Nanjangud: ನಂಜನಗೂಡಿನಲ್ಲಿ ವಿಚಿತ್ರ ಸನ್ನಿವೇಶ; ಹಿರಿಯ ಅಧಿಕಾರಿಗಳಿಂದಲೇ ಬೀದಿ ಬೀದಿಯಲ್ಲಿ ತರಕಾರಿ ಮಾರಾಟ

ಮೈಸೂರು(ಏ. 11): ಕೊರೊನಾ ಹಾಟ್​​ಸ್ಪಾಟ್ ಆಗಿರುವ ನಂಜನಗೂಡಿನಲ್ಲಿ ಒಂದು ರೀತಿಯಲ್ಲಿ ಭಯಗ್ರಸ್ತ ವಾತಾವರಣ ನೆಲಸಿದೆ. ಈ ಊರಿಗೆ ಕಾಲಿಡಲು ಜನರು ಹೆದರುತ್ತಿದ್ದಾರೆ. ಎಂಥದ್ದೇ ಪ್ರದೇಶವಿದ್ದರೂ ತರಕಾರಿ ತಳ್ಳುಗಾಡಿಗಳಾದರೂ ಹೋಗುತ್ತವೆ. ಆದರೆ, ನಂಜನಗೂಡಿನಲ್ಲಿ ಅದಕ್ಕೂ ಜನರು ಹೆದರುತ್ತಿದ್ಧಾರೆ. ಅನೇಕ ಕೊರೋನಾ ಸೋಂಕಿತರು ಮತ್ತು ಶಂಕಿತರು ನಂಜನಗೂಡಿನ ವಿವಿಧ ಬಡಾವಣೆಗಳಲ್ಲಿ ಹೋಮ್ ಕ್ವಾರಂಟೈನ್​ನಲ್ಲಿರುವುದೇ ಇದಕ್ಕೆ ಕಾರಣ.

ಹೋಮ್ ಕ್ವಾರಂಟೈನ್​ನಲ್ಲಿರುವವರು ಮನೆಯಿಂದ ಹೊರಗೆ ಕಾಲಿಡಬಾರದು. ಅವರಿಗೆ ಬೇಕಾದ ಅಗತ್ಯ ವಸ್ತುಗಳನ್ನು ಪೂರೈಸುವ ವ್ಯವಸ್ಥೆ ಮಾಡಲಾಗಿದೆ. ಹೋಮ್ ಕ್ವಾರಂಟೈನ್​ನಲ್ಲಿರುವವರಿಗೆ ಹಣ್ಣು, ತರಕಾರಿಗಳನ್ನ ಪೂರೈಸಬೇಕೆಂದು ಹಾಪ್ ಕಾಮ್ಸ್​ಗೆ ಸೂಚನೆ ನೀಡಲಾಗಿದೆ. ತೋಟಗಾರಿಕೆ ಇಲಾಖೆ, ಜಿಲ್ಲಾಧಿಕಾರಿಗಳೇ ಮನವಿ ಮಾಡಿದ್ಧಾರೆ. ಆದರೂ ಹಣ್ಣ ತರಕಾರಿ ಮಾರಲು ಹಾಪ್​ಕಾಮ್ಸ್ ಸಿಬ್ಬಂದಿ ಯಾರೂ ಮುಂದೆ ಬರುತ್ತಿಲ್ಲ. ಹೋಮ್ ಕ್ವಾರಂಟೈನ್​ನಲ್ಲಿರುವವರ ಬೀದಿಗಳಿಗೆ ಕಾಲಿಡಲೇ ಹೆದರುತ್ತಿದ್ದಾರೆ.

ಇದನ್ನೂ ಓದಿ: ಕೊರೋನಾ ಪತ್ತೆಯಾಗದ ಜಿಲ್ಲೆಗಳಲ್ಲಿ ಲಾಕ್​​ಡೌನ್ ಸಡಿಲಿಕೆಗೆ ಚಿಂತನೆ ; ಡಿಸಿಎಂ ಗೋವಿಂದ ಕಾರಜೋಳ

ಈ ಕಾರಣದಿಂದ ತೋಟಗಾರಿಕೆ ಇಲಾಖೆಯ ಅಧಿಕಾರಿಗಳೇ ಅನಿವಾರ್ಯವಾಗಿ ಹಣ್ಣ ತರಕಾರಿ ಮಾರಾಟಕ್ಕೆ ನಿಂತಿದ್ದಾರೆ. ತೋಟಗಾರಿಕೆ ಇಲಾಖೆ ಹಿರಿಯ ಸಹಾಯಕ ನಿರ್ದೇಶಕ ಗುರುಸ್ವಾಮಿ ಸೇರಿದಂತೆ 8 ಅಧಿಕಾರಿಗಳು ಈ ಕಾಯಕದಲ್ಲಿ ಸ್ವತಃ ತೊಡಗಿಸಿಕೊಳ್ಳುವಂತಾಗಿದೆ. ಆಟೋಗಳಲ್ಲಿ ತೆರಳಿ ಇವರು ಮಾರಾಟ ಮಾಡುತ್ತಿದ್ದಾರೆ.

ನಂಜನಗೂಡಿನ ಜುಬಿಲೆಂಟ್ ಫ್ಯಾಕ್ಟರಿಯಲ್ಲಿ ಕೊರೋನಾ ಸೋಂಕು ಕಾಣಿಸಿಕೊಂಡು, ಅದೀಗ ಅಲ್ಲಿಯ ಅನೇಕ ಉದ್ಯೋಗಿಗಳಲ್ಲಿ ಹರಡಿರುವ ಶಂಕೆ ಇದೆ. ಹಲವರನ್ನು ಆಸ್ಪತ್ರೆಗೆ ದಾಖಲಿಸಲಾಗಿದೆ. ಇನ್ನೂ ಹಲವರು ಹೋಮ್ ಕ್ವಾರಂಟೈನ್​ನಲ್ಲಿದ್ದಾರೆ.