ಕೊರೋನಾ ಎಫೆಕ್ಟ್​; ಶಿವಮೊಗ್ಗದಲ್ಲಿ ಗಣೇಶನ ಮೂರ್ತಿ ತಯಾರಕರನ್ನು ಕೇಳೋರೇ ಇಲ್ಲ!

ಶಿವಮೊಗ್ಗ (ಜು. 9): ಶ್ರಾವಣ ಮಾಸ ಆರಂಭವಾಗುತ್ತಿದ್ದ ಹಾಗೆ ಸಾಲು ಸಾಲು ಹಬ್ಬಗಳು ಬರಲಿವೆ. ಈ ಕೊರೊನಾ ಎಂಬ ಹೆಮ್ಮಾಯಿಂದರಿ ಹಬ್ಬಗಳ ಮೇಲೂ ಕರಿಛಾಯೆ ಆವರಿಸಿಕೊಳ್ಳುವ ಭೀತಿ ಎದುರಾಗಿದೆ.  ಗಣೇಶೋತ್ಸವ ಹಬ್ಬದ ಮೇಲೂ ಈ ಕೊರೊನಾ ಮಹಾಮಾರಿ  ಪರಿಣಾಮ ಬೀರಲಿದೆ. ಈಗಾಗಲೇ, ಗಣೇಶನ ಮೂರ್ತಿ ನಿರ್ಮಾಣ ಮಾಡುವವರು  ಪರಿತಪಿಸುತ್ತಿದ್ದಾರೆ. ಇಷ್ಟೊತ್ತಿಗಾಗಲೆ ಗಣಪತಿ ಮೂರ್ತಿಗೆ ಆರ್ಡರ್ ಗಳು ಬರಬೇಕಿತ್ತು. ಆದರೆ, ಅಡ್ವಾನ್ಸ್​ ಬುಕಿಂಗ್ ಇಲ್ಲದೆ ಗಣಪತಿ ಮೂರ್ತಿ ತಯಾರಿಸುವವರು ಖಾಲಿ ಕೈಯಲ್ಲಿ ಕುಳಿತಿದ್ದಾರೆ.

ಆಷಾಢ ಮಾಸ ಮುಗಿಯುತ್ತಾ ಬರುತ್ತಿದೆ. ಶ್ರಾವಣ ಮಾಸದಲ್ಲಿ ಸಾಲು ಸಾಲು ಹಬ್ಬಗಳು ಬರಲಿವೆ. ಆದರೆ ಈ ಕೊರೊನಾದ ಕಾಟದಿಂದ ಈ ಹಬ್ಬಗಳ ಸಂಭ್ರಮವನ್ನೇ ಕಸಿದುಕೊಳ್ಳುವಂತ ಪರಿಸ್ಥಿತಿ ತಂದಿದೆ. ಈ  ಬಾರಿ ಎಲ್ಲಾ ಹಬ್ಬಗಳಿಗೂ ಬ್ರೇಕ್ ಬೀಳುವ ಸಾಧ್ಯತೆ ದಟ್ಟವಾಗಿದೆ.  ಇನ್ನು ಒಂದು ತಿಂಗಳಲ್ಲಿ ಬರುವ ಗೌರಿ-ಗಣೇಶ ಹಬ್ಬದ ಮೇಲೂ ಈ ಕೊರೊನಾದ ಕರಿಛಾಯೆ ಆವರಿಸಿಕೊಂಡಿದೆ. ಗಣಪತಿ ಹಬ್ಬಕ್ಕೂ ಎರಡು ತಿಂಗಳ ಮುನ್ನವೇ ಗಣೇಶನ ಮೂರ್ತಿ ತಯಾರಿಕೆಯಲ್ಲಿ ತೊಡಗಬೇಕಿದ್ದ ಕುಂಬಾರರು, ಖಾಲಿ ಕೈಯಲ್ಲಿ ಕೂತಿದ್ದಾರೆ.

ಇದನ್ನೂ ಓದಿ: ಹರ್ಬಲ್ ಮೈಸೂರ್ ಪಾಕ್​ನಿಂದ ಕೊರೋನಾ ಗುಣವಾಗುತ್ತೆ ಎಂದ ಸ್ವೀಟ್​ ಅಂಗಡಿ ಬಾಗಿಲಿಗೆ ಬೀಗ!

