Coronavirus Updates: ಭಾರತದಲ್ಲಿ ಎರಡು ತಿಂಗಳಲ್ಲೇ ಇಂದು ಅತ್ಯಂತ ಕಡಿಮೆ ಕೊರೋನಾ ಕೇಸುಗಳು ಪತ್ತೆ

ನವದೆಹಲಿ, ಜೂ. 5: ಮೊದಲ ಅಲೆಗಿಂತಲೂ ತೀವ್ರವಾಗಿ ದೇಶವನ್ನು ಕಾಡಿ ಕಂಗೆಡಿಸಿದ್ದ, ಎಲ್ಲರನ್ನೂ ಒಂದಲ್ಲಾ ಒಂದು ರೀತಿಯಲ್ಲಿ ಕತ್ತಲಿಗ ನೂಕಿದ್ದ, ಕರಾಳವಾಗಿ ಪರಿಣಮಿಸಿದ್ದ ಪರಿಸ್ಥಿತಿ ಸುಧಾರಣೆಯ ಕಡೆಗೆ ಸಾಗಿದೆ. ಕಳೆದ ಒಂಭತ್ತು ದಿನಗಳಿಂದ ನಿರಂತರವಾಗಿ ದೇಶದಲ್ಲಿ ಕೊರೋನಾ ಸೋಂಕು ಪೀಡಿತರಾಗುವವರ ಸಂಖ್ಯೆ ಎರಡು ಲಕ್ಷಕ್ಕಿಂತ ಕಡಿಮೆ ಆಗಿವೆ. ಕೊರೋನಾದಿಂದ ಸಾಯುವವರ ಸಂಖ್ಯೆ ಇಳಿಮುಖವಾಗಿದೆ. ಇನ್ನೊಂದೆಡೆ ಕೊರೋನಾದಿಂದ ಚೇತರಿಸಿಕೊಳ್ಳುತ್ತಿರುವವರ ಸಂಖ್ಯೆ ಚಿಗರುತ್ತಲೇ ಇದೆ. ಇದರಿಂದಾಗಿ ಕೊರೋನಾ ಎರಡನೇ ಅಲೆ ನಿಧಾನಕ್ಕೆ ಕೊನೆಯಾಗಬಹುದು ಎಂಬ ಲಕ್ಷಣಗಳು ಗೋಚರಿಸತೊಡಗಿವೆ. ಎರಡು ತಿಂಗಳಲ್ಲೇ ನಿನ್ನೆ (ಜೂನ್ 4ರಂದು) ಅತ್ಯಂತ ಕಡಿಮೆ ಕೊರೋನಾ ಕೇಸುಗಳು ಪತ್ತೆ ಆಗಿವೆ. ನಿನ್ನೆಯ ಕೊರೋನಾ ಸೋಂಕು, ಸಾವು, ಗುಣ ಆದವರ ಮುಖ್ಯ ಅಂಕಿ ಅಂಶಗಳು ಈ ಕೆಳಕಂಡಂತಿವೆ.

* ದೇಶದಲ್ಲಿ ನಿನ್ನೆ 1,20,529 ಪ್ರಕರಣಗಳು ಪತ್ತೆ ಆಗಿವೆ. ಇದರಿಂದ ದೇಶದ ಕೊರೋನಾ ಸೋಂಕಿತರ ಸಂಖ್ಯೆ 2,86,94,879ಕ್ಕೆ ಏರಿಕೆ ಆಗಿದೆ.
* ನಿನ್ನೆ ಕೊರೋನಾದಿಂದ 3,380 ಜನರ ಸಾವನ್ನಪ್ಪಿದ್ದಾರೆ.‌ ಈವರೆಗೆ ಕೊರೋನಾ ಮಹಾಮಾರಿಗೆ ಬಲಿ ಆದವರು 3,44,082 ಜನ.
* ಕಳೆದ 24ಗಂಟೆಯಲ್ಲಿ ಗುಣ ಆದವರು 1,97,894 ಜನ. ಇದರಿಂದ ಈವರೆಗೆ ಕೊರೋನಾದಿಂದ 2,67,95,549 ಜನ ಗುಣ ಆದಂತಾಗಿದೆ.
* ದೇಶದಲ್ಲಿ ಇನ್ನು ಸಕ್ರೀಯವಾಗಿರುವ ಕೇಸುಗಳು 15,55,248. ಇದರಿಂದ ಕೊರೋನಾ ಸೋಂಕು ಪೀಡಿತರ ಸಂಖ್ಯೆ ಇಳಿಮುಖವಾಗಿ ಸಾಗುತ್ತಿರುವ ಟ್ರೆಂಡ್  ಸಾಬೀತಾಗಿದೆ.
* ಚೇತರಿಕೆಗಳು ಸತತ 23ನೇ ದಿನವೂ ದೈನಂದಿನ ಹೊಸ ಪ್ರಕರಣಗಳನ್ನು ಮೀರಿಸಿದೆ. ಚೇತರಿಸಿಕೊಳ್ಳುತ್ತಿರುವವರ ಪ್ರಮಾಣ ಶೇಕಡಾ 93.08ಕ್ಕೆ ಹೆಚ್ಚಾಗಿದೆ.
* ಸಾಪ್ತಾಹಿಕ ಸಕಾರಾತ್ಮಕ ದರ ಪ್ರಸ್ತುತ ಶೇಕಡ 5.78ಕ್ಕೆ ಇಳಿದಿದೆ. ದೈನಂದಿನ ಸಕಾರಾತ್ಮಕತೆ ದರ ಶೇಕಡಾ 6.38ಕ್ಕೆ ಇಳಿದಿದೆ. ಸತತವಾಗಿ 12 ದಿನ ಶೇಕಡಾ 10ಕ್ಕಿಂತ ಕಡಿಮೆ ಆಗಿದೆ.
* ಕೊರೋನಾ ಪರೀಕ್ಷಾ ಸಾಮರ್ಥ್ಯ ಗಣನೀಯವಾಗಿ ಹೆಚ್ಚಾಗಿದೆ. ನಿನ್ನೆ 36.5 ಲಕ್ಷ ಜನರಿಗೆ ಲಸಿಕೆ ಹಾಕಲಾಗಿದ್ದು ಈವರೆಗ ದೇಶದಲ್ಲಿ ಒಟ್ಟು 22.79 ಕೋಟಿ ಡೋಸೇಜ್ ಅನ್ನು ರಾಷ್ಟ್ರವ್ಯಾಪಿ ವ್ಯಾಕ್ಸಿನೇಷನ್ ಡ್ರೈವ್ ಅಡಿಯಲ್ಲಿ ನೀಡಲಾಗಿದೆ.

ಮೇ ತಿಂಗಳ ಮಧ್ಯ ಭಾಗದಲ್ಲಿ ಕೊರೋನ ಎರಡನೇ ಅಲೆ ತಾರಕಕ್ಕೇ ಏರುತ್ತದೆ. ತಿಂಗಳ ಕೊನೆಯಲ್ಲಿ ಕಡಿಮೆ ಆಗುತ್ತದೆ ಎಂಬ ತಜ್ಞರು ಅಭಿಪ್ರಾಯ ಪಟ್ಟಿದ್ದರು. ಅದೇ ರೀತಿ ಮೇ 6ರಂದು 4,14,188 ಪ್ರಕರಣಗಳು ಕಂಡುಬಂದಿದ್ದು ದೇಶದಲ್ಲಿ ದಿನ ಒಂದರಲ್ಲಿ ದಾಖಲಾದ ಅತಿ ಹೆಚ್ಚು ಪ್ರಕರಣಗಳಾಗಿದ್ದವು. ನಂತರ ಕೆಳಮುಖವಾಗಿ ಸಾಗಿ ಮೇ 16ರಂದು ಮೊದಲ ಬಾರಿಗೆ ಮೂರು ಲಕ್ಷಕ್ಕೂ ಕಡಿಮೆ ಪ್ರಕರಣಗಳು (2,81,386) ಕಂಡು ಬಂದಿದ್ದವು. ಮೇ 24ರಂದು ಮೊದಲ ಬಾರಿಗೆ ಎರಡು ಲಕ್ಷಕ್ಕಿಂತ ಕಡಿಮೆ (1,96,427) ಪ್ರಕರಣಗಳು ಪತ್ತೆ ಆಗಿದ್ದವು.