ರಾಜ್ಯದಲ್ಲಿ ಸಾರ್ವಕಾಲಿಕ‌ ದಾಖಲೆ ಬರೆದ‌ ಕೊರೋನಾ; ಒಂದೇ ದಿನ 50 ಸಾವಿರ ಸನಿಹ ಪಾಸಿಟಿವ್​ ಕೇಸ್​ಗಳು!

ಬೆಂಗಳೂರು: ರಾಜ್ಯದಲ್ಲಿ ಕೊರೋನಾ ಅಬ್ಬರಿಸುತ್ತಿದ್ದು, ಸರ್ವಕಾಲಿಕ ದಾಖಲೆ ಬರೆದಿದೆ. ಒಂದೇ ದಿನ ಬರೋಬ್ಬರಿ 50 ಸಾವಿರ ಸಮೀಪ ಪಾಸಿಟಿವ್​ ಕೇಸ್​ಗಳ ಸಂಖ್ಯೆ ತಲುಪಿದೆ. ಇಂದು ಒಂದೇ ದಿನ ರಾಜ್ಯಾದ್ಯಂತ 48,296 ಮಂದಿ ಸೋಂಕಿಗೆ ತುತ್ತಾಗಿದ್ದಾರೆ. ಅರ್ಧ ಲಕ್ಷದಷ್ಟು ಜನರ ಕೋವಿಡ್ ರಿಪೋರ್ಟ್​ ಪಾಸಿಟಿವ್​ ಬಂದಿದ್ದು, ಜನ ಬೆಚ್ಚಿ ಬಿದ್ದಿದ್ದಾರೆ. ರಾಜ್ಯದಲ್ಲಿ ಕೊರೋನಾ ಕೇಸ್​ಗಳ ಸಂಖ್ಯೆ 15,23,142ಕ್ಕೆ ಏರಿಕೆ ಆಗಿದೆ. ಇನ್ನು ಇಂದು ಒಂದೇ ದಿನ ಕೊರೋನಾದಿಂದ ರಾಜ್ಯಾದ್ಯಂತ 217 ಮಂದಿ ಮೃತಪಟ್ಟಿದ್ದಾರೆ. ಆಮೂಲಕ ರಾಜ್ಯದಲ್ಲಿ ಕೊರೋನಾ ಸಾವಿನ ಸಂಖ್ಯೆ 15,523ಕ್ಕೆ ಏರಿಕೆಯಾಗಿದೆ. 

ರಾಜ್ಯ ರಾಜಧಾನಿ ಬೆಂಗಳೂರಿನಲ್ಲೂ ಸೋಂಕು ಸರ್ವವ್ಯಾಪಿಯಾಗಿದ್ದು, ಒಂದೇ ದಿನ 26,756 ಪಾಸಿಟಿವ್​ ಪ್ರಕರಣಗಳು ದಾಖಲಾಗಿವೆ. ಇಂದು ಬೆಂಗಳೂರಿನಲ್ಲಿ 93 ಮಂದಿ ಸೋಂಕಿನಿಂದ ಸಾವನ್ನಪ್ಪಿದ್ದಾರೆ. ರಾಜ್ಯಾದ್ಯಂತ 14,884 ಮಂದಿ ಗುಣಮುಖರಾಗಿದ್ದಾರೆ. ಲಾಕ್​ಡೌನ್​ ಹೇರಿಕೆಯ ಆಚೆಗೂ ರಾಜ್ಯದಲ್ಲಿ ಸೋಂಕು ನಿಯಂತ್ರಣಕ್ಕೆ ಬರುತ್ತಿಲ್ಲ.

ಹಾಸನದಲ್ಲಿ ಇಂದು ಒಂದೇ ದಿನ ಕೊರೋನಾಗೆ 19 ಮಂದಿ ಬಲಿಯಾಗಿದ್ದಾರೆ. ಮೈಸೂರಲ್ಲಿ 13 ಮಂದಿ, ಬಳ್ಳಾರಿಯಲ್ಲಿ 11 ಮಂದಿ ಮೃಪಟ್ಟಿದ್ದಾರೆ. ಬೀದರ್​, ಕಲಬುರಗಿ, ಶಿವಮೊಗ್ಗ, ತುಮಕೂರಲ್ಲಿ ತಲಾ 6 ಮಂದಿ ಸಾವನ್ನಪ್ಪಿದ್ದಾರೆ. ಕೊಡಗು, ರಾಮನಗರ, ಉತ್ತರ ಕನ್ನಡದಲ್ಲಿ ತಲಾ ಐವರು ಸೋಂಕಿನಿಂದ ಸಾವಿನ ಮನೆ ಸೇರಿದ್ದಾರೆ. ಬಾಗಲಕೋಟೆ, ವಿಜಯಪುರ, ಕೋಲಾರದಲ್ಲಿ ತಲಾ ಮೂವರು ಕೊರೋನಾಗೆ ಬಲಿಯಾಗಿದ್ದಾರೆ.

ಇನ್ನು ಬೆಂಗಳೂರು ನಂತರದ ಸ್ಥಾನದಲ್ಲಿ ಮೈಸೂರ ಜಿಲ್ಲೆಯಿದ್ದು, 3500 ಪಾಸಿಟಿವ್​ ಕೇಸ್​ಗಳು ದಾಖಲಾಗಿವೆ.  ತುಮಕೂರಲ್ಲಿ 1,801 , ಬಳ್ಳಾರಿಯಲ್ಲಿ 1,282 , ಕಲಬುರಗಿಯಲ್ಲಿ 1,256 ,  ದಕ್ಷಿಣ ಕನ್ನಡದಲ್ಲಿ  1,205 ಪಾಸಿಟಿವ್​ ಕೇಸ್​ಗಳು ವರದಿಯಾಗಿದೆ.