ಈ ಬಾರಿ ಸಾರ್ವಜನಿಕವಾಗಿ ಗಣಪತಿ ಪ್ರತಿಷ್ಠಾಪನೆಗೆ ಅವಕಾಶ ಸಿಗುತ್ತೋ ಇಲ್ಲವೋ ಎಂಬ ಪ್ರಶ್ನೆಗಳು ಜನರನ್ನು ಕಾಡುತ್ತಿವೆ. ಕೊರೋನಾ ಭೀತಿಯಲ್ಲಿ ಸಾರ್ವಜನಿಕವಾಗಿ ಗಣಪತಿ ಪ್ರತಿಷ್ಠಾಪನೆ ಮತ್ತು ವಿಸರ್ಜನೆ ಕಾರ್ಯಗಳಿಗೆ ಕಡಿವಾಣ ಬೀಳುವ ಸಾಧ್ಯತೆಗಳೇ ಹೆಚ್ಚಿವೆ. ಈ ಹಿನ್ನೆಲೆಯಲ್ಲಿ, ಗಣಪತಿ ಪ್ರತಿಷ್ಠಾಪನೆ ಮಾಡುವ ಯುವಕರ ಸಂಘದವರು ಈ ಬಾರಿ ಗಣೇಶನ ಮೂರ್ತಿ ರಚನೆಗೆ ಆರ್ಡರ್ ಕೂಡ ನೀಡಿಲ್ಲ. ಸರ್ಕಾರ ಈ ಬಾರಿ ಸಾರ್ವಜನಿಕವಾಗಿ ಗಣಪತಿ ಪ್ರತಿಷ್ಟಾಪನೆ ಬ್ಯಾನ್ ಮಾಡುವ ಎಲ್ಲಾ ಸಾಧ್ಯತೆಗಳಿದ್ದು,  ಯಾರು ಕೂಡ ಗಣಪತಿ ಕೂರಿಸುವ ಆಸಕ್ತಿಯೇ ತೊರಿಲ್ಲ.

ಈ ಕಾರಣದಿಂದಾಗಿ ಕುಂಬಾರರು, ಗಣೇಶನ ಮೂರ್ತಿ ರಚನೆ ಮಾಡುವವರು ತಲೆ ಮೇಲೆ ಕೈ ಹೊತ್ತು ಕುಳಿತಿದ್ದಾರೆ.  ಗಣಪತಿ ಹಬ್ಬದ ಸಮಯದಲ್ಲಿ ಮೂರ್ತಿ ಸಿದ್ಧಪಡಿಸಿ ಮಾರಾಟ ಮಾಡಿ ವರ್ಷದ ತುತ್ತಿನ ಚೀಲ ತುಂಬಿಸಿಕೊಳ್ಳುತ್ತಿದ್ದವರಿಗೆ ಈ ಬಾರಿ ಸಂಕಷ್ಟ ಎದುರಾಗಿದೆ. ಇದುವರೆಗೆ ಹತ್ತಾರು ದೊಡ್ಡ ದೊಡ್ಡ ಗಣಪತಿ ಮೂರ್ತಿ ರಚನೆ ಮಾಡುತ್ತಿದ್ದವರಿಗೆ ಈ ಬಾರಿ ಒಂದೇ ಒಂದು ಗಣಪತಿ ಬೇಕು ಎಂಬ ಆರ್ಡರ್ ಬಂದಿಲ್ಲ, ನಮ್ಮ ಬದುಕು ಹೇಗೆ ಸಾಗಿಸೋದು ಎನ್ನುತ್ತಿದ್ದಾರೆ. ಗಣೇಶನ ಹಬ್ಬದ ಸಂದರ್ಭದಲ್ಲಿ ವರ್ಷದ ಆದಾಯ ಗಳಿಸುವ ಕುಟುಂಬಗಳಿಗೆ ಈ ವರ್ಷ ಬಾರೀ ಪೆಟ್ಟು ಬೀಳಲಿದೆ. ಮನೆಯಲ್ಲಿ ಗಣಪತಿ ಮೂರ್ತಿ ಕೂರಿಸಿ ಪೂಜೆ ಮಾಡುವವರು ಮೂರ್ತಿಗಳ ಖರೀದಿಗೆ ಬರುತ್ತಾರೆ ಎಂಬ ಆಶಾಭಾವನೆಯಲ್ಲಿ  ಗಣಪತಿ ಮೂರ್ತಿಗಳನ್ನು ತಯಾರಿಸುವ ಕೆಲಸದಲ್ಲಿ ಕುಂಬಾರರು ನಿರತರಾಗಿದ್ದಾರೆ. ಕೇವಲ ಗಣೇಶನ ಮೂರ್ತಿ ತಯಾರಿಕೆಯಿಂದಲೇ ಜೀವನ ಮಾಡಿಕೊಂಡು ಬರುತ್ತಿದ್ದ ಕುಟುಂಬಗಳಿಗೆ ಈ ಬಾರಿ ಸಂಕಷ್ಟ ಎದುರಾಗಿದೆ.