ಭಾರತದಲ್ಲಿ ಉತ್ತಮಗೊಂಡಿದೆ ಸೋಂಕು ದ್ವಿಗುಣ ದರ; ದಿನದ ಪರೀಕ್ಷೆ ಸಾಮರ್ಥ್ಯ 1 ಲಕ್ಷಕ್ಕೆ ಹೆಚ್ಚಳ

ನವದೆಹಲಿ(ಮೇ 13): ಭಾರತದಲ್ಲಿ ಕೊರೋನಾ ವೈರಸ್ ಸೋಂಕು ಪ್ರಕರಣ ಸಂಖ್ಯೆ 74,281ಕ್ಕೆ ಏರಿದೆ. ಕಳೆದ 24 ಗಂಟೆಯಲ್ಲಿ 3,525 ಪಾಸಿಟಿವ್ ಪ್ರಕರಣಗಳು ಬೆಳಕಿಗೆ ಬಂದಿವೆ. ಸಾವಿನ ಸಂಖ್ಯೆ 2,415ಕ್ಕೆ ಏರಿದೆ. ಇಲ್ಲಿಯವರೆಗೆ 24,386 ಜನರು ಗುಣಮುಖಗೊಂಡು ಆಸ್ಪತ್ರೆಗಳಿಂದ ಡಿಸ್​ಚಾರ್ಜ್ ಆಗಿದ್ದಾರೆ. ಕೇಂದ್ರ ಆರೋಗ್ಯ ಸಚಿವ ಡಾ. ಹರ್ಷ್ ವರ್ಧನ್ ಅವರು ಇವತ್ತು ಪತ್ರಿಕಾಗೋಷ್ಠಿಯಲ್ಲಿ ಈ ಮಾಹಿತಿ ನೀಡಿದ್ಧಾರೆ.

ಅತೀ ಹೆಚ್ಚು ಪ್ರಕರಣಗಳ ಹಣೆ ಪಟ್ಟಿ ಮಹಾರಾಷ್ಟ್ರಕ್ಕೆ ಮುಂದುವರಿದಿದೆ. ಮುಂಬೈನ ಧಾರಾವಿ ಸ್ಲಮ್ ಪ್ರದೇಶ ಕೊರೋನಾ ಹಾಟ್ ಸ್ಪಾಟ್ ಆಗಿ ಮುಂದುವರಿದಿದೆ. ಇಲ್ಲಿ ಪ್ರಕರಣಗಳ ಸಂಖ್ಯೆ 1 ಸಾವಿರ ಗಡಿ ದಾಟಿ ಹೋಗಿದೆ.

ಇದೇ ವೇಳೆ, ಕೊರೋನಾ ವೈರಸ್ ವಿರುದ್ಧ ಹೋರಾಟದಲ್ಲಿ ದೇಶ ಯಶಸ್ಸು ಸಾಧಿಸುವ ಸೂಚನೆ ಇದೆ. ಸೋಂಕು ದ್ವಿಗುಣಗೊಳ್ಳುವ ದರ ಉತ್ತಮಗೊಳ್ಳುತ್ತಿದೆ. ಸೋಂಕು ದ್ವಿಗುಣಗೊಳ್ಳಲು ಈಗ 12.6 ದಿನಗಳಾಗುತ್ತಿವೆ ಎಂದು ಆರೋಗ್ಯ ಸಚಿವರು ಹೇಳಿದ್ಧಾರೆ.

ಕಳೆದ 24 ಗಂಟೆಯಲ್ಲಿ 9 ರಾಜ್ಯ ಮತ್ತು ಕೇಂದ್ರಾಡಳಿತ ಪ್ರದೇಶಗಳಲ್ಲಿ ಯಾವುದೇ ಪ್ರಕರಣಗಳು ದಾಖಲಾಗಿಲ್ಲ. ಸೋಂಕು ಮತ್ತು ಸಾವಿನ ಅನುಪಾತ ಶೇ. 3.2 ಇದೆ. ಗುಣಮುಖರಾಗುತ್ತಿರುವವರ ಪ್ರಮಾಣ ಶೇ. 32.8 ಇದೆ ಎಂದೂ ಸಚಿವರು ತಿಳಿಸಿದ್ದಾರೆ.

ಇದನ್ನೂ ಓದಿ: ಅಮೆರಿಕ, ಜಪಾನ್ ಬಿಟ್ಟರೆ ನರೇಂದ್ರ ಮೋದಿ ಘೋಷಿಸಿದ ಆರ್ಥಿಕ ಪ್ಯಾಕೇಜ್ ಅತಿದೊಡ್ಡದು

ಕೊರೋನಾ ವಿರುದ್ಧದ ಹೋರಾಟದಲ್ಲಿ ಪರೀಕ್ಷೆಗಳು ಪ್ರಮುಖ ಪಾತ್ರ ವಹಿಸುತ್ತವೆ. ಭಾರತದಲ್ಲಿ ಪರೀಕ್ಷಾ ಸಾಮರ್ಥ್ಯ ಹೆಚ್ಚುತ್ತಿರುವುದು ಡಾ. ಹರ್ಷ್ ವರ್ಧನ್ ಅವರು ನೀಡಿದ ಮಾಹಿತಿಯಿಂದ ಗೊತ್ತಾಗುತ್ತದೆ. ದೇಶದಲ್ಲಿ ಈಗ ದಿನಕ್ಕೆ 1 ಲಕ್ಷ ಪರೀಕ್ಷೆಗಳನ್ನು ನಡೆಸುವ ಸಾಮರ್ಥ್ಯ ಇದೆ. ದೇಶಾದ್ಯಂತ 352 ಸರ್ಕಾರಿ ಲ್ಯಾಬ್​ಗಳು ಹಾಗೂ 140 ಖಾಸಗಿ ಲ್ಯಾಬ್​ಗಳಲ್ಲಿ ಪರೀಕ್ಷಾ ಸೌಲಭ್ಯ ಇದೆ ಎಂದವರು ಹೇಳಿದ್ದಾರೆ.