಿಗಳು ವುಹಾನ್ ಪ್ರಾಂತ್ಯದಲ್ಲಿ ಹರಡಿರುವ ವೈರಸ್​ಗೆ ಹೆದರಿ ತಮ್ಮ ದೇಶಕ್ಕೆ ಮರಳಲು ಸಿದ್ಧತೆ ನಡೆಸಿದ್ದಾರೆ, ಆದರೆ, ಪಾಕ್​ ಮಾತ್ರ ತಮ್ಮ ದೇಶದ ನಾಗರಿಕರನ್ನು ಹಿಂದಕ್ಕೆ ಕರೆಸಿಕೊಳ್ಳಲು ಸಾಧ್ಯವಿಲ್ಲ ಎಂದಿದೆ.

ಈ ಕುರಿತು ಮಾತನಾಡಿರುವ ಪಾಕಿಸ್ತಾನದ ಚೀನಾ ರಾಯಭಾರಿ, ವುಹಾನ್​ನಲ್ಲಿರುವ ವಿದ್ಯಾರ್ಥಿಗಳನ್ನು ಸ್ವದೇಶಕ್ಕೆ ಕಳುಹಿಸಲು ಸಾಧ್ಯವಿಲ್ಲ. ಪಾಕಿಸ್ತಾನದಲ್ಲಿ ಈ ವೈರಸ್​ಗೆ ಚಿಕಿತ್ಸೆ ನೀಡುವಷ್ಟು ವೈದ್ಯಕೀಯ ವ್ಯವಸ್ಥೆ ಇಲ್ಲ. ಹಾಗಾಗಿ ವಿದ್ಯಾರ್ಥಿಗಳು ಪಾಕ್​ಗೆ ಮರಳುವುದು ಬೇಡ ಎಂದಿದ್ದಾರೆ. ಇದರಿಂದಾಗಿ ಪಾಕ್​ ವಿದ್ಯಾರ್ಥಿಗಳು ಕಂಗಾಲಾಗಿದ್ದಾರೆ.

ಜಿಯೋ ನ್ಯೂಸ್​ನೊಂದಿಗೆ ಮಾತನಾಡಿದ ನಗ್ಮಾನ ಹಶ್ಮಿ, ಚೀನಾದಲ್ಲಿ ವೈದ್ಯಕೀಯ ವ್ಯವಸ್ಥೆ ಕೊರತೆ ಇದೆ. ಈ ಸೋಂಕನ್ನು ಎದುರಿಸುವ ವೈದ್ಯಕೀಯ ವ್ಯವಸ್ಥೆ ಚೀನಾದಲ್ಲಿಯೇ ಉತ್ತಮವಾಗಿದೆ ಎಂದಿದ್ದಾರೆ.

ವುಹಾನ್​ನಲ್ಲಿರುವ ವಿದ್ಯಾರ್ಥಿಗಳು ಆಹಾರ ಕೊರತೆ ಮತ್ತಿತ್ತರ ವಿಷಯದ ಬಗ್ಗೆ ಚಿಂತಿತರಾಗಿದ್ದಾರೆ. ಈ ಬಗ್ಗೆ ಸಂಪೂರ್ಣ ಅರಿವಿದ್ದು, ಅವುಗಳನ್ನು ಪೂರ್ಣಗೊಳಿಸಲು ಚೀನಾ ಅಧಿಕಾರಿಗಳೊಂದಿಗೆ ನಿರಂತರ ಸಂಪರ್ಕದಲ್ಲಿದ್ದೇವೆ ಎಂದರು.

ಇದನ್ನು ಓದಿ: Coronavirus: ಕೊರೊನಾ ವೈರಸ್​ ಭೀತಿ: ಕೇರಳದಲ್ಲಿ ಮೂರನೇ ಪ್ರಕರಣ ಪತ್ತೆ

ಇನ್ನು ಚೀನಾದಲ್ಲಿರುವ ವಿದ್ಯಾರ್ಥಿಗಳು ಹಾಗೂ ಕುಟುಂಬಸ್ಥರನ್ನು ಮರಳಿ ತರುವಂತೆ ಪಾಕ್​ ನಾಗರೀಕರು ಸರ್ಕಾರಕ್ಕೆ ಮನವಿ ಸಲ್ಲಿಸಿದರು. ಇದಾದ ಬಳಿಕ ಈ ಪ್ರಕಟಣೆಯನ್ನು ಇಸ್ಲಾಮಾಬಾದ್​ ಅಧಿಕಾರಿಗಳು ಪ್ರಕಟಿಸಿದ್ದಾರೆ.