ಲಾಕ್​ಡೌನ್ ನಡುವೆಯೂ ದಾಖಲೆ ಪ್ರಮಾಣದ ರಸಗೊಬ್ಬರ ಮಾರಾಟ; ಉತ್ತಮ ಮುಂಗಾರು ಬಿತ್ತನೆಯ ಸೂಚನೆ

ನವದೆಹಲಿ: ಕೊರೋನಾ ಸೋಂಕು ಹರಡುವುದನ್ನು ತಡೆಯಲು ಜಾರಿಗೊಳಿಸಿರುವ ಲಾಕ್​ಡೌನ್ ಅಡಚಣೆ ಮಧ್ಯೆಯೂ ರಸಗೊಬ್ಬರ ಇಲಾಖೆಯು ಏಪ್ರಿಲ್ 22ರವರೆಗಿನ ಅವಧಿಯಲ್ಲಿ ದಾಖಲೆ ಪ್ರಮಾಣದಲ್ಲಿ ರಸಗೊಬ್ಬರ ಮಾರಾಟ ಆಗುವಂತೆ ನೋಡಿಕೊಂಡಿದೆ ಎಂದು ಕೇಂದ್ರ ರಸಗೊಬ್ಬರ ಸಚಿವ ಡಿ.ವಿ.ಸದಾನಂದಗೌಡ ಅವರು ತಿಳಿಸಿದ್ದಾರೆ.

ಈ ಅವಧಿಯಲ್ಲಿ ಡೀಲರುಗಳು 15.77 ಲಕ್ಷ ಟನ್ ರಸಗೊಬ್ಬರ ಆವಕ ಮಾಡಿಕೊಂಡಿದ್ದಾರೆ. ಇದು ಕಳೆದ ವರ್ಷಕ್ಕೆ ಹೋಲಿಸಿದರೆ ಶೇಕಡಾ 46ರಷ್ಟು ಹೆಚ್ಚಾಗಿದೆ. ಕಳೆದ ವರ್ಷ ಇದೇ ಅವಧಿಯಲ್ಲಿ ಡೀಲರುಗಳು 10.79 ಲಕ್ಷ ಟನ್ ರಸಗೊಬ್ಬರ ಖರೀದಿಸಿದ್ದರು. ಹಾಗೆಯೇ, ರೈತರು ಇದೇ ಅವಧಿಯಲ್ಲಿ 10.63 ಲಕ್ಷ ಟನ್ ರಸಗೊಬ್ಬರ ಖರೀದಿಸಿದ್ದಾರೆ. ಇದು ಕಳೆದ ವರ್ಷದ ಈ ಅವಧಿಯ ಖರೀದಿಗೆ ಹೋಲಿಸಿದರೆ ಶೇಕಡಾ 32ರಷ್ಟು ಜಾಸ್ತಿ. ರೈತರು ಕಳೆದ ವರ್ಷದ ಈ ಅವಧಿಯಲ್ಲಿ 8.02 ಲಕ್ಷ ಟನ್ ರಸಗೊಬ್ಬರ ಖರೀದಿಸಿದ್ದರು ಎಂದು ಸಚಿವ ಸದಾನಂದಗೌಡ ಅವರು ತಮ್ಮ ಫೇಸ್​ಬುಕ್ ಪುಟದಲ್ಲಿ ಬರೆದುಕೊಂಡಿದ್ದಾರೆ.