ನ್ಯೂಜಿಲೆಂಡ್​ನಲ್ಲಿ ಪತ್ತೆಯಾಯ್ತು ಒಂದೇ ಒಂದು ಡೆಲ್ಟಾ ಪ್ರಕರಣ; ದೇಶಾದ್ಯಾಂತ ಲಾಕ್​​ಡೌನ್ ಘೋಷಣೆ​​

ಕೋವಿಡ್​ 19 ಹರಡುವಿಕೆಯನ್ನು ತಪ್ಪಿಸಲು ಇರುವ ಏಕೈಕ ಮಾರ್ಗ ಆ ಸರಪಳಿಯನ್ನು ತುಂಡರಿಸುವುದು. ಇದೇ ಕಾರಣಕ್ಕೆ ಕರ್ಫ್ಯೂ, ಲಾಕ್​ ಡೌನ್​ ಅಂತಹ ಕಠಿಣ ಕ್ರಮಕ್ಕೆ ಪ್ರಪಂಚದ ನಾನಾ ದೇಶಗಳು ಮುಂದಾದವು. ಕಳೆದ ಒಂದೂವರೆ ವರ್ಷದಿಂದ ಪ್ರಪಂಚ ಬಹುತೇಕ ರಾಷ್ಟ್ರಗಳು ಇಂತಹ ಲಾಕ್ ​ಡೌನ್​ ನಿಯಮ ಜಾರಿ ತರುವ ಮೂಲಕ ಸೋಂಕು ನಿಯಂತ್ರಣಕ್ಕೆ ಮುಂದಾದವು. ಈಗ ಸೋಂಕಿನ ರೂಪಾಂತಾರ ತಳಿಗಳು ಆತಂಕ ಮೂಡಿಸಿದ್ದು, ಈಗಲೂ ಅಂತಹದ್ದೇ ನಿಯಮಕ್ಕೆ ಅನೇಕ ರಾಷ್ಟ್ರಗಳು ಮುಂದಾಗಿವೆ. ಅದರಲ್ಲೂ ನ್ಯೂಜಿಲೆಂಡ್​ನಲ್ಲಿ ಒಂದೇ ಒಂದು ಡೆಲ್ಟಾ ರೂಪಾಂತರ ಪ್ರಕರಣ ಪತ್ತೆಯಾಗಿದ್ದು, ಸಾಕಷ್ಟು ಆತಂಕ ಮೂಡಿಸಿದೆ. ಈ ಹಿನ್ನಲೆ ಇಡೀ ದೇಶಾದ್ಯಂತ ಲಾಕ್​ಡೌನ್​​ ಘೋಷಣೆ ಮಾಡಿ ಪ್ರಧಾನ ಮಂತ್ರಿ ಜಸಿಂಡಾ ಅರ್ಡೆರ್ನ್​ ಆದೇಶ ನೀಡಿದ್ದಾರೆ.

ಈ ಕುರಿತು ಇಂದು ಅಂದರೆ ಮಂಗಳವಾರ ಸುದ್ದಿಗೋಷ್ಠಿ ನಡೆಸಿರುವ ಅವರು, ಅಧಿಕಾರಿಗಳು ಹೇಳುವಂತೆ ಇದು ಸೋಂಕಿನ ಡೆಲ್ಟಾ ರೂಪಾಂತರವಾಗಿದೆ. ಆಕ್ಲೆಂಡ್​ನ 58 ವರ್ಷದ ವ್ಯಕ್ತಿಯಲ್ಲಿ ಈ ಸೋಂಕು ಪತ್ತೆಯಾಗಿದೆ. ಲಸಿಕೆ ಪಡೆಯದ ಈತ ದೇಶದ ಉದ್ದ ಅಗಲಕ್ಕೂ ಪ್ರಯಾಣಿಸಿದ್ದಾನೆ ಎಂದು ಆರೋಗ್ಯ ನಿರ್ದೇಶಕ ಆಶ್ಲೇ ಬ್ಲೂಮ್​ಫೀಲ್ಡ್​ ತಿಳಿಸಿದ್ದಾರೆ.

ಈ ಹಿನ್ನಲೆ ಮುಂದಿನ ಮೂರು ದಿನಗಳ ಕಾಲ ನ್ಯೂಜಿಲೆಂಡ್​ನಲ್ಲಿ ಕಟ್ಟು ನಿಟ್ಟಿನ ಲಾಕ್​ಡೌನ್​ ಘೋಷಣೆ ಮಾಡಲಾಗಿದೆ. ನ್ಯೂಜಿಲೆಂಡ್​ ಸ್ಥಳೀಯ ಕಾಲಮಾನದಂತೆ ರಾತ್ರಿ 11. 59ರಿಂದ ಲಾಕ್​ಡೌನ್​ ಜಾರಿಯಾಗಲಿದೆ. ಈ ನಾಲ್ಕನೇ ಹಂತದ ಲಾಕ್​ಡೌನ್​ ವೇಳೆ ದೇಶದ ಪ್ರತಿಯೊಬ್ಬರು ಮನೆಯಲ್ಲೇ ಇರಬೇಕು. ಅಗತ್ಯ ವಸ್ತುಗಳ ಸೇವೆ ಮತ್ತು ಮೆಡಿಕಲ್​, ಸೂಪರ್​ ಮಾರ್ಕೆಟ್​ ಹೊರತು ಪಡಿಸಿ ಎಲ್ಲಾ ವ್ಯಾಪಾರ, ಉದ್ಯಮಗಳನ್ನು ಮುಚ್ಚಬೇಕು ಎಂದು ತಿಳಿಸಲಾಗಿದೆ.

ಇದನ್ನು ಓದಿ: ಅಪ್ರಾಪ್ತ ಬಾಲಕಿ ಮನವಿ ಪುರಸ್ಕರಿಸಿದ ಕೇರಳ ಹೈ ಕೋರ್ಟ್​; ತಂದೆಯೊಂದಿಗೆ ಅಯ್ಯಪ್ಪನ ದರ್ಶನಕ್ಕೆ ಅನುಮತಿ

ಡೆಲ್ಟಾ ರೂಪಾಂತರ ಹೊಂದಿರುವ ವಿಶ್ವದ ಕೊನೆಯ ದೇಶಗಳಲ್ಲಿ ನಾವು ಒಂದಾಗಿದ್ದೇವೆ. ಡೆಲ್ಟಾ ಯಾವುದೇ ರೀತಿಯಲ್ಲೂ ಪರಿಸ್ಥಿತಿ ಬದಲಾವಣೆ ಮಾಡಬಹುದು . ಈ ಹಿನ್ನಲೆ ನಾವು ಮತ್ತಷ್ಟು ಕಠಿಣ ಕ್ರಮಕ್ಕೆ ಮುಂದಾಗಿ, ಸೋಂಕು ತಡೆಯಬೇಕಿದೆ. ಇದನ್ನು ತಡೆಯಲು ವಿಫಲವಾದರೆ ಈಗಾಗಲೇ ಏನಾಗಿದೆ ಎಂಬುದನ್ನು ನಾವು ನೋಡಿದ್ದೇವೆ. ಈ ಹಿನ್ನಲೆ ಈ ಕ್ರಮ ಅವಶ್ಯವಾಗಿದೆ ಎಂದಿದ್ದಾರೆ.

ನ್ಯೂಜಿಲೆಂಡ್​ನಲ್ಲಿ ಲಸಿಕೆ ಪ್ರಕ್ರಿಯೆ ಕೂಡ ನಿಧಾನವಾಗಿ ನಡೆಯುತ್ತಿದ್ದು, ದೇಶದ ಶೇ 20 ರಷ್ಟು ಜನರು ಮಾತ್ರ ಸಂಪೂರ್ಣವಾಗಿ ಲಸಿಕೆ ಪಡೆದಿದ್ದಾರೆ. ಕಳೆದ ತಿಂಗಳ ಆರಂಭದಲ್ಲಿ ಕಡಿಮೆ ಸೋಂಕು ಪ್ರಕರಣ ಹೊಂದಿರುವ ದೇಶದಲ್ಲಿನ ಸಂಪೂರ್ಣ ಲಸಿಕೆ ಪಡೆದವರಿಗೆ ನ್ಯೂಜಿಲೆಂಡ್​ ಪ್ರವೇಶಕ್ಕೆ ಅನುಮತಿ ನೀಡಲಾಗಿತ್ತು.

ಕಳೆದ ವರ್ಷ ಕೂಡ ಅನೇಕ ಸರಣಿ ಲಾಕ್​ಡೌನ್​ ಘೋಷಣೆ ಮಾಡುವ ಮೂಲಕ ನ್ಯೂಜಿಲೆಂಡ್​ ಸೋಂಕಿನ ವಿರುದ್ಧ ಹೋರಾಡಿತ್ತು. ಕಳೆದ ವರ್ಷ ಸೋಂಕು ತಡೆಯುವಲ್ಲಿ ನ್ಯೂಜಿಲೆಂಡ್​ ತೆಗೆದುಕೊಂಡ ಕ್ರಮಕ್ಕೆ ಜಗತ್ತಿನಾದ್ಯಂತ ಮೆಚ್ಚುಗೆ ವ್ಯಕ್ತವಾಗಿತ್ತು. ಗಡಿ ಪ್ರದೇಶಗಳನ್ನು ಸಂಪೂರ್ಣ ಬಂದ್​ ಮಾಡಿ ಪ್ರಯಾಣಿಕರನ್ನು ಕ್ವಾರಂಟೈನ್​​ಗೆ ಒಳಪಡಿಸುವ ಮೂಲಕ ಸೋಂಕು ತಡೆಗೆ ಬಿಗಿ ಕ್ರಮ ನಡೆಸಲಾಗಿತ್ತು.

ನ್ಯೂಸ್​​​18 ಕನ್ನಡ ಕಳಕಳಿ: ಕೊರೋನಾ ಪಾಸಿಟಿವ್​ ಕೇಸ್​ಗಳ ಸಂಖ್ಯೆ ರಾಜ್ಯದಲ್ಲಿ ತಗ್ಗಿದೆಯಾದರೂ ಸೋಂಕಿನ ಅಪಾಯದಿಂದ ಸಂಪೂರ್ಣವಾಗಿ ಇನ್ನೂ ಯಾರೂ ಸುರಕ್ಷಿತರಲ್ಲ. ಹೀಗಾಗಿ ಪ್ರತಿಯೊಬ್ಬರು ಕೋವಿಡ್​​ ನಿಯಮಗಳಾದ ಮಾಸ್ಕ್​​ ಧರಿಸುವುದು, ಸಾಮಾಜಿಕ ಅಂತರ ಕಾಯ್ದುಕೊಳ್ಳುವುದನ್ನು ಮರೆಯಬಾರದು. ಆದಷ್ಟು ಶೀಘ್ರವೇ ಲಸಿಕೆ ಪಡೆದು ಸೋಂಕಿನ ವಿರುದ್ಧದ ಯುದ್ಧದಲ್ಲಿ ಪ್ರತಿಯೊಬ್ಬರು ಕೈ ಜೋಡಿಸಬೇಕು. ನಾವು ಸುರಕ್ಷಿತವಾಗಿ ಇದ್ದು, ನಮ್ಮಿಂದ ಇತರರಿಗೆ ಸೋಂಕು ಹಬ್ಬದಂತೆ ಜವಾಬ್ದಾರಿಯುತವಾಗಿ ನಡೆದುಕೊಳ್ಳಬೇಕು.