ಏಪ್ರಿಲ್​ನೊಳಗೆ ಆಕ್ಸ್​ಫರ್ಡ್​ನ ಕೋವಿಡ್ ಲಸಿಕೆ ಲಭ್ಯ; 2 ಡೋಸ್​ಗೆ ಗರಿಷ್ಠ 1,000 ರೂ ಬೆಲೆ

ನವದೆಹಲಿ(ನ. 20): ಲಂಡನ್​ನ ಆಕ್ಸ್​ಫರ್ಡ್ ಇನ್ಸ್​ಟಿಟ್ಯೂಟ್ ಸಂಶೋಧಿಸಿರುವ ಕೋವಿಶೀಲ್ಡ್ ಕೋವಿಡ್ ವ್ಯಾಕ್ಸಿನ್ ಇನ್ನು ನಾಲ್ಕೈದು ತಿಂಗಳಷ್ಟರಲ್ಲಿ ಮಾರುಕಟ್ಟೆಗೆ ಲಭ್ಯವಿರಲಿದೆ ಎಂದು ಸೆರಮ್ ಇನ್ಸ್​ಟಿಟ್ಯೂಟ್ ಆಪ್ ಇಂಡಿಯಾದ ಸಿಇಒ ಆಡಾರ್ ಪೂನಾವಾಲ ತಿಳಿಸಿದ್ದಾರೆ. ಹಿಂದೂಸ್ತಾನ್ ಟೈಮ್ಸ್ ಲೀಡರ್​ಶಿಪ್ ಸಮಿಟ್ 2020 ಸಭೆಯಲ್ಲಿ ಮಾತನಾಡುತ್ತಿದ್ದ ಅವರು, ಎಲ್ಲ ಪರೀಕ್ಷೆಗಳು ಸುಗಮವಾಗಿ ಮುಕ್ತಾಯಗೊಂಡಲ್ಲಿ ಏಪ್ರಿಲ್ ತಿಂಗಳೊಳಗೆ ಸಾರ್ವಜನಿಕರಿಗೆ ಲಸಿಕೆ ಲಭ್ಯವಾಗುತ್ತದೆ ಎಂದಿದ್ದಾರೆ. ಲಸಿಕೆಯ ಎರಡು ಡೋಸ್​ಗಳಿಗೆ ಅಂದಾಜು ಗರಿಷ್ಠ 1 ಸಾವಿರ ರೂ ದರ ನಿಗದಿಯಾಗಬಹುದು ಎಂದೂ ಅವರು ತಿಳಿಸಿದ್ದಾರೆ. ಆಕ್ಸ್​ಫರ್ಡ್ ವಿಶ್ವವಿದ್ಯಾಲಯ ಮತ್ತು ಆಸ್ಟ್ರಾಜೆನೆಕಾ ಫಾರ್ಮಾ ಸಂಸ್ಥೆ ಜಂಟಿಯಾಗಿ ತಯಾರಿಸುತ್ತಿರುವ ಈ ಲಸಿಕೆಯನ್ನು ಸೆರಮ್ ಇನ್ಸ್​ಟಿಟ್ಯೂಟ್ ಭಾರತದಲ್ಲಿ ತಯಾರಿಸುತ್ತಿದೆ. ಈ ಸಲಿಕೆಯ ಅಂತಿ ಹಂತದ ಪ್ರಯೋಗಗಳು ನಡೆಯುತ್ತಿವೆ.

ಸೆರಮ್ ಇನ್ಸ್​ಟಿಟ್ಯೂಟ್​ನ ಸಿಇಒ ಪ್ರಕಾರ ಭಾರತದಲ್ಲಿ ಪ್ರತಿಯೊಬ್ಬ ವ್ಯಕ್ತಿಗೂ ಲಸಿಕೆ ಹಾಕಲು ಎರಡ್ಮೂರು ವರ್ಷ ಆಗಬಹುದಂತೆ. ಅದಕ್ಕೆ ಅವರು ನೀಡುವ ಕಾರಣ ಇದು: “ಪ್ರತಿಯೊಬ್ಬ ಭಾರತೀಯರಿಗೂ ವ್ಯಾಕ್ಸಿನ್ ಹಾಕಲು ಎರಡು ಅಥವಾ ಮೂರು ವರ್ಷ ಆಗಬಹುದು. ಸರಬರಾಜು ವ್ಯವಸ್ಥೆಯ ದೌರ್ಬಲ್ಯ ಇದಕ್ಕೆ ಕಾರಣ ಅಲ್ಲ. ಆದರೆ, ಇದಕ್ಕೆ ಹಣ ಹೊಂದಿಸಬೇಕು. ಲಸಿಕೆ ಲಭ್ಯವಾಗಬೇಕು. ಅಗತ್ಯ ಸೌಕರ್ಯದ ವ್ಯವಸ್ಥೆಯಾಗಬೇಕು. ಜನರು ವ್ಯಾಕ್ಸಿನ್ ಹಾಕಿಸಿಕೊಳ್ಳಲು ಒಪ್ಪಿಕೊಳ್ಳಬೇಕು. ಹೀಗಾದಲ್ಲಿ 2-3 ವರ್ಷದಲ್ಲಿ ಶೇ. 80-90ರಷ್ಟು ಜನಸಂಖ್ಯೆಗೆ ಲಸಿಕೆ ಹಾಕಬಹುದು. ಎರಡು ಡೋಸ್​ಗಳ ಲಸಿಕೆ ಪೂರ್ಣಗೊಳ್ಳಲು 2024ರಷ್ಟಲ್ಲಿ ಸಾಧ್ಯವಾಗಬಹುದು” ಎಂದು ಪೂನಾವಾಲ ಹೇಳಿದ್ದಾರೆ.

ಇದನ್ನೂ ಓದಿ: Pfizer: ಕೊರೋನಾಗೆ ಫಿಜರ್​ ಶೇ 95ರಷ್ಟು ಪರಿಣಾಮಕಾರಿ ಲಸಿಕೆ; ತುರ್ತು ಅನುಮೋದನೆ ಪಡೆಯಲು ಸಿದ್ಧತೆ

ಇನ್ನು, ಈ ಲಸಿಕೆಯ ಬೆಲೆ ಬಗ್ಗೆ ಸುಳಿವು ನೀಡಿದ ಅವರು, ಒಂದು ಡೋಸ್​ಗೆ 5-6 ಡಾಲರ್ ದರ ಇರಲಿದೆ ಎಂದರು. ಅದರಂತೆ, ಎರಡು ಡೋಸ್​ಗಳಿಗೆ 1 ಸಾವಿರ ರೂಪಾಯಿಗಿಂತ ಕಡಿಮೆ ಇರಲಿದೆ. ಭಾರತ ಸರ್ಕಾರ ಅಧಿಕ ಪ್ರಮಾಣದಲ್ಲಿ ಲಸಿಕೆ ಕೊಳ್ಳುವುದರಿಂದ ಅದು ಒಂದು ಡೋಸ್​ಗೆ 3-4 ಡಾಲರ್ ಬೆಲೆಗೆ ಪಡೆಯಬಹುದು. ನಮ್ಮ ಕೋವಿಶೀಲ್ಡ್ ಲಸಿಕೆಯು ಬೇರೆ ವ್ಯಾಕ್ಸಿನ್​ಗಿಂತ ಅಗ್ಗವಾಗಿರಲಿದೆ ಎಂದು ಸೆರಮ್ ಇನ್ಸ್​ಟಿಟ್ಯೂಟ್ ಆಫ್ ಇಂಡಿಯಾದ ಸಿಇಒ ಭರವಸೆ ನೀಡಿದ್ದಾರೆ.

ಮಕ್ಕಳಿಗಿಂತ ಹಿರಿಯರಿಗೆ ಕೋವಿಡ್ ಅಪಾಯ ಇರುವುದರಿಂದ ಮೊದಲಿಗೆ ಹಿರಿಯ ನಾಗರಿಕರಿಗೆ ಲಸಿಕೆಯನ್ನ ಒದಗಿಸಲಾಗುವುದು. ಮಕ್ಕಳ ಮೇಲೆ ಇನ್ನೂ ಪ್ರಯೋಗಗಳಾಗಬೇಕಿರುವುದರಿಂದ ಹಾಗೂ ಕೋವಿಡ್​ನಿಂದ ಅವರಿಗೆ ಹೆಚ್ಚಿನ ಅನಾಹುತ ಆಗುವ ಸಾಧ್ಯತೆ ಇಲ್ಲದಿರುವುದರಿಂದ ಮಕ್ಕಳಿಗೆ ಲಸಿಕೆಯನ್ನು ತುಸು ತಡವಾಗಿ ನೀಡಿದರೂ ಅಡ್ಡಿ ಇಲ್ಲ ಎಂಬುದು ಈ ಸಂಸ್ಥೆಯ ಅಭಿಪ್ರಾಯ.