ಕೋವಿಡ್-19 ವೈರಸ್ ಪ್ರತಿದಿನದ ಪರಾಮರ್ಶೆಗೆ ತಜ್ಞರ ಸಮಿತಿ ನೇಮಿಸಿದ ರಾಜ್ಯ ಸರ್ಕಾರ

ಬೆಂಗಳೂರು: ಕೊರೋನಾ ವೈರಸ್ ನಿಯಂತ್ರಣಕ್ಕಾಗಿ ಸರ್ಕಾರ ಹರಸಾಹಸ ಪಡುತ್ತಿದ್ದು, ಪ್ರತಿನಿತ್ಯ ಸಭೆ ಮೇಲೆ ಸಭೆ ನಡೆಸಿ, ಹಲವು ಕಟ್ಟುನಿಟ್ಟಿನ ಕ್ರಮಗಳನ್ನು ಕೈಗೊಳ್ಳುತ್ತಿದೆ. ಇದೀಗ ಕೋವಿಡ್-19 ವೈರಸ್ ಸಂಬಂಧಿಸಿದಂತೆ ಪ್ರತಿನಿತ್ಯ ಪರಾಮರ್ಶೆ ನಡೆಸಲು ರಾಜ್ಯ ಸರ್ಕಾರ ಸಮಿತಿಯೊಂದನ್ನು ನೇಮಿಸಿದೆ.

ಸಾರ್ವಜನಿಕ ಆರೋಗ್ಯ ತಜ್ಞರಾದ ಡಾ.ಎಂ.ಕೆ.ಸುದರ್ಶನ್​ ಅವರನ್ನು ಈ ಸಮಿತಿ ಅಧ್ಯಕ್ಷರನ್ನಾಗಿ ನೇಮಿಸಲಾಗಿದೆ. ಹಾಗೆಯೇ, ಸಾಂಕ್ರಾಮಿಕ ರೋಗಶಾಸ್ತ್ರಜ್ಞರಾದ ಡಾ.ಗಿರಿಧರ್ ಬಾಬು, ಡಾ.ಪ್ರದೀಪ್, ಡಾ. ಗುರುರಾಜ್, ನಿಮ್ಹಾನ್ಸ್​ನ ವೈರಾಣು ತಜ್ಞರಾದ ಡಾ.ವಿ.ರವಿ ಮತ್ತು ಡಾ.ಅನಿತಾ, ಬಿಎಂಸಿಆರ್​ಐನ ಎಚ್​ಒಡಿ ಡಾ.ಕೆ.ರವಿ ಹಾಗೂ ಬಿಎಂಸಿಆರ್​ಐನ ಶ್ವಾಸಕೋಶ ತಜ್ಞರಾದ ಡಾ.ಶಶಿ ಭೂಷಣ್ ಅವರನ್ನು ಸಮಿತಿ ಸದಸ್ಯರನ್ನಾಗಿ ನೇಮಿಸಲಾಗಿದೆ. ಮತ್ತು ಸಿಎಂಡಿಯ ಜಂಟಿ ನಿರ್ದೇಶಕರಾದ ಡಾ.ಪ್ರಕಾಶ್ ಅವರನ್ನು ಕಾರ್ಯದರ್ಶಿ ಸದಸ್ಯರನ್ನಾಗಿ ರಾಜ್ಯ ಸರ್ಕಾರ ನೇಮಿಸಿದೆ.



ಇದನ್ನು ಓದಿ: ಸ್ಮಾರ್ಟ್​​​ ಲಾಕ್​​ಡೌನ್​​​ ಜಾರಿ ಸಂಬಂಧ ಸಿಎಂ ಯಡಿಯೂರಪ್ಪ ನೇತೃತ್ವದಲ್ಲಿ ಸಭೆ: ಹೀಗಿವೆ ರಾಜ್ಯ ಸರ್ಕಾರ ಕೈಗೊಂಡ ತೀರ್ಮಾನಗಳು

ಈ ಸಮಿತಿಯೂ ಪ್ರತಿದಿನ ರಾಜ್ಯದಲ್ಲಿನ ಕೊರೋನಾ ವೈರಸ್​ ಸ್ಥಿತಿಗತಿ ಬಗ್ಗೆ ಪ್ರತಿದಿನ ಪರಾಮರ್ಶೆ ನಡೆಸಲಿದೆ. ಮತ್ತು ಸರ್ಕಾರ ಕೈಗೊಳ್ಳಬಹುದಾದ ಕ್ರಮಗಳ ಬಗ್ಗೆ ಸಲಹೆ ಸೂಚನೆಗಳನ್ನು ನೀಡಲಿದೆ